ئه‌ڤرۆ نيوز:
بودجا سالا 2019ێ يا وه‌زاره‌تا به‌ره‌ڤانيا ئه‌مريكا ژ لايێ دونالد تره‌مپ سه‌رۆكێ ئه‌مريكا ڤه هاته ئيمزا كرن و ب فه‌رمى كه‌فته وارێ بجهئينانێ.
بوودجا سالا 2019ێ يا وه‌زاره‌تا به‌ره‌ڤانيا ئه‌مريكا كو تێدا 290 مليۆن دۆلار بۆ پێشمه‌رگه‌يى هاتينه ته‌رخانكرن، ژ لايێ دونالد تره‌مپ سه‌رۆك كۆمارێ ئەمریکا ڤه هاته ئيمزا كرن و ب فه‌رمى كه‌فته وارێ بجهئينانێ.
ئەڤرۆ نیۆز، سالار دۆسکی:
ب بەرھەڤبوونا ھژمارەکا رەوشەنبیر، میدیاکار و بالیوزێن وەلاتێن جیھانێ ل جیھانا عەرەبی و تایبەت ل وەلاتێ مسرێ، دوھی 13-8-2018 د رێورەسەکێ ژ ھەژی دا ل قاھیرە پایتەختێ وەلاتێ مسرێ، ئێکەتیا رێکخراوێن رۆھەلاتا ناڤین بۆ مافێن مرۆڤی و ئازادیان، دکتورا فەخری پێشكێشى سێ میدیاکار و ھەلبەستڤان پێ ھاتەدان. 
د رێورەسمەکێ ژ ھەژی دا، ھەلبەستڤان و میدیاکار عەدنان رەشید رێکانی ژ ھەرێما کوردستانێ، ل گەل ھەر دو میدیاکاران فاتیما ژ وەلاتێ مەغرب، نڤسیەر و راگەھاندکار ئەحمەد مرێوفی ژ مسری ناما دکتورایێ یا فەرخی پێ ھاتەدان کو پێک ھاتبوون، ژ بەر کارێ وان د بیاڤێ ئاشتی و ئازادیا گەلان دا ژ لایێ رێکخراوا ناڤبری ناما دکتورا فەخری پێ ھاتەدان.
میدیاکار، عەدنان رەشید رێکانی، بەرپرسێ لاپەرێ سیاسی یە ل رۆژناما ئەڤرۆ و پشكدارى د چه‌ندين فيستڤالێن عه‌ره‌بى دا كريه و چه‌ندين خه‌لات ل دۆر هه‌لبه‌ستێ ل سه‌ر ئاستێ وه‌لاتێن عه‌ره‌بى وه‌رگرتينه.
ئه‌ڤرۆ نيوز، ئيقبال عومه‌ر:
فروکێن تورکیا دەڤەرا ئامێدێ بوردومان دکەن ئەڤرۆ نیوز، ئێقبال عومەر: سپێدەهیا ئەڤرۆ فروکێن شەری یێن تورکیا سنوورێ قەزا ئامێدیێ بوردومان کر ب تایبەتی سنوورێ گوندێ گیزێ و نێزیک گوندێ دێرەشێ ل بەرێ گارێ.
دڤی واریدا ئیبراهیم دێرەشی موختارێ گوندێ دێرەشێ بو ئەفرۆ نیوز گۆت: (ئەڤرۆ دەردورێن دەمژمێر 10:00ێ سپێدێ فروکێن شەری یێن تورکیا ئاسمانێ دەڤەرا ئامێدیێ بەزاند و ب گرانی دناڤبەرا دێرەشێ و رەزیکێ و گیزێ بوردومان کر ، و ترسەکا زور لدەف خەلکی پیداکریە ب تایبەتی نوکە کو وەرزێ چنینا سماقێ یە و هزارا رەزیێن سماقێ هەنە و خەلک نەشێت بچیت بچنیت).
زێدەتر گوت: (پێشتر ژی فروکێن تورکیا نێزیکێ گوندی بوردومانکریە و چوار خانی هاتینە خراپکرن و هەتا نوکە کەس نەهاتیە قەرەبوکرن ، ژبەرڤێ ئەم دخوازین کو تورکیا بوردومانا خو رابگریت و پەکەکەش بارەگایێن خو ل جهێن ئاڤەدانی دوربکەت، ئەگەر بوردومان هەر یا بەردەوام بیت ئەم د گوندێن خو چول کەین و ئاوەرەیێ دەڤەرێن دی بین)
ئه‌ڤرۆ نيوز:
حوكمه‌تا مسرێ ماوه‌كه مژوولى پێشڤه‌برنا مه‌زنترين پرۆژه‌يه ژبۆ ئاڤاكرنا پايته‌خته‌كێ نوو كو دكه‌ڤيته بيابانێن رۆژهه‌لاتا قاهيره و كه‌نالێ سوێس.
ئه‌ڤ پايته‌خته ب ره‌نگه‌كێ وه‌سان دهێته ئاڤاكرن كو جهێ ژيارا 18 مليۆن كه‌سان تێدا ب ساناهيتر لێ بكه‌ت كو ل قاهيره دژين.
ئه‌ڤ پايته‌ختێ نوو 45 كيلۆمه‌تران يێ ژ رۆژهه‌لاتا قاهيره دووره و دێ بيته پايته‌ختێ ئيدارى و بازرگانى و بنه‌جهبوونا نوو و دڤێت سالا 2019ێ هه‌موو ئاڤاهى و باره‌گايێن سه‌رۆك كۆمارو سازيێن حكومى و فه‌رمى و له‌شكرى ب دووماهى بهێن و بۆ باژێرێ نوو بهێنه ڤه‌گوهاستن.
ل دۆر وێ يه‌كێ ژى به‌رپرسێن مسرێ گه‌شبينى يا خوه ژبۆ ده‌ركه‌فتن ژ باژێرێ نها نيشان دا كو ئاكنجيێن زێده تێدا هه‌نه و ژينگه‌ها وێ ژى پيس بوويه.
ئه‌ڤرۆ نيوز:
رێڤەبەرێ چاڤدێری و گەشەپێدانا جڤاکی ل ئامێدیێ راگەھاند، بێ پلانی و نەھەماھەنگیا وەزارەتا کار و کاروبارێن کومەلایەتی د پروسا دووبارەکرنا پشکنینا خودان پێدڤیێن تایبەت دا، بۆ ئەگەرێ نەداد پەروەریێ د دەر ئەنجامان دا و خەلکەکێ زور ژ ھاریکاری یا مەھانە بێ بەھر بوون.
مافپەروەر سەرھەنگ حسێن بۆ ئەڤرۆ دیار کر، ھەرسال ئەم پشکنینەکێ دکەین و داوی پشکنینا کێم ئەندامان ئەنجام دای ل 15-7-2017 بو و بەری دوو حەفتیان ئەنجامێن وان کێم ئەندامان زڤرین ئەوێن ل لێژنا پزیشکی دەرنەچووین، لێ د ڤی ئەنجامی لێژنا پزیشکی کو بۆ کێم ئەندامان دایە دیارکرن زۆر شاشی دناڤ وی ئەنجامێ نمرا بۆ کێم ئەندامان دانای ھەیە، ئانکو نەدادپەروەری د ڤان ئەنجامان دا ھەیە.
خویاژی کر، ل سنورێ پارێزگەھا دھوکێ چار ھزار و 404 ناڤ یێن زڤرین کو نەدەرچووینە ل پشکنینا لیژنا پزیشکی و ژ ڤان ھەمی ناڤان گەلەک یێن دەرچوی و ناڤێ وان جارەک دن دگەل دەرنەچوویان ژی یێ بۆ مە ھاتی، ئانکو ناڤێن وان دگەل دەرچوویان ژی یێ ھاتی و دگەل دەرنەچوویان ژی یێ ھاتی، مە دوونیایەکا تێبینیان ل سەر ھەیە و ئەو شاشیە ژ وەزارەتێ یا دەرکەفتی و ئەڤە دێ بیتە ئاریشەکا زورا مەزن بۆ وەلاتیان، ژ بەر کو ھاتن و چون بۆ وان زۆر یا ب زەحمەتە و زەرەرمەندێ ئێکێ د ڤێ پروسێ دا ھەر وەلاتیە.
مافپەروەری خوەیاکر، ئەڤە ھەر ژ 2015 ل ھەیڤا 10 تاکو نھا چۆ مۆچەک بۆ وان وەلاتیێن سەر ب چاڤدێرێن خێزانی نەھاتیە دابینکرن و یێن ھاتیە راگرتن نەک برین، و گۆت: پشتی ڤێ پشکنینا مە ل دووماھی جار ئەنجام دای ئەم د گەشبینین دێ چارەنڤیسێ وان یێ باش و دیاربیت، چونکو گەلەک د ناڤ وان دا کێم ئەندام بوون و ھاتبونە ڤەگوھاستن بۆ ناڤ لیستێن چاڤدێرێن خێزانی ژ بەر تەمەنێ وان یێ سەر 60 سالیێ دا و ئەڤە دەلیڤەکا زێرینە بۆ وان کێم ئەندامان کو بزڤرنە سەر لیستا کێم ئەندامان و مفادارببن ژ وەرگرتنا ھاریکاریێ.
ئه‌ڤرۆ نيوز:
تاخێ قەرەچان دکەڤیتە سەنتەرێ بازارێ دھۆکێ، گەلەک دەم ب سەرڤەچوون و گەلەک ناڤ بۆ ڤی تاخی ھاتنەدانان، لێ ھەر نەشیان ناڤێ قەرەچان بەرزە بکەن. رەوشەنبیرەکێ قەرەچان ژی دیار کر کو ئەو شانازیێ دبەن ئەو تاخ ب ناڤێ قەرەچانە و گۆت: ل سالا 1959 ھەتا 1961 قەرەچ ھاتینە دھۆکێ و ل وی تاخی ژیاینە و گەلەک مالێن قەرەچان وی تاخی ھەبوون، لێ شەرەک دناڤبەرا قەرەچان دا دروست بوو و خوینداری دروست بوو، قەرەچ ھەر ھندەک خێزان بۆ خوە چوون.
یونس زاھر پیرۆ، کەساتیەکێ قەرەچانە بەحسێ دیرۆکا قەرەچان ل دھۆکێ بۆ رۆژناما ئەڤرۆ گۆت: ل سالا 1959 ھەتا 1961 قەرەچ ھاتینە دھۆکێ و ل وی تاخی ژیاینە و گەلەک مالێن قەرەچان وی تاخی ھەبوون، لێ شەرەک دناڤبەرا قەرەچان دا دروست بوو و خوینداری دروست بوو، قەرەچ ھەر ھندەک خێزان بۆ خوە چوون، ل دووڤ دا مالێن مە و مامێ من ھەر وی تاخی بووینە و شانازیێ دبەین کو ھێشتا ناڤێ قەرەچان ل سەر وی تاخی یە و ھەتا نەبێژنێ تاخێ قەرەچان کەسەک نزانیت بەحسێ کیش تاخی یە.
خورشید یەحیا سەلیم، ئاکنجیێ تاخێ قەرەچانە، ل دەسپێکا سالێن شێستان خانی ل وی تاخی ئاڤاکریە، بۆ ئەڤرۆ گۆت: گەلەک تشتەکێ نورمال بوو وەکی گۆتن تاخێ قەرەچان، مە کرێدارەک کربوو خانی ڤە، پشتی شورەشێ ل گەل پیرا خوە باپیرێ خوە ھاتینە خانی چونکو من دھۆکێ خواند، ھەموو خانی ئاخ بوون و خانیێ مە تەنشت خانیێ واحد بوو و خانیێ مە بەری یێ واحد ھاتبوو ئاڤاکرن.
خورشید سەلیم، بەحسێ بیرھاتنێن زارۆکینیێ کر دیار کر کو چالەکا وی تاخی ھەبوو ھەموو گێچ بوو و ئەوا مفا ژ وێ گێچێ وەرگرت بۆ کارێن دەستی بکاردئینان ل وانا ھونەرێ ل قوتابخانێ، دیسا بیرھاتنەکا وی تاخی ل بیرا منە ل دووماھی یا سالێن شێستان، نێزیک وێ مزگەفتێ سەر قوتابخانا خەبات دا گرەکێ مەزن بوو و ترۆمبێل گەلەک ب زحمەت ب سەر دکەفتن، وی دەمی پارێزگەرێ دھۆکێ عەگید ھاتبوو گوھورین و ئێکێ دی ھاتبوو جھێ وی، نزانم محەمەد رەسول بوو بیرا من ناھێت، ب تنێ ترۆمبێلا خوە دا بوو و دزڤری دا چیتە گەلی و پولیسەک ل گەل دابوو، خدرو ل گەل مە یاریا چکلانێ دکر، جلک د دەستێ خدروی دا بوون و خدرو ھاڤێت جاما پشتێ یا پارێزگەرێ دھۆکێ دا و شکاند و ترۆمبێل راوەستیا و پولیس دەرکەفت خدرو یە ھەر پارێزگەر ژ ترۆمبێلا خوە نەھاتە خوارێ و چوو.
یەحیایی ئەو ژی گۆت: باپیرێ من ئەو ئەرد کری بوو و ئاشکراکر کو ھەر پیەک ئانکو جھێ مەترێ دگۆتنێ پێ ب سێ دەرھەمان کری بوو.
ھێرش کەمال رێکانی، بەرپرسێ سەنتەرێ قوبەھان بۆ ڤەکۆلین و بەلگەنامە و دەستنڤێسێن بەھدینان بۆ رۆژناما ئەڤرۆ گۆت: ئەڤ تاخە ل دووماھی یا سالێن پێنجی یان ھاتیە ناڤکرن ب تاخێ قەرەچان، نەخشێ تاخێن دھۆکێ یێ سالا 1923 ھەیە، لێ ناڤێ تاخێ قەرەچان ل گەل دا نینە، ناڤێ تاخێ قەرەچان نە فەری یە، بەلکو ناڤەکە خەلکی بۆ خوە دانایە سەر، ناڤێ قەرەچان د ناڤا تومارێن خواندنگەھێن کچان و کوردان دا ل دناڤبەرا سالێن 1928 ھەتا1932 دا ھاتیە، ژیانا قەرەچان نەھاتیە دیارکرن.
ئه‌ڤرۆ نيوز:
پەیڤدارێ وەزارەتا ساخلەمیا حوکمەتا ھەرێما کوردستانێ بۆ رۆژناما ئەڤرۆ دیار کر کو وەزارەتا ساخلەمیێ داخوازا دامەزراندنا کارمەندێن خوەبەخش ل کەرتێ ساخلەمیێ کاردکەن ژ جڤاتا وەزیرێن ھەرێما کوردستانێ کریە کو ب شێوێ گرێبەست بھێنە دامەزراندن و دبێژیت: “جڤاتا وەزیران ب شێوەکێ زارەکی رازیبوونا خوە ل سەر داخوازیا مە دیارکریە”.
د. خالس قادر، پەیڤدارێ وەزارەتا ساخلەمیا حوکمەتا ھەرێما کوردستانێ ئاشکرا کر نێزیکی دو ھزار کارمەندان کو دەرچوویێن پشکێن ساخلەمیێ نە ل کۆلیژ و پەیمانگەھان بۆ دەمێ چەند سالانە ب شێوەکێ خوەبەخش د ناڤ کەرتێ ساخلەمیێ دا ل ھەرێما کوردستانێ کار دکەن، لێ ژ بەر خانەنشینبوون و ھێلانا دەوامێ و ئەگەرێن دی ڤالاھیەکا مەزن ل نەخۆشخانە و بنگەھێن ساخلەمیێ پەیدابوویە ژ بەر ڤێ چەندێ وەزارەتا ساخلەمیێ داخواز ژ جڤاتا وەزیران کریە ھژمارەکا ڤان کارمەندێن خوەبەخش ب شێوێ گرێبەست ب دامەزرینیت.
ناڤھاتی ئاماژە دا وێ چەندێ کو جڤاتا وەزیرێن ھەرێما کوردستانێ ب شێوەکێ زارەکی رازیبوونا خوە ل سەر دامەزراندنا ھژمارەکا وان کارمەندێن خوەبەخش ل کەرتێ ساخلەمیێ کار دکەن دیارکریە کو ب شێوێ گرێبەست بھێنە دامەزراندن، لێ ئەو چاڤەرێ نڤیسارا رازەمەندیێ نە ب گەھیتە دەستێ وان و گۆت: “ھەر دەمێ نڤیسارا رازەمەندیێ گەھشتە مە ل وی دەمی دێ رێنما و مەرجێن دامەزراندنێ ئاشکرا کەین”.
ئەڤرۆ نيوز:
رێڤەبەرێ گشتی یێ گەشتوگۆزارێ ل پارێزگەھا دھۆکێ بۆ رۆژناما ئەڤرۆ دیار کر کو وان ھەموو بەرھەڤی بۆ ھاتنا گەشتیاران ل رۆژێن جەژنا قۆربانی کرینە و گۆت: “دەستەیا گشتی یا گەشتوگۆزارێ داخوازا ژ مە کریە ھەر ژ رۆژا 18-8-2018ێ و ھەتا 28-8-2018ێ ئامارا گەشتیارن وەرگرن، ئانکو د 11 رۆژان دا ژ بلی گەشتیارێن ناڤخۆ ئەم پێشبینیا ھاتنا پتری 70 ھزار گەشتیاران ژ پارێزگەھێن عیراقێ و وەلاتێن دەوروبەر بۆ پارێزگەھا دھۆکێ دکەین”.
عوبەیدوللا داود، رێڤەبەرێ گشتی یێ گەشتوگۆزارێ ل پارێزگەھا دھۆکێ ئاشکرا کر کو د ھەموو ھەلکەفتان دا رێڤەبەریا گشتی یا گەشتوگۆزارێ ل دھۆکێ پلانەکا تایبەت بۆ ھاتنا گەشتیاران د دانیت ژ بەر ڤێ چەندێ بۆ جەژنا قۆربانی ژی رێڤەبەریا ناڤھاتی پلانەکا باش بۆ ھاتنا گەشتیاران بۆ سنوورێ پارێزگەھا دھۆکێ دانایە و ھەموو بەرھەڤی بۆ ڤێ مەرەمێ کرینە و گۆت: “مە نێزیکی 20 لیژنێن تایبەتمەند بۆ خزمەتکرنا گەشتیارێن د جەژنا قۆربانی دا سەرەدانا پارێزگەھا دھۆکێ دکەن پێک ئیناینە و ئەڤ لیژنە دێ ل دەرگەھێن سەرەکی یێن گەشتیار تێ ڕا دھێنە دھۆکێ و ل جھێن گەلەک گەشتیار دچنێ ھێنە بەلاڤکرن، بۆ وێ چەندێ خزمەتا گەشتیاران بکەن و شریناھی و ئاڤێ و رێبەرێن گەشتیاری ل سەر بەلاڤ کەن و سەرەرایی ڤێ چەندێ ئەڤ لیژنە دێ بزنس کارتان ژی کو ھژمارێن رێڤەبەریا مە ل سەرن ل سەر گەشتیاران بەلاڤ کەن بۆ وێ چەندێ ھەکە گەشتیاران ئاریشەک یان داخوازەک ھەبیت ب گەھینتە مە”.
ناڤھاتی ئاماژە دا وێ چەندێ کو رێڤەبەریا وان رێژەکا گەلەک باش یا دەست ئاڤان ل زالگەھێن سەرەکی یێن گەشتیار دھێنە د ناڤ دھۆکێ دا و ل جھێن گەشتیاری د ھەوەکێ دا پاقژ و نووژەنکرینە داکو بێ بەرامبەر د خزمەتا گەشتیاران دا بن و سەرەرایی ڤێ چەندێ وان ھندەک لافیتە ژی بۆ پیرۆزکرنا جەژنا قۆربانی و بخێرھاتنا گەشتیاران بەرھەڤکرینە و دێ ل جھێن گەشتیار قەست دکەنێ و ل زالگەھان ھێنە ھەلاویستن و زێدەباری ڤێ چەندێ چەندین ئاھەنگێن پێشۆازیێ و خوەشیێ ل بنگەھێن گەشتیاری ب تایبەت ژ ئالیێ کەرتێ تایبەت ڤە بۆ گەشتیاران دێ ھێنە گێڕان گۆت: “مە ھەماھەنگیەکا باش دگەل ھەموو فرۆشگەە و مۆلێن مەزن ھەیە کو داشکاندنێن باش بۆ گەشتیاران بکەن ژ بلی ڤێ چەندێ ھەماھەنگیا مە ل گەل کۆمەلا ئۆتێل و مۆتێل و خوارنگەھان و کۆمەلا کۆمپانیێن گەشتیاری و حەج و عومرێ و ھەموو سازیێن میری یا خورتە ب تایبەت رێڤەبەریێن ئاسایش و پۆلیس و ھاتنوچوون و ساخلەمی و بەرەڤانیا باژێری و چاڤدێریا بازرگانی یێن دھۆکێ و ھەموو قایمقامیا بۆ وێ چەندێ کو ئەم بشێن زێدەتر ئاسانکاریا و خزمەتا گەشتیاران بکەین”.
ناڤھاتی خویا کر کو د رۆژێن جەژنا قۆربانی دا دێ ھژمارەکا بەرچاڤ یا خوارنگەھان بۆ خزمەتکرنا گەشتیاران د ڤەکری بن و وان چو ئاریشێن ئاکنجیبوونێ ژی بۆ ھاتنا ڤان گەشتیاران نابن، چونکی ھەموو دەمان ئەو یەدەکەکی د دەستێ خوە دا دھێلن بۆ وێ چەندێ ھەکە رێژا گەشتیاران ژ پێشبینیا وان زێدەتربوو و گۆت: “دخوازم ھەموو سازیێن پەیوەندیدار پێکڤە کار بکەن بۆ خزمەتکرنا گەشتیاران و ئەم ب ھیڤینە ب پشتەڤانیا ھەموو لایەکی پارێزگەھا دھۆکێ ببیتە پایتەختێ گەشتوگۆزاری ل ھەرێما کوردستانێ و ئەم د گەشبینین ئەڤ ئومێدا مە ل دەمەکێ نێزیک دێ چیتە د وارێ بجە ئینانێ دا”.
ئەڤرۆ نيوز:
سەرۆکێ شۆرەشا ئیسلامی یا ئیرانێ عەلی خامنەیی راگەھاند کو ھەڤدیتنێن بەری نھا د ناڤبەرا ئیرانێ و ئەمریکا دا ل دۆر بەرنامێ ئەتۆمی شاشیەکا مەزن بوو و پێدڤی بوو ئیرانێ ئەو یەک نەکربا، چونکو ئەمریکا چو دەمەکێ جھێ باوەریێ نەبوویە و ئێدی ئیران بۆ چارەکرنا پرسێن خوە ل گەل ئەمریکا دانوستاندنان ناکەت و گۆت: (ئەز دەستپێکێ ژی ل دژی دانوستاندنان بووم، لێ ھەڤالێن مە د رژد بوون کو ئەم پرسێن خوە ل گەل ئەمریکا ب رێیا دانوستاندنان چارە بکەین، لێ نھا ئاشکرا بوو کو ئەمریکا ناخوازیت پرس چارەسەر بن، بەلکو ئەمریکا دخواست ھەموو مەرجێن خوە ل سەر مە بسەپینیت و بێگومان ئەم ڤێ یەکێ قەبوول ناکەین).
عەلی خامنەیی د پشکەکا دی یا ئاخڤتنا خوە دا ئەو یەک ژی دیار کر کو ئەمریکا ناھێلیت پرسێن رۆژھەلاتا ناڤین بھێنە چارەکرن و قەیرانا نھا ل رۆژھەلاتا ناڤین ھەموو بەرھەمێن سیاسەتا ئەمریکا نە، ژ بەر ھندێ ژی ئەز جارەکا دی دبێژم کو دانوستاندنێن بەری نھا ل گەل ئەمریکا ھاتنە کرن شاشیەکا مەزن و ستراتیژی بوو و ئێدی ئەو یەک ب چو رەنگەکێ دوبارە نابیت و گۆت: (ئەز باوەرم ھەموو کەسەکێ نیەتا ئەمریکا یا خراب دیت و بۆ ھەموو وەلاتەکێ ژی ئاشکرا بوو کو ئەمریکا ناخوازیت پرسگرێکان چارە بکەت، بەلکو وان دڤێت پرسێن ھەی مەزنتر بکەن و ژ بەر ھندێ ژی ئێدی ئیران ب چو رەنگەکێ ل گەل ئەمریکا دانوستاندنان ناکەت).
نيشاندان