NO IORG
نووترين نووچه
نوچێن گرنگ

ئه‌ڤرۆ نيوز:

سه‌رۆك كۆمارێ عيراقێ فوئاد مه‌عصوم راگه‌هاند كو كاودانێن عيراقێ و سرۆشتێ وێ په‌يوه‌نديێن وێ ل گه‌ل عيراقێ دبيته‌ ئه‌گه‌ر كو سه‌ره‌ده‌رينه‌كرن ل گه‌ل ئيرانێ يا ب زه‌حمه‌ته‌ و نه‌شێت پابه‌ندى وان سزايان بيت يێن واشنتۆن ل سه‌ر ته‌هرانێ سه‌پاندين.

فوئاد مه‌عصوم  د داخۆيانيه‌كێ دا بۆ كه‌نالێ حوره‌ يێ ئه‌مريكى گۆت: “عيراق دڤێت ل گه‌ل لايه‌نه‌كى نه‌بيت ل دژى لايه‌نێ دى ل سه‌ر وان هه‌ڤركيێن نوكه‌ د ناڤبه‌را وان دا هه‌ين”.

سه‌رۆك وه‌زيرێن هه‌رێما كوردستانێ ژى، نێچيرڤان بارزانى، ئه‌ڤرۆ رۆژا سێشه‌مبى د كۆنگره‌كێ رۆژنامه‌ڤانى دا راگه‌هاند كو هه‌رێما كوردستانێ سه‌ر ب عيراقێ ڤه‌ يه‌ و دێ پابه‌ندى هه‌ر بڕياره‌كێ بيت ژ حوكمه‌تا عيراقێ ب ده‌ركه‌ڤيت.

ئه‌ڤرۆ نيوز:

ئه‌ڤرۆ جڤاتا وه‌زيرێن هه‌رێما كوردستانێ كۆمبوونا خوه‌ يا ئاسايى يا حه‌فتيانه‌ ل دۆر چه‌ند ته‌وه‌ران ئه‌نجام دا كو گرنگترين ته‌وه‌ر ژى ب جينوسايد ناساندنا كه‌يسا جينوسايدا ئێزديان بوو.

نێچيرڤان بارزانى د كۆنگره‌كێ رۆژنامه‌ڤانى دا راگه‌هاند كو ئه‌ڤرۆ جڤاتا وه‌زيران كۆمبوو و د كۆمبوونا خوه‌ يا ئاسايى دا، وه‌زيرێ كاروبارێن شه‌هيد و ئه‌نفالكريان راپۆرته‌ك ل سه‌ر جينوسايد ناساندنا ئێزديان به‌رهه‌ڤكربوو و خواند و گۆت: “كاره‌كێ باش يێ هاتيه‌ كرن، هيڤيدارين خووشك و برايێن ئێزدى بهێنه‌ قه‌ره‌بووكرن”.

ل دۆر كۆمبوونێن ل گه‌ل به‌غدا دازانين ژى كو كومبوونێن باش ل گه‌ل حه‌يده‌ر عه‌بادى هاتينه‌ كرن و گۆت: “بابه‌تێ ڤه‌كرنا رێيان ل گه‌ل عه‌بادى مه‌ به‌حسكريه‌، به‌رى دو رۆژان مه‌ كۆمبوون ل گه‌ل عيراقێ كريه‌ و ئه‌و پر ژى دێ هێته‌ چێكرن و ڤه‌كرن”.

ده‌رباره‌يى ده‌مێ هه‌لبژارتنان ژى و ئه‌و گۆتنا دبێژيت كو بڕێت مه‌كگۆرك داخوازا پاشخستنا هه‌لبژارتنان يا كرى و ب تايبه‌ت ژى كو هێشتا حوكمه‌تا عيراقێ نه‌هاتيه‌ پێكئينان، نێچيرڤان بارزانى گۆت: “دخوازين هه‌لبژارتن د ده‌مێ خوه‌ دا بهێنه‌ كرن. برێت مه‌كگۆرك ژى به‌حس ل پاشخستنا هه‌لبژارتنان نه‌كريه‌. چو لايه‌نه‌كى ژى ب فه‌رمى داخوازا پاشخستنا هه‌لبژارتنان نه‌كريه‌”.

د پرسياره‌كێ ژى دا ل دۆر وێ چه‌ندێ كو تره‌مپ گۆتيه‌ يێ هاريكاريا و هه‌ماهه‌نگيێ ل گه‌ل ئيرانێ ژى بكه‌ت دێ هێته‌ سزادان، ئه‌ڤجا دێ هه‌رێما كوردستانێ لێكگوهارتنا بازرگانى ل گه‌ل ئيرانێ كه‌ت يان نه‌، سه‌رۆك وه‌زيران گۆت: “ئه‌م سه‌ر ب عيراقێ ڤه‌ ينه‌ و عيراق د ڤێ ده‌ربارێ دا چو ب هه‌لبژێرێت، هه‌رێما كوردستانێ دێ يا پابه‌ند بيت ب وێ بڕيارێ”.

هيڤى ژى خواست كو شانده‌كێ ئه‌مريكا سه‌ره‌دانا هه‌رێما كوردستانێ بكه‌ت بۆ ئاگه‌هداركرنا چاوانيا سه‌ره‌ده‌ريكرنێ ل گه‌ل وه‌لاتێ ئيرانێ.

د درێژاهيا كۆنگرێ خوه‌ يێ رۆژنامه‌ڤانى دا ئاشكه‌را ژى كر كو ئه‌و دێ د ماوێ بهێت دا سه‌ره‌دانا وه‌لاتێ توركيا كه‌ت، به‌لێ هێشتا ژڤانێ وێ سه‌ره‌دانێ نه‌هاتيه‌ دياركرن.

ل دۆر دوورپێچا وه‌لاتێ توركيا ل سه‌ر فرۆكخانا سلێمانيێ ژى سه‌رۆك وه‌زيران دا زانين كو ئه‌وى گه‌له‌ك جاران خواستيه‌ كو ئه‌و كێشه‌ بهێته‌ چاره‌كرن و رێ بهێته‌ ڤه‌كرن و گۆت: “ئه‌و بابه‌ته‌كێ سياسى يه‌”.

ئەڤرۆ نیوز، نەوزاد ھلۆری:

ب بەرھەڤبوونا سەروک بارزانی کونگرێ ھەشتێ یێ ئێکەتیا لاوێن دیموکراتا کوردستانێ لژێر دۆريشمێ پێشمەرگە ل ھەولێرێ ب رێڤەچوو، سەروک بارزانی د کونگرەی دا دیارکر کو پاشەرۆژا کوردستانێ د دەستێ لاوان دایە و لاوان دێ ھەر مینن شیرێن پولاین ، و شانازیە کو لاوان ئەندامێن ئێکەتیا لاوێن جیھانی نە ، و دیسان بارزانی بەحس ل ریفراندوم و ھەلبژاردنێن عیراقێ و دەنگویێن پاشئێخستنا ھەلبژاردنێن کوردستانێ کر.

سەرۆک بارزانی د دەستپێکا دەست بکاربوونا کونگرێ ھەشت یێ ئێکەتیا لاوێن دیموکراتا کوردستانێ دیارکر کو ئەو دلخوشە د کونگرێ ھەشت یێ لاوان پشکدارە و گۆت: (ل دەما شورشا ئیلونێ و پشتی شورەشا ئیلونێ لاوان رولەکێ بەرچاڤ و کارا ھەبویە د پەروەردەکرنا لاوان دا لسەر بنەمایەکێ دیموکراسی ، و بەشەکێ زور ل سەرکردەیێن کوردستانێ دناڤ لاوان دا دەرچوینە، و بەردەوامبوونا خەباتا لاوان بویە سەدەم کو ببنە ئەندام د ئێکەتیا لاوێن جیھانی دا کو ئەڤ یەک ژی شانازیە ، و بارزانی نەمر پێشتر ل بارا لاوان گوتە لاوان شورایی پولاین و قوتابی سەرێ رومێ نە، وەکو پارتی ئەم بەرھەڤین بو ھەر کارەکێ لاوان بڤێت).

بارزانی زێدەتر گۆت: (دبوری دا مە چوو ھێرش و شەر نەکرینە کەسێ، و کار و خزمەتا مە تنێ بەرەڤانی کرن بوویە ل گەلێ کوردستانێ و خاکا کوردستانێ و مافێت وان ، و ئارمانجا مە بتنێ ئازادی بوویە ، و ئەم ب خەبات و قوربانیدانا خوە سەربلندین، د بوری دا مە چوو کێشە نەبوینە و کێشە بو کەسێ ژی درۆست نەکرینە بەلکو ھەر دوژمنان ڤیایە کێشە و نەخوشیان بو مە درۆست بکەن ، مە ھەردەم ڤیایە کو وەکو برا خوە ئەگەر برایێ بچوک ژی بیت ل عیراقێ بژین و پشکدارێ عیراقێ بین بەلێ وان نە ھەڤپشکی قبولە و نەژی جیرانی ، و مە ژی نەڤێت ببینە پاشکویێن کەسێ، و پێدڤی یە گەلێن جیھانێ و عیراق ژی ھزر بکەت کو گەلێ کوردستانێ ب ئاگر و ئاسن و کومکوژیان ژ ناڤ ناچیت ، و دڤێت ئەو ھزرێ د چارەسەرکرنا کێشەیان ب دانوستاندن و دەستوور بکەن ، بەروڤاژی ئەم و ئەو چوو خوشیان نابەن).

بارزانی ل بارا ریفراندۆمێ گوت: (پشتی سالا 2003 و ئازادیا عیراقێ ئەم چوینە بەغدا، و مە ڤیا ھەڤپشکێ راستەقینەیێ عیراقێ بین و مە زور بزاڤ ژی کرن کو لسەر بنەمایەکێ راستەقینە بین ،بەلێ ب لێبورین ڤە بومە دیاربوو کو نەک تنێ ھەڤپشکی بەلکو ھەڤوەلاتی بوون بو کوردان ژلایێ وان یا قبولکری نینە، بەری کو ریفراندوم بھێتەکرن ل ھەیڤا ئیلو یا سالا 2016 ئەم چوینە بەغدا و دووبارە داخوازا ھەڤپشکی کر و دەستوور بھێتە بجھکرن ئەو دەستوورێ کو خەلکێ عیراقێ ب کورد ڤە دەنگ بو دایی، و عیراقەکا راستەقینە بھێتە درۆستکرن، بەروڤاژی وەرن دا ھزرێ د وێ یەکێ دا بکەین کو ببنە دوو جیرانێن باش ، ب چوو شێوەیان ژی مە نەڤیایە کێشەیان درۆست بکەین ، پشتی کو ریفراندۆم ھاتیە کرن و خەلکێ کوردستانێ سەرکەفتن ئینایی و زێدەتر ژ 92% دەنگ بودایی ، ب لێبورین ڤە ئەگەر 16ێ ئوکتوبەرێ نەبایە ئەڤ رەوشا نھا ب سەرێ مە نەدھات ، و مافێ سەربخوەیێ مافەکێ سرۆشتی یە خودێ دایە مە ، و ھەر ژ روژا کاوەیێ ئاسنگەر زوحاک ژ ناڤبری داخوازا ئازادی و سەربخوەیێ دکەت و ھەموو لایەک دڤێت بزانیت کو کورد دەستبەردارێ سەربخوەیێ نابن و ئەو خەیالەکە تێدا دژین ، و پێشمەرگەیان بو ھەموو لایەکێ سەلماند کو بەرەڤانێ ئاخا کوردستانێ یە و پشتراستم ئەڤرۆ یان سوبەھی سەربخوە دێ ھەرھێتە بجھئینان).

مەسعود بارزانی سەرۆکێ پارتی دیموکراتێ کوردستانێ ل بارا دوماھی گورانکاریێن پشتی ریفراندۆمێ دیارکر ژی کو پشتی چەندین قوربانی و نەخوشیان کورد ب چوو شێوەیان پاشکویی قبول ناکەت و زێدەتر گۆت: (نھا پەیوەندیێن مە ل گەل عیراقێ و وەلاتێن جیھانێ ئاسایی بوویە ، و بزاڤێن خورت دکەین کو پەیوەندیێن نافخوەیێن لایەنێن سیاسیێن کوردستانێ ئاسای ببن، و د ھەلبژاردێن بوری یێن عیراقێ پارتی سەلماند کو داکوکیکارێ مافێ گەلێ کوردستانێ یە و بویە یا ئێکێ ، ئەڤە سەرەرای کو ستەمەکا زور ل پارتی ھاتیەکرن و 4 بو 6 کورسیێن پارتی ھاتینە برن ، بەلێ مە چوو کێشە نەکرن ، و پارتی بەرھەڤە د ھەلبژاردنێن بھێت یێن کوردستانێ ژی پشکداربیت و ئەم وەکو پارتی دێ ھەموو بزاڤان بو سەرئێخستنا پارتی کەین ژبەرکو چەند پارتی یا بھێز بیت دێ کوردستان یا ب ھێز بیت ، و لسەر سێ بنەمایێن سەرەکی دێ دانوستاندنێ ل گەل بەغدا کەین کو ئەو ژی ھەڤپشکی و تەوافق و ھەڤسەنگی یە).

ل باری دەنگویێن ھاتنا برێت مەکگور و 48 ملیار دیناران ژی بارزانی گۆت: (ب چوو شێوەیان برێت مەکگورک داخوازا پاشئێخستنا ھەلبژاردنان ل من نەکریە ، و ئەڤ یەک مافێ پارتی یە کو بریارێ بدەت ، و دیسان چوو راستی بو سامانێ من نینە کو دبێژن 48 ملیار دولار ھەنە، و ئەگەر من ئەو پارە ھەبایە دا گەلەک گورانکاریان کەم).

ئه‌ڤرۆ نيوز:

یەکەم گورزا سزایێن کو ئەمریکا ل سەر ئیرانی سەپاندبوون ژ دەستپێکا ئەڤرۆ کەڤتنە د وارێ پێکئانینێ دا.

سەرۆکێ ئەمریکا دۆنالد ترەمپ د داخویانیەکێ دا گۆت: “سیاسەتا ئەمریکا ئەوە کو فشارێن ئابووری ھەتا ئاستی ھەری بلند ل سەر ئیرانێ ب سەپینن.

ب گۆرەیی ترەمپ رێکەفتنا ئەتۆمی ل گەل ئیرانێ سالا 2015ێ ریکەفتنەکا گەلەک خراپ بوو و رێ دا کو ئابووریا ئیرانی گەش ببیت و تەھران وان پارەیان ژبۆ ب ھێزکرنا ناکوکیان ل رۆژھەلاتا ناڤین بکار بینیت و پشتگریا تیرۆرێ بکەت.

داخویانیێ ھەروەسا گۆت: “دڤێت رژێما ئیرانێ ھەلبژێریت، یان دەست ژ کارێ تێکدانا ئارامیێ بەردەت و بکەڤیتە د ناڤ ئابووریا جیھانی، یان ژی گاڤ ب گاڤ بەر ب دوورپێچا ئابووری بچیت.

یەکەم گورزا سزایێن ئەمریکا ل دژی ئیرانێ ژ راوەستاندنا تێکەلیێن دارایی و ھاوردەکرنا ماددەیێن خاڤ و کارتا ترۆمبێلان و فرۆکڤانیا بازرگانی پێک دھێت.

ئه‌ڤرۆ نيوز:

ئه‌ڤرۆ رۆژا سێشه‌مبى جڤاتا وه‌زيرێن هه‌رێما كوردستانێ دێ كۆمبوونا ئاسايى يا خوه‌ ئه‌نجام ده‌ت و كۆمبوون دێ ل سه‌ر دو ته‌وه‌رێن سه‌ره‌كى بيت و دێ به‌حس ل سه‌ر چاوانيا ئينانا ده‌رمانان ژ لايێ بازرگان ژى ڤه‌ كه‌ت.

ب گۆره‌يى پێزانينێن ئه‌ڤرۆ نيوز دێ د پشكه‌كا ڤێ كۆمبوونێ دا، وه‌زيرێ كاروبارێن شه‌هيد و ئه‌نفالكريان دێ به‌حس ل سه‌ر راپۆرته‌كێ ل سه‌ر كۆمكرنا داتا و ديكيۆمێنتان ل سه‌ر كۆمكۆژى و جينوسايدا ئێزديان كه‌ت كو ب بڕياره‌كا جڤاتا ئاسايشا نێڤده‌وله‌تى كار ل سه‌ر دهێته‌ كرن.

ته‌وه‌ره‌كێ دى يێ كۆمبوونێ ژى دێ به‌حسكرن بيت ل سه‌ر چاوانيا ئينانا ده‌رمانان ژ لايێ بارزگانان ڤه‌ ب ره‌نگه‌كێ قاچاخ كو د ڤى ماوێ بۆرى دا گه‌له‌ك به‌حس ل سه‌ر دهێته‌ كرن.

هه‌ر د ڤێ كۆمبوونێ دا، بڕيارا رێباز حه‌ملان وه‌زيرێ ئابوورى راپۆرته‌كێ ل سه‌ر به‌رهه‌ڤكرنا بوودجێ 2019ێ ئاماده‌ بكه‌ت و به‌حس ل وێ چه‌دنێ ژى بهێته‌ كرن كا چاوان هه‌رێما كوردستانێ پشتى چار سالێن قه‌يرانێ خوه‌ بۆ ره‌وشه‌كا باشتر ئاماده‌ بكه‌ت.

ئەڤرۆ نيوز:

ب چاڤدێریا سەرۆک مەسعود بارزانی، ئەڤرۆ 7 تەباخا 2018 ئێکەتیا لاوێن دیموکراتا کوردستانێ دێ کۆنگرێ خوە یێ ھەشتێ ب ناڤێ (کۆنگرێ پێشمەرگە) ل ھۆلا سەعد عەبدوللا ل ھەولێرێ ئەنجام دەت.

د کۆنگرەی دا 260 ئەندام دێ پشکداریێ تێدا کەن کو بۆ دەمێ دۆ رۆژان دێ یێ بەردەوام بیت و تێدا سکرتێر و ستافەکێ نوو بۆ مەکتەبا سکرتاریەتا ئێکەتیا لاوێن دیموکراتا کوردستانێ دێ ھێنە ھەلبژارتن.

وەکو دیار کۆنگرێ ھەشتێ یێ ئێکەتیا لاوێن دیموکراتا کوردستانێ بۆ 7-8-2018 ھاتبوو پاشخستن.

ئەڤرۆ نیوز ، زنار تۆڤی:

بڕیارا وه‌زاره‌تا چاندنا عیراقێ بۆ نووكرنا گرێبه‌ستا چاندنێ یا وان عه‌ره‌بێن نفوسا سالا (1957) هه‌ی‌، زیانەکا مەزن دگه‌هینیتە جوتیارێن كوردان ب ‌شێوه‌کێ کو 150 هه‌زار دۆنەمێن ئەردێ كوردان ل كه‌ركوكێ دهێتە دان ب وان عه‌ره‌بێن کو مفادارن ل سه‌رده‌مێ سه‌دام حسێنی.

مه‌ردان ره‌حمان سه‌رۆكێ لقێ كه‌ركوكێ یێ سه‌ندیكا جوتیارێن كوردستانێ گوتیە، ئەڤ بریاره‌‌ دێ 150 هزار دۆنەمێن ئەردێ كوردان ڤەگەرینیت‌ بۆ وەلاتیێن عه‌ره‌ب ل دەڤەرێن: شوان، دوبز، ساله‌یی، قه‌ره‌هه‌نجیر، ناحیا پردێ و له‌یلان.

هەروەسا جوتیارێن كورد نه‌خستینه‌ ناڤا پلانا چاندنێ یا ساڵانه‌، ب بهانەیا نه‌بوونا گرێبه‌ست و تاپۆیێ و ئێكلایی نه‌بوونا كێشا زه‌ڤیان و د‌ ئاماده‌نینن تۆڤی و كیمیایێ و ئامیران بدەنێ.

گۆتیە ژی: هەکە چو چاره‌سه‌ری بۆ ڤێ كێشێ نەهێتە دیتن، جوتیارێن كورد دێ ل ده‌رڤەی پلانا ساڵانه یا چاندنێ دا بیت و ل دوماهێ به‌رهه‌مێ گەنمێ وان ژێ ناهێتە وەرگرتن.

ئه‌ڤرۆ نيوز: ئاراس ره‌شاڤايى:

گه‌نجه‌كێ دهۆكێ پشكدارى د پرۆگرامێ سه‌ركردێن گه‌نجێن گه‌روك يێن جيهانى دا دكه‌ت، ميعاد سه‌عيد سالح دوسكى شيا ل سه‌ر ئاستێ عيراقێ ببيته‌ ئێكه‌م د بوارێ جڤاكێ سڤيل و پێكڤه‌ ژيانێ و ژ ئاليێ ئه‌مريكا ڤه‌ هاته‌ هه‌لبژارتن كو پشكدارى د به‌رنامێ سه‌ركردێن جيهانێ دا بكه‌ت.

ميعاد سه‌عيد سالح دوسكى بۆ ئه‌ڤرۆ نيوز دياركر كو بۆ ماوێ 24 هه‌تا 30 روژان وه‌كو سه‌ركرده‌ پشكدارى به‌رنامه‌ى بووين و سه‌ره‌دانا وان جهێن تايبه‌ت بكارى مروڤى ڤه‌ مه‌ كرن و مروڤ فێرێ سه‌ركردايه‌تيێ دكه‌ت كو گرنگيا وێ ئه‌وه‌ هزر و بير ل ئێك بهێته‌ گوهارتن و ل پاشه‌رۆژێ سه‌ركرده‌ دروست ببن و دخزمه‌تا وه‌لاتێ خوه‌ دابن، كو سالانه‌ 5 هزار كه‌س ل سه‌رانسه‌رى جيهانى پشكدار دبن.

 

 

ئه‌ڤرۆ نیوز:
ب چاڤدێریا سه‌رۆك مه‌سعود بارزانی، سوبه‌هی 7 ته‌باخا 2018 ئێكه‌تیا لاوێن دیموكراتا كوردستانێ دێ كۆنگرێ خوه‌ یێ هه‌شتێ ب ناڤێ (كۆنگرێ پێشمه‌رگه‌) ل هۆلا سه‌عد عه‌بدوللا ل هه‌ولێرێ گێڕیت.
هه‌ر د ڤی واری دا، ئه‌ڤرۆ نێچیرڤان بارزانی جێگرێ‌ سه‌رۆكێ‌ پارتی دیمۆكراتی كوردستان ل گه‌ل سكرتێر و ئه‌ندامێن سكرتاریه‌تێ‌ و به‌رپرسێن ناڤه‌ندێن بالا یێن باژێر و باژێركێن ئێكه‌تیا لاوێن دیمۆكراتا كوردستانێ‌ كۆمبوو.
د كۆمبوونێ‌ دا، جێگرێ‌ سه‌رۆكێ‌ پارتی كار و چالاكیێن ئێكه‌تیا لاوان بلند هه‌لسه‌نگاندن، ب تایبه‌تی د وێ‌ ره‌وشا نه‌خواستی دا كو شه‌رێ‌ تیرۆرستێن داعش و قه‌یرانا دارایی و كێشێن د ماوێ‌ بۆری دا هاتینه‌ خۆلقاندن.
ب گرنگی ڤه‌ دوپاتی ل رۆل و كاریگه‌ریا ته‌خا لاوان د رووبرووبوونا هه‌ر مه‌ترسیه‌ك و پێشڤه‌برنا وارێ‌ كلتووری، وه‌رزشی و وارێن جودا یێن جڤاكی دا كر.
ژ ئالیێ‌ خوه‌ ڤه‌، ئێكه‌تیا لاوان سه‌ره‌رای سوپاسیێ‌ كو به‌رده‌وام پشته‌ڤانیێ‌ ل داخواز و ئارمانج و كار و پرۆژێن ته‌خا لاوان دكه‌ت، كورتیه‌ك ل دۆر پلانا وان یا تایبه‌ت ب پێشخستنا ئێكه‌تیا لاوان و گوهۆڕینان د پێكهاته‌ و میكانزما كاركرنێ‌ و ئه‌جندا كارێن رێكخراوێ‌ پێشكێشكرن ب ره‌نگه‌كی كو خزمه‌تێن زێده‌تر و ب به‌رهه‌متر پێشكێشی لاوان بكه‌ت.

ئه‌ڤرۆنيوز:

رێكخراوا نه‌ته‌وێن ئێكگرتى بۆ په‌روه‌ردێ وفێركرنێ وره‌وشه‌نبيريێ (يونسكۆ) نڤيسه‌ره‌كێ كورد خه‌لات دكه‌ت.

جه‌ميل تۆران بازيدى، نڤيسه‌ر، خه‌لكێ باژێرێ ئاگرى يه‌ ل باكوورێ كوردستانێ، پشتى كوده‌تايا له‌شكرێ توركى ل 12 ئيلۆنا 1980 بۆ ده‌مه‌كى هاتبوو ده‌سته‌سه‌ركرن وپشتى ئازادبوونا وى وه‌كو په‌نابه‌ر چوو يونانى وهه‌تا نوكه‌ ل وێرێ دژيت.

ئه‌و نڤيسه‌ره‌ ل سه‌ر رومانا وى ( ناڤێ من ئازاده‌) هاتيه‌ خه‌لاتكرن كو تێدا به‌حسێ ژيان ومشه‌ختبوونا خێزانه‌كا كورد يا خه‌لكێ هه‌له‌بجه‌ دكه‌ت كو پشتى كيميابارانكرنا هه‌له‌بجه‌ نه‌چاربووين وه‌كو په‌نابه‌ر بچنه‌ ده‌رڤه‌.

گۆت ژى” چيرۆكا رومانا من يا راسته‌ كو ده‌مێ دايك وبابێن ئازادى ل گه‌ل زارۆيێن خوه‌ بزاڤێ دكه‌ن بگه‌هنه‌ يونانێ، تنێ ئازاد قورتال دبيت ودگه‌هيته‌ يونانێ وپۆليسێن توركى دايك وباب وخوشكا ئازادى ده‌سته‌سه‌ر دكه‌ن ودبێژنێ كورێ وان ( ئازاد) يێ دده‌ريايێ دا خه‌ندقى وپاشى ئه‌و خێزانه‌ بێ ئازاد دهێنه‌ راده‌ستكرن بۆ حوكمه‌تا عيراقێ”.

website security
WP Facebook Auto Publish Powered By : XYZScripts.com