ئه‌ڤرۆنيوز:

رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ پلا گه‌رمێ ل پارێزگها دهۆكێ يا ئه‌ڤرۆ وسه‌باهى به‌لاڤكر.

رێڤه‌به‌ريا ناڤبرى ئاماژه‌ دا كو پلا گه‌رمێ ئه‌ڤرۆ سێشه‌مبى 4/9/2018 ل پارێزگه‌ها دهۆكێ 38 پله‌يه‌.

دياركر ژى كو پێشبينى دهێته‌ كرن پلا گه‌رمێ يا سوباهى چارشه‌مبى 5/9/2918 ل پاريزگه‌ها دهۆكێ دێ 39 پله‌ بيت.

ئه‌ڤرۆ نيوز:

د چارچۆڤێ سه‌ره‌دانێن پارتى دا بۆ لايه‌نێن سياسى ل هه‌رێما كوردستانێ ئه‌ڤرۆ ب سه‌رپه‌رشتيا نێچيرڤان بارزانى جێگرێ سه‌رۆكێ پارتى ديموكراتى كوردستان سه‌ره‌دانا باژێرێ سلێمانيێ كر و ل گه‌ل بزاڤا گۆڕان ل باره‌گايێ وێ يێ سه‌ره‌كى ل گردێ زه‌رگه‌ته‌ كۆمبوو و ژ لايێ عومه‌رێ سه‌يد عه‌لى، رێكخه‌رێ گشتى يێ بزاڤا گۆڕان كۆمبوو.

پێشتر ئەندامەکێ جڤاتا نشتیمانی یا گۆڕان راگەھاند بوو کو ئەڤرۆ کۆمبوونا تەڤگەرا گۆڕان ل گەل پارتی دیمۆکراتی کوردستان ل سلێمانیێ دێ ھێتە ئەنجامدان.
کاروان ھاشم، ئەندامێ جڤاتا نشتیمانی یا گۆڕان راگەھاند کو ئەو ل گەل شاندێ پارتی ل سەر ھەردو پرسێن پێکئینانا حوکمەتا داھاتی یا عیراقێ و دانوستاندنان ل دۆر ھەلبژارتنێن پەرلەمانێ کوردستانێ کەن.
ئەندامێ جڤاتا نشتیمانی، دوپات کر کو وان وەکو گۆڕان بڕیار دایە پشکداریێ د ھەلبژارتنێن پەرلەمانێ کوردستانێ دا بکەن و گۆت: مە گرەنتیا وێ چەندێ دڤێت کو ھەلبژارتن دێ ب رەنگەکێ پاقژ و دوور ژ سەختەکاریێ ھێنە کرن).

ئەڤرۆ نيوز:

پەیڤدارێ وەزارەتا خواندنا بلند و ڤەکۆلینێن زانستی یا حوکمەتا ھەریما کوردستانێ بۆ رۆژناما ئەڤرۆ دیار کر، ئەڤرۆ ل دەمژمێر ھەشتی سپێدێ سیستەمێ وەرگرتنا قوتابیان ل زانکۆ و پەیمانگەھان ب رێیا زانکۆلاین، بۆ قوتابیێن پۆلا 12 ئامادەیی یێن خۆلا ئێکێ و دویێ دێ کەڤتە کاری و دبێژیت: دەرچوویێن پۆلا 12 ب رێیا وێبسایتی دشێن داخواز یێن خوە پێشکێش بکەن. سیستەمین (زانکۆلاین، راستەوخو، بەکریدیت، پارالێل و ئێڤاران) بۆ وەرگرتنێ ل زانکۆ و پەیمانگەھان پێشکێش بکەن.

عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ ئاشکرا ژی کر، پشتی ناڤێ (بکارئینەر و پەیڤا تێپەر) ژ لایێ وەزارەتا وانڤە ئاراستەی ریڤەبەریێن گشتی یێن پەروەردێن پاریزگەھێن (دھۆک، ھەولێر، سلێمانیێ و ھەلەبجە) و ئیدارێن (گەرمیان و راپەرین) ھاتینەکرن، داکو ب رێیا قوتابخانێن ئامادەیی ل سەر دەرچووێن 12 ئامادەیی بھینە بەلاڤکرن.

عەباسی خویا ژی کر، ئەڤرۆ 4-9-2018، ل دەمژمێر ھەشتی سپێدێ مالپەڕێ (www.regayzanko.com) دەرچوویێن پۆلا 12 ئامادەیی دشێن فۆرمێن وەرگرتنێ ل زانکۆ و پەیمانگەھان پڕ بکەن و پێشکێش بکەن و گۆت: “دەرچوویێن 12 ئامادەیی دەلیڤە ھەتا دەمژمێر 12 شەڤا 14-9-2018 یا ھەی بۆ وەرگرتنا فۆرمێ ل زانکۆ و پەیمانگەھێن کوردستانێ و پێدڤیە ب کارئینانا ھەمان وی ناڤێ بکارئینەر و پەیڤا تێپەر (یو‌زەر نەیم و پاسوورد) کو پێشتر ژ قوتابخانێن خوە وەگرتین، دشێن فۆرما وەرگرتنێ داگرن”.

گۆتژی: “دەرچوویێن 12 ئامادەیی ب رێیا ھەمان وێبسایت دشێن داخوازیێن خوە ب سیستەمێن (زانکۆلاین، راستەوخوە، کرێدێت، پارالێل و ئێڤاران) بۆ وەرگرتنێ ل زانکۆیان پێشکێش بکەن”.

ڤێره‌ كليك بكه‌ بۆ وه‌رگرتنا چوونا ناڤ زانكۆ لاين

ئەڤرۆ نيوز:

بەرپرسەکێ وەزارەتا ئاڤەدانکرن و ئاکنجیکرنێ دیار کر کو ئێک ژ وان پرۆژێن گرنگێن نوکە حوکمەتا ھەرێما کوردستانێ کار تێدا دکەت، رێیا پارێزگەھا دھۆکێ بۆ دەڤەرا سحێلایە و بڕیارە ئەڤ سالە تمام بیت.

ئەندازیار سامی قادر، رێڤەبەرێ پرۆژان ل وەزارەتا ئاڤەدانکرن و ئاکنجیکرنێ یا حوکمەتا ھەرێما کوردستانێ دیار کر کو دەست ب چێکرنا ھژمارەکا پرۆژێن رێ و بانان ھاتیەکرن و کارکرن تێدا یا بەردەوامە، حوکمەتا ھەرێما کوردستانێ ل گەل کۆمپانیێن ناڤخۆ و بیانی د بزاڤان دایە کار د ھژمارەکا پرۆژێن دی ژی دا بھێتەکرن، ب تایبەت ئەو پرۆژێن بەری نوکە چەند قووناغ ژێ ھاتینە بجە ئینان و ژ بەر قەیرانا دارایی ھاتینە راگرتن.

ناڤھاتی ئاماژە دا وێ چەندێ کو نوکە ئێک ژ وان پرۆژێن کار بۆ تمامکرنا وی دھێتەکرن، پرۆژێ رێیا گرشین بۆ دەڤەرا سحێلایە کو ب درێژاھیا 22 کیلۆمەتران دێ ھێتە چێکرن و بۆ مالپەرێ فەرمی یێ پارتی دیموکراتی کوردستان گۆت: “نوکە 35% کار د ڤی پرۆژەیی دا ب دووماھی ھاتیە و کارکرن د ڤی پرۆژەیی دا دێ یا بەردەوام بیت ھەتا ب دووماھی دھێت”.

رێڤەبەرێ پرۆژان ل وەزارەتا ئاڤەدانکرن و ئاکنجیکرنێ یا حوکمەتا ھەرێما کوردستانێ خویا کر کو رێیا گرشین – سحێلا پارێزگەھا دھۆکێ ب دەڤەرا سحێلا ڤە گرێدەت کو ئەڤ رێیە ل گۆندێ گرشینێ یێ ل سەر رێیا سەرەکیا زاخۆ بەر ب دەڤەرێن سحێلا بۆ ناحیا زومار و رەبیعە دچیت و گۆت: “تمامبوونا ڤی پرۆژەیی دێ گەلەک مفایی گەھینیتە دەڤەرێ”.

ئەڤرۆ نيوز:

پەیڤدارێ وەزارەتا شەھید و ئەنفالکریا یا حوکمەتا ھەرێما کوردستانێ ئاشکرا کر کو ژ ئەگەرێ قەیرانا دارایی یا سەر ب ھەرێما کوردستانێ دا ھاتی کارکرن د چێکرنا یەکێن ئاکنجیکرنێ دا بۆ کاسوکارێن شەھیدێن شەرێ داعش ھاتبوو راگرتن، بەلێ نوکە جارەکا دی دەست ب چێکرنا یەکێن ئاکنجیبوونێ بۆ خێزانێن شەھیدان ھاتیەکرن و ھەر دەمێ ئامادەبوون دێ دەست ب بەلاڤکرنا وان ھێتەکرن.

دەمەکە حوکمەتا ھەرێما کوردستانێ بڕیاردایە یەکێن ئاکنجیبوونێ یان پارچێن ئەردیل سەر ھەموو کەسوکارێن شەھیدێن شەرێ داعش بەلاڤ بکەت، نوکە ئامادەکاری بۆ ڤێ چەندێ دھێنەکرن.

فۆئاد ئوسمان، پەیڤدارێ وەزارەتا شەھید و ئەنفالکریا یا حوکمەتا ھەرێما کوردستانێ دیار کر کو حوکمەتا ھەرێما کوردستانێ بڕیار یادای یەکێن ئاکنجیکرنێ یان پارچێن ئەردی ل سەر ھەموو خێزانێن شەھیدێن شەرێ داعش بەلاڤ بکە، بۆ ڤێ مەرەمێ ژی لیژنەک ژ وەزارەتا شەھیدان و ئەنفالکریان و ئاڤەدانکرنێ ھاتیە پێک ئینان و وەزارەتا ئاڤەدانکرنێ ل بەھرا پتریا دەڤەرێن ھەولێر و سلێمانیێ و گەرمیان یەکێن ئاکنجیکرنێ ئامادەکرینە و ب تنێ خزمەتگۆزاری یێن ماین بۆ بھێنە دابینکرن و ژ ئەگەرێ قەیرانا دارایی ھاتبوونە راگرتن.

ناڤھاتی ئاماژە دا وێ چەندێ کو نوکە دەست ب دابینکرنا خزمەتگۆزاریان بۆ وان یەکێن ئاکنجیکرنێ ھاتیە کرن و ھەر دەمێ ئامادەبوون دێ دەست ب بەلاڤکرنا وان ھێتەکرن و بۆ مالپەرێ فەرمی یێ پارتی دیموکراتی کوردستان گۆت: “وەزارەتا ئاڤەدانکرنێ ل دووڤ ھژمارا شەھیدان و دەڤەران یەکێن ئاکنجیکرنێ دێ دەتە خێزانێن شەھیدان، کو نێزیکی ھزار و 800 شەھیدانە”.

ل دووماھیێ پەیڤدارێ وەزارەتا شەھید و ئەنفالکریا یا حوکمەتا ھەرێما کوردستانێ خویا کر کو ل ھەر جھەکێ یەکێن ئاکنجیکرنێ بۆ خێزانێن شەھیدان نەھاتینە ئاڤاکرن دێ ئەرد ل شوونا یەکێن ئاکنجیکرنێ ل سەر وان ھێتە بەلاڤکرن.

ئەڤرۆ نیوز:

شاندێ ھەڤپشکێ پارتی و ئێکەتی پشتی ئەنجامدانا چەندین کۆمبوونان ڤەگەریا ھەولێر.

شاندێ ھەڤپشک ل سەر پاکێچەکا 27 خالی کو تێدا مافێن ھەرێما کوردستانێ و خەلکێ وێ ھاتبوونە بەحسکرن ل گەل وان لایان گەنگەشە کرن.

شاندێ پارتی دیموکراتی کوردستان ژ ھەر ئێک ژ فازل میرانی سکرتێرێ مەکتەبا سیاسی و فوئاد حسێن سەرۆکێ دیوانا سەرۆکاتیا ھەرێما کوردستانێ و جەعفەر ئیبراھیم ئەندامێ مەکتەبا سیاسی و دکتور ئۆمێد سەباح و بەنگین رێکانی پێکھاتبوون.

شاندێ ئێکەتی نشتیمانی کوردستان ژی ژ ھەر ئێک ژ مەلا بەخیترا بەرپرسێ دەستەیا کارگێری یا مەکتەبا سیاسی و سەعدی ئەحمەد پیرە ئەندامێ مەکتەبا سیاسی و خالد شوانی ئەندامێ سەرکرداتیێ پێک ھاتبوون.