ئه‌ڤرۆ نيوز:
جه‌مال شوكر، جێگرێ به‌رپرسێ مه‌لبه‌ندێ 2 كه‌ركووك يێ ئێكه‌تى نشتيمانى كوردستان راگه‌هاند كو گه‌له‌ك يا فه‌ره پارتى ل كه‌ركووك هه‌بيت، چونكو د رابردويى دا زيانا زۆر يا ب مه كه‌فتى ب نه‌بوونا پارتى.
گۆتژى: “هه‌ر ژ ده‌سپێكێ مه پێخوش بوو هه‌موو حزبێن كوردستانى ڤه‌گه‌رنه كه‌ركووك ب تايبه‌ت پارتى ديموكراتى كوردستان، هه‌ر وه‌كو كه‌ركووكى ژى هه‌رده‌م ب نه‌بوونا پارتى زيانه‌كا زێده گه‌هشتيه مه”.
ئه‌ڤرۆ نيوز:
ب گۆره‌يى رويته‌رز ئه‌بۆ به‌كر به‌غدادى ده‌ركه‌فته‌ڤه پشتى بۆرينا ساله‌كێ ژ ديارنه‌مانا و د پشت راست ژى نينن كا ئه‌و تۆمارا ده‌نگى يا وى يه يان نه و كه‌نگى هاتيه تۆماركرن.
ب گۆره‌يى ئاژانسا ناڤبرى ئه‌بۆ به‌كر به‌غدادى رێبه‌رێ داعش داخوازا خوه‌راگريێ ل چه‌كدار و لايه‌نگرێن خوه كريه و دانپێدان ب ژ ده‌ستدانا وى رووبه‌رى كريه يێ ژ ئه‌گه‌رێ گورزێن ئه‌سمانى ل ڤێ دووماهيێ ژ ده‌ست دايى و تووشى وێ زيانا مه‌زن بووين.
ئه‌ڤ گۆتارا ئه‌بۆ به‌كر به‌غدادى يا دوهى ل دامه‌زراوا ميديايى يا فرقان به‌لاڤبووى پشتى بۆرينا ساله‌كێ يه ل سه‌ر ديارنه‌مانا رێبه‌رێ وێ رێكخراوا تيرۆرستى.
ئه‌و د ڤێ تۆمارێ دا، ته‌كستى ل سه‌ر وێ چه‌ندێ دكه‌ت كو سه‌ركه‌فتن و شكه‌ستن گرێدايى باژێره‌كى يان باژێركه‌كى نينه، يا گرێدايى وێ چه‌ندێ ژى نينه كا كى ل ئه‌سمانى ب هێزتره و مووشه‌كێن كيشوه‌ران دبڕن هه‌نه و بۆمبێن زێره‌ك زێده‌تر هه‌نه.
رويته‌رز دايه زانين ژى كو هێشتا چو جهێن شاره‌زايێن وارێ ته‌كنۆلۆژيايێ ئاماژه ب وێ چه‌ندێ نه‌كريه كا ئه‌و تۆمارا ده‌نگى به‌غدادى بوويه يان نه و كا ب دروستى كه‌نگى هاتيه تۆماركرن و ل كيرێ هاتيه تۆماركرن.
ئه‌ڤرۆ نيوز:
سێ گولێن هاونى ب تاخه‌كێ كوردى ل خورماتۆ كه‌فتنه خوار و بريندار و زيانێن ماددى ژى ل پشت خوه هێلان.
ب گۆره‌يى پێزانينێن ل به‌ر ده‌ست ئه‌ڤرۆ رۆژا پێنجشه‌مبى 23ى ته‌باخا 2018ێ سێ گولێن هاونى ب تاخێن كوردنشين يێ ئيمام ئه‌حمه‌د و عه‌سكه‌رى ل ناڤه‌راست و خوارا خورماتۆ كه‌فتنه خوار.
ژ ئه‌نجامێ كه‌فتنه خوارا سێ گولێن هاونى، كه‌سه‌ك بريندار بوويه و زيانێن ماددى يێن زێده ژى ب وان جهان كه‌فتينه.
پشتى خيانه‌تا 16ى ئوكتۆبه‌رێ ل سالا بۆرى و راده‌ستكرنا ده‌ڤه‌رێ ب ده‌ستێ حه‌شدا شه‌عبى خه‌لك ئاواره بوون و ژماره‌كا زۆر يا خانوو و مالێن وه‌لاتيان ژى هاتنه تالانكرن و سۆتن.
ئەڤرۆ نیوز ، زنار تۆڤی:
پەیڤدارێ دەستەیا گەشتوگۆزارا هەرێما کوردستانێ بۆ ئەڤرۆ نیوز دا خویاکرن، کو د شەش هەیڤێن بوری یێن ئەڤ سالە دا، ملیۆنەک و 310 ھزار گەشتیاران سەرەدانا ھەرێما کوردستانێ کریە.
نادر روستی پەیڤدارێ دەستەیا گەشت و گوزارا ھەرێما کوردستانێ زێدەتر دیارکر: ئەڤ ساله رێژەکا باش یا گەشتیاران هاتینە هەرێما کوردستانێ و ل ماوێ ڤان شەش هەیڤێن بوری یێن ئەڤ سالە دا ملیۆنەک و 310 ھزار گەشتیار ھاتینە ھەرێما کوردستانێ و 82% ژ وان گەشتیاران ژ ناڤەراست و باشۆرێ عیراقێ هاتینە، هەروەسا 13% ژ وان گەشتیاران ژ ئیرانێ هاتینە و پێنج ژ سەدێ ژ وەلاتێن بیانی ھاتینە.
ناڤهاتی زێدەتر گۆتیە: ژ ئەگەرێ گرتنا فرۆکخانان و داکەفتنا دراڤێ ئیرانی و ھەبوونا رسووماتان ل سەر گەشتیارێن ئیرانێ، د ماوێ ڤان شەش هەیڤێن بوری دا ھاتنا گەشتیارێن ئیرانی و بیانی بۆ ھەرێمێ کێم بوویه، بەلێ ب رەنگەکێ گشتی هەکە بەراورد بکەین ب شەش هەیڤێن سالێن بوری هژمارا گەشتیاران گەلەک زێدە بووینە.
ئه‌ڤرۆ نيوز:
د ماوێ دو رۆژێن جه‌ژنا قوربان دا، نێزيكى 30 هزار گه‌شتياران كو پتريا وان ل خوار و ناڤه‌راستا عيراقێ هاتينه، سه‌ره‌دانا جهێن گه‌شتيارى يێن پارێزگه‌ها دهۆكێ كريه.
ل پارێزگه‌ها دهۆكێ زێده‌ترى 800 جهێن گه‌شتيارى هه‌نه و به‌رده‌وام د بهێنڤه‌دان و هه‌لكه‌فتان دا ژماره‌كا زۆر يا گه‌شتياران ژ هه‌موو جهێن عيراقێ و هه‌رێمێ و ده‌رڤه ژى سه‌ره‌دانا وان جهێن گه‌شتيارى دكه‌ن.
ب گۆره‌يى پێشبينيێن رێڤه‌به‌ريا گه‌شتوگۆزارا دهۆكێ، د هه‌ر رۆژه‌كا جه‌ژنێ دا 15 هزار گه‌شتياران سه‌ره‌دانا پارێزگه‌ها دهۆكێ كريه و د هه‌ردو رۆژێن به‌رى جه‌ژنێ ژى دا، 19 و 20ى ته‌باخا 2018ێ دا، نێزيكى 21 هزار گه‌شتياران سه‌ره‌دانا پارێزگه‌ها دهۆكێ كريه.
ب گۆره‌ى ڤان ئاماران بيت دهێته پێشبينكرن هه‌تا بهێنڤه‌دانێن جه‌ژن ب دووماهى دهێن سه‌ره‌دانێن ڤان جهێن گۆزارى بگه‌هيته نێزيكى 100 هزار كه‌سان.
ئه‌ڤرۆ نيوز:
چه‌كدارێن گرۆپێن سوريان كو ژ لايێ توركيا ڤه دهێنه پشته‌ڤانيكرن ل ناحيا راجو يا ب سه‌ر ب باژێرێ عه‌فرينێ خالێن پشكنينێ داناينه و ژ ئه‌گه‌رێ وێ چه‌ندێ “مال و مولكێ كوردان، وه‌كو ده‌ستكه‌فتێ شه‌رى ل قه‌له‌م ده‌ن” د به‌رده‌وامن د تالانكرنا وان بێ چو رێگريه‌ك.
ب گۆره‌يى راپۆرته‌كێ كو ئه‌ڤرۆ نيوز ژ مالپه‌رێ رووداو وه‌رگرتيه؛ تێدا به‌لگه‌نامه‌كا فه‌رمى ب ده‌ست كه‌فتيه و تێدا داخزاز ژ دامه‌زراوێن ئه‌منى يێن ناحيا راجۆ يا سه‌ر ب عه‌فرينێ ڤه كريه “رێ بده‌ن ب ده‌ربازبوونا شوفێرێ بارهه‌لگره‌كێ كو ئاسن باركريه ب به‌هانه‌يا وێ چه‌ندێ كو پشكه‌كن ژ ده‌ستكه‌فتێن فرقا 9″.
ل سه‌ر وێ به‌لگه‌نامێ ده‌سته‌واژێ “كۆمارا عه‌ره‌بى يا سوريا – سۆپايێ نشتيمانى – دامه‌زراوا ئه‌منى يا هه‌ڤپشك ل راجۆ” نڤيسيه و مورا دامه‌زراوا ئه‌منى و ئيمزا ئه‌بۆ عوده‌يى سه‌رۆكێ دامه‌زراوێ ل سه‌ره.
به‌لگه ل 3ى تيرمه‌ها 2018ێ بۆ شوفێره‌كى ب ناڤێ حه‌يده‌ر به‌عاج ده‌رچوويه و هه‌تا 4ى تيرمه‌ها 2018ێ كار پێ دهێته كرن.
ئه‌ڤرۆنيوز:
سه‌رۆكێ تيما راگه‌هاندنا حه‌جيێن هه‌رێما كوردستانێ ل سعوديێ راگه‌هاند، ل رۆژا 28/8/2018 كاروانێ ئێكێ يێ حه‌جيێن هه‌رێما كوردستانێ دێ زڤريت، هه‌كه فرۆكێن مه دمه‌زن بن، ده‌مێ زڤرينا هه‌موو كاروانان دێ كێمتر بيت.
نه‌به‌ز ئيسماعيل، سه‌رۆكێ تيما راگه‌هاندنا حه‌جيێن كوردستانێ ل سعوديێ ،ل دووڤ مالپه‌رێ كوردستان تى ڤى، گۆت” برياره ل رۆژا 28/8/2018 كاروانێ ئێكێ يێ حه‌جيێن كوردستانێ ژ وه‌لاتێ سعوديێ بگه‌هيته فرۆكخانا نێڤده‌وله‌تى يا هه‌ولێرێ، پاشى زڤرينا حه‌جيان دێ يا به‌رده‌وام بيت”,
گۆت ژى” هه‌كه فرۆكێن مه دمه‌زن بن، ده‌مێ زڤرينا هه‌موو كاروانێن حه‌جيان دێ كێمتر بيت”.
بۆ حه‌جا ئه‌ڤ ساله، پێنج هزار و469 وه‌لاتيێن هه‌رێما كوردستانێ بۆ بجهئينانا فه‌ريزا حه‌جێ سه‌ره‌دانا مه‌كه ومه‌دينه كريه، ژوان 600 هه‌تا 700 كه‌سان ب شێوێ بازرگانى يه.
ئه‌ڤرۆنيوز:
فه‌رماندێ ميليشيێن حه‌شدا شه‌عبى بريار دا هه‌موو باره‌گايێن حه‌شدێ دناڤ باژێرێن سه‌ره‌كى يين عيراقێ دا بهێنه داخستن وبهێنه ڤه‌گوهاستن بۆ ده‌رڤه‌ى باژێران.
فه‌رمانده‌يا حه‌شدا شه‌عبى دبه‌ياننامه‌كێ دا به‌لاڤكر هه‌موو باره‌گايێن حه‌شدێ بهێنه ڤه‌گوهاستن بۆ ده‌رڤه‌ى باژێران وهه‌موو نڤيسينگه‌هێن حه‌شدێ ژى دناڤ باژێران دا بهێنه داخستن ونابيت ب چو ناڤه‌كى دناڤ باژێران دا بمينن، ب تايبه‌تى ل وان ده‌ڤه‌رێن ژده‌ستێ داعشێ هاتينه ئازادكرن.
وێ به‌ياننامێ كو ب ئيمزايا ئه‌بو مه‌هدى ئه‌لموهه‌ندس جێگرێ سه‌رۆكێ ده‌سته‌يا حه‌شدا شه‌عبى ل سه‌ره داخوازكر چو په‌يوه‌ندى دناڤبه‌را ميليشيێن حه‌شدا شه‌عبى ومه‌رجه‌عێن شيعان دا نه‌مينيت وهه‌ر په‌يوه‌نديه‌كا هه‌بيت، بهێته هه‌لوه‌شاندن.
ئه‌ڤرۆنيوز:
مالپه‌ره‌كێ ئيرانى يێ ب سه‌ر بالێ ريفۆرمخوازان ڤه راپۆرته‌ك ل دۆر بلندبوونا رێژا ( هه‌ڤژينيا موتعێ) كو شيعه رێ ب ڤێ جۆره هه‌ڤژينيێ دده‌ن به‌لاڤكر وتێدا دياردكه‌ت كو وه‌لاتيێن عيراقى بۆ وێ جورێ هه‌ڤژينيێ سه‌ره‌دانا ئيرانێ دكه‌ن.
باژێرێ مه‌شهه‌د دكه‌ڤيته پارێزگه‌ها خوراسان ل باكوورێ رۆژهه‌لاتا ئيرانێ، ژبه‌ر هه‌بوونا مه‌زارێ ( عه‌لى كورێ موسى ره‌زا) كو ئيمامێ هه‌شتێ يه شيعانه (ژ سه‌رجه‌مێ 12 ئيمامان). ب باژێره‌كێ پيرۆز يێ شيعان دهێته هژمارتن، ل دووڤ مالپه‌رێ (خه‌به‌ر ئۆنلاين)، به‌رپرسێن وى باژێرى راگه‌هانديه كو ژبه‌ر هاتنا خوارا بهايێ دراڤێ ئيرانى، مه‌زاختيێن گه‌شتيارێن بيانى يێن كێمتر بووين وژئه‌گه‌رێ وێ چه‌ندێ هژماره‌كا مه‌زن يا گه‌شتياران سه‌ره‌دانا مه‌شهه‌د دكه‌ن، جێگرێ رێڤه‌به‌رێ گشتيێ گه‌شتوگوزارێ ژى رادگه‌هينيت” ژبه‌ر هاتنا خوارا بهايێ دراڤێ ئيرانى رێژا گه‌شتيارێن عيراقى بۆ مه‌شهه‌د 90% زێده‌بوويه”.
دپشكه‌كا وێ راپۆرتا ريفۆرمخوازان دا هاتيه” هژماره‌كا مه‌زن يا گه‌شتيارێن عه‌ره‌ب كو زگوردن وبێ ئه‌ندامێن خيزانێن خوه دهێنه وى باژێرى بۆ گريدانا وێ جۆره هه‌ڤژينيێ، ئه‌وا جهێ ناكۆكيێ قه‌بارا هه‌بوونا (هه‌ڤژينيا موتعێ يه) نه‌كو هه‌بوون ونه‌بوونا وێ”.
د وێ راپۆرتێ دا ئاماژێ ب وێ چه‌ندێ هاتيه كرن كو كارێ گه‌هشتيه وى ئاستى پشكه‌ك ژ گه‌شتياران هه‌بوونا وێ جۆرێ هه‌ڤژينيێ ل جهێن مانا خوه بكه‌نه مه‌رج ل سه‌ر وان ئۆتێل ومۆتێلێن تێدا دمينن، ديسا ژ ئه‌گه‌رێ مشه‌بوونا وێ داخوازيێ، گه‌له‌ك ژ ئۆتێلان په‌نابريه ڤه‌كرنا نڤيسينگه‌هێن تايبه‌ت ب وێ جۆره هه‌ڤژينيێ ڤه”.
وى مالپه‌رى به‌لاڤكر ژى” ل دۆر وێ ره‌وشا ناله‌بار پێدڤيه بێژين ره‌وشا خراب يا جڤاكى ب جۆره‌كى يێ هاتيه شێواندن كو وه‌لێهاتيه خزمه‌تگوزاريێن سيكسى بى به‌رگه‌كێ شه‌رعى پێشكێش بكه‌ين”. كو مه‌ره‌ما وى هه‌ڤژينيا موتعێ يه”
ل دۆر زێده‌بوونا وان جهێن وێ جۆره هه‌ڤينيێ ئه‌نجام دده‌ن، وى مالپه‌رى رۆهنكر” پشكه‌كا مه‌زن ژ ئۆتێلێن فه‌رمى ونه‌فه‌رمى جهێ حه‌واندنێ ونڤستنێ ب زه‌لامێن عيراقى ل گه‌ل ژنێن ئيرانى ناده‌ن، هه‌تاكو هه‌كه هه‌ڤژينى ژى كربيت، به‌لێ ل گه‌ل وێ چه‌ندێ ديارده‌كا دى يا سه‌رهلداى ئه‌وژى كرێكرنا خانيێن ئاسايى يه كو چو مه‌رجێن گه‌شتيارى وساخله‌مى ژى تێدا نينن ول بن چاڤدێريا حوكمه‌تێ ژى نينن”.
وى مالپه‌رى داخواز ژ ده‌ستهه‌لاتدارێن ئيرانێ كر كو ب هه‌مان شێوێ وه‌لاتێ سعوديێ كار بكه‌ن، كو ئه‌و وه‌لاته ناهێليت چو كچه‌كا ئيرانى ب تنێ بهێته دناڤ دا، كو ئيران ژى ب هه‌مان شێوه رێ نه‌ده‌ت زه‌لامێن عيراقى ب تنێ بچنه مه‌شهه‌د.
ل دووماهيا وێ راپۆرتێ دووپاتى ل وێ چه‌ندێ هاتيه كرن كو هه‌بوونا قانوونێن هه‌ڤژينيا موتعێ زيانێ ب خيزان وجڤاكێ ئيرانى دده‌ن وپێدڤيه پێداچوون دوان قانوونان دا بهێته كرن وفه‌لسه‌فا وێ جۆره هه‌ڤژينيێ دوباره بهێته پێناسه‌كرن.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن : ئەڤرۆ د رۆژا دویێ یا جەژنا قوربانێدا د روودانەکا هاتنوچوونێدا شۆفێرەکێ گیانێ خوە ژ دەستدا.
ناڤهاتی زێدەتر ئاشکرار کر: ئەڤرۆ چارشەمبی رۆژا دویێ یا جەژنا قۆربانێ ۲۲.٨.۲۰۱٨ لدەمژمێر (۷:۳۰) سپێدێ ل سنورێ قەزا بەردەرەش و ل سەر جادا گشتی یا دناڤبەرا ناحیا رۆڤیا بۆ گوندێ چەمە و ل نێزیک گوندێ بەردە زیو روودانەک ژ جۆرێ وەرگەریان روودایە و د ئەنجامدا شۆفێرێ وێ ترۆمبێلێ گیانێ خوە ژ دەستدایە و هەروەسا زیانێن مادی یێن مەزن گەهشتینە ترۆمبێلێ ژی.
نيشاندان