ئه‌ڤرۆنيوز:

په‌يڤدارێ وه‌زاره‌تا ئه‌وقافێ وكاروبارێن ئايينى ل هه‌رێما كوردستانێ، نه‌به‌ز ئيسماعيل، راگه‌هاند” پشتى به‌لاڤبوونا گوتگوتكه‌كێ كو مزگه‌فته‌ك ل رێيا هه‌ولێر – پردێ بوويه‌ جهێ مه‌ى فرۆشتنێ، پشتى مه‌ پێداچوونه‌كا هوور بۆ وى جهى كرى، دياربوو كو ئه‌و جهه ب چو جۆره‌كى مزگه‌فت نه‌بوو، به‌لكو خوارنگه‌ه بوو وده‌مه‌كى هاتبوو داخستن وب چو جۆره‌كى نه‌ مزگه‌فته‌ ونڤێژ ژى تێدا نه‌هاتينه‌ كرن”.

ئه‌ڤرۆنيوز:

چاڤدێره‌كێ سياسى راگه‌هاند، كوردان ئيك دۆز وداخوازيێن هه‌ڤپشك يێن هه‌ين  ل به‌غدا وهه‌ر حزبه‌كا ل ده‌رڤه‌ى ڤى چارچۆڤه‌ى دا دانوستاندنان ل به‌غدا بكه‌ت دێ زيانێ گه‌هينيته‌ خوه‌.

خالد ئه‌حمه‌د چاڤدێرێ سياسى وكارگێرێ لقێ ئێك يێ پارتى ديموكراتى كوردستان بۆ ئه‌ڤرۆنيوز گۆت” پێدڤيه‌ هه‌موو لايه‌نێن سياسى يێن كوردستانى ل دۆر ڤێ دۆزێ وداخوازيان  كۆم ببن ئه‌وژى داخوازيێن ره‌وانه‌ دچارچۆڤێ دستوورێ عيراقێ”.

خالد گۆت ژى” هه‌ر حزبه‌كا كوردستانى ل ده‌رڤه‌ى ڤى چارچۆڤه‌ى دا بكه‌ڤيته‌ ددانوستاندنان دا ل به‌غدا،  دێ زيان ڤێ كه‌ڤن هه‌م وه‌كو حزب وهه‌م وه‌كو دۆز، له‌وما هه‌موو لايه‌نين سياسى بۆ بابه‌تێ به‌غدا خوه‌ د چارچۆڤێ ڤێ دۆزێ دا ومافێن دچارچۆڤێ دستوورێ عيراقێ دا دبينن”..

ديار كر ژى” لايه‌نين سه‌ره‌كى يێن كو نوونه‌راتيا كوردستانێ دكه‌ن ودهه‌لبژارتنێن بۆرى دا ژى خه‌لكێ كوردستانێ باوه‌رى دايێ ئه‌وژى پارتى ديموكراتى كوردستان وئێكه‌تى نيشتمانى كوردستانه‌ وتێگه‌هه‌شتنه‌ك دناڤبه‌را هه‌ردو لايه‌نان دا يا هه‌ى بۆ دانوستاندنێ بۆ پێكئينانا حوكمه‌تا عيراقى يا نوو وهه‌تا ل سه‌ر ئاستێ ناڤخوه‌يێ كوردستانێ دا تێگه‌هه‌شتنه‌ك وهه‌لگرتنا به‌رپرسياره‌تيه‌كێ ژلايێ هه‌ردو حزبان ڤه‌ دهێته‌ كرن.”

ئه‌ڤرۆنيوز:

نوونه‌رێ حوكمه‌تا هه‌رێما كوردستانێ ل ئێكه‌تيا ئورۆپى دراگه‌هاندنه‌كێ دا به‌لاڤكر، ل ده‌ستپێكا حه‌فتيا داهاتى شانده‌كێ په‌رله‌مانێ به‌لجيكى دێ سه‌ره‌دانا هه‌رێما كوردستانێ كه‌ت ول گه‌ل سه‌ركردايه‌تيا سياسى يا هه‌رێما كوردستانێ كۆمبيت.

دلاوه‌ر خالد ئاژگه‌يى، نوونه‌رێ حوكمه‌تا هه‌رێما كوردستانێ ل ئێكه‌تيا ئورۆپى دياركر” شاندێ وه‌لاتێ به‌لجيكا ژ به‌رپرسێ په‌يوه‌نديێن ده‌رڤه‌ ل په‌رله‌مانێ به‌لجيكى وهژماره‌كا رۆژنامه‌ڤانێن وى وه‌لاتى پێك دهێت”.

خوياكر ژى” وى شاندێ دڤێت دووماهى گوهۆرينێن ل هه‌رێما كوردستانێ وده‌ڤه‌رێ ژ نێزيك ببينيت، هه‌روه‌سا به‌حسێ په‌يوه‌نديێن دناڤبه‌را هه‌ولێرێ وبه‌غدا دێ كه‌ن تاكو رۆناهيه‌ك ژى ل سه‌ر گوهۆرينێن عيراقێ پشتى هه‌لبژارتنان ل ده‌ڤ په‌يدا بيت كو پاشى راپۆرته‌كێ به‌رهه‌ڤ بكه‌ت و ل په‌رله‌مانێ به‌لجيكى بخوينيت”.

نوونه‌رێ حوكمه‌تا هه‌رێما كوردستانێ دياركر ژى كو پشتى هه‌رێما كوردستانێ برياره‌ ئه‌و شاند\ێ به‌لجيكى سه‌ره‌دانا رۆژئاڤايێ كوردستانێ ژى بكه‌ت ول وێرێ ژى راپۆرته‌كێ ل سه‌ر ره‌وشا نوكه‌ يا رۆژئاڤا به‌رهه‌ڤ بكه‌ت ول روونشتنا په‌رله‌مانێ به‌لجيكى ئاماژێ پێ بده‌ن.

ئه‌ڤرۆنيوز:

وه‌زاره‌تا كاره‌بێ ل هه‌رێما كوردستانێ رۆهكرنه‌ك ل دۆر كێمبوونا كاره‌بێ ل رۆژێن بۆرى به‌لاڤكر وئاماژه‌ ب ژڤانێ چاره‌سه‌ركرنا وێ كێشێ كر.

د رۆهنكرنا وه‌زاره‌تا كاره‌بێ دا هاتيه‌” ئاگه‌هداريا وه‌لاتيان دكه‌ين كو ژبه‌ر گرفته‌كا ته‌كنيكى ل بۆريا غازێ ( كۆرمۆر) وراوه‌ستانا هنارتنا غازا سروشتى بۆ ويستگه‌ها هه‌ولێرێ يا غازى، هه‌موو يه‌كه‌يێن ويستگه‌هێ راوه‌ستاينه‌ وبه‌رهه‌مئينانا كاره‌بێ ب رێژا 900 ميگاواتان ل تۆرا كاره‌با نيشتمانى يا كێمبووى”.

وه‌زاره‌تا كاره‌بێ دياركر ژى” نوكه‌ هه‌ردو وه‌زاره‌تێن كاره‌بێ وسامانێن سروشتى ل گه‌ل كۆمپانيا (دانا غاز) مژوولى چاره‌سه‌ركرنا وێ گرفتێ نه‌ وچاڤه‌رێ دهێته‌ كرن دده‌مێ 24 ده‌مژمێرێن داهاتى دا ره‌وش بهێته‌ ئاساييكرن.

ئه‌ڤرۆنيوز:

رێڤه‌به‌رێ ئۆفيسا كه‌نالێ (كوردسات) يێ ب سه‌ر ئێكه‌تى نيشتمانى كوردستان ڤه‌ ل پارێزگه‌ها كه‌ركووكێ، عومه‌ر غه‌ريب، ئه‌ڤرۆ شه‌مبيێ 25/8/2018 راگه‌هاند، گوله‌يه‌كا هاونێ ل به‌رامبه‌ر ئۆفيسا كه‌نالێ ناڤبرى كه‌فت.

عومه‌ر غه‌ريب بۆ مالپه‌رێ (بغداد اليوم) يێ عيراقى گۆت” گوله‌يا هاونى ئه‌ڤرۆ سپێدى ل به‌رامبه‌ر ئۆفيسا وان كه‌فت خوار”.

دياركر ژى گوله‌ ل نيڤا باخچێ ئاڤاهيێ كه‌نالێ كه‌ركووك يێ ئه‌سمانى كه‌فت كو ئۆفيسا كه‌نالێ كوردستان ژى تێدايه‌ ، به‌لێ وێ هێرشێ چو زيانێن گيانى نه‌بوون، تنێ زيانێن مادى ددووڤدا خوه‌ دا هێلان”.