NO IORG
نووترين نووچه
نوچێن گرنگ

ئەڤرۆ نیوز ، زنار تۆڤی:

رێڤەبه‌ریا گشتی یا ئاڤ و ئاڤرێژان ل هەرێما كوردستانێ راگەهاند کو ئەو دێ كار ب سیستەمێ نوو یێ پیڤه‌رێن ئاڤێ کەن وداخواز ژ هەموو وەلاتیێن هەرێمێ کر، كو د دەمێ دوو هەیڤاندا پێدڤیە پێڤەرێن ئاڤێ ل هەموو مالان بهێتە دانان بەروڤاژی وێ ئێكێ ئەو كەسێ نەگرێده‌ت دی تووشی سزایا دارایێ بیت و بەرامبەر ڤێ چەندێ دێ 100 هزار دینار وەکو سزا ژێ هێته وەرگرتن و هەردوو هەیڤان جارەکێ دێ سەرەدانا هەموو مالان هێتە کرن.

ئەڤرۆ نيوز:

رێڤەبەرێ کارگێری ل رێڤەبەریا سەنتەر و تیپێن ھونەری ل پارێزگەھا دھۆکێ بۆ رۆژناما ئەڤرۆ دیار کر کو ھەر سەنتەر و تیپەکا ھونەری یا د ڤێ ھەیڤێ دا کۆنفرانسێ خوە ئەنجام نەدەت دێ ھێتە ھەلوەشاندن.

رەبیع خەلاتی، رێڤەبەرێ کارگێری ل رێڤەبەریا سەنتەر و تیپێن ھونەری ل پارێزگەھا دھۆکێ خویا کر کو وەزارەتا ناڤخۆ یا حوکمەتا ھەرێما کوردستانێ بڕیار دایە ھەر سەنتەر و تیپەکا ھونەری یا ل سنوورێ پارێزگەھا دھۆکێ د ڤێ ھەیڤێ دا کۆنفرانسێ خوە ئەنجام نەدەت دێ دەستەکا کارگێریا وی سەنتەری ھێتە ھەلوەشاندن و ھندەک کەسێن دی ل جھێ وان دێ ھێنە دانان و نوکە رێڤەبەریا کاروبارێن ناڤخۆ ل دھۆکێ یا دووپاتیێ ل ڤێ چەندێ دکەت.

ناڤھاتی ئاماژە دا وێ چەندێ کو ھەر ژ ئەڤرۆ رۆژا 26-6-2018ێ دێ ھندەک سەنتەر کۆنفرانسێ خوە ئەنجام دەن ژ وان سەنتەرێن (ئالوکا، فەیدیێ) و گۆت: “مە نێزیکی 50 سەنتەر و تیپێن ھونەری ل سنوورێ پارێزگەھا دھۆکێ ھەنە، لێ ژ بەر قەیرانا دارایی یا سەر ب ھەرێمێ دا ھاتی بۆ دەمەکی کار و چالاکیێن وان ھاتبوونە راوەستاندن، لێ پشتی ڤێ بڕیارێ ئەڤ سەنتەرە د کارا بنە ڤە و جارەکا دی دێ دەست ب بزاڤ و چالاکیێن خوە کەن”.

ئه‌ڤرۆ نیوز ، نه‌وزاد هلۆرى:

پشتى كو ل چه‌ند روژێن بۆرى موندیالا 2018 ل رووسیا ده‌ستپێكرى ، هژماره‌كا مه‌زن یا جهێن په‌خشكرنا یاریێن وێ ل سنورێ قه‌زا ئامێدیێ ب گشتى و ناحیا شێلادزێ ب تایبه‌تى هاتنه‌ دروستكرن و هژماره‌كا گه‌نجان تێدا كاردكه‌ن و بوونه‌ خودانكار.

ئه‌و گه‌نجێن كو جهێن تایبه‌ت بۆ په‌خشكرنا یاریێن موندیالێ درۆستكرین ديار دكه‌ن كو سه‌ره‌راى موندیال يا ده‌مكى یه‌ ، به‌لێ بۆ وان بوویه‌ ده‌رگه‌هه‌ك بۆ په‌یداكرنا كارى و دبێژن: (موندیال بۆ ئه‌گه‌ر كو ئه‌و جهێن تایبه‌ت بۆ په‌خشكرنا یاریێن موندیالێ بدانن و هنده‌ك خوارن و ڤه‌خوارنان بفرۆشن، دیسان شه‌ڤانه‌ هژماره‌كا مه‌زن یا گه‌نجان قه‌ستا جهێن وان دكه‌ن بۆ دیتنا یاریيێن مونديالا رووسيا و ئه‌و دناڤبه‌را خوه‌ دا دانوستاندنان ل سه‌ر ئه‌نجامێن یاریان دكه‌ن و ب گۆره‌ى یاریێن ب هێز هژمارا سه‌ره‌دانێن وان دهێته‌ گوهۆرین).
پشته‌ڤانێن هه‌لبژاتیێن پشكدار د موندیالێ دا ژى بوچوونێن خوه‌ هه‌نه‌ و ئه‌و شه‌ڤانه‌ دهێنه‌ جهێن په‌خشكرنا یاریان و دانوستاندنێ ل سه‌ر ئه‌نجامێن یاریان دكه‌ن و دبێژن ، موندیال ده‌لیڤه‌كا مه‌زن‌ بۆ هنده‌ك گه‌نجێن ده‌ڤه‌رێ ره‌خساندیه‌ كو جهێن كارى بۆ خوه‌ بدانن و ببنه‌ خودان كارێن تایبه‌ت مینا دانانا شاشێن مه‌زن و فرۆتنا چه‌ند خوارن و ڤه‌خوارنان ل سه‌ر جادده‌ و جهێن تایبه‌ت و ئه‌و ژى دلخوه‌شن ب ڤه‌كرنا وان جهان و ئه‌ڤه‌ سه‌ره‌راى كو ئه‌ڤ جهه‌ و یاریێن موندیالێ ئه‌و ژ كه‌ش و هه‌وایێ سیاسى دوور كرینه‌.
ب گۆره‌ى پێزانينێن ئه‌ڤرۆ نیوز ب تنێ ل سنورێ قه‌زا ئامێدیێ زێده‌تر ژ 30 جهێن تایبه‌ت بۆ په‌خشكرنا یاریێن موندیالێ هاتینه‌ ڤه‌كرن و هژماره‌كا مه‌زن یا گه‌نجان ل وان جهان وه‌كو خودان كار و كرێكار كاردكه‌ن.

شێخان،بارزان مزووری:

كومیسەر ئەمین حه‌سه‌ن ، ژ رێڤەبەریا هاتنوچونا ناحیا ئەلقوشێ   بۆ ئەڤرۆنيوز دیار كر كو ئه‌ڤرۆ دوشه‌مبى25/6 ل سەر رێيا سەرەكی يا ئەلقوش- شێخان دناڤبەرا گوندێ‌ خەوشابا و نفێریێ،‌ ترومبێلەك پیكاب تویۆتا خوه‌ ل ماتورسكلەكێ دا ود ئەنجام دا شوفێرێ‌ ماتورسكلی پشتی بۆ نەخوه‌شخانا تەنگاڤیا دهۆك هاتیە ڤه‌گوهاستن، گیانێ‌ خوه‌ ژ دەست دا ،

دیار كر ژى كو شوفێرێ‌ ترومبێلا پیكاب يێ ب رەگەز عەرەب هاتە دەستەسەركرن ژلایێ‌ پۆلیسێن ئەلقوشێ ڤە ،

خوياكر ژى”كو ئەو كەسێ‌ گیانێ‌ خو ژ دەست دای ب ناڤێ‌”خالد عصمان” خەلكێ‌ گوندێ‌ خەوشابا يه‌ يێ سەر ب قەزا شێخان ڤە وبابێ‌ كچك و كورەكى يه‌”.

ئه‌ڤرۆنيوز:

وه‌زيرێ كاروبارێن شه‌هيد وئه‌نفالكريان ل هه‌رێما كوردستانێ راگه‌هاند، ل ده‌مێ شه‌رێ داعشێ ل هه‌رێما كوردستانێ زێده‌تر ژ دو هزار كه‌س يێن بێ سه‌ر وشوين بووين.

مەحموود حاجی ساڵح، وه‌زيرێ کاروبارێن شەهید و ئەنفالکريان دچارچۆڤێ پشكداريا وى د كۆنفرانسێ نه‌هێلانا توندوتيژيا سيكسى ل هه‌وليرێ،  گۆت” ل ده‌مێ شه‌رێ داعشێ 2495 كه‌س ژ كوردێن ئێزدى ژلايێ وه‌زاره‌تا شه‌هيد وئه‌نفالكريان هاتينه‌ تۆماركرن، ژ سه‌رجه‌مێ وێ هژمارێ ژى چو پێزانين ل سه‌ر 2303 كه‌سان نينن”.

دياركر ژى” هه‌تا نوكه‌ 2036 دوسێيێن تاوانێن توندوتيژيێ ژلايێ وه‌زاره‌تا ناڤبرى هاتينه‌ تۆماركرن كو دژى كچ وژنێن ئێزدى هاتينه‌ ئه‌نجامدان، ژوان 1052 كه‌سان ژيێ وان دسه‌ر 18 ساليێ دابوو و 948 كه‌سێن دى ژيێ وان دبن 18 ساليێ دا بوو”.

ئه‌ڤرۆنيوز:

ب هه‌لكه‌فتا ب دووماهی هاتنا ئه‌رك وكارێن به‌رپرسا رێكخراوا UNHCR ل هه‌رێما كوردستانێ،‌ ئه‌ڤرو دوشه‌مبى 25-6-2018 فه‌رهاد ئه‌مین  پارێزگه‌رێ‌ دهوكێ‌ پێشوازیا (مونیكا نورۆ) به‌رپرسا رێكخراوا UNHCRل كوردستانێ‌ كر.

دهه‌ڤدیتنه‌كێ دا به‌حسێ‌ ره‌وشا ئاواره‌ وپه‌نابه‌ران ل سنورێ‌ پارێزگه‌ها دهۆكێ‌ وهه‌ماهه‌نگیا دناڤبه‌را كارگێریا پارێزگه‌ها دهۆكێ‌ ورێكخراوا UNHCR كو ل سالێن بۆری خزمه‌ته‌كا هه‌ڤپشك پێشكێشی هه‌موو ئاواره‌ وپه‌نابه‌ران كریه‌ ب گشتی هاته‌ كرن.

دته‌وه‌ره‌كێ‌ دى دا به‌حسێ‌ ب دووماهی هاتنا كار وئه‌ركێن به‌رپرسا رێكخراوا UNHCR ل كوردستانێ‌ وئه‌و خزمه‌تا ل ده‌مێ‌ ده‌ربازبووی پێشكێشكری وئه‌ركێ‌ وێ‌ یێ‌ نوو بۆ كاروبارێن مروڤایه‌تی ل وه‌لاتێ‌ ئوردن هاته‌ كرن.

پارێزگه‌رێ‌ دهۆكێ‌ ب ناڤێ‌ خوه‌ وكارگێریا پارێزگه‌ها دهۆكێ‌ ده‌ست خوه‌شی وسوپاسیا (مونیكا نورۆ) به‌رپرسا رێكخراوا UNHCRل كوردستانێ‌ كر هه‌مبه‌ر ئه‌و خزمه‌تا ل ده‌مێ‌ ده‌ربازبووی دوارێ‌ مروڤایه‌تی دا پێشكێشی ئاواره‌ وپه‌نابه‌ران ل سنورێ‌ پارێزگه‌ها دهۆكێ‌ كری وداخوازا سه‌ركه‌فتنێ‌ دكارێ‌ وێ‌ یێ‌ نوو دا كر.

ئه‌ڤرۆ نيوز، نيوار:

لیژنا دووڤچوونا بازاری ئەڤرۆ (٢٠١٨/٦/٢٥) ھژمارەکا دی یا خوارنگەھ و نانپێژیا سزادان.
بەرپرسێ لیژنا دووڤچوونا بازاری ل قائیمقامیا دھۆکێ ئاشکرا کر ژ بەر نەپێگریا وان ب رێنماێن ساخلەمیێ ھەڤیرگوشتا (حەمودی) و فەلافل (بابێ یەحیا) و (سولتان دونەر) ھەر ئێک ب گوژمێ (٥٠٠) ھزار دیناران ھاتنە سزادان.
یوسف محمەد گۆتژی: “ژ بەر نەبوونا دەستووریا ساخلەمیێ ناپێژیا (بابۆ) ژى ھاتە دايخستن.
نافبری خواست ژبۆ ھەر گازندەکێ وەلاتی دشێن پەیوەندیێ ب ڤێ ژمارێ بکەن (٠٧٥٠١٦١٢٦٢٢).

35923201_1694128770698006_5692375742302650368_n 36031371_1694128704031346_7698022295830265856_n 36088338_1694128720698011_6902755886331068416_n

ئه‌ڤرۆنيوز:

سه‌رۆك مه‌سعود بارزانى، ئه‌ڤرۆ دوشه‌مبى 25/6/2018 پيرۆزباهيا سه‌ركه‌فتنا هه‌لبژارتنێن توركيا كر وراگه‌هاند كو يێ خوه‌شحاله‌ ب سه‌ركه‌فتنا پرۆسێ ب شێوه‌كێ ديموكراسى وئاشتيانه‌.

سه‌رۆك بارزانى، دبه‌رپه‌رێ خوه‌ دا ل سه‌ر تۆرا تويته‌رى، به‌لاڤكر” خوه‌شحالم ب سه‌ركه‌فتنا دوهى يا پرۆسا هه‌لبژارتنێن گشتى ل توركيا ب شێوه‌كێ ديموكراتى وئاشتيانه‌”.

سه‌رۆك بارزانى گۆت ژى” هيڤيدارم ئه‌نجامێن هه‌لبژارتنان رێخوه‌شكه‌ربن بۆ ديتنا رێ چاره‌كا نوو بۆ پرسا كوردى ل توركيا، ئه‌ڤه‌ ژى ل پێناڤى په‌يداكرنا سه‌قامگيرى وئاشتيه‌كا زێده‌تر ل ده‌ڤه‌رێ”.

ئه‌ڤرۆنيوز:

كارگه‌هه‌كا دروستكرنا مه‌حفيران ئه‌ڤرۆ دوشه‌مبى 25/6/2018 ب جهئينانا رێكخراوا كۆچ يا نێڤده‌وله‌تى( IOM) وب هاريكاريا ده‌سته‌يا كاروبارێن مرۆڤايه‌تى ل پارێزگه‌ها دهۆكێ ( BRHA) و ب پشته‌ڤانيا دراڤى يا حوكمه‌تا ئه‌لمانيا، ل خانكێ هاته‌ ڤه‌كرن.

جيوفانى، رێڤه‌به‌رێ رێكخراوا كوچ يا نێڤدوله‌تى ( IOM) بۆ ئه‌ڤرۆنيوز گۆت” ئه‌ڤ كارگه‌هه‌ ب هاريكاريا وه‌لاتێ ئه‌لمانيا هاتيه‌ دروستكرن ب گۆژمێ نيڤ مليۆن دۆلاران زێده‌بارى مه‌زاختيێ راهێنانا كه‌سێن تێدا كاردكه‌ن ومه‌ ل به‌ره‌ پرۆژێن ب ڤى شێوه‌ى ل چه‌ندين ده‌ڤه‌رێن دى ژى دروست بكه‌ين”.

جيوفانى گۆت ژى” 31 كچ وژن ژ خانكێ وئاوارێن شنگالێ دێ ل ڤێ كارگه‌هێ كاركه‌ن”.

سه‌لوا، ل ڤێ كارگه‌هێ كار دكه‌ت بۆ ئه‌ڤرۆ نيوز گۆت” مه‌ بۆ ده‌مه‌كى راهێنان ل سه‌ر چێكرنا مه‌حفيران كريه‌ ول ده‌ستپێكێ بۆمه‌ گه‌له‌ك يا بزه‌حمه‌ت بوو، به‌لێ پاشى ئه‌م فێربووين وبێگومان ل كاركرنا مه‌ يا به‌رده‌وام ل ڤێ كارگه‌هێ دێ پتر شاره‌زاييا كارى بۆمه‌ په‌يدا بيت”.

سه‌ميره‌ عه‌لى، هاريكارا رێڤه‌به‌را بنگه‌هێ دروستكرنا مه‌حفيران ل پارێزگه‌ها دهۆكێ گۆت” پێنگاڤه‌كا باشه‌ ئه‌ڤ كارگه‌هه‌ ل خانكێ هاتيه‌ دروستكرن ودێ ده‌ليڤێن كارى په‌يداكه‌ت ومه‌ وه‌كو بنگه‌هێ دروستكرنا مه‌حفيران هاريكاريا ڤێ كارگه‌هێ كريه‌ ب رێيا راهێنانا ژنێن دێ ل ڤێ كارگه‌هێ كاركه‌ن وئه‌م د به‌رهه‌ڤين بۆ هاريكاريا وان ب مه‌شق وراهێنانێ”.

ئيسماعيل محه‌مه‌د، هاريكارێ پارێزگه‌رێ دهۆكێ بۆ كاروبارێن مرۆڤايه‌تى دپه‌يڤه‌كێ دا ل رێ وره‌سمێن ڤه‌كرنا بنگه‌هى به‌حسێ گرنگیا ڤێ کارگەھێ وھاندانا خەلکێ بۆ جێکرنا کارێن دەستی و مفا وەرگرتن ژ بەرھەمێن خوه‌يى.

ئه‌ڤرۆنيوز:

رۆژناما شه‌رقولئه‌وسه‌ت يا له‌نده‌نى د راپۆرته‌كا خوه‌ دا يا هژمارا ئه‌ڤرۆ دوشه‌مبى 25/6/2018 به‌لاڤكر كو ئه‌و هه‌ڤپه‌يمانيا دناڤبه‌را سائيرون ب سه‌رۆكاتيا موقته‌دا سه‌در و ليستا نه‌سر ب سه‌رۆكاتيا حه‌يده‌ر عه‌بادى ده‌ليڤا وه‌رگرتنا حه‌يده‌ر عه‌بادى بۆ پۆستێ سه‌رۆك وه‌زيران زێده‌تر لێكريه‌.

رۆژناما له‌نده‌نى به‌لاڤكر ژى” دروستبوونا وێ هه‌ڤپه‌يمانيێ خه‌ونا هادى عامرى سه‌رۆكێ ليستا فه‌تح بۆ وه‌رگرتنا پۆستێ سه‌رۆك وه‌زيران ژناڤبر.

دياركر ژى” گرێدانا هه‌ڤپه‌يمانيێ دناڤبه‌را سه‌در و عامرى ل هه‌يڤا بۆرى هيڤيێن عامرى بۆ وه‌رگرتنا پۆستێ سه‌رۆك وه‌زيران گه‌ش كربوون، ئێرانێ ژى به‌رهه‌ڤى بۆ وێ چه‌ندێ كربوو، به‌لێ هنده‌ك لايه‌نێن شيعى ل عيراقێ ددلته‌نگ بوون ب وێ پێنگاڤێ ول به‌راهيا وان حه‌يده‌ر عه‌بادى كو وه‌كو بزاڤه‌ك بۆ ژناڤبرنا وێ هيڤيا عامرى، داخوازا كۆمبوونا سه‌ركردێن عيراقى كربوو”.

سياسه‌تمه‌داره‌كێ عيراقێ بۆ رۆژناما شه‌رقولئه‌وسه‌ت گۆت” ده‌ليڤا عه‌بادى بۆ وه‌رگرتنا پۆستێ سه‌رۆك وه‌زيران ژ عامرى پتره‌، هه‌رچه‌نده‌ چه‌ندين به‌ربژارێن دى ژى بۆ وى پۆستى يێن هه‌ين وه‌كو محه‌مه‌د شياع سودانى وخه‌له‌ف عه‌بدولسه‌مه‌د كو نێزيكن ژ نورى مالكى، به‌ربژاره‌كێ دى ژى يێ هه‌ى كو نه‌ په‌رله‌مانتاره‌ و نه‌ژى خودانێ چو قه‌وارێن سياسى يه‌ ئه‌وژى عه‌لى عه‌بدولئه‌مير عه‌لاوى يه‌”.

website security
WP Facebook Auto Publish Powered By : XYZScripts.com