ئەڤرۆ نیوز ، زنار تۆڤی:

كۆمسیۆنا بلند یا سه‌ربه‌خۆ یا هه‌لبژارتن و راپرسیێ ل هه‌رێما كوردستانێ تۆماره‌كا نوو یا ده‌نگده‌ران بۆ هه‌لبژارتنێن په‌رله‌مانێ كوردستانێ چێكریە و ده‌نگده‌رێن مادێ 140 ژ تۆمارێ ده‌رخستن.

راگه‌هاندنه‌كا كۆمسیۆنا هەرێما کوردستانێ دیارکریە، کو شڤێدی تۆمارا نوویا ده‌نگان بۆ هه‌لبژارتنێن په‌رله‌مانێ كوردستانێ ب دوماهی هاتیه‌ و بۆ چاپێ هاتیه‌ هنارتن. هەروەسا تۆمارا نوو ژ تۆمارا كۆمسیۆنا هه‌لبژارتنێن عیراقێ یا جۆدایه‌ و هژمارا دروست یا ده‌نگده‌ران تێدا هاتیه‌ رێزكرن و ناڤێن دوباره‌ و مری و ئاواران ژی هاتینه‌ ده‌رخستن.

هه‌روه‌سا كۆمسیۆنێ ناڤێن ده‌نگده‌رێن مادێ 140 ژ تۆمارا نوو ده‌رخستیه‌ و بریاره‌ پشتی چاپكرنێ، كۆپیه‌كا تۆمارێ بۆ رایا گشتی و ئالیێن سیاسی یێن هه‌رێمێ بهێته‌ هنارتن.

ئەڤرۆ نیوز ، زنار تۆڤی:

وەزارەتا رەوشەنبیری و لاوان ل هەرێما کوردستانێ بریارا راگرتنا مۆلەتێ بۆ سەرجەم كەنالێن راگەهاندنێ دا و رێڤەبەرێ چاپ و بەلاڤکرنێ ل وێ وەزارەتێ دبێژیت ، هندەک كەنال هاتینە فرۆتن و هندەک ژی ب پارەکێ زۆر قەردارێن حوکمەتێ نە.

ب بریارەکا نوو وەزارەتا رەوشەنبیری و لاوان ل هەرێمێ، ژ ئەڤرۆ وێڤە پێدانا مۆلەتێ بۆ سەرجەم كەنالێن راگەهاندنێ، رادیۆ، كەنالێن نافخۆیی و ئەسمانی ل هەرێما كوردستانێ بۆ ماوێ زێدەتر ژ دوو هەیڤان راگرتن.

محەمەد گەردی، رێڤەبەرێ گشتی یێ چاپ و بەلاڤکرنێ و راگەهاندنێ ل وەزارەتا رەوشەنبیری ل هەرێما کوردستانێ گوتیە، ب ئەگەرێ هندێ کو پشکەک ژ كەنالان بەری پەخشكرنا وان هاتینە فروتن، هەروەسا پشکەکا دیتر كێشە د فریكوێنساندا هەیە و پتریا وان ب پارەکێ زۆر قەردارێن حوكمەتێ نە، لەوما هەتا ئەڤ كێشە دهێنە چارەسەر کرن، مۆلەت ب هیچ كەنالەکێ دیتر ناهێتە دان.

هەروەسا دیارکریە، دێ هەلمەتەکادی بۆ وەرگرتنا قەرێن حوکمەتێ ژ كەنالان و ل گەل پێداچوونەکا هوور بۆ شێوازێ پەخشێ كەنالان دەستپێكەین، لەوما هەتا ئەو كێشە نەهێنە چارەسەر کرن، مۆلەت دەستپێناكەن و پێدچیت بۆ چارەسەركرنا ڤان كێشان ماوێ دو هەیڤان ڤەکێشیت.

نوکە ل هەرێما كوردستانێ 160 رادیۆ و 104 كەنالێن نافخۆیی و 39 كەنالێن ئەسمانی هاتینە تۆماركرن.