ئەڤرۆ نیوز ، زنار تۆڤی :
ب بەهانەیا هەبوونا چەکدارێن پەکەکێ ئەڤرۆ ئەینیێ 17.8.2018 جارەکادی فرۆکێن سۆپایێ تورکی شکەفتا بابەکرا ل گەلیێ بازێ ل ناحیا کانی ماسێ بۆمبە بارانکر.
رێڤنگ محەمەد وەلاتیەکێ وێ دەڤەرێ یە بۆ ئەڤرۆ نیوز دیارکر: کو ئەڤرۆ ئەینیێ و ل دەمژمێر 12 نیڤرۆ جارەکادی فرۆکێن سۆپایێ تورکی شکەفتا بابەکرا ل گەلیێ بازێ ل ناحیا کانی ماسێ یێ سەر ب قەزا ئامێدیێ ڤە بۆمبە بارانکر و هەروەسا د ئەڤ سالەدا ئەڤە چەندیا جاران فرۆکێن تورکی ئەڤ شکەفتە بۆمبە باران کریە.
ئه‌ڤرۆنيوز:
رۆژناما (حوريه‌ت) يا توركى وێنێ هنده‌ك وه‌لاتيێن توركى به‌لاڤكرن كو ب كارێ سوتنا دۆلارێ ئه‌مريكى رادبن وه‌كو پشته‌ڤانى بۆ ليرێ توركى.
پشتى تێكچوونا په‌يوه‌نديێن ئه‌مريكا وتوركيا وسه‌پاندنا هژماره‌كا سزايێن ئابوورى ژلايێ ئه‌مريكا ڤه ل سه‌ر توركيا، ليرێ توركى ب شێوه‌كێ به‌رچاڤ ل به‌رامبه‌ر دۆلارێ ئه‌مريكى يێ هاتيه خوار.
ئه‌ڤرۆنيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان راگه‌هاند، پرسا چوونا شاندێ كوردستانى بۆ به‌غدا تنێ گرێداى پارتى نينه وچو ژڤان ژى بۆ سه‌ره‌دانا به‌غدا نه‌هاتينه دياركرن.
رۆژ نورى شاويس، ئه‌ندامێ مه‌كته‌با سياسى يا پارتى بۆ كه‌نالێ كوردستان 24 گۆت” پارتى دپه‌يوه‌نديه‌كا به‌رده‌وام دايه ل گه‌ل هه‌موو لايه‌نان ل دۆر وێ پرسێ”.
گۆت ژى” مه پێخوه‌شه كورد دئێك ده‌نگ بن وب ئێكگرتى بچنه به‌غدا”.
ل دۆر سه‌ره‌دانا چار لايه‌نێن نه‌رازى ل هه‌رێما كوردستانێ، گۆت” دكۆمبوونا داهاتى يا مه‌كته‌با سياسى يا پارتى دێ بريارێ ل سه‌ر وى بابه‌تى ده‌ين”.
ئه‌ڤرۆنيوز:
سه‌رۆك مه‌سعود بارزانى ل ساليادا دامه‌زراندنا پارتى ديموكراتى كوردستان راگه‌هاند، بۆ باشكرنا ره‌وشا ناڤخوه كو مه هه‌موويان گازنده ژ ڤێ ره‌وشێ يێن هه‌ين، پێدڤيه چاكسازى بهێته كرن وپێنگاڤێن گه‌له‌ك مه‌زن بهێنه هاڤيتن. به‌لێ ب راستى ئه‌ڤه دده‌مه‌كى دا دبيت كو هه‌لبژارتنه‌كا ناڤخوه‌يى ژى بكه‌ين بۆ هه‌رێما كوردستانێ وحوكمه‌ته‌كا نوو وحوكمه‌ته‌كا ب هێز بهێته دامه‌زراندن، بۆ وێ چه‌ندێ ئه‌م هه‌موو پشته‌ڤانيێ لێ بكه‌ين بۆ نه‌هێلانا وان كێماسيان وده‌ست ب ئه‌نجامدانا چاكسازيه‌كا بنه‌ره‌تى دهه‌موو بواره‌كى دا.
سه‌رۆك بارزانى گۆت ژى” ئێدى ئومێده‌وارم ل شوينا هزر ل وێ چه‌ندێ بهێته كرن هه‌لبژارتن بهێنه پاشخستن، هزر دوێ چه‌ندێ دا بكه‌ين چاوان ئه‌م هه‌موو پێكڤه هه‌لبژارتنه‌كا بێ گيروگرفت وزه‌لال ئه‌نجام بده‌ين. فه‌رموون ل نه‌ته‌وێن ئێكگرت، ل رێكخراوێن بيانى دچاڤدێريا ناڤخوه‌يا مه چ پێدڤيه بهێته كرن بۆ وێ چه‌ندێ چاڤدێرى بهێته كرن ونه‌هێلين چو گازنده‌ك بهێته سه‌ر وان هه‌لبژارتنان وهه‌لبژارتن بهێنه ئه‌نجامدان وبه‌ر ب دامه‌زراندنا حوكمه‌ته‌كا ب هێز بچين، ئه‌ڤه چاره‌سه‌ريه ومن ل ڤێرێ دڤێت ب راشكاوى بێژم وه‌كو پارتى ب چو شێوه‌كى ئه‌م ل گه‌ل پاشخستنا هه‌لبژارتنان نينين”.
ئه‌ڤرۆنيوز:
په‌يڤدارێ فه‌رميێ كۆمسيۆنا بلند يا هه‌لبژارتنان ل عيراقێ، دادوه‌ر له‌يس جه‌بر راگه‌هاند، كۆمسيۆنێ ئه‌نجامێن دووماهيێ يێن هه‌لبژارتنان بۆ دادگه‌ها فيدرالى ڤرێكرن بۆ په‌سه‌ندكرنێ.
له‌يس جه‌بر په‌يڤدارێ كۆمسيۆنێ دياركر” سه‌حكرنا تانێن ل سه‌ر هه‌لبژارتنان ژ لايێ ده‌سته‌يا دادوه‌رى ل دادگه‌ها ته‌مييزا فيدرالى ب دووماهى هاتيه پشتى ب دووامهى هاتنا قۆناغێن گرێداى وێ چه‌ندێ، له‌وما ئه‌نجامێن دووماهيێ يێن هه‌لبژارتنان بۆ دادگه‌ها فيدرالى هاتن ڤرێكرن ب مه‌ره‌ما په‌سه‌ندكرنێ”.
دياركر ژى”ب ڤێ چه‌ندێ جڤاتا دادوه‌رى يا بلند وكۆمسيۆنا بلند يا هه‌لبژارتنان ئه‌ركێن خوه يێن پێ هاتينه سپاردن تمامكرن”.
ئه‌ڤرۆنيوز:
سه‌رۆك مه‌سعود بارزانى ميداليا (بارزانيێ نه‌مر) پێشكێشى هژماره‌كا كه‌سوكارێن سه‌ربلندێن شه‌هيد وپێشمه‌رگێن شوره‌شا ئيلۆنێ كر.
ئه‌ڤرۆ ب هه‌لكه‌فتا ساليادا 72 يا دامه‌زراندنا پارتى ديموكراتى كوردستان وژدايكبوونا سه‌رۆك بارزانى، ل باژێرێ هه‌ولێرێ رێ وره‌سمه‌ك هاته سازكرن وتێدا كاكه‌مين نه‌جار سه‌رۆكێ جڤاتا سه‌ركردايه‌تيا پاريزگه‌ها هه‌ولێرێ په‌يڤا ب خێرهاتنێ پێشكێشكر.
پاشى سه‌رۆك بارزانى ميداليا (بارزانيێ نه‌مر) پێشكێشى كه‌سوكارێن سه‌ربلندێن شه‌هيد وپێشمه‌رگێن شوره‌شا ئيلۆنێ كر.
ئه‌ڤرۆنيوز:
كۆمسيۆنا بلند يا سه‌ربخوه يا هه‌لبژارتن وراپرسيان ل هه‌رێما كوردستانێ ده‌مێ نووكرنا تۆمارا ده‌نگده‌ران بۆ هه‌لبژارتنێن خۆلا پێنجێ يا په‌رله‌مانێ كوردستانێ كو برياره ل 30 ئيلۆنا 2018 بهێنه ئه‌نجامدان درێژكر.
دراگه‌هاندنه‌كێ دا، كۆمسيۆنا هه‌لبژارتن وراپرسيان ل هه‌رێمێ به‌لاڤكر، دكۆمبوونا ئه‌ڤرۆ يا كۆمسيۆنێ بريار هاته دان ب درێژكرنا ده‌مێ نووكرنا تۆمارا ده‌نگده‌ران تا ده‌مژمێر 3:30 پشتى نيڤرۆيا رۆژا شه‌مبيا داهاتى 18/8/2018″.
كۆمسيۆنێ دياركر ژى كو ل هه‌ردو رۆژێن ئه‌ينى وشه‌مبيێ بنگه‌هێن تۆماركرنا ده‌نگده‌ران ل به‌رده‌م وه‌لاتيان دێ دڤه‌كرى بن .
ئه‌ڤرۆنيوز:
سه‌رۆكايه‌تيا توركيا ئه‌ڤرۆ پێنجشه‌مبى 16/8/2018 راگه‌هاند، ئه‌نقه‌ره ل گه‌ل به‌غدا به‌حسێ زێده‌كرنا پرۆسێن له‌شكرى يێن توركى دژى په‌كه‌كێ كريه.
ئيبراهيم كالين، په‌يڤدارێ سه‌رۆكاتيا كۆمارا توركيا دكۆنگره‌كێ رۆژنامه‌ڤانى دا گۆت” دێ به‌رده‌وام بين ل سه‌ر ئه‌نجامدانا پرۆسێن له‌شكرى دژى په‌كه‌كێ، ب تايبه‌ت پشتى سه‌ره‌دانا سه‌رۆك وه‌زيرێن عيراقێ حه‌يده‌ر عه‌بادى بۆ توركيا”.
ئاشكراكر ژى” ل گه‌ل حه‌يده‌ر عه‌بادى به‌حسێ پرۆسێن له‌شكرى يێن به‌رفره‌هتر هاته كرن، كو ژ بلى شنگالێ، مه‌خموور وقه‌نديل ژى بخوه‌ڤه بگريت وئه‌و هێرشا دوهى ل شنگالێ هاتيه ئه‌نجامدان دوى چارچۆڤه‌ى دابوو”.
دياركر” ل رۆژێن داهاتى دێ پرۆسێن له‌شكرى دژى په‌كه‌كێ به‌رفره‌هتر لێ كه‌ين، ب تايبه‌تى وه‌كو شێوێ ل شنگالێ هاتيه ئه‌نجامدان”.
ئه‌ڤرۆ نیۆز،عه‌زیز هه‌ورامی
زێده‌تره ژ سێ سالان هه‌له‌بجه بوويه پارێزگه ژلايێ حوكمه‌ت وپه‌رله‌مان وسه‌رۆكاتيا هه‌رێما كوردستانێ ڤه، به‌لێ حوكمه‌تا عيراقێ ژ هه‌موو وان سۆزێن ل سه‌ر پارێزگه‌هبوونا هه‌له‌بجه داين په‌شێمان بوويه.
ل چه‌ند رۆژێن بۆرى شانده‌كێ پارێزگه‌ها هه‌له‌بجه سه‌ره‌دانا به‌غدا كر وچه‌ندين كۆمبوون ل گه‌ل مه‌زنه به‌رپرسێن حوكمه‌تا عيراقێ ئه‌نجامدان، نوكه پاريزگه‌رێ هه‌له‌بجه ب وه‌كاله‌ت وئامانج ره‌حيم سكرتێرێ جڤاتا وه‌زيرێن هه‌رێمێ رادگه‌هينن كو حوكمه‌تا عيراقێ رازيبوونا خوه دياركريه ل سه‌ر ڤه‌كرنا شه‌ش رێڤه‌به‌رى وفه‌رمانگه‌هان ل هه‌له‌بجه كو ل ده‌ستهه‌لاتا حوكمه‌تا عيراقێ دانه.
ئامانج ره‌حيم، سكرتێرێ جڤاتا وه‌زيرێن هه‌رێما كوردستانێ دبه‌رپه‌رێ خوه دا ل سه‌ر تۆرا جڤاكى يا فه‌يسبووكى به‌لاڤكر” ل هه‌له‌بجه ل رۆژا 9/8/2018 ب فه‌رمى رێڤه‌به‌ريێن كارتا نيشتمانى وره‌گه‌زنامه وپاسپۆرت، تابلۆيێن ترومبێلان دێ ب ناڤێ ( پارێزگه‌ها هه‌له‌بجه) كو دبيته پارێزگه‌ها 19ێ يا عيراقێ وپارێزگه‌ها چارێ ل هه‌رێما كوردستانێ”.
عه‌لى عوسمان، پارێزگه‌رێ هه‌له‌بجه ژى ب وه‌كاله‌ت ل فه‌يسبووكى خوه به‌لاڤكر” ب پشته‌ڤانيا دۆستێن مه، حوكمه‌تا هه‌رێمێ ل وێ سه‌ره‌دانا بۆ به‌غدا ئه‌نجامداى، مه شيا فه‌رمانا ڤه‌گرنا رێڤه‌به‌ريێن فيدرالى يێن حوكمه‌تا عيراقێ بۆ پارێزگه‌ها هه‌له‌بجه بده‌ستڤه‌بينين كو ئه‌ڤه‌ژى ده‌ستكه‌فته‌كێ مه‌زنه”.
ئه‌و رێڤه‌به‌رى وفه‌رمانگه‌هێن دێ ل هه‌له‌بجه هێنه ڤه‌كرن ئه‌ڤه‌نه: رێڤه‌به‌ريا ره‌گه‌زنامێ، تابلۆيا ترومبێلان، رێڤه‌به‌ريا كاروبارێن شارستانى، رێڤه‌به‌ريا هاتنوچوونێ، رێڤه‌به‌ريا پۆليسێن گۆمرگێ، رێڤه‌به‌ريا نشينگه‌هێ.
نيشاندان