ئه‌ڤرۆ نيوز:
عەباس ئەکرەم، په‌يڤدارێ وه‌زاره‌تا خواندنا بلند راگه‌هاند: ئه‌ڤ ساله هه‌تا كو 70% كورسييێن خواندنێ يێن زانكۆيان دێ بۆ ده‌رچوويێن خولا ئێكێ يا تاقيكرنان بن.
عەباس ئەکرەم، په‌يڤدارێ وه‌زاره‌تا خواندنا بلند هه‌روه‌سا دياركر: سالا بوورى رێژا سه‌ر 55% يا كورسيێن خواندنێ بۆ ده‌رچوويێن خولا ئێكێ يا ده‌رچوويێن پولا 12 ئاماده‌يى بوو، هه‌روه‌سا رێژا 45 % بۆ خولا دووێ يا ده‌رچوويان بوون، به‌لێ ئه‌ڤ ساله تاوه‌كو ئاستێ 70% دێ بۆ قوتابيێن خولا ئێكێ بيت.
ئه‌ڤرۆ نیوز:
مه‌ولود چاويشئۆغلو، وه‌زیرێ ده‌رڤه یێ توركیا راگه‌هاند، ئه‌نقه‌ره ده‌ست ب رێكاران كرییه بۆ دوباره ڤه‌كرنا كۆنسولخانێن خوه ل باژارێن مووسل و به‌سرا ل ئیراقێ.
توركیا ل 11 خزیرانا سالا 2014ێ ژبه‌ر گه‌فێن ئێمناهیێ كۆنسولخانێن خوه ل باژارێن مووسل و به‌سرا داخستن پشتی داعشێ ده‌ست ب سه‌ر كۆنسولخانا وێ ل مووسل ودا گرتی و چل و هه‌شت كه‌س كو كۆسول ژی ناڤدا بوو ب بارمته برین، پشتی سێ مه‌هان داعشێ بارمته ئازادكربوون.
ئەڤرۆنیۆز، سالار دۆسكی:
رێڤەبەرێ بەرەڤانیا باژێری ل دهۆك ئاشكراكر كو ئەڤرۆ ئێڤاری 30/6/2018 ژ ئەگەرێ ڤەگۆهاستنا گازوایلێ ژ ترومبێلا تانكەر بۆ تانكێ مولیدان ل بانێ ئوتێلا جوتیار ل تاخێ شێلێ، گازوایل هاتیە رێتن وبۆ ئەگەرێ وێ چه‌ندێ ئاگر هه‌لبيت، تیمێن بەرەڤانیا باژێری ئاگر كونترۆل كریە و ڤەكۆلین ل سەر روودانێ یا بەردوامە.
عەمید عەبدالحكیم تاهر سالح، رێڤەبەرێ بەرەڤانیا باژێری ل پارێزگه‌ها دهۆكێ بۆ ئەڤرۆ نیۆز گۆت” ژ ئەنجامێ ڤێ ئاگر بەربوونێ كرێكارەكێ ئوتێلێ ب سڤكی بریندار بوویە كو ملێ وی هاتیە سوتن، كارمەندەكێ بەرەڤانیا باژێری ژى گێژ بوویە و هاتیە رەوانەكرن بۆ نەخوه‌شخانێ”.
گۆت ژى” تانكەرا گازویلێ ب تمامی هاتیە سوتن و ترومبێلەكا وەلاتیەكی ل تەنشت تانكه‌رى ژی هاتیە سوتن و مولیدەكێ كارەبێ ژى يێ سوتى و بیستانەك ژی نێزیك ئوتێلێ يێ هاتینە سوتن و سوباهى دێ راپۆرتا زیانێن مادی هێتە دروستكرن و ڤەكۆلینێن هوور دێ هێنە دەستپێكرن”.
ئه‌ڤرۆ نیوز، نه‌وزاد هلۆرى:
پشتى نیڤرۆیا ئه‌ڤرۆ ژ ئه‌نجامێ توپ بارانكرنا له‌شكرێ توركیا بۆ ده‌ڤه‌رێن سنوری ل ده‌ڤه‌را بارزان، كچه‌كا 19 سالى هاته شه‌هیدكرن.
ژێده‌ره‌كێ ژ نێزیك روودانێ بۆ ئه‌ڤرۆ نیوز گۆت: (پشتى نیڤرۆيا ئه‌ڤرۆ توپخانێن له‌شكرێ توركیا گوندێ ئه‌لانیا یا سه‌ر ب ناحیا شێروانى مه‌زن ب دژوارى توپ بارانكر و د ئه‌نجام دا كچه‌ك هاته شه‌هیدكرن)
زێده‌تر گۆت: ( ناڤێ وێ كچێ دنیا ره‌شیده و خه‌لكا گوندێ ئه‌لانیايه يێ سه‌ر ب ناحیا شێروانى مه‌زن ل مێرگه‌سووره ل سنوورێ ده‌ڤه‌را بارزان ، تیمێن ڤێراگه‌هشتنا بله‌ز ته‌رمێ وێ رزگاركریه و بۆ كه‌سوكارێن وێ زڤراندیه).
ب گۆره‌ى پێزانينێن وى ژێده‌رى، وێ كچێ ل گه‌ل خێزان و كه‌سوكارێن خوه قه‌ستا ئاقارێ گوندێ خوه كربوو ب مه‌ره‌ما كۆمكرنا كه‌نگرۆكان.
ئەڤرۆ ،سالار دۆسكی:
ژ بەر هەبوونا سەیێن بەرەلا شەڤا دەربازبووی ل تاخێ پیشەسازی چەند سەیێن بەرەلا هێرش كرە چەند گەنجان و دئەنجامدا ترۆمبێلێ ل گەنجەكی دا و پێ وی سێ جهان را شكەست.
شڤان، برایێ خودانێ ترۆمبێلا ئەڤیو یە بۆ رۆژناما ئەڤرۆ گۆت: شەڤا 30/6 ل دەمژمێر 12 شەڤ ل تاخێ پیشەسازی هندەك سەیێن بەرەلا هێرش كرە چەند گەنجەكان و گەنجەكێ 24 سالی ب ناڤێ(ئەمیر سەعد) ژ سەیێن بەرەلا ره‌ڤى وكەفتە بەر ترۆمبێلا برایێ من ژ جۆرێ ئەڤیو و برایێ من لەزاتیا ترۆمبێلا وی 30 بوو، لێ چونكى ئەو گەنج ب لەز رەڤی ب ترۆمبێلێ كەفت و پیێ وی د سێ جهان را شكەست.
هێشتا گۆت: ئەڤ سەیێن بەرەلا یێن زێرەڤانانە و گەلەك روودان ل ڤێرە دروست بوون وبەری ده‌مه‌كی ژی سه‌يه‌كى له‌قەك ل گەنجەكی دا بوو ، ئەڤجا پێدڤیە حوكمەت چاره‌يه‌كێ بكه‌ت.
عەبدوالرزاق حاجی، بەرپرسێ پشكا ساخلەمیا ئاژەلی ل ڤێتێەرنەریا دهۆكێ بۆ ئه‌ڤرۆنيوز گۆت: ب تنێ كەسەكێ باژێرڤانیێ ب كاری رادبیت و جفتەك هەیە و رادبیت ب كوشتنا سەیێن بەرەلا و گەلەك جاران ئاریشە بۆ دروست دبن و هەتا نوكە وەك پارێزگەه پشتەڤانی نینە وەك ڤێتێەرنەری نە ئه‌م ل گەل كوشتنا ئاژەلی نينين، لێ چو چارەسەریێن دی نین و ئەڤە قانوونە.
گۆت ژی: لژنەك هاتیە پێكئینان ژ باژێرڤانيێ و ڤێتێەرنەريێ تێ و ئەڤ لژنە ب كوشتنا سەیێن بەرەلا رادبیت، كوشتنا سه‌يان هاتیە قەدەغەكرن و هندەك رێكخراوێن ئاژەلی هەنە مافێن ئاژەلان دپارێزن.
خوياكر” ئه‌رده‌ك يێ هاتیە دەست نیشانكرن ل زركا ماوێ هەشت سالانە و ڤەدیتن بۆ هاتینەكرن و چاڤدان بۆ هەبیت و خەلك ب خوە يبەت هەكە پێدڤی پێ هەبیت و هەتا نوكە چ پێنگاڤ ل ڤی جهی نەهاتینە هاڤێتن، دیسا مە پرۆژەك هەبوو كو سەیێن بەرەلا بگرین و بهێنە ڤاكسندان و ل جهەكێ دی بەردەین”.
ئه‌ڤرۆنيوز:
ئه‌ندامه‌كا په‌رله‌مانێ عيراقێ ژ پارێزگه‌ها نه‌ينه‌وا، راگه‌هاند رێكخستيا داعش يا تيرۆرستى ده‌ست ب چالاكيێن خوه ل وێ پاريزگه‌هێ كرينه، دياركر ژى كو هيزێن له‌شكرى ل نه‌ينه‌وا كو هژمارا وان 12 هزار سه‌ربازن تێرا پاراستنا ئێمناهيێ ناكه‌ن.
نه‌هلا هوبابى په‌رله‌مانتارا مووسلێ بۆ راديوا (المربد) گۆت” ئه‌ندامێن داعشێ ب كه‌يفا خوه هاتنوچوونێ ل پارێزگه‌ها نه‌ينه‌وا دكه‌ن ب هاريكاريا هنده‌ك لايه‌نێن ئه‌منى به‌رامبه‌ر كۆژمێن پاره‌ى ويێ هه‌ڤكاريێ ل گه‌ل داعشێ نه‌كه‌ت دهێته ڤه‌گوهاستن بۆ ده‌رڤه‌ى پارێزگه‌هێ”.
ئه‌ڤرۆنيوز:
ئه‌ندامه‌كێ په‌رله‌مانێ توركيا ژ پارتيا ديموكراتيا گه‌لان (هه‌ده‌په) پشتى ب دووماهى هاتنا خۆلا په‌رله‌مانێ توركيا دزڤريته گوندێ خوه وده‌ست ب كارێ چاندنێ دكه‌ت.
مالپه‌رێ (شرناخ ئاژانس) به‌لاڤكر” محه‌مه‌د عه‌لى ئه‌سلان په‌رله‌مانتارێ هه‌ده‌پێ ل دو خۆلێن بۆرى يێن په‌رله‌مانێ توركيا ب ده‌نگێ خه‌لكێ باتمانێ ومێردينێ گه‌هشتبوو په‌رله‌مانێ توركيا وپشتى ب دووماهى هاتنا خۆلا په‌رله‌مانێ توركيا وهه‌لبژارتنێن رۆژا 24 خزيرانێ يێن په‌رله‌مانى وسه‌رۆكاتيا كۆمارێ، محه‌مه‌د عه‌لى ئه‌سلان زڤريه ڤه بۆ گوندێ خوه (مێرچمكلى) ل مه‌دياتێ ول گه‌ل خيزانا خوه ده‌ست ب كارێ چاندنێ كريه كو ئێك ژوان دوورينا نيسكايه”.
محەمه‌د عه‌لى ئه‌سلان دبێژيت” ژ زارۆكينيێ كارێ من ل گوندى بوو ونوكه ژى پشتى ب دووماهى هاتنا كارێ من ل په‌رله‌مانێ توركيا، ئه‌ز زڤريمه ڤه سه‌ر كارێ خوه ودێ ل گوندى ژيانا خوه به‌مه سه‌ر”.
گۆت ژى” راسته ب كاركرنێ ل گوندى دێ وه‌ستم، به‌لێ به‌رده‌وام يێ دلخوه‌شم كو ل گوندى كار دكه‌م”.
ئه‌ڤرۆنيوز:
كه‌شناسيا عيراقى راگه‌هاند، پلێن گه‌رمێ ل باشوورێ عيراقێ دێ گه‌هنه 50 وبۆ ده‌مێ پێنج رۆژان دێ يا به‌رده‌وام بيت.
كه‌شناسيا عيراقێ به‌لاڤكر” پێله‌كا گه‌رمێ دێ پتريا ده‌ڤه‌رێن عيراقێ ڤه‌گريت ول رۆژا ئێكشه‌مبى 1/7/2018 دێ ده‌ستپێكه‌ت وهه‌تا رۆژێن چارشه‌مبى وپێنجشه‌مبى دێ يا به‌رده‌وامبيت”.
دياركر ژى” دده‌مێ وان پێنج رۆژان دا، پلێن گه‌رمێ ل هنده‌ك ده‌ڤه‌ران دێ گه‌هنه 50 يێ ول باژێرێ به‌غدا دێ گه‌هيته 47 ێ”.
ئاماژه دا كو ئه‌و پێلا گه‌رمى دێ زێده‌تر ل پارێزگه‌هێن باشوورێ عيراقێ وه‌كو ناسريه وبه‌سره وعوماره ڤه‌گريت.
ل دووڤ راگه‌هاندنه‌كا رێڤه‌به‌ريا گشتى يا كه‌شناسيێ ل هه‌رێما كوردستانێ ژى، پلێن گه‌رمێ ل پارێزگه‌هێن هه‌رێما كوردستانێ دێ ب ڤى شێوه‌يى بن: هه‌وليڕ 41 پله، سلێمانى 40 پله، دهۆك 39 پله.
نيشاندان