ئه‌ڤرۆ نيوز:
شانده‌كێ هه‌ڤپه‌يمانيا فه‌تح يا هادى عامرى بۆ دانوستاندنا سه‌باره‌ت پێكئينانا حوكمه‌تا نوو يا عيراقێ گه‌هشته هه‌ولێرێ، به‌نگين رێكانى ئه‌ندامێ شاندێ دانوستاندكار يێ پارتى ديموكراتى كوردستان راگه‌هاند كو شاندێ هه‌ڤپه‌يمانيا فه‌تح بۆ دانوستاندنا ل دۆر حوكمه‌تا نوو يا عيراقێ هاتينه هه‌ولێرێ .
شاندێ هه‌ڤپه‌يمانيا فه‌تح يا هادى عامرى برياره ل گه‌ل پرانيا ليستێن كوردستانى يێن سه‌ركه‌فتى د هه‌لبژارتنێن عيراقێ دا كۆم ببن.
ئه‌ڤرۆنيوز:
پۆليسێن ئيدارا راپه‌رين رۆهنكرنه‌ك ل دۆر سوتنا عه‌مباره‌كا چه‌كى ل چوارقورنه به‌لاڤ دكه‌ت وتێدا دياردكه‌ت كو دێ ڤه‌كۆلينێ ل دۆر وان ته‌قينێن رووداين ل ده‌مێ ئاگربه‌ربوونێ ئه‌نجام ده‌ن.
رۆهنكرنا پۆليسان دبێژيت” ئاگر به‌ربوو باخچه‌كێ وه‌لاتيه‌كى ل نيزيك گوندێ گردجان ل ناحيا چوارقورنه وده‌نگێ ته‌قينێ ژى هات وپاشى شيان ئاگرى كونترۆل بكه‌ن.
پێرابوونێن قانوونى دێ هێنه وه‌رگرتن ودوسيا ڤه‌كۆلينێ بۆ روودانێ هاتيه ڤه‌كرن، نوكه هێزێن مه مژوولى ڤه‌كۆلينه‌كا هوورن ل سه‌ر ئه‌گه‌رێ ئاگربه‌ربوونێ وئه‌و په‌قينێن ل ده‌مێ ئاگربه‌ربوونێ رووداين”.
پۆليس دبێژن” چو زيانين گيانى ژ ئه‌گه‌رێ روودانێ نه‌بوون، به‌لێ هه‌موو ئاڤاهى هاتيه ژناڤبرن، كه‌سه‌ك ژى ژبه‌ر روودانێ يێ هاتيه ده‌سته‌سه‌ركرن ل دووڤ مادێ 21 ژ قانوونا چه‌كى كو دژيێ 40 ساليێ دايه وڤه‌كۆلين ژى دروودانێ دا يا به‌رده‌وامه.
حسێن عه‌بدوللا، په‌يڤدارێ رێڤه‌به‌ريا به‌رگريا شارستانى ل ئيدارا راپه‌رين، دوهى پێنجشه‌مبى راگه‌هاندبوو” ل شه‌ڤا پێنجشه‌مبى 5/7/2018 ل گوندێ گردجان ل سنورێ ئيدارا راپه‌رين، عه‌مباره‌كا ته‌قه‌مه‌نيێ يا وه‌لاتيه‌كى په‌قى”.
گۆتبوو ژى” ئاگر ل ناڤ باخچه‌كێ گوندێ گردجان سه‌ر ب ناحيا چوارقورنه به‌ربوو كو چه‌ك وته‌قه‌مه‌نى تێدا بوو وزيانێن گيانى نه‌بوون، تنێ زيانێن دراڤى هه‌بوون”.
دياركربوو ژى” ژئه‌گه‌رێ وى ئاگربه‌ربوونێ وه‌لاتيه‌ك بريندار بوو”.
ئه‌ڤرۆنيوز:
حوكمه‌تا هه‌رێما كوردستانێ كۆژمێ 400 مليۆن دينار بۆ كرين وره‌شاندنا ده‌رمانى بۆ به‌رهنگاريا نه‌خوه‌شيا تايا خوين به‌ربوونێ ته‌رخانكر.
رێباز حه‌ملان، وه‌زيرێ دارايى وئابوورى ل هه‌رێما كوردستانێ، دبه‌ياننامه‌كێ دا راگه‌هاند” 400 مليۆن دينار بۆ كرين وره‌شاندنا ده‌رمانێ بۆ به‌رهنگاريا نه‌خوه‌شيا تايا خوين به‌ربوونێ يێن هاتينه ته‌رخانكرن”.
حه‌ملانى گۆت ژى” هه‌كه پێدڤى بكه‌ت دێ كۆژمه‌كێ زێده‌تر ژى بۆ ڤێ مه‌ره‌مێ هێته ته‌رخانكرن”.
دياركر” ل رۆژێن داهاتى دێ ده‌ست ب ره‌شاندنا ده‌رمانى هێته كرن ول ده‌ستپێكێ دێ ل تاخ وجهێن هه‌ژارنشين هێته ئه‌نجامدان”.
ئه‌ڤرۆنيوز:
ترومبێله‌كا بارهه‌لگر ئه‌ڤرۆ ئه‌ينيێ 6/7/2018 ل سه‌ر رێيا سێمێل – زاخۆ وه‌رگه‌ريا وچو زيانێن گيانى نه‌بوون.
رێڤه‌به‌ريا هاتنوچوونا دهۆكێ دبه‌رپه‌رێ خوه دا ل سه‌ر تۆرا جڤاكى يا فه‌يسبووكى به‌لاڤكر” ئه‌ڤرۆ ل سه‌ر رێيا سێمێل – زاخۆ ترومبێله‌كا باهه‌لگر وه‌رگه‌ريا وچو زيانێن گيانى نه‌بوون، تنێ زيانێن دراڤى هه‌بوون”.
ئەڤرۆ نیوز ، زنار تۆڤی:
سەرۆک وەزیرێن تورکیا راگەھاند، سوپایێ وەلاتێ وی رووبەرێ 350 کیلۆمەترێن دوجا ل ناڤا ھەرێما کوردستانێ گرتینە و ئۆپەراسیۆنێن وان ل دژی گەریلایێن پەکەکێ د بەردەوامن.
بینالی یلدرم د دیدارەکێ دا بۆ ئاژانسا ئەنادۆل یا تورکی راگەھاند، کو سوپایێ تورکیا 350 کیلۆمەتر ل ناڤا ھەرێما کوردستانێ گرتینە، ئەو رووبەر ژی ژ سنۆرێ ئیرانێ دەست پێ دکەت تا رووبارێ خابووری، ئۆپەراسیۆنێن وان ژی ل قەندیلی د بەردەوامن.
بینالی یلدرم گۆت: ھەر ژ دەریا ناڤەراست هەتا رۆژئاڤایێ رووبارێ فوراتی ل باکۆرێ سووریێ سوپایێ وان ل وان دەڤەران ھەیە.
ئەڤە ماوێ سێ هەیڤانە چالاكیێن سوپایێ توركیا ل دژی په‌كه‌كێ ل هه‌رێما كوردستانێ زێده‌بووینه، سەرۆک وەزیرێن ھەرێما کوردستانێ ژی ل چارشەمبیا بوری راگەھاند بوو، حوکمه‌تا هه‌رێمێ چەندین جاران داخواز ژ پەکەکێ کریە ھەرێما کوردستانێ نەکەنە مەیدانا شەرێ خوە ل گەل تورکیا.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ پێنجشه‌مبى 5/7/2018 پشكدارى د مه‌راسيمێن رۆژا نيشتمانى يا ئه‌مريكا دا كر.
كونسۆلخانا ئه‌مريكا ل هه‌ولێرێ ب به‌رهه‌ڤبوونا هژماره‌كا مه‌زن ژ باليۆز وكونسۆلێن وه‌لاتان وكه‌سايه‌تيێن سياسى وئيدارى ورێكخراوێن جڤاكێ مه‌ده‌نى، مه‌راسيمێن رۆژا نيشتمانى يا ئه‌مريكى ب رێڤه‌چوون.
دۆگڵاس سڵیمان باڵیۆز و كین گرۆس كونسۆلی ئەمەریكا لە هەولێرێ خوه‌شحاليا خوه ب به‌رهه‌ڤبوونا سه‌رۆك بارزانى نيشان دا ودووپاتى ل پێشڤه‌برنا په‌يوه‌نديێن هه‌رێما كوردستانێ وئه‌مريكا دبوارێن سياسى وئابوورى وكه‌لتوورى وهه‌روه‌سا هاريكاريا له‌شكرى ل شه‌رێ دژى تيرۆرێ كر.
هه‌روه‌سا زێده‌بارى ئاماژهدان ب گرنگى وپێگه‌هێ هه‌رێما كوردستانێ، به‌رچاڤكر كو ئه‌مريكا مژوولى دروستكرنا مه‌زنترين كونسۆلخانه‌يه ل سه‌ر ئاستێ جيهانێ ل باژێرێ هه‌ولێرێ وئه‌و ژى ئاماژه‌كا رۆهنه بۆ ب هێز مانا په‌يوه‌نديێن دناڤبه‌را ئه‌مريكا وهه‌رێما كوردستانێ.
ئه‌ڤرۆنيوز:
جاره‌كادى فرۆكێن له‌شكرێ توركى ده‌ڤه‌را سيده‌كان توبپارانكر وبۆ ئه‌گه‌رێ سوتنا پيش ودارستانا ده‌ڤه‌رێ.
ل ئێڤاريا دره‌نگ يا ئه‌ڤرۆ، ل دووڤ سه‌ته‌لايتا كوردستان، فرۆكێن له‌شكرێ توركى ب به‌هانه‌يا هه‌بوونا بنكه وباره‌گايێن په‌كه‌كێ، هه‌ر ئێك ژ چيايێ شه‌كيو وگه‌لى ماله‌مه‌لا وكه‌وه‌رت ل ده‌ڤه‌را سيده‌كان توپبارانكرن وبۆ ئه‌گه‌رێ سوتنا پيش ودارستانا وێ ده‌ڤه‌رێ.
ئەڤرۆ نیوز، فاتما مزووری:
فیدریکا موگرینی بەرپرسا سیاسەتا ژ دەرڤە یا ئێکەتیا ئورۆپا د داخویانیەکی دا راگەھاند کو ھەر ئێک ژ وەزیرێن دەرڤە یێ چین و روسیا و بریتانیا و ئەلمانیا رۆژا ئەینی ل ڤییەنا دێ ل گەل بەرپرسێن ئیرانێ کۆم بن ب مەرەما دیتنا چارەسەریەکێ ژبۆ پاراستنا رێکەفتنا ئەتۆمی یا ل گەل ئیرانێ کو د سالا 2015ێ دا د ناڤبەرا وان وەلاتان دا ھاتیە ئیمزا کرن.
ب گۆرەی ژێدەرێن دەنگوباسان مەرەم ژ ڤێ کۆمبوونێ ژبۆ رزگارکرنا رێکەفتنا ئەتۆمی یە ئەو ژی وەکو روو ب رووبوونا بڕیارا سەرۆکێ ئەمریکا ترەمپ ژبۆ خوەڤەکێشان ژ رێکەفتناما ئەتۆمی و سەپاندنا سزایێن ل سەر ئیرانێ.
مۆگرینی ئەشکەرا ژی کر کو د ھەیڤا ھەشت دا سزا دێ ل سەر ئیرانێ ھێنە سەپاندن، بەلێ ھندەک ژ کۆمپانیێن ئورۆپی کو وەبەرھێنانا وان د ناڤ ئیران دایە و کارێن مەزن ل ئەمەریکا ھەنە گۆتیە دێ ژ رێکەفتنا ل گەل ئیرانێ خوە ڤەکێشین.
ئه‌ڤرۆ نيوز، فاتما مزوورى:
سيناتۆڕه‌كێ ئه‌مريكى هێرشێ دكه‌ته سه‌ر توركيا و دده‌ته زانين كو هه‌كه توركيا ده‌ستێوه‌ردانێن زێده‌تر بكه‌ته د ناڤ كاروبارێن سوريا دا، دێ خوه د كێشه‌كێ دا بينيت.
سيناتۆرێ ئه‌مريكى لندسه‌ى گراهام د سه‌ره‌دانا خوه دا ژ بۆ به‌غدا بۆ رويته‌رز راگه‌هانديه كو دڤێت توركيا پشته‌ڤانيا به‌رده‌وامبوونا ئه‌مريكا ل سوريا بكه‌ت.
گراهام كو دێ سه‌ره‌دانا توركيا و سوريا و عيراقێ دكه‌ت پشتى كۆمبوونا ل گه‌ل سه‌رۆك كۆمار ره‌جه‌ب ته‌يب ئه‌ردوگان گۆت: “من بزاڤ كرن كو وێ باوه‌ريێ بۆ ئه‌ردوگان چێكه‌م كو توركيا پێدڤى يا ئه‌مريكا هه‌ى، ژ به‌ر كو ده‌ركه‌فتنا ئه‌مريكا ژ سوريا دێ ئه‌نجامێن نه‌باش ده‌ركه‌ڤن”.
گۆتژى: “پێدڤى ناكه‌ت له‌شكرێ توركيا زێده‌تر ده‌ستێوه‌ردانێ د ناڤ ئاخا سوريێ دا بكه‌ت، ژ به‌ر كو توركيا دێ خوه د چاله‌كێ دا بينيت”.
توركيا ژ پشته‌ڤانيكرنا ئه‌مريكا بۆ يه‌كينێن پاراستنا گه‌ل “يه‌په‌گه” يا دلگرانه و د دو سالێن بۆرى دا د ناڤ ئاخا سوريێ دابوو. له‌شكرێ توركيا ژى ژ 18ى ئادارا بۆرى دا چوويه د ناڤ عه‌فرينێ دا و داگير كريه.
توركيا هه‌يڤا بۆرى ژى راگه‌هاند كو ل سه‌ر باژێرێ منبجێ ل گه‌ل ئه‌مريكا گه‌هشتينه نه‌خشه رێيه‌كێ و ب گۆره‌ى وى نه‌خشه‌ڕێ، د قووناغا ئێكێ دا يه‌په‌گه دێ ژ وى باژێرى ده‌ركه‌ڤيت و پاشان ژى هێزه‌كا هه‌ڤپشك يا توركى و ئه‌مريكى دێ چيته د وى باژێرى دا.
ئه‌ڤ سيناتۆرێ ئه‌مريكى ل سه‌ر ڤه‌كێشانا هێزێن يه‌په‌گێ دده‌ته زانين كو هه‌كه يه‌په‌گه 20 كيلۆمه‌تران ژ منبجێ يا دوور بيت به‌سه.
نيشاندان