ئه‌ڤرۆ نيوز:

بڕیارە ئەڤرۆ پەرلەمانێ کوردستانێ راپۆرتەکێ ل دۆر روودانا باژێڕکێ کۆیە بەرھەڤ بکەت کو تێدا ئیرانێ ب مۆشەکێن زیرەک ھێرشی سەر کەلھا حزبا دیموکرات کربوو و چەندین وەلاتی و سەرکردێن دیموکرات شەھید و برینداربوون.

نازم کەبیر، جێگرێ سەرۆکێ لیژنا ناڤخۆ ل پەرلەمانێ کوردستانێ بۆ رۆژناما ئەڤرۆ دیار کر کو ب مەرەما ڤەکۆلینێ ل سەر روودانا ھێرشا بارەگایێن حزبا دیموکراتا کوردستانا ئیرانێ، شاندەکێ پەرلەمانێ کوردستانێ سەرەدانا حزبێن رۆژھەلات و جھێ روودانێ کریە و ژ نێزیک ئەو ئاگەھداری رەوشا خەلکێ رۆژھەلاتێ کوردستانێ بووینە ل سنوورێ قەزا کۆیە کو ل رۆژا شەمبیا بۆری ژ لایێ کۆمارا ئیسلامیا ئیرانێ ڤە ببوو ئارمانجا مۆشەکێن زیرەک یێن سوپایێ پاسدارێن ئیرانێ و مخابن ژ ئەگەرێ ھێرشی ھژمارەکا شەھید و برینداران ھەبوون، سەرەڕای زیانێن بەر بارەگایێ کەلھا دیموکراتی کەفتین.

ناڤھاتی خویا کر کو لیژنا ناڤخۆ ئەڤرۆ رۆژا چارشەمبی دێ کۆمبیت و بڕیارە راپۆرتەک ل دۆر ھێرشا سەر حزبا دیموکرات بھێتە بەرھەڤکرن و بلندکرن بۆ دەستەیا سەرۆکاتیا پەرلەمانێ کوردستانێ، وی دەمی دێ پەرلەمان ھەلویستێ خوە یێ فەرمی ل دۆر ھێرشێ دیارکەت و گۆت: “ب دیتنا مە نابیت ئاخا ھەرێما کوردستانێ بھێتە بکارئینان بۆ ھێرشکرنا سەر جیرانان، بەلێ دگەل ڤێ چەندێ دڤێت ئیران ژی رێزێ ل سەروەریا ئاخا ھەرێما کوردستانێ بگریت و خەلکێ سڤیل و پەنابەر نەکەتە ئامانج.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى راگه‌هاند، پارتى ديموكراتى كوردستان دباشترين ره‌وش دايه‌ بۆ به‌رگريێ ل به‌رژه‌وه‌نديێن كوردستانێ.

مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ ل به‌رپه‌رێ خوه‌ ل سه‌ر تۆرا جڤاكى يا تويته‌رى به‌لاڤكر” 30 ئه‌يلوولێ ده‌ليڤه‌كه‌ ل به‌رده‌م خه‌لكێ كوردستانێ بۆ وێ چه‌ندێ چاره‌نڤيسێ گه‌لێ كورد ده‌ستنيشان بكه‌ت”.

مه‌سرور بارزانى داخواز ژ خه‌لكێ كوردستانێ كر ده‌نگ ب ليستا 183 يا پارتى ديموكراتى كوردستان بده‌ن.

ئه‌ڤرۆنيوز:

ئه‌ڤرۆ سێشه‌مبى 11/9/2018 كو رۆژا ده‌ستپێكرنا بانگه‌شا هه‌لبژارتنێن په‌رله‌مانێ كوردستانێ بوو، كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ درۆهنكرنه‌كێ دا سزادانا 7 قه‌واره‌ ولايه‌نێن سياسى راگه‌هاند.

كۆمسيۆنا ناڤبرى راگه‌هاند كو ژبه‌ر پێگيرى نه‌كرنا وان ب قانوون ورێنما وپه‌يره‌وێن كۆمسيۆنێ وئه‌نجامدانا بانگه‌شا پێشوه‌خت، بريارا سزادانا دارايى يا چه‌ند قه‌وارێن سياسى يێن پشكدار دبانگه‌شا هه‌لبژارتنان دا دايه‌.

كۆمسيۆنێ قه‌وارێ ئێكه‌تى نيشتمانى كوردستانێ ب گۆژمێ 3 مليۆن ديناران سزا دايه‌، هه‌روه‌سا پارتى ژى ب هه‌مان گۆژمێ پاره‌ى سزادايه‌.

هه‌روه‌سا قه‌وارێ ( به‌ره‌ڤ چاكسازيێ) كو هه‌ردو حزبێن ئێكگرتوو ئيسلامى وبزاڤا ئيسلامه‌ بخوه‌ڤه‌ دگريت،  ب گۆژمێ ئێك مليۆن دينار سزادايه‌، ب هه‌مان گۆژمێ پاره‌ى قه‌وارێ پارتى گه‌شه‌پێدان ژى سزادايه‌.

ديسا هه‌ردو قه‌وارێن پارتيا چاكسازى يا توركمانى وجڤاتا مللى كلدانى سريانى ئاشوورى ژى ب گۆژمێ ئێك مليۆن دينار هاتينه‌ سزادان.

قه‌وارێ حه‌فتێ ئه‌وێ هاتيه‌ سزادان ژلايێ كۆمسيۆنێ ڤه‌، ( تاكێ ئه‌رمه‌نه‌) كو ب گۆژمێ 500 هزار ديناران هاتيه‌ سزادان.

ئه‌ڤرۆنيوز:

سه‌رۆك وه‌زيرێن هه‌رێما كوردستانێ، نێچيرڤان بارزانى ئه‌ڤرۆ سێشه‌مبى 11/9/2018 پێشوازى ل برێت ماكگۆرك نوونه‌رين سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تى يا شه‌رێ دژى داعشێ وشانده‌كێ دگه‌لدا كر.

دديداره‌كێ دا ره‌وشا سياسى يا نوكه‌ يا عيراقێ وبزاڤێن پێكئينانا كابينا نوو يا حوكمه‌تا عيراقێ وروونشتنين په‌رله‌مانێ نوو يێ عيراقێ وئه‌گه‌رێ پێكئينانا مه‌زنترين هه‌ڤپه‌يمانيا په‌رله‌مانى وه‌كو پێنگاڤا ئێكێ بۆ پێكئينانا حوكمه‌تا عيراقى يا نوو هاته‌ به‌حسكرن.

ديسا رۆلێ هه‌رێما كوردستانێ وهه‌ڤپشكى دپرۆسا سياسى يا عيراقێ دا وپێكئينانا كابينا حوكمه‌تا نوو ب گرنگ هاته‌ هه‌لسه‌نگاندن وهه‌درو لايه‌نان هيڤى خواست ل پاشه‌رۆژه‌كا نێزيك بزاڤ بگه‌هنه‌ ئه‌نجامه‌كى وحوكمه‌تا نوو  يا عيراقێ بهێته‌ پێكئينان كو به‌رژه‌وه‌ندا هه‌موو پێكهاتين عيراقێ ل به‌رچاڤ بگريت ووه‌لاتى بگه‌هينيته‌ قۆناغه‌كا نوو.

هه‌ردو لايه‌نان ره‌وشا سياسى يا هه‌رێما كوردستانێ وبه‌رهه‌ڤيێن بۆ هه‌لبژارتێن په‌رله‌مانێ كوردستانێ ل 30 ڤێ هه‌يڤێ به‌حسكرن ول دۆر ڤێ چه‌ندێ ماكگۆركى خوه‌شحاليا خوه‌ دياركر به‌رامبه‌ر ئه‌نجامدانا هه‌لبژارتنێن هه‌رێما كوردستانێ دده‌مێ خوه‌ يێ دياركرى دا وهيڤى خواست پرۆسا هه‌لبژارتنان وده‌نگدانێ ب سه‌ركه‌فتيانه‌ ب رێڤه‌ بچيت.