ئەڤرۆ نیوز، زنار تۆڤی:

بانكا ناڤەندی یا عیراقی چاپا دویێ بۆ چەند جۆرێن دیتر یێن دیناری عیراقی ڕاگەهاند، كو گۆهورین د دیزاینێ وان جۆرێن دیناران دا هاتیە كرن.

ئەڤرۆ ئێکشەمبی 7/10/2018، بانکا ناڤەندی یا عیراقێ د راگەهاندنەکێدا چاپا دویێ ب ‌پێنج جۆرێن دراڤێن عێراقی راگه‌هاند كو پێکهاتینە ژ‌ جۆرێ (25000 – 10000 – 1000 – 500 – 250) دیناری.

بانکا ناڤەندی ئەو ژی ئاشکراکریە، کوژ‌ جۆرێ (25000 – 10000 – 500 – 250) ناڤێ پارێزگاری ل سه‌ر نڤێسیە ل جهێ هندێ کو ئیمزا ل ‌سه‌ر بیت، هەروەسا ئاماژە ب گۆهورینا جۆرێ كاغەزا چاپكرنێ ژی هاتیە کرن، بەلێ رووهنکرنێن زێدەتر دڤی واریدا نەداینە.

ئەڤە د دەمەکێدایە، کو بانکا ناڤەندی ل رۆژا پێنجشەمبیا بوری د راگەهاندنەکێدا ئاشکرا کربوو، کو ئەو دێ گۆهورینان د شێوه‌ و دیزاینێ دراڤێ عێراقی دا کەت.

ئەڤرۆ نیوز ، زنار تۆڤی:

سەرۆک بارزانی خۆشحالیا خوە ب کۆمبوونا ل گەل برێت مەکگۆرک، نوونەرێ تایبەت یێ سەرۆکێ ئەمریکا ل هەڤپەیمانیا نێڤدەولەتی ل دژی داعشی دەربری.

ئەڤرۆ سەرۆک بارزانی ل پێگەهێ خوە یێ تایبەت ل تۆرا جڤاکی یا (تویتەر) ی بەلاڤەکریە، کو ئەو خۆشحال بوویە ب دیدارا ل گەل برێت مەکگۆرک، نوونەرێ تایبەتی یێ سەرۆکێ ئەمریکا ل هەڤپەیمانیا نێڤدەولەتی ل دژی داعشێ و دۆگلاس سلێمان، بالیۆزێ ئەمریکا ل عێراقێ.

سەرۆک بارزانی ئاشکرا کریە کو د وێ کۆمبوونێدا بەحسێ دوماهی پێشهاتێن سیاسی یێن عێراقێ و هەرێما کوردستانێ کرینە.

ئه‌ڤرۆ نيوز:

سەرۆکێ ئێکەتیا مامۆستایان راگەھاند، پشتی چەندین کۆمبوونان ل گەل وەزارەتا ‏پەروەردێ یا حۆکمەتا ھەرێما کوردستانێ، ئەم گەھشتینە وێ قەناعەتێ کو ئۆفێن ‏شەمبیان نەھێنە ڤەگەراندن، بەلکو رێڤەبەرێن قوتابخانان ماف ھەبیت بۆ ھەر ‏ماموستایەکێ خوە د حەفتیێ دا رۆژەکێ بکەتە بێھنڤەدان، ب مەرجەکی زیان ب ‏خواندنێ نەکەڤیت. سەرۆکێ لقێ دھۆکێ یێ ئێکەتیا مامۆستایان ژی راگەھاند کو د ‏ڤێ حەفتیێ دا دێ ل گەل رێڤەبەرێن پەروەردێ روونن و داخواز ژێ کەن، ھەر ‏مامۆستایەکێ وانەیا خوە بێژیت، ئازاد ببیت و بچیتە مالا خوە.‏

عەبدولواحد محەمەد، سەرۆکێ سەندیکا مامۆستایێن کوردستانێ بۆ ئەڤرۆ دیار کر، ‏پشتی چەندین کۆمبوونان ل گەل وەزارەتا پەروەردێ، ئەم رازی بووین کو بێھنڤەدانا ‏رۆژا شەمبیان نەمینیت، چونکو زیان ب کەرتێ خواندنێ دکەڤیت و پێدڤیە خواندن ل ‏چو رۆژان نەھێتە راگرتن، بەلکو ل شوونا وێ بۆ ماموستایان د حەفتیێ دا رۆژەک ‏ببیتە بێھنڤەدان، بێکو زیان ب خواندنێ بکەڤیت و پرۆگرامێن خواندنێ و خشتێ ‏حەفتیانە یێن قوتابیان وەکو خوە برێڤە بچیت.‏

ئاشکرا ژی کر کو ئەو بڕیارە ژی ھاتە دان کو ئەو رۆژا ئۆف و بێھنڤەدان ب تنێ بۆ ‏قوتابخانێن ئێڤاران بیت، ئەو ژی ل ھەموو رۆژێن پێنچشەمبی دێ ب شێوەیەکێ ‏فەرمی بۆ قوتابخانێن ئێڤاران بیتە بێھنڤەدان و گۆت: بەری نھا ژی ئەڤ رۆژا ‏پێنچشەمبی بۆ قوتابخانێن ئێڤاران بێھنڤەدان بوو، بەلێ ل سالا بۆری پشتی رۆژێن ‏شەمبی بۆ ھەموو قوتابخانان بوویە بێھنڤەدان، ئووفا قوتابخانێن ئێڤاران ژی بۆ ‏شەمبیێ ھاتبوو ڤەگوھاستن.‏

عومەر عەلی، رێڤەبەرێ گشتیێ پەروەردا پارێزگەھا دھۆکێ بۆ ئەڤرۆ دیار کر کو ھەتا ‏نھا چو بریار و نڤیسارێن فەرمی نەگەھشتینە دەستێ مە کو رۆژەک وەکو بێھنڤەدان ‏ژلایێ قوتابخانان ڤە بۆ مامۆستایان بھێتە دان و ب تنێ بریارا بۆ مە ھاتی ئەوە کو ‏بھێنڤەدانێن رۆژێن شەمبی نەماینە.‏

وەھبی یونس، سەرۆکێ لقێ دھۆکێ یێ سەندیکا مامۆستایان بۆ ئەڤرۆ دیار کر، ئەم ‏یێ ھەولددەین د ڤێ حەفتیێ دا، کۆمبوونەکا سەرانسەری ل گەل رێڤەبەریا گشتیا ‏پەروەردا دھۆکێ و ھەر 10 رێڤەبەرێن پەروەردێ ل پارێزگەھا دھۆکێ ئەنجام بدەین ‏و د ڤێ کۆمبوونێ دا ئەم ب ژڤانین دوو داخوازی و پێشنیاران ژ پەروەردێ بکەین، ‏داخوازیا ئێکێ ئەوە کو رێ بھێتە دان ھەر مامۆستایەک د حەفتیێ دا رۆژەکێ وەکو ‏بێھنڤەدان وەربگریت، بێکو زیان ب کەرتێ خواندنێ و خشتێ خواندنا قوتابیان ‏بکەڤیت.‏

دەربارەی داخوازیا دوویێ یا سەندیکا مامۆستایان ژی، وەھبی یونس دبێژیت: ئەم ‏دێ داخواز ژ پەروەدێ کەین کو ئازادیێ بدەنە ماموستایان، ھەر دەمێ وانێن خوە ‏یێن رۆژێ گۆتن، بچنە مالێن خوە و ل قوتابخانێ نەمینن، ب تنێ ل گۆرەی وانە و ‏خشتێ خوە ل قوتابخانێ بمینن و وەکو دی دەلیڤە ب وان بھێتە دان بچنە مالێن ‏خوە.‏