ئه‌ڤرۆ نيوز:
ئێڤاريا ئه‌ڤرۆ، نێچیرڤان بارزانی سه‌رۆك وه‌زيرێن هه‌رێمێ پێشوازيا شانده‌كێ ئه‌مريكى كر و چه‌ند پرس ل گه‌ل به‌حس كرن ژ وان ژى پێكئينانا كابينا نوويا حوكمه‌تا هه‌رێمێ.
هه‌روه‌سا به‌حسێ پێشهاتێن ئه‌منى و سياسى يێن ده‌ڤه‌رێ، ره‌وشا عيراقێ و پشته‌ڤانيا لايه‌نێن سياسى بۆ حوكمه‌تا عادل عه‌بدولمه‌هدى كرن.
ئه‌ڤرۆنيوز:
رێبه‌رێ ره‌وتێ سه‌درى وليستا سائيرون موقته‌دا سه‌در ئه‌ڤرۆ سێشه‌مبى 27/11/2018 د به‌رپه‌رێ خوه دا ل سه‌ر تۆرا جڤاكى يا تويته‌رى به‌لاڤكر” قه‌بوول ناكه‌م كه‌سێن نه سه‌ربخوه پۆستێن وه‌زاره‌تێن ناڤخوه وبه‌رگريێ وه‌ربگرن”.
گۆت ژى”هنده‌ك يێ بزاڤێ دكه‌ن كه‌سێن گه‌نده‌لكار پۆستان وه‌رگرن ونه مه‌رجه‌عيه‌تا شيعى ونه وه‌لاتى ڤێ چه‌ندێ قه‌بوول ناكه‌ن، نه ئه‌زم ئه‌گه‌رێ گيرۆبوونا پێكئينانا حوكمه‌تێ، به‌لكو ئه‌و ئه‌گه‌رن”.
موقته‌دا سه‌در داخواز ژ عادل عه‌بدولمه‌هدى سه‌رۆك وه‌زيرێن عيراقێ كر له‌زێ دپێكئينانا حوكمه‌تا خوه دا بكه‌ت ژبلى هه‌ردو وه‌زاره‌تێن (ناڤخوه وبه‌رگريێ) وڤه‌كرنا ده‌رگه‌هێ به‌ربژارتنێ بۆ وان هه‌ردو پۆستان ل به‌رده‌م فه‌رماندێن ئاخ ژ ده‌ستێ داعشێ ئازادكرى وبێ ده‌ستێوه‌ردانا چو ليست وحزبان وگۆت” جيرانێن مه ژى هه‌ڤالێن مه‌نه، نه‌كو مه‌زنێن مه‌نه”.
ئه‌ڤرۆنيوز:
رێڤه‌به‌ريا هه‌والگيريا له‌شكرى ل عيراقێ، ده‌سته‌سه‌ركرنا ژنه‌كا داعش ل كه‌مپا (ئه‌لجدعه) ل گه‌ياره ل پارێوگه‌ها نه‌ينه‌وا راگه‌هاند كو خوه تێكه‌لى ئاواران كربوو ودهێته نياسين ب (دايكا داعشان).
رێڤه‌به‌ريا هه‌والگيريا له‌شكرى ل عيراقێ د به‌ياننامه‌كێ دا ئاشكراكر” پشتى مه‌فره‌زێن مه ل فرقا 20 پێزانينێن تمام وه‌رگرتين، شيان (دايكا داعشان) ده‌سته‌سه‌ر بكه‌ن كو خوه خستبوو دناڤ ئاواران دا ل كه‌مپا (ئه‌لجدعه) ل گه‌ياره”.
دياركر ژى كو دايكا داعشان كارێ گه‌هاندنا كه‌لوپه‌لێن خوارنێ بوو بۆ ئه‌ندامێن داعشێ ل جه‌هێن وان ول دووڤ مادێ چارێ ژ قانوونا تيرۆرێ، ژلايێ دادگه‌هێ ڤه يا داواكرى بوو وفه‌رمانا ده‌سته‌سه‌ركرنا وێ ژى هه‌بوو.
ئه‌ڤرۆنيوز:
ژێده‌ره‌كێ له‌شكرى ئاشكرا دكه‌ت كو فه‌رماندێن وه‌زاره‌تا به‌رگريا عيراقێ پلانه‌ك پێشكێشى سه‌رۆك وه‌زيرێن عيراقێ وفه‌رماندێ گشتى يێ هيزێن چه‌كدار عادل عه‌بدولمه‌هدى كريه بۆ هێرشكرنێ ل سه‌ر پارێزگه‌ها دێرلزۆر يا سوورى بۆ رێگرتنێ ل هاتنا رێكخستيا داعش يا تيرۆرستى بۆ عيراقێ.
وى ژێده‌رى بۆ مالپه‌رێ (الغد برس) يێ عيراقى دياركريه كو هێزێن تايبه‌ت يێن عيراقى 25 خالێن له‌شكرێ سوورى يێن به‌رى كو ببونه خالێن هێزێن سووريا ديموكراتى هه‌ر ژ ده‌ڤه‌را هه‌جين تاكو دێرلزۆرى ل سه‌ر سنورێ عيراقێ – سووريێ.
ئاماژه كر كو هه‌بوونا شه‌ش ليوايێن هێزێن تايبه‌ت يێن عيراقى وله‌شكرێ عيراقى وزێره‌ڤانێن سنوورى وحه‌شدا شه‌عبى وحه‌شدا عه‌شائيرى وفه‌وجێن زريپۆشان ل سه‌ر هه‌موو سنوورێ عيراقێ وسووريێ، مه‌ره‌م ژێ رێگرتنه ل هاتنا چه‌كدارێن داعشێ بۆ ناڤ ئاخا عيراقێ.
گۆت ژى” فه‌رماندێن وه‌زاره‌تا به‌رگريا عيراقى پلانا هێرشكرنێ ل سه‌ر پاريزگه‌ها دێرلزۆر يا سوورى پێشكێشى عادل عه‌بدولمه‌هدى كريه بۆ رێگرتنێ ل هاتنا داعشێ بۆ ناڤ عيراقێ و هه‌كه وه‌زيرێ نوو يێ به‌رگريێ هاته ده‌ستنيشانكرن، دبيت عه‌بدولمه‌هدى ل سه‌ر پلانا وان فه‌رماندێن وه‌زاره‌تا به‌رگريێ رازى ببيت”.
ئه‌ڤرۆ نیوز، نه‌وزاد هلۆرى:
بو ئێكه‌مجار ل سنوورێ پارێزگه‌ها دهۆك، پێشانگه‌هه‌كا فروتنا مه‌حفیر و كومباران رابویه ب فروتنا كه‌لوپه‌لێن خوه ب شێوه‌یێ قستێن بێ زێده‌هى، ئانكو بهایێ فروتنا مه‌حفیرا ب پارێ كاش و ب قست وه‌كو ئێكه، ئه‌ڤ یه‌ك ژى بویه جهێ دلخوشیا هاولاتیان.
خودانێ پێشانگه‌هێ بو ئه‌ڤرۆ نیوز دیاركر كو قه‌یرانا دارایى و ره‌وشا ئابوورى یا هاوولاتیان ئه‌گه‌رێ سه‌ره‌كى بویه كو ئه‌و ڤێ یه‌كێ بكه‌ن و گۆت: (ب چوو شێوه‌یان بهایێ مه‌حفیر و كومباران نه‌هاتیه بلندكرن، به‌لكو ب هه‌مان بهایێ پێشانگه‌هێن دى و ئه‌رزانتر ژى ب شێوه‌یێ قست و بێ زێده‌هى هه‌موو پێدڤیێن ناڤمالێ یێن مه‌حفیر و كومباران دفروشینه وه‌لاتیان ب چوار قستان)
فروتنا كه‌لوپه‌لێن وێ پێشانگه‌هێ بویه جهێ دلخوشیا هاولاتیان، دخوازن كو هه‌موو پێشانگه و جهێن بازرگانى كه‌لوپه‌لێن خوه بكه‌ن ب قستێن بێ زێده‌هى داكو زیان ب وان ژى نه‌كه‌ڤن.
ئه‌ڤرۆ نیوز:
د راگه‌هاندنه‌كێ دا، راگه‌هاندنا وه‌زاره‌تا پێشمه‌رگه‌ى ل هژمارا خوه یا فه‌یسبوكێ به‌لاڤ كریه كو قوناغێن دروستكرنا نه‌خوشخانا پێشمه‌رگه‌ى پشكه‌كا زور ژ كارێن وێ ب دووماهى هاتینه.
پشتى بریارا وه‌زاره‌تا به‌ره‌ڤانیا ئه‌لمانیا ل سه‌ر هه‌ڤكاریكرنا هێزێن پێشمه‌رگه‌ى ژ ئالیێ ساخله‌میێ ڤه، ل سه‌ر داخوازا وه‌زاره‌تا پێشمه‌رگه‌ى، بریار هاته دان كو نه‌خوشخانه‌كا مودێرن بۆ چاره‌كرنا بریندار و نه‌خوشێن پێشمه‌رگه ل سه‌ر ئه‌ركێ وه‌زاره‌تا به‌ره‌ڤانیا ئه‌لمانیا بهێته دروسته دروستكرن.
ئه‌ڤرۆنيوز:
شاره‌زايه‌كێ سه‌قاى يێ ئوردنى پێشبينيێ دكه‌ت ل هه‌يڤا داهاتى (كانوونا ئێكێ) به‌فره‌كا زۆر ل هه‌رێما كوردستانێ بباريت.
خالد مه‌هداوى، شاره‌زايێ سه‌قاى يێ ئوردنى دبه‌رپه‌رێ خوه دا ل سه‌ر تۆرا فه‌يسبووكى به‌لاڤكر” ژبه‌ر هه‌بوونا نه جێگيربوونێ دسه‌قايێ جه‌مسه‌رى وئه‌تله‌سى دا، زڤستان زوو هاتيه وسه‌رما دێ ده‌ڤه‌را رۆژهه‌لاتا ناڤه‌راست ڤه‌گريت”.
ناڤبرى پێشبينيێ دكه‌ت كو ل دووماهيا ڤێ حه‌فتيێ پێله‌كا بارانێ يا ب هێز ده‌ڤه‌رين هه‌رێما كوردستانێ وسووريێ وباكوورێ مسرى ڤه‌گريت.
گۆت ژى” ل رۆژا پێنجشه‌مبى هه‌رێما كوردستانێ دێ كه‌ڤيته به‌ر پێله‌كا بارانێ وئاماژێن ب هێز ژى يێن هه‌ين كو ل هه‌يڤا داهاتى به‌فره‌كا زۆر ل هه‌رێما كوردستانێ بباريت”.
ژلايێ خوه‌ڤه ده‌سته‌يا كه‌شناسيێ ل عيراقێ پێشبينيێ دكه‌ت ل رۆژێن پێنجشه‌مبى وئه‌ينى وشه‌مبيێ پێله‌كا بارانێ چه‌ندين ده‌ڤه‌رين عيراقێ وهه‌رێما كوردستانێ ڤه‌گريت.
ئه‌ڤرۆنيوز:
پشتى دوهى دوشه‌مبى 26/11/2018 گۆڤارا ديرشبيگل يا ئه‌لمانى به‌لاڤكرى كو چه‌ندين پێشيلكارى ل گونسۆلخانا ئه‌لمانى ل هه‌ولێرێ هاتينه تۆماكرن وبه‌رامبه‌ر وه‌رگرتنا 12 هزار دۆلاران ڤيزه هاتيه فرۆشتن بۆ وه‌لاتيێن سوورى وتنێ ژ هه‌يڤا ته‌باخا 2017 هه‌تا كانوونا ئيكێ 2017 نێزيكى 25 حاله‌تێن ب ڤى شێوه‌ى هاتينه تۆماركرن، كونسۆلێ ئه‌لمانيا ل كوردستانێ رادگه‌هينيت كو ڤه‌كۆلين ل دۆر وێ چه‌ندێ يا ده‌ستپێكرى.
كونسۆلخانا ئه‌لمانيا ل هه‌رێما كوردستانێ ئه‌ڤرۆ سێشه‌مبى 27/11/2018 رۆهنكرنه‌ك به‌لاڤكر وتێدا هاتيه” دكارڤه‌دانه‌كا ب له‌ز دا ل سه‌ر وان ئاماژێن كو ل سالا 2017 هه‌بوون، كونسۆلخانا ئه‌لمانى ل هه‌ولێرێ چه‌ندين پێرابوون وه‌رگرتينه بۆ رێگريێ ل بكارئينانا مامه‌لێن نه‌قانوونى بۆ ڤيزا ئه‌لمانى”.
د وێ رۆهنكرنێ دا هاتيه ژى” پۆليسێن ئه‌لمانى ل دۆر ڤان پێزانينان يێن هاتينه ئاگه‌هداركرن، وه‌زاره‌تا ده‌رڤه يا ئه‌لمانى ژنێزيك ل گه‌ل ده‌زگه‌هين به‌رپرس كاردكه‌ت بۆ ئه‌نجامدانا ڤه‌كۆلينه‌كا هوور ل سه‌ر پرسا ڤيزا نه‌قانوونى”.
كونسۆلخانا ئه‌لمانى دياركريه ژى”ئه‌م چو جۆره نه‌رميه‌كێ ديارناكه‌ين ل ئاستێ گه‌نده‌ليێ وتاوانكاريێ ل نوونه‌راتيێن مه يێن ده‌رڤه، داواكارێ گشتى ل به‌رلين نوكه مژوولى دووڤچوونێ وڤه‌كۆلينێ يه ل دۆر پرسا فرۆشتنا ڤيزا ئه‌لمانيا ب شێوه‌كێ نه‌قانوونى
ئه‌ڤرۆ نیۆز، ئازاد نسری:
سه‌رۆك مه‌سعود بارزانی و شاندێ ل گه‌ل دا پشتی سه‌ره‌دانه‌كا چه‌ند رۆژی بۆ به‌غدا و وه‌لاتێن كه‌نداڤی و دیدار و چاڤپێكه‌فتن ل گه‌ل به‌رپرسێن پله بلندێن عیراق و ئیماراتا ئێكگرتیا عه‌ره‌بی و كوێت ئه‌نجامداین، ئه‌ڤرۆ 27/11/2018 ب رێیا فرۆكخانا نێڤده‌وله‌تی یا هه‌ولێرێ ڤه‌گه‌ڕیا هه‌رێما كوردستانێ.
ئەڤرۆ نيوز، ژیمان سەعید:
رێڤەبەرێ بەنکا خوینێ ئاشکەرا کر کو نھا رۆژانە ئەو پێدڤی نێزیکی 100 بتلێن خوینێ دبن و دا زانین کو دا پێرا بگەھن، خوینێ پۆلین دکەن و ل دووڤ پێدڤیاتیێ ددەنە نەخۆشان.
عادل عەبدلسەلام، رێڤەبەرێ بەنکا خوینێ بۆ ئەڤرۆ دیارکر کو رۆژانە نێزیکی 80 ھەتا 100 بتلێن خوینێ ددەینە نەخۆشان و پتر ژ 700 بتلان مە د ناڤ بەنکێ دا دمینن بۆ وان نەخۆشێن تەنگاڤ و گۆت: “رۆژانە پێدڤی ب 100 بتلێن خوینێ دبین و ژ وان 100 بتلان ژی 10%ێ دھێتە ھاڤێتن و ئەوێن دھێنە ھاڤێتن ژی ئەون یێن کو ب کێری ب کارئینانێ نەھێن.
رێڤەبەرێ بەنکا خوینێ ئەو ژی نەڤەشارت کو ھەر کەسێ بچیت خوینێ بدەت بەری کو خوین ژێ بھێتە کێشان ھندەک پشکنین بۆ دھێنە کرن دا کو پشت راست بن کو ئەوی کەسی چو نەخوشی لێ نینن و ھندەک جاران ژی د پشکنینان دا ھندەک نەخۆشی دەردکەڤن بۆ نموونە ئاریشە د کلیێن وی دا یێن ھەین یان د گەدێ دا یان ژی خوینا وان کێمترە ژ 13ێ ئەڤە ئەگەر زەلام بیت، نابیت خوین ژڤان بھێتە کێشان و بدەنە نەخۆشان.
عادل عەبدلسەلام ئاماژە ب وێ چەندێ ژی کر کو نھا ئەو خوینێ ھەموویێ نادەینە چ نەخۆشان، ئانکو خوینێ دکەنە پشک پشک دا کو نە ب تنێ نەخۆشەک مفایی ژ وی جورێ خوینێ ببینیت، بەلکو سێ ھەتا چار نەخۆشان دێ مفای ژ جورێن خوینێ بینن. “بۆ نموونە بۆ نەخۆشێن تەلاسیمیا ب تنێ پێدڤی ب خروکێن سور ھەنە خرۆکێن سور ب تنێ ددەینێ و ئەوێن پێدڤی ب ماددێ ئاسنی ھەین ب تنێ وی ماددەی ددەینێ و ئەوێ ب تنێ خوینا وی کێم بیت خوینێ ب تنێ ددەینێ”.
نيشاندان