ئه‌ڤرۆ نيوز:
ئەندامەکێ دەستەیا کارگێری یا پارتی دیموکراتی کوردستان- ئیران دیار دکەت کو ئەمریکا ب رەنگەکێ ئاشکرا نابێژیت کو دێ دەستھەلاتا ئیرانێ گوھۆڕین و نەشێت ژی ب رەنگەکێ ئاشکرا ڤێ یەکێ بێژیت چونکو قانوونێن نێڤدەولەتی رێ نادەت، لێ ڤێجارێ ئەمریکا ب رەنگەکێ جدی کار بۆ گوھۆڕینا سیستەمێ سیاسی یێ ئیرانێ دکەت.
کەریم پەرویزی ئەندامێ دەستەیا کارگێری یا پارتی دیموکراتی کوردستان- ئیران د دیدارەکا تایبەت دا ل گەل رۆژناما ئەڤرۆ دیار کر کو سەپاندنا سزایێن ئابووری یێن ئەمریکا ل سەر ئیرانێ ئەو وەلاتە تووشی قەیرانەکا مەزن کریە، بابەت تنێ قەیرانا ئابووری نینە بەلکو نھا ئیران د سیاسەتا خوە یا ناڤخوەیی دا ژی تووشی قەیرانەکا مەزن ھاتیە و گۆت: (بەرپرسێن ئیرانێ بزاڤەکا مەزن دکەن کو ب رێیا چینێ، تورکیا و ھندێ بشێن کارتێکرنا ڤان سزایان کێم بکەن و نھا دخوازن پەترۆلێ ب بھایەکێ ئەرزان بدەنە وان وەلاتان دا بشێن پارە بۆ ھێزێن سەربازی یێن خوە ل وەلاتێن وەکو سووریا، عیراقێ و لوبنانێ دابین بکەن، ئەمریکا ژی ڤێ یەکێ باش دزانیت و ژ بەر ھندێ ژی بەری نھا ترامپی ھۆشداری دابوو ھەر وەلاتەکێ ھەکە پەیوەندیێن ئابووری ل گەل ئیرانێ نەدەنە راگرتن دێ تووشی سزایێن گران بن).
ناڤبری د بەردەوامیا ئاخڤتنا خوە دا ئەو یەک ژی دیار کر کو بەری نھا ئەمریکا بزاڤ دکر کو ئیرانێ بۆ پاراستنا ھەڤسەنگیا ھێزێ ل دەڤەرێ بکار بینیت، چونکو ھێزێن سوننە یێن ھشکباوەر ل رۆژھەلاتا ناڤین مەترسیەکا مەزن بۆ ئەمریکا دروست دکرن، ھەبوونا ئیرانێ وەکو سیستەمەکێ شیعە ل دژی سوننێن ھشکباوەر د بەرژەوەندیا ئەمریکا دا بوو، لێ نھا ئەمریکی گەھشتینە ڤێ باوەریێ کو پرانیا وان ھێزێن سوننە یێن ھشکباوەر ژی ھەر ب پشتەڤانیا ئیرانێ شیاینە ئالۆزیان ل دەڤەرێ دروست بکەن و گۆت: (ھەتا نھا ستراتیژیا ئەمریکا ل ھەمبەر ئیرانێ پتر د چارچۆڤێ لاوازکرنا ئیرانێ بوو، لێ ئەم دبینین ڤێجارێ ئەمریکا دخوازیت سیستەمێ سیاسی یێ ئیرانێ ب تەمامی بگوھۆڕیت و بەری چەند رۆژان ترامپی ژی ب رەنگەکێ ئاشکرا دیار کر کو رەنگە سیاسەتا مە ببیتە ئەگەرێ ژناڤچوونا سیستەمێ نھا یێ ئیرانێ و ئەو یەک ژی نیشا ددەت کو ڤێجارێ ئەمریکا ب جدی بۆ گوھۆڕینا سیستەمێ سیاسی یێ ئیرانێ کار دکەت).
ل دۆر رۆژھەلاتێ کوردستانێ ژی ناڤھاتی دیار کر کو رۆژھەلاتێ کوردستانێ وەکو چو پارچێن دی یێن کوردستانێ نینە و گەلەک تایبەتمەندیێن خوە یێن جودا ھەنە، ھەر ھێزەک بزاڤێ بکەت کو ئەزموونا پارچەکێ دی یێ کوردستانێ دەربازی رۆژھەلات بکەت دێ تووشی شکەستنێ ھێت، چونکو جڤاکێ رۆژھەلاتێ کوردستانێ ئەزموونا خوە یا شۆرەشێ یە و خوەدان ھێزەکا مەزنە ب ناڤێ پێشمەرگێن رۆژھەلات و گۆت: (ھەموو پارتێن رۆژھەلات ژی باش دزانن کو دڤێت پێکڤە کار بکەن و بەرژەوەندیێن نەتەوی بپارێزن و رێ نەدەن کو ھندەک ھێزێن دی ئالۆزیان ل رۆژھەلاتێ کوردستانێ دروست بکەن).
ل دۆر بەرنامێ وان وەکو پارتی دیموکراتی کوردستان بۆ رۆژھەلاتێ کوردستانێ ژی ناڤھاتی دیار کر کو نھا ئەم ل گەل ھێزێن دی یێن رۆژھەلات کار دکەین کو پێکڤە بەرەیەکێ دروست بکەن، بەری نھا ناڤەندا ھەڤکاریا پارتێن رۆژھەلاتێ کوردستانێ ھاتە ئاڤاکرن کو ئەڤە پێنگاڤەکا گرنگە بۆ ئاڤاکرنا بەرەیەکێ کوردی ل رۆژھەلاتێ کوردستانێ و گۆت: (مە دڤێت ھندەک ھێلێن سۆر یێن نەتەوی بھێنە دانان دا چو ئالیەک ڤان ھێلان دەرباز نەکەت، چونکو گرنگە ئەم ڤێ باش بزانین کو ئارمانجا مە ھەموویان پاراستنا دەستکەفتێن نەتەوی و بدەستڤەئینانا مافێن رەوا یێن گەلێ کوردستانێ یە ل رۆژھەلاتێ کوردستانێ و ئیرانێ و ژ بەر ھندێ ژی بێگومان پێکڤە کارکرنا ھەموو پارت و ئالیێن سیاسی یێن رۆژھەلاتێ کوردستانێ گرنگە و ئەز ب باوەرم کو دێ پێنگاڤێن باش ژی ھێنە ھاڤێتن چونکو ئەم ب ھەموو رەنگەکێ بۆ ڤێ چەندێ کار دکەین).
نيشاندان
