ئه‌ڤرۆنيوز:
دپارچه‌كا ڤيديۆيى دا كو ئه‌ڤرۆ پێنجشه‌مبى 14/6/2018 ل سه‌ر تۆرێن جڤاكى به‌لاڤبووى، گه‌نجه‌ك ل دوبه‌ى ل وه‌لاتێ ئيماراتێ تووشى سوتنێ دبيت ژئه‌گه‌رێ په‌قينا موبايلا وى.
ل دووڤ وێ ڤيديۆيا هاتيه به‌لاڤكرن، روودانا ناڤبرى په‌يدابوو ده‌مێ ئه‌و گه‌نج ل مۆله‌كا بازرگانى ل دوبه‌ى كو ژنشكه‌كێڤه موبايلا وى په‌قى وئێكسه‌ر ئاگر به‌ربوو جلكێن وى وكه‌سێن ل وێ مۆلێ بزاڤا ڤه‌مراندنا ئاگرى دكر”.
گه‌نجى ناڤبرى هاته ڤه‌گوهاستن بۆ نه‌خوه‌شخانێ وره‌وشا وى ساخله‌ميێ يا باش نينه.
ئه‌ڤرۆ نيوز، فاتما مزوورى:
په‌یڤدرێ هێزێن سوریا دیموكرات راگه‌هاند: شه‌رڤانان هن ده‌ڤه‌ر ل سینورێ رۆژئاڤایی كوردستانێ و ئیراقێ ژ ده‌ستێن تيرۆریستێن داعش رزگار كرنه.
لیوا عه‌بدولله‌په‌یڤدارێ فه‌رمی یێ ئۆپه‌راسیۆنا باهوزا جزیره راگه‌هاندیه: ئۆپه‌راسیۆنا هێزێن سوریای دیموكرات “هه‌سه‌ده” ب مه‌به‌سته پاقژكرنا ده‌ڤه‌رێن سینوری د ناڤبه‌را كوردستان و عیراقێ ده ژ ده‌ستێن ته‌رۆرستێن داعشێ ده، ل دو قولان به‌رده‌وامه و ل قولێ رۆژهه‌لات ڤه نۆ كیلۆمێتران و ل قۆلێ رۆژاڤا ژی 13 كیلۆمێتران پێشره‌وی كرینه.
هه‌روه‌سا راگه‌هاندیه كو شه‌رڤانان كارینه هن گوندان ل بن ده‌ستێن تيرۆرستێن داعش رزگار بكه‌ن و هه‌ڤده‌م كارینه پێنج تونیلێن داعشان ژی ببینن.
لیوا عه‌بدولله هه‌روه‌سا راگه‌هاند:د نها ده شه‌ره‌ك گران د ناڤبه‌را شه‌رڤانان و چه‌كدارێن تيرورستیێن داعش دا به‌رده‌وامه.
جهێ ئاماژێ یه هێزێن سووریا ده‌موكرات هه‌سه‌ده ئۆپه‌راسیۆنا باهۆزا جزیره ل ده‌ستپێكا مه‌ها ئه‌یارا ئیسال ل دژی ته‌رۆریستێن داعش ل حه‌سه‌كه و سه‌ر سینورێن رۆژئاڤایێ كوردستانێ و ئیراقێ هاتیه راگه‌هاندن.
ئەڤرۆ نیوز، نەوزاد ھلۆری:
جودا ژ ھەر دەڤەرەکا دی ،د روژانێن دیماھیا رەمەزانێ و عەرەفاتێ دا بازارێ شێلادزێ گەرم و گوریەکا زێدە بخوڤە گرتیە و بویە ژێدەرێ سەرەکیێ دەستکەفتنا پێدڤیێن جەژنێ بو خەلکێ ناحیا بلێ ھەتا سەرسنکێ.
وەلاتی ددەن دیارکرن کو بازارێ شێلادزێ جودا ژ ھەر دەڤەرەکا دی یا کوردستانێ تا رادەیەکێ ئەرزانە و ژ دوکانداران رازی نە ، و بازارێ شێلادزێ بویە ژێدەرێ سەرەکیێ دەستکەفتنا پێدڤیێن جەژنێ بو خەلکێ ناحیا بلێ ھەتا ناحیا سەرسنکێ.
ب گورەی ئاخفتنێن وان پرانیا ئەو پێدڤیێن نھا ل بازارێ شێلادزێ دھێنە کرین پێکدھێن ژ کەلوپەلێن جەژنێ مینا چکلێت و شیرناھی و چەرەزات و شەربەت و جلوبەرگ و پێدڤیێن خوارنێ.
دوکاندار ژی ددەن دیارکرن کو ئەو ب گورەی شیانێن خوە ھاریکاریا خەلکی دکەن د ئەرزانکرنا بوھایێن کەلوپەلان ، بەلێ ھەڤرکیا دناڤبەرا دوکاندار و بازرگانان بویە سەدەم کو بازارێ شێلادزێ ئەرزانتر ژ دەڤەرێن دەربکەڤیت.
ئه‌ڤرۆ نيوز، فاتما مزوورى:
سه‌رۆكێ سووریێ به‌شار ئە‌سه‌د دبێژيت هه‌گه‌ر ئیران بخوازيت وه‌كو روسیا بنگه‌هێن خوه یێن له‌شكری ل سه‌ر خالا سوریێ ئاڤا بكه‌ت ئەو دێ رازی بن و گۆتژی: “حزبولاھ هێزه‌كا سه‌ره‌كيه د شه‌رێ ل سووریێ دا”.
سه‌رۆكێ سوریێ به‌شار ئە‌سه‌د د هه‌ڤدیتنه‌كێ ل گه‌ل كه‌نالا “الالام” يێ ئیرانی دا ل سه‌ر هه‌بوونا هێزێن ئیرانی ل سوریێ گۆت: “هه‌گه‌ر ئیران بخوازيت وه‌كو روسیا بنگه‌هێن خوه یێن له‌شكری ل سه‌ر خالا سوریێ ئاڤا بكه‌ت، ئەو دێ رازی بن، به‌لێ هه‌بوونا ئیرانێ ل سووریێ نها د چارچۆڤا شه‌رێ ل دژی تيرۆرێ دایه”.
ده‌ربارێ هه‌بوونا حزبولاهـ یا لوبنانی ل سه‌ر ئاخا سوریێ دا ژی گۆت: “شه‌ر ل سوریێ يێ به‌رده‌وامە و حزبولاهـ یا لوبنانی هێزه‌كا سه‌ره‌كى یه د وی شه‌ری دا. هه‌گه‌ر سوریێ ژى نه‌خوازيت، چو هێز نه‌شێن وێ ژ سوريا ده‌ربێخن”.
به‌شار ئە‌سه‌د ئه‌شكه‌را كر ژی كو كۆمێن به‌رخوه‌دانێ ژ لوبنان و عیراقێ يێن هاتينه سوریێ و به‌ره‌ڤانیێ ژ به‌ر ئاخا سوریێ دا دكه‌ن. سپاسی رێز و حه‌زكرنا من ژ هه‌ر چه‌كداره‌كی وان یێ شه‌هید و بریندار را هه‌يه.
ل سه‌ر كۆنترۆلكرنا ئاخا سوریێ گۆت: “مه ژ ده‌ستپێكێ بریار دایه ئەمێ ته‌ڤاهیا ئاخا سووریێ رزگار بكه‌ين. كه‌نگی بچينه باكوور، باشوور، رۆژاڤا و رۆژهلات، ئەڤه پرسه‌كا له‌شكری یه، لێ نها مه به‌رێ خوه دایه باشوورێ سوریێ و ئەم رێ دده‌ين پرۆسه‌یا سیاسی هه‌گه‌ر ب سه‌ر نه‌كه‌ت، ب رێیا هێزێ رزگار دكه‌ين.”
ئه‌ڤرۆ نيوز، فاتما مزوورى:
هێزێن سووریا ده‌مۆكراتیك ده‌ردۆرا باژارۆكێ ده‌شیشێ ل دێرازۆرێ گرتنه و خستنه د بن دۆرپێچه‌كه توند ده.
فه‌رمانده‌یه‌كی هه‌سه‌دێ ژی ئەشكه‌ره دكه‌ت كو نێزیكی 800 چه‌كدارێن داعشێ ل ڤێ ده‌ڤه‌رێ مانه كو پرانیا وان ژ ده‌رڤه‌یی سووریێ نه.
ئۆپه‌راسیۆنا هێزێن سووریا ده‌مۆكراتیك ژ بۆ ده‌رخستنا گوندێن ل ده‌ردۆرا ناڤچه‌یا ده‌شیشه ل رۆژهلاتێ شه‌دادێ ژ ده‌ستێ چه‌كدارێن داشێ به‌رده‌وامە.
هه‌ری داوی د ئەنجاما شه‌ره‌كی دژوار ده، ته‌نێ سێ كیلۆمه‌تر د ناڤبه‌را شه‌رڤانێن هه‌سه‌دێ و باژارۆكێ ده‌شیشه ده مایه كو بارگه‌هه‌كه گرینگ یا داعشێ ل باشوورێ رۆژهلاتێ پارێزگه‌ها هه‌سه‌كێ یه.
فه‌رماندارێ هه‌سه‌دێ، ده‌لیل جودی گۆت: “ئه‌ڤ ده‌ڤه‌ر ب ته‌مامی ژ ئالیی چه‌كدارێن داعشێ ڤه هاتیه بۆمبرێژكرن. له‌وما ئەم ب زریپۆشا هێزێن سووریا ده‌مۆكراتیك ره دچن ئەنیا پێش یا شه‌رێ ل دژی داعشێ. چاندنا بۆمبان تاكتیكا هه‌ری زێده یه كو رێخستنا داعش ل وێ ده‌ڤه‌رێ ب كار تینه.”
پێشڤه‌چوونێن هێزێن سووریێ ده‌مۆكراتیك ل هه‌رێما دێره‌زۆرێ به‌رده‌وامە و چه‌كدارێن داعشێ خستنه بن دۆرپێچه‌كه توند.
گیڤارا تله‌لۆ، كو شه‌رڤانه‌كی هه‌سه‌دێ یه، به‌حسا شه‌ر و په‌ڤچوونێن ل ده‌ردۆرا باژارۆكێ ده‌شیشه كر و گۆت: “ل ڤر په‌ڤچوون روو دان و بالافرێن هه‌ڤپه‌یمانیێ ده‌ستێوه‌ردان تێده كر و بارگه‌هێن داعشێ ئارمانج كرن، و تا نها ئەم نكارن پێشكه‌ڤن و ته‌رمێن وان بینن.”
سه‌رۆكێ خالا سه‌ربازی یا هه‌سه‌دێ ل ده‌ردۆرا ده‌شیشه‌یێ، خه‌لیل ئید خویاكرن، كو چه‌كدارێن داعشێ ئێدی نكارن شه‌ر بكن، له‌وما ل هه‌رێمێ ته‌نێ ماین و بۆمبه‌یان ل سه‌ر جاده‌یان ددانن.
خه‌لیل ئید وها ئاخڤی: “چه‌كدارێن داشێ ژ به‌ر كو نكارن پێشده بچن، ئەو ماین و هاونان بكار تینن، ل ڤان ده‌ڤه‌ران هه‌موویان داعشێ هه‌یه، كه‌س نكاره سه‌رێ خوه هلده، داعش ته‌نێ ماینان دچینه و ب هاونان ئێریشی مه دكه‌ن.
د وێ ئوپه‌راسیۆنا كو ژ دوو ئالیان ڤه هاتیه ده‌ستپێكرن، 30 گوند و زه‌ڤی ژ ئالیێ هه‌سه‌دێ ڤه هاتن كۆنترۆك كرن، نها ژی هه‌ولا دۆرپێچكرنا ته‌ڤایا باژارۆكێ دشیشا تێ دان.
ئه‌ڤرۆ نيوز، فاتما مزوورى:
چه‌كدارێن ئۆپۆزسیۆنا سوریا یێن سه‌ر ب توركیا ڤه سێ جوانێن كوردێن نیشته‌جهێ ده‌ڤه‌را راجۆ یا عە‌فرینێ كو به‌ری نها گرتبوون، ب فدیێ سه‌ربه‌ست به‌ردان.
ژ هه‌رێما ئە‌فرینێ چاڤكانیه‌كه تایبه‌ت دا زانین كو چه‌كدارێن گرۆپا حه‌مزه، سێ جوان ژ گوندێ سوركێ یێ سه‌ر ب باژارۆكێ راجۆ ڤه گرتبوون و ژ بۆ به‌ردانا وان داخوازا فدیه ل مالباتێن وان كربوون.
ل گۆری چاڤكانیێ، پشتی شه‌ش رۆژان ژ گرتنا وان سێ خۆرتێن كورد، مالباتێن وان خۆرتان فدیه دانه چه‌كداران و وان ژی ئەو خۆرت به‌ردان.
هه‌مان چاڤكانیێ ناسنامه‌یا وان خۆرتێن كورد ژی ئاشكه‌را كر و گۆت: “محه‌مه‌د ئە‌لی محه‌مه‌د 21 سالی، عە‌لی حاجۆ 18 سالی و عە‌بدۆ محه‌مه‌د 16 سالی ب فدیه هاتنه به‌ردان”.
چاڤكانیێ ئه‌شكه‌ره كر كو هه‌ر جوانه‌ك ل به‌رامبه‌ر 900 دۆلارێن ئه‌مه‌ریكی هاتیه به‌ردان و مالباتێن وان ژ بۆ رزگاركرنا وان ژ ده‌ستێ چه‌كداران، ب نه‌چاری ئەو به‌ر دانه.
شه‌ش رۆژان به‌ری نها چه‌كدارێن گرۆپا حه‌مزه یا ئۆپۆزسیۆنا سووریێ، ئەو هه‌ر سێ جوانێن كورد گرتبوون.
ب گۆره‌ی ئاگاهیان، د ده‌ما گرتنێ دا، چه‌كداران ڤه‌كۆلین ب وان ره كریه و ژ ئالیێ چه‌كداران ڤه هه‌ر سێ جوان راستی لێدان و ئه‌شكه‌نجه‌یێن توند ژی هاتنه.
ئه‌ڤرۆ نيوز، فاتما مزوورى:
شه‌ڤا ده‌رباس بووی توپخانێن توركیا ل گوندێ كه‌وه‌رت و گه‌لیێ خواكورك ل ده‌ڤه‌را سیده‌كان بوردومان كرن.
ب گۆره‌ى گۆتنێن خه‌لكێ ڤان ده‌ڤه‌ران، شه‌ڤا چارشه‌مبى ژى هه‌ليكۆپته‌رێن توركيا ده‌وروبه‌رێن چيايێ ديليا بۆردۆمان كرينه.
ب سه‌رده‌ما درێژبوونا بۆردۆمانا توركيا بۆ ده‌ڤه‌رێن سنورى يێن هه‌رێما كوردستانێ ب به‌هانه‌يا هه‌بوونا چه‌كدارێن په‌كه‌كێ ره‌وشا وان گۆندێن سنورى نه‌يا ئارامه و چه‌ندين گۆند ژ به‌ر ڤێ چه‌ندێ هاتينه چوولكرن.
ئه‌ڤرۆ نيوز، فاتما مزوورى:
بڕياره ئه‌ڤرۆ رۆژا پێنجشه‌مبى ل ياريگه‌ها لۆژنيكى ل مۆسكۆ ل رۆسيا ياريێن مۆنديالا ته‌پا پێ 2018 ده‌ست پێ بكه‌ن و ده‌مژمێر 17:30 ده‌قيقه و بۆ ماوێ 30 ده‌قيقان ب پشكداريا چه‌ند هۆنه‌رمه‌نده‌كێن جيهانى ئاهه‌نگا ڤه‌كرنا قاره‌مانيێ ده‌ست پێ بكه‌ت و چه‌ندين نمايش ژى دێ هه‌بن.
پاشان ده‌مژمێر 18:00 ياريا ڤه‌كرنا مۆنديالێ د ناڤبه‌را هه‌ردو هه‌لبژارتيێن رۆسيا يا ميڤاندار و سعوديێ ژ كۆمه‌لا ئێكێ دا ب رێڤه چيت.
بڕياره ئاهه‌نگا ڤه‌كرنا مۆنديالێ 20 سه‌رۆك وه‌لات و ب ده‌هان كه‌ساتيێن سياسى، ئابوورى و هۆنه‌رمه‌ندێن جيهانى پشكداريێ بكه‌ن.
ئه‌ڤرۆ نيوز، فاتما مزوورى:
جێگرێ فه‌رماندارێ هێزا هه‌ڤپه‌یمانان ل سوریا و عیراقێ جه‌نه‌رال والته‌ر پایت راگه‌هاند: ئەو كار دكه‌ن ژ بۆ ئاماده‌كرنا پێشمهرگهى ژ هه‌ر ئەگه‌ره‌كى را، ژ به‌ر كو پێشمه‌رگه هێزه‌كا كاريگه‌ره.
ئه‌مه‌ریكا هه‌ڤكاریێ پێشكێش دكه‌ت دا كو ژبۆ قووناغا پشتی داعشێ ئاماده ببيت. هه‌ڤده‌م به‌شه‌ك ژ فه‌رماندارێن هێزێن بیانی یێن ل هه‌رێما كوردستانێ دبێژن، مه‌ترسیا داعشێ هێش مایه و ب تایبه‌ت ل ده‌ڤه‌رێن جهێ هه‌ڤركيێ.
نها ئه‌لمانیا سه‌ركرداتیا ناڤه‌ندا راهێنانا هێزا پێشمهرگهى راده‌ستی ئیتالیا كر، ب ڤێ یه‌كێ ژی كه‌فته بن كۆنترۆلا هه‌ڤپه‌یمانیا نێڤده‌وله‌تی یا ل دژی داعشێ.
جیگرێ فه‌رماندارێ هێزا هه‌ڤپه‌یمانان ل سوریا و عیراقێ جه‌نه‌رال والته‌ر پایت گۆت: “ئه‌ڤ ناڤه‌نده هاته بن كۆنترۆلا هه‌ڤپه‌یمانیا نێڤده‌وله‌تی. وه‌سا باشترە ژ بۆ هه‌ڤكاریێ ب له‌زتر و باشتر بكه‌ن. هێزێن پێشمه‌رگه خودان ئەزموونێن باشن. ئەو هه‌ر ده‌م ئاماده نه ژ بۆ هه‌ر ئه‌گه‌ره‌كى، به‌لێ پێدڤيا وان ب راهێنان و چه‌كێ باشتر هه‌یه. رۆلێ پێشمهرگهى یێ مه‌زن د شكاندنا داعشێ دا هه‌بوو. ئەم شانازیێ ب وان دكه‌ين. نها ژی پێدڤيه ئەم راهێنانێن زێده‌تر ب پێشمهرگهى بكه‌ین دا ژ بۆ هه‌ر ئه‌گه‌ره‌كى د ئاماده بن”.
هه‌روه‌سا گۆت: “هه‌ڤكاریێن جودا جودا مه پێشكێشی پێشمهرگهى كرينه. مه ترۆمبێلێن له‌شكری یێن باش داينه وان و راهێنان ژی ب وان كرینه”.
به‌رپرسێ به‌رێ یێ ناڤه‌ندا راهێنان و هه‌ماهه‌نگیێ جه‌نه‌رال ئه‌ندریاس ستانهاوس گۆت: “نه‌شێم ببێژم مه‌ترسیا داعش نه‌مایه. راسته داعش د روویێ له‌شكری دا هاتیه شكاندن، به‌لێ د راستیێ دا داعش رێخستنه‌كا چالاكە و ب تایبه‌ت ل ده‌ڤه‌رێن هه‌ڤركى ل سه‌ر. پێدڤيه ل وان ده‌ڤه‌ران چاره‌سه‌ریه‌كا سیاسی هه‌بيت. هه‌ر چاوا بيت ئەم راهێنانێ ب پێشمهرگهى دكه‌ين هه‌تا ژ هه‌ر ئەگه‌ره‌كى را يێ ئاماده بيت”.
هه‌ر د وێ ده‌ربارێ دا، به‌رپرسێ راهێنانێ ل ناڤه‌ندا راهێنان و هه‌ماهه‌نگیێ رۆبه‌رتۆ ڤاناگه دبێژيت: “ئه‌م دزانين داعش د وارێ له‌شكری دا هاتیه شكاندن، به‌لێ ب ته‌ڤاهی داعش ل عیراقێ ب دووماهی نه‌هاتيه. دڤێت ئەم داعش ب ته‌مامی ب دووماهی بینين، ژ به‌ر وێ چه‌ندێ دێ هه‌ڤكاریا مه ژ بۆ پێشمهرگهى درێژ بيت، دا كو د داهاتى دا ژ ئەگه‌رێ په‌یدابوونا رێخستنه‌كا وه‌كو داعش د ئاماده بن”.
ئه‌ڤرۆ نيوز:
ئەندامێ دەستەیا دامەزرێنەر یا ئێکەتیا نشتیمانیا کوردستانێ “عەبدولرەزاق فەیلی” ل باژارێ سلێمانیێ وەغەر کر.
ئەندامێ دەستەیا دامەزرێنەر یا ئێکەتیێ عەبدولرەزاق فەیلی ژ دایکبوویێ سالا 1945یە و د ژیانا سیاسی و پێشمەرگاتی دا ھندەک پۆست و پلە وەرگرتینە، ل کۆمەلگەھا نوشداری یا فارووق ل باژارێ سلێمانیێ وەغەر کر.
عەبدولرەزاق فەیلی بەرێ پۆستێ وەزیرێ پەیوەندی و راگەھاندنێ د کابینا حوکمەتا ئیدارەیا سلێمانیێ دا وەرگرتبوو و دەمەکی ژی بەرپرسێ نڤیسگەھا رێخستنێ یا ئێکەتیێ بوو.
داوی پۆست ژی بەرپرسێ پەیوەندیێن دەرڤە یێن ئێکەتیێ.
نيشاندان