NO IORG
نووترين نووچه
نوچێن گرنگ

ئه‌ڤرۆ نيوز:

پشتى ب دووماهى هاتنا كۆمبوونا ئه‌ڤرۆ يا جڤاتا سه‌ركرداتيا پارتى ب سه‌رپه‌رشتيا سه‌رۆك بارزانى، نێچيرڤان بارزانى جێگرێ سه‌رۆكێ پارتى ديموكراتى كوردستان د داخۆيانيه‌كا رۆژنامه‌ڤانى دا ته‌كست ل سه‌ر وێ چه‌ندێ كر كو هه‌لبژارتنێن په‌رله‌مانێ كوردستانێ دێ د ده‌مێ خوه‌ دا هێنه‌ كرن.

ل به‌رسڤا پرسياره‌كێ دا، ل دۆر ئه‌نجامدانا هه‌لبژارتنێن په‌رله‌مانێ كوردستانێ، نێچيرڤان بارزانى، گۆت: “هه‌لبژارتن دێ د ده‌مێ خوه‌ دا هێنه‌ كرن و لايه‌نێن دى ژى ته‌كست ل سه‌ر وێ چه‌ندێ كريه‌ نه‌ ب تنێ پارتى”.

 

ئه‌ڤرۆ نيوز:

جڤاتا سه‌ركرداتيا پارتى ديموكراتى كوردستان بۆ گه‌نگه‌شه‌كرنا هه‌لبژارتنێن په‌رله‌مانێ كوردستانێ و پێكئينانا حوكمه‌تا نوو يا عيراقێ يا د كۆمبوونێ دا.

ئه‌ڤ كۆمبوونا جڤاتا سه‌ركرداتيا پارتى د ده‌مه‌كى دايه‌ كو ئه‌و پارتى يا رژده‌ ل سه‌ر ئه‌نجامدانا هه‌لبژارتنێن كوردستانێ و دخوازيت ل 30ى ڤێ هه‌يڤێ بهێنه‌ ئه‌نجام دان.

ژ لايه‌كێ دى ڤه‌، شاندێ هه‌ڤپشك ل گه‌ل ئێكه‌تى نشتيمانى كوردستان مژوولى دانوستاندنايه‌ ل سه‌ر پێكئينانا حوكمه‌تا نوو يا عيراقێ كو دخوازن مافێن گه‌لێ كورد تێدا ب ده‌ست ڤه‌ بينن.

ئه‌ڤرۆ نيوز:

ئه‌ڤرۆ رۆژا ئێكشه‌مبى، ژ ئه‌نجامێ ژناڤچوونا فرۆكه‌كا نه‌فه‌ر هه‌لگرا بچووك ل باشوورێ سودانێ ب كێمى شه‌ش كه‌سان گيانێ خوه‌ ژ ده‌ست دا.

فرۆكه‌ د گه‌شته‌كێ دابوو ل جۆبايى پايته‌ختێ باشوورێ سودانێ به‌ر ب باژێركێ پيرۆلى يێ وى وه‌لاتى.

ب گۆره‌يى ژێده‌رێن ئاژانسا نووچه‌يێن رۆيته‌رز دهێته‌ پێشبينيكرن كو 19 كه‌س د ناڤا وێ فرۆكێ دا بن.

ئێك ژ وان كه‌سێن روودان ب چاڤێن خوه‌ ديتى گۆت: “ئه‌م هێشتا يێ ته‌رمان د ناڤ ئاڤێ دا د ده‌رئێخين ژ به‌ر كو فرۆكه‌ يا كه‌فتيه‌ ناڤ ئاڤا رووباره‌كى. هه‌تا نها ته‌رمێ شه‌ش كه‌سان ل به‌ر سينگێ منه‌ و ژ ئاڤێ ئيناينه‌ ده‌ر”.

ئه‌ڤرۆ نيوز:

وه‌زاره‌تا ژ ده‌رڤه‌ يا عيراقێ راگه‌هاندنه‌ك ل دۆر بۆردۆمانا باره‌گايێن پارتيا ديموكراتا كوردستانێ – ئيران ل كۆيه‌ به‌لاڤكر و راگه‌هاند كو ئێدانا ئه‌وان بۆردۆمانان دكه‌ن.

فرۆكێن بێ فرۆكه‌ڤان يێن وه‌لاتێ ئيرانێ دوهى رۆژا شه‌مبى رێكه‌فتى 8ى ئيلۆنا 2018ێ هێرش كره‌ سه‌ر كۆمبوونه‌كا پارتيا ديموكراتا كوردستانێ – ئيران ل هۆلا پلنيۆما سه‌ركرداتيا وێ حزبێ و سه‌ره‌رايى برينداربوونا سكرتێرێ گشتى يێ وێ حزبێ و سكرتێرێ به‌رێ يێ وێ حزبێ 13 كه‌س شه‌هيد بوون كو هنده‌ك ژ وان ژن بوون و نێزيكى 50 كه‌سان ژى بريندار بوون كو زارۆ ژى د ناڤ دا هه‌بوون.

وه‌زاره‌تا ژ ده‌رڤه‌ يا عيراقێ د به‌ياننامه‌كێ دا كو دانه‌ك ب ده‌ست ئه‌ڤرۆ نيوز كه‌فتيه‌ راگه‌هانديه‌ كو وه‌زاره‌تا ژ ده‌رڤه‌ يا عيراقێ نه‌رازيبوونا خوه‌ ل هه‌مبه‌ر وێ بۆردۆمانێ ديار دكه‌ت ئه‌وا قه‌زا كوسه‌نجيق ل پارێزگه‌ها هه‌ولێرێ ب خوه‌ ڤه‌ گرتى يا كو بوويه‌ ئه‌گه‌رێ قوربانيبوونا چه‌ندين كه‌سان.

ئاماژه‌ ب وێ چه‌ندێ ژى كريه‌ كو وه‌زاره‌ت يا رژده‌ ل سه‌ر پاراستنا ئه‌منيه‌تا هه‌ڤسۆيێن خوه‌ و رێ ناده‌ت ئه‌ردێ وێ گه‌فلێكرن ل سه‌ر وان وه‌لاتان بهێته‌ ب كارئينان، به‌لێ ب ره‌نگه‌كێ ته‌مام ژى ره‌ت دكه‌ت كو سه‌روه‌ريا عيراقێ د رێيا بۆردۆمانان ژى دا بهێته‌ بن پێ كرن بێى كو هه‌ماهه‌نگيه‌كا پێش وه‌خت ل گه‌ل لايه‌نێن عيراقى هه‌بيت.

ئه‌ڤرۆ نيوز:

به‌رى ده‌مه‌كێ كێم فرۆكێن شه‌ركه‌رێن وه‌لاتێ توركيا چيايێ ئه‌لهۆيى ل هنداڤى ئامێديێ بۆردۆمان كر و ب ڤێ چه‌ندێ ژى ترسه‌كا مه‌زن كه‌فته‌ دلێ وه‌لاتيان ژ به‌ر نێزيكيا ده‌ڤه‌را بۆردۆمانكرى ژ جهێ ئاكنجيبوونا وه‌لاتيان.

گه‌نجه‌كى ب ناڤێ محه‌مه‌د ئامێدى بۆ ئه‌ڤرۆ نيوز دياركر كو ئه‌ڤرۆ رۆژا ئێكشه‌مبى رێكه‌فتى 9ى ئيلۆنا 2018ێ ل ده‌مژمێر 10:40 ده‌قيقه‌ چيايێ ئه‌لهۆيى ل هنداڤى ئامێديێ هاته‌ بۆردۆمانكرن.

ب گۆره‌يى محه‌مه‌د ئامێدى كو ئه‌ڤ وێنه‌ ژى بۆ ئه‌ڤرۆ نيوز ره‌وانه‌ كرينه‌ ئاشكه‌را كريه‌ كو ئه‌ڤێ بۆردۆمانێ ترسه‌كا مه‌زن خسته‌ دلێ وه‌لاتيان ژ به‌ر جهێ بۆردۆمانێ يێ نێزيك ژ مالێن وه‌لاتيان.

دهێته‌ زانين كو بۆردۆمانا فرۆكێن شه‌ركه‌رێن توركيا بۆ ده‌ڤه‌رێ هه‌تا نها يا به‌رده‌وامه‌.

بۆردۆمان

1 2 3 4 5

ئەڤرۆ نيوز:

رێڤەبەرێ گشتی یێ پۆلیسێن ھاتنوچوونا ھەرێما کوردستانێ دیار کر کو ژ نوکە وێڤە زمانێ کوردی ژی دێ کەڤیتە ل سەر دەستووریا ھاژووتنا ترۆمبێلێ.

لیوا رزگار عەلی، رێڤەبەرێ گشتی یێ پۆلیسێن ھاتنوچوونێ ل وەزارەتا ناڤخۆ یا حوکمەتا ھەرێما کوردستانێ دیار کر کو حوکمەتا عیراقێ رازەمەندیا خوە دیار کریە ل سەر زێدەکرنا نڤیسینا زمانێ کوردی ل سەر دەستووریا ھاژووتنا ترۆمبێلێ و ژ لایێ خوە ڤە ژی بجە ئینایە و بۆ باسنیۆز گۆت: “پشتی بڕیارێ مە دەست ب قووناغێن ب جە ئینانا رێنمایان کریە، بەلێ رەنگە ڤی کاری بدەینەف کۆمپانیەکێ بۆ وێ چەندێ شێوەیێ پێکھاتن و دروستکرن نڤیسینا ل سەر دەستووریێ رێکبێخیت، ئەم ب ھیڤینە ل دەمەکێ نێزیک ئەڤ کارە دێ تمام بیت”.

ئه‌ڤرۆ نيوز:

بۆ دەمێ سێ سالانە تیمەکا زانکۆیا ئەودنی یا ئیتالی ڤەکولینێ ل سەر جھێ شینواری گرێ “تلجومل” یێ سەر ب ناحیا کەلەکچی ڤە دکەت و چەندین پارچێن شوونواری ھاتینە دیتن کو مێژوویا وان بۆ سالێن 331 بەری زاینی ڤەدگەڕێت، گەلەک ژ ڤان شوونواران یێن ل سەر دەمێ شەرێ جیھانی یێ ئێکێ نە

محەمەد عارف، سەرپەرشتێ شوونوارێن قەزا شێخان بۆ رۆژناما ئەڤرۆ دیار کر کو ئەڤە سێ سالە تیمەکا زانکۆیا ئەودنی یا ئیتالی ڤەکۆلینێ ل سەر گرێ شوونواری یێ تلجومل ل ناحیا کەلەکچی دکەت و چەندین پارچێن شوونواری یێن ل سەر دەمێ شەرێ جیھانی یێ ئێکێ دیتینە و گۆت: “ڤەکۆلین بەردەوام ژ ئالیێ تیمێن بیانی ڤە ل سەر ڤی جھێ شوونواری دھێنەکرن، لێ ھێشتا نەگەھشتینە دووماھیا ڤەکۆلینێ ژ بەر کو گەلەک پارچێن شوونواری یێن گرنگ د ناڤ دا ماینە ھەتا نوکە نەھاتینە دیتن”.

ئه‌ڤرۆ نيوز:

فرۆکێن شەڕی یێن تورکیا بەردەوام دەڤەرێن سنوورێ قەزا ئامێدیێ بۆردومان دکەن، نێزیکی 10 رۆژایە گوندێ شاجا یێ سەر ب دەڤەرا نێروە و رێکان دھێتە بۆردومانکرن و گوند ھەموو ب ئاقار و رەز و بیستان ڤە ھاتیە سۆتن و سیمایەکێ رەش بخوەڤە گرتیە، ئەندانەمەکی جڤاتا پارێزگەھا دھوکێ ژی بۆ رۆژناما ئەڤرۆ دبێژیت: ئەم بەردەوام بزاڤان دکەین کو سنوورەک بۆ بۆردومانا دەڤەرێ ژ لایێ فڕۆکێن تورکیا ڤە بھێتە دانان و وەلاتیێن زیان ڤێکەفتی ژی بھێنە قەرەبووکرن.

زیاد حسێن شاجی خەلکێ گوندێ شاجا بو ئەڤرۆ گۆت: “نێزیکی 10 روژایە گوندێ مە رۆژانە ژ لایێ فڕۆکێن شەڕی یێن تورکی ڤە دھێتە بۆردومانکرن و چو کەس نوکە نەشێت قەستا گوندی بکەت، لەو ئەم دخوازین حوکمەتا ھەرێما کوردستان و عیراقێ و لایەنێن شولەژێ ب رژدی کار بکەن بۆ راوەستاندنا وان بۆردومانان، چونکی ژێدەرێ سەرەکیێ ژیان خەلکێ دەڤەرێ ئەو گوندەنە”.

رزگار سدقی، ئەندامێ جڤاتا پارێزگەھا دھوکێ بۆ ئەڤرۆ دیار کر، ژ ئەگەرێ شەڕێ بەردەوامێ د ناڤبەرا گەریلا و سۆپایێ تورکیا دا و بۆردومانکرنا دەڤەرێ ژ لایێ فڕۆکان ڤە، ژ سەرجەمێ 346 گوندێن دەڤەرا ئامێدیێ، ھەتا نوکە 198 گوند ب چولی ماینە و نەھاتینە ئاڤاکرن و گۆت: “ژ بەر بۆردومانێن بەردەوام رووبەرێن بەرفرەھێن ئەردی ھاتینە سۆتن، رەز و باغێن وەلاتیان ژ ناڤچووینە، ب ڤێ یەکێ ژی زیانێن مەزنێن گیانی و مادی گەھشتینە خەلکێ ڤان گوندان”.

رزگاری گۆتژی: “مە بەری نوکە بزاڤێن زور کرینە، بۆ وێ یەکێ ئەڤ وەلاتیێن، ژ ئەنجامێ بۆردومانا فرۆکێن تورکیا زیان گەھشتینێ، بھێنە قەرەبووکرن، مە ب رێیا کارگێریێن دەڤەرێن دھێنە توپبارانکرن، چەند ئامار ب دەست خستبوون و بۆ لایەنێن پەیوەندیدار بلند کربوون، بۆ وێ یەکێ حوکمەتا تورکیا و حکومەتا عیراقێ ژی بھێنە ئاگەھدارکرن کو ئەڤ خێزانە بھێنە قەرەبووکرن و دیار بوویە زیانێن گەھشتینە وەلاتیان دۆرێن 4 ملیار دیناران بووینە”.

وی ئەندامێ جڤاتا پارێزگەھا دھۆکێ ئاماژە ب وێ چەندێ ژی کر، ژ ئەنجامێ ڤان تۆپبارانان زیانێن گیانی ژی گەھشتینە وەلاتیێن سنوورێ قەزا ئامێدیێ و د ڤان دو سالان دا پتر ژ 10 وەلاتیێن دەڤەرێ بووینە قوربانی و گۆت: “ژ بەر ڤێ یەکێ ئەم دێ بزاڤێن رژد کەن کو قۆنسلخانا تورکیا ل ھەرێما کوردستانێ بھێتە ئاگەھدارکرن و خێزانێن وان شەھید و برینداران بھێنە قەربووکرن”.

ئه‌ڤرۆ نيوز:

کارگەھەکا چێکرنا زێڕی بۆ جارا ئێکێ ل ھەرێما کوردستانێ ھاتە دامەزراندن و سەرۆکێ کۆمەلا زێڕینگرانژی دبێژیت: بەرھەمێ ناڤخوە خواستەکا زۆر ل سەر ھەیە و بەرھەمێ کارگەھا ناڤخوە ژ لایێ کوالێتیێ ڤە چو جوداھی دگەل بەرھەمێ یێن وەلاتێن دەوروبەر نینە.

قارەمان جەوھەر، سەرۆکێ کۆمەلا زێڕینگرێن کوردستانێ بۆ رۆژناما ئەڤرۆ ئاشکرا کر، کارگەھەکا بەرھەمئینانا زێڕی ل ھەرێما کوردستانێ ھاتیە دامەزراندن و ل گورەی خواستێن وەلاتی و بازاڕی زێڕی بەرھەم دئینیت و گۆت: “زێڕێ ھەرێما کوردستانێ ل بازاڕی خواستەکا زۆر ل سەرە و کڕیارێن زۆر ھەنە، ژ بەرکو ب کوالێتەکا بلند دھێتە بەرھەمئینان و چو جوداھی دگەل زێڕێ وەلاتێن دەڤەرێ نینە، لەوڕا ژی د دەمێ نوکە دا بەرھەمێ کارگەھا زێڕێ ناڤخوە کڕیار زۆرن و بەرھەم ژی بەھرا کڕیاران دکەت”.

قارەمان جەوھەر ئاماژە ب وێ چەندێ ژی کر کو پێکھاتێن دەستپێکی یێن چێکرنا زێڕی ل دەرڤەی ھەرێما کوردستانێ دھێن، بەلێ ژ لایێ کارگەھەکا ناڤخوە دھێتە نەخشاندن و ل گورەی خواستا کڕیاران دھێتە چێکرن و گۆت: “ئەز باوەر دکەم ل داھاتی دێ شێت ھەموو پێکھاتێن زێڕی ژی ھەر ل ناڤ کوردستانێ بکاربینیت، ژ بەرکو کانزایێن دبنە زێڕ ل ھەرێما کوردستانێ ھەنە، دیسا یا خویایە کوردستان ب جۆرەھا کانزایێن بھا گران یا زەنگینە، دامەزراندنا کارگەھەکا زێڕی ژی بۆ جارا ئێکێ پێنگاڤەکا مەزن و ئەرێنیە ل کوردستانێ”.

ئه‌ڤرۆ نيوز:

پشتی ھەوا ھەلبژارتنان بۆ دەمێ حەفتیەکێ ھاتیە پاشخستن، نوکە گۆمان پەیدابویە ھەلبژارتنژی بھێتە پاشخستن، پەرلەمانتارەکژی دبێژیت، پارتی یا رژدە ل سەر ئەنجامدانا ھەلبژارتنان، و ھەکە بھێت و ھەلبژارتن نەھێنەکرن ئەڤە دێ پەرلەمان تەمەنێ خوە درێژبکەت، ھەروەسا دیارکر، بێی رێککەفتنا ناڤبەرا لایەنێن سیاسی پەرلەمان نەشێت بەردەوامبیت و دێ ھەرێم کەڤیتە ڤالاھیا قانوونی دا.

حەیات مەجید پەرخی، پەرلەمانتارا فڕاکسیۆنا پارتی لپەرلەمانێ کوردستانێ بۆ رۆژناما ئەڤرۆ گۆت” بابەتێ پاشخستنا ھەلبژارتنێن 30ی ئیلوونێ یێن ھەرێما کوردستانێ ددەستێ پەرلەمانی دەرکەفتیە و نوکە تنێ لایەنێن سیاسی و حوکمەت دشێن بڕیارێ لدۆر ئەنجامدان و نەدانا ھەلبژارتنان بدەن، بەلێ ئەم وەکی پارتی دیموکراتی کوردستان ھێشتا د رژدین لسەر ھەلویستێ خوە کو پێدڤیە ھەلبژارتنێن پەرلەمانێ کوردستانێ ددەمێ خوەدا بھێنە ئەنجامدان و نەھێنە پاشخستن بۆڤێ مەرەمێ ژی چەندین جارا پارتی لسەر ئاستێن بلند ئەف چەندە پشتڕاستکریە، بەلێ دگەل ڤێ چەندێ ژی ھەگەر بھێت و ھەلبژارتن د ژڤانێ دیاری کری نەھێنە کرن و بھێنە گیرووکرن ئەڤە دێ کەڤیتە سەر لایەنێن سیاسی ئەو چو بڕیار بدەن، خۆلا نوکەیا پەرلەمانێ کوردستانێ ھەتا ھەیڤا یازدە دێ یا بەردەوامبیت و پشتی ئەڤی ژڤانی تەمەنێ پەرلەمانی دێ تەمام بیت و ھەرێما کوردستانێ دێ کەڤیتە ڤالاھیا قانوونی، تنێ ب مەرجەکی دێ ئەف ئاریشەی ھێتە چارەسەرکرن لایەنێن سیاسی دناڤبەرا خوەدا رێکەڤن و ئێکدەنگیێ پەیدا کەن لسەر پاشخستنا ھەلبژارتنان.

حەیات مەجید پەرخی گۆتژی” پارتی دیموکراتی کوردستان بەردەوام لسەر پرسێن نەتەوەیی و نیشتیمانی تەنازۆلکرینە و زۆرجارا ل مافێ خوە خۆشبویە تنێ بۆ بەرژەوەندیێن گشتی، لەوڕا سەرەڕای پێداگیریا پارتی لسەر ئەنجامدانا ھەلبژارتنان ددەمێ خوەدا، ئەگەر ھەموو لایەنێن سیاسی بۆچوونەک ھەبیت و دگەل ھەلبژارتنان نەبن پارتی وی دەمی نابیتە ئاستەنگ، چونکە پارتی یا پشتڕاستە دێ ھەر دەنگێن خوە ئینیت و ھەلبژارتن بھێتە کرن و نەھێتەکرن و پارتی سەنگا خوە ھەیە، بەلێ رەوشا نوکەی و نەڕازیبوونا ھندەک لایەنێن سیاسی ژی لبەرچاڤە، خویایە ھەلبژارتن نەھێنەکرن ددەمێ خوە یێ دیاری کری چەندین ئاریشەیێن دی لھەرێما کوردستانێ پەیدابن، ئێک ژوان درێژکرنا تەمەنێ پەرلەمانیە ھەتا ئەڤی دەمێ لایەنێن سیاسی لسەر دگەھنە رێکەوفتنێ، چونکی بێی رێکەفتنا لایەنێن سیاسی و ئێک دەنگیا فڕاکسیۆنێن ناڤا پەرلەمانی ب چو شێوەیەکی پەرلەمان نەشێت تەمەنێ خوە درێژ بکەت بۆ ئێک رۆژا دیژی.

website security
WP Facebook Auto Publish Powered By : XYZScripts.com