ئه‌ڤرۆنيوز:

ئاژانسا سپۆتنيك يا ده‌نگوباسان يا رووسى، ئه‌ڤرۆ بريار دا پشكا كوردى ب پيتێن لاتينى بهێته‌ داخستن، په‌يامنێره‌كێ پشكا كوردى يا وێ ئاژانسێ ژى بۆ ئه‌ڤرۆنيوز ئاشكراكر كو توركيا رۆل د وێ بريارێ دا هه‌بوو.

ئاژانسا سپۆتنيك يا رووسى، ئه‌ڤرۆ شه‌مبيێ 30/6/2018 به‌لاڤكر” ئه‌م دووماهيێ ب وه‌شانا خوه‌ يا زمانێ كوردى دئينين، هوون دكارن ده‌نگوباسێن مه‌ ب زمانێن دى ل سپۆتنيك بخوينن”.

عوسمان باشقالى، په‌يامنێرێ پشكا كوردى ب پيتێن لاتينى ل ئاژانسا سپۆتنيك يا ده‌نگوباسان يا رووسى بۆ (ئه‌ڤرۆنيوز) گۆت”  ئاژانسا سپۆتنيك ب 32 زمانان دهێته‌ وه‌شاندن كو ئێك ژوان زمانێ كوردى بوو ( پيتێن لاتينى)، ل هه‌يڤا شوباتا بۆرى مه‌ پرۆژه‌ك دابوو وه‌زاره‌تا ده‌رڤه‌ يا رووسى ومه‌ داخوازكر كو پشكا كوردى بهێته‌ هه‌ولێرێ، چونكى پشكا توركى يێ ل ستانبۆلێ وپشكا عه‌ره‌بى يێ ل قاهيره‌ وپشكا فارسى يێ ل ئيرانێ ومه‌ داخوازكر پشكا كوردى ژى يێ سه‌ربخوه‌ بيت نه‌كو دناڤ پشكه‌كا دى دابيت كو دناڤ پشكا توركى دابوو”.

باشقالى زێده‌تر گۆت” ده‌مێ هنده‌ك كه‌سێن ل پشكا توركى يا ئاژانسا سپۆتنيك ئه‌ڤ چه‌نده‌ زانى، بزاڤ كرن ب رێيا كه‌سه‌كێ ئازه‌رى كو به‌رپرسێ پشكا توركى وكوردى يه‌ ل ئاژانسا ناڤبرى ل ستانبۆلێ رێ ل ڤێ چه‌ندێ بگرن وئاريشه‌ دروستكرن ب به‌هانه‌يا نه‌بوونا بودجێ وئه‌ڤ چه‌نده‌ دێ بيته‌ بارگرانى وپاره‌ نه‌دان كارمه‌ندێن كورد ل ستانبۆلێ”.

دياركر ژى” به‌رى هه‌يڤا ره‌مه‌زانێ هه‌ڤالێن ئاژانسێ ژ موسكۆ په‌يوه‌ندى ب من كر ورازيبوونا خوه‌ ل سه‌ر ڤه‌كرنا پشكا كوردى ب زاراڤێ سۆرانى دياركر، به‌لێ پشكا توركى ل ستانبۆلێ ل ده‌مێ هه‌يڤا ره‌مه‌زانى بزاڤا رێگريێ ل وێ پرۆژه‌ى كر وبزاڤێن وان سه‌رگرتن ودێ پشكا كوردى ب تيپێن لاتينى هێته‌ داخستن وئه‌ڤرۆ شه‌مبيێ 30/6/2018 دووماهى رۆژا پشكا كوردى يه‌ ل ئاژانسا سپۆتينك يا رووسى”.

گۆت ژى” هه‌رچه‌نده‌ بريارا داخستنێ ژ رووسيا هاتيه‌ ده‌ركرن، به‌لێ توركيا رۆله‌كێ مه‌زن دوێ چه‌ندێ دا هه‌بوو ب بهانه‌يا نه‌بوونا بودجه‌ى وپاره‌ى، ژبه‌ركو پشكا توركى كو هه‌ر سه‌رپه‌رشتى ل يا كوردى ژى دكر، دخواست پشكا كوردى ژى هه‌ر ب هه‌ناسه‌يا پشكا توركى به‌حسێ كوردان بكه‌ت وبه‌حسێ سه‌ربخوه‌يێ ومافێن كوردان نه‌كه‌ت وئه‌ڤه سێ ساله‌ مه‌ ئه‌و ناكۆكى ل گه‌ل پشكا توركى هه‌بوون” .

عوسمان باشقالى دياركر” ل دۆر پرسا داخستنا پشكا كوردى مه‌ ياداشته‌ك ل سه‌ر ئاستێ هه‌ر چار پارچێن كوردستانێ يا نڤيسى وگه‌له‌ك كه‌سايه‌تيێن سياسى وره‌وشه‌نبير ورۆژنامه‌ڤانان وخه‌لكى ژى پشكدارى تێدا كريه‌ ومه‌ پێشكێشى وه‌زاره‌تا ده‌رڤه‌ يا رووسى كريه‌ ومه‌ تێدا يا داخواز كرى كو پشكا كوردى نه‌هێته‌ داخستن وبهێته‌ ڤه‌گوهاستن بۆ هه‌ولێرێ وپشكا سۆرانى ژى دگه‌لدا بهێته‌ ڤه‌كرن، به‌لێ مخابن وان بريار دا وداخست”.

ئه‌ڤرۆنيوز:

رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند، ژئه‌گه‌رێ وێ تۆزا ئه‌ڤرۆ ئه‌ينيێ باژێرێ كه‌ركووكێ وخورماتوو ڤه‌گرتى، رادێ ديتنێ كێمكريه‌.

رێڤه‌به‌ريا ناڤبرى دياركر ژى” ژئه‌گه‌رێ له‌زاتيا باى، توز ل هنده‌ك باژێر وباژێركێن هه‌رێما كوردستانێ يا به‌رده‌وامه‌ وراده‌يا ديتنێ يا كورت بووى ب جۆره‌كى ل هه‌ولێرێ راده‌يا ديتنێ پێنج كيلۆمه‌تره‌ ول شه‌مامك سێ كيلۆمه‌تر ول دهۆكێ وزاخۆ 9 كيلۆمه‌تر ول كه‌ركووكێ ئێك كيلۆمه‌تره‌ ول خورماتوو 800 مه‌تره‌”.

ئه‌و توزبارينه‌ ل ده‌مژمێر 1:30 پشتى نيڤرۆيا ئه‌ڤرۆ ده‌ستپێكريه‌، به‌لێ كه‌شناسيا هه‌رێمێ ئاماژه‌ ب ژڤانێ ب دووماهى هاتنا وێ توزبارينێ نه‌دايه‌.

ئه‌ڤرۆنيوز:

نوونه‌رێ كوردێن ئێزدى ل په‌رله‌مانێ كوردستانێ راگه‌هاند، هه‌كه‌ ده‌ڤه‌رێن شنگالێ بزڤرن بۆ سه‌ر هه‌رێما كوردستانێ، كوردێن ئيزدى پێدڤى ب كورسيێن كۆتا نابن، به‌لێ نوكه‌ كوردێن ئێزدى تنێ 10% ئاكنجيێن پاريزگه‌ها دهۆكێ پێك دئينن ونه‌شێن نوونه‌ران بۆ خوه‌ ب هه‌لبژێرن،

شێخ شامۆ، ئه‌ندامێ په‌رله‌مانێ كوردستانێ، ل دووڤ مالپه‌رێ كوردستان تى ڤى گۆت” هه‌رچه‌نده‌ سه‌رۆك بارزانى ئه‌م يێن پشت راستكرين ل سه‌ر بنه‌مايێ ئاكنجيان ئه‌و مامه‌لێ ل گه‌ل كوردێن ئيزدى ناكه‌ن”.

گۆت ژى” مه‌ پرۆژه‌ قانوونه‌ك ب ئيمزايا 40 په‌رله‌مانتاران يا به‌رهه‌ڤكرى وتێدا مه‌ يا داخوازكرى ل په‌رله‌مانێ كوردستانێ پێنج كورسيێن كۆتا بۆ كوردێن ئێزدى بهێنه‌ دياركرن ول جڤاتا پاريزگه‌ها دهۆكێ ژى سێ كورسى، ئه‌وژى ب شێوه‌كێ ده‌مكى هه‌تاكو شنگال وده‌ڤه‌رێن داگيركرى بزڤرن بۆ سه‌ر هه‌رێما كوردستانێ وبشێن مه‌ نوونه‌رێن خوه‌ ل په‌رله‌مانێ كوردستانێ هه‌بيت”.

ل دۆر ئه‌نجامێ وى پرۆژه‌ قانوونێ، شێخ شامۆ گۆت” مه‌ ئه‌و پرۆژه‌ يێ راده‌ستى په‌رله‌مانى كرى وب ئۆمێدين ل ڤێ خۆلا په‌رله‌مانى بچيته‌ دناڤ به‌رنامێ كارى دا وبهێته‌ په‌سه‌ندكرن”.

ئه‌ڤرۆنيوز:

وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، دچارچۆڤێ وێ پلانا ستراتيژى ئه‌وا وه‌زاره‌تێ ده‌ستپێكرى بۆ گوهۆرينان د پرۆگرامێن خواندنێ ل پشكێن زانستى، پێنگاڤێن پراكتيكى يێن گوهۆرينان ل پشكێن كومه‌لناسيێ وكارێ كومه‌لايه‌تى ل زانكۆيێن هه‌رێما كوردستانێ يا ده‌ستپێكرى.

وه‌زاره‌تا خواندنا بلند دمالپه‌رێ خوه‌ يێ فه‌رمى دا به‌لاڤكر” يوسف گۆران وه‌زيرێ خواندنا بلند وڤه‌كۆلينێن زانستى دچارچۆڤێ سه‌رپه‌رشتيكرنا لژنا پێداچوونا بابه‌تێن خواندنێ ل هه‌ردو پشكێن كومه‌لناسيێ وكارێ كومه‌لايه‌تى وگۆت، بۆ چاره‌سه‌ركرنا ئه‌و كێشێن ل كومه‌لگه‌ها كوردى سه‌رهلداين، پێدڤى ب هشياريا كومه‌لايه‌تى هه‌يه‌، ژ وى رووى دا دڤێت بسپۆر وشاره‌زاێن بوارێ كومه‌لناسيێ وكارێ كومه‌لايه‌تى رۆلێ پێشه‌نگ وكارا هه‌بيت، بۆ وێ چه‌ندێ ژى دڤێت پێداچوونه‌كا تمام د پرۆگرامێن خواندنێ ل پشكێن كومه‌لناسيێ وكارێ كومه‌لايه‌تى دا بهێته‌ كرن”.

هه‌روه‌سا دكتۆر ماهر عه‌بدولواحد، سه‌رۆكێ لژنا پێداچوونێ ب وان بابه‌تێن كۆمبوونێ دا گۆت” چه‌ند پێشنياز هاتن به‌حسكرن كو ئه‌وژى ئێكسختنا پرۆگرامێ خواندنێ ل قۆناغا ئێكێ ل هه‌ردو پشكێن كومه‌لناسيێ وكارێ كومه‌لايه‌تى بۆ سالا خواندنێ 2018 -2019، دهه‌مان ده‌م دا پێشنياز هاتيه‌ كرن بابه‌تێ كومپيۆته‌رى ل هه‌ردو پشكان بهێته‌ لادان وبابه‌تێ په‌يوه‌نديدار ل جهێ وى بهێته‌ دانان، هه‌روه‌سا پێشنياز هاته‌ كرن بابه‌تێ كوردولۆجى بهێته‌ گوهارتن ب بابه‌تێ كومه‌لگه‌ها كوردستانى”.