ئه‌ڤرۆ نيوز، فاتما مزوورى:

ئه‌ڤرۆ پارتى ديموكراتى كوردستان وه‌كو قه‌وارێ ئێكێ يێ سياسى ل كوردستانێ ناڤێ خوه‌ بۆ هه‌لبژارتنێن په‌رله‌مانێ كوردستانێ ل كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ تۆماركر ئه‌وێن بڕياره‌ ل 30ى ئيلۆنا 2018ێ بهێنه‌ كرن.

خسرۆ گۆران د كۆنگره‌كێ رۆژنامه‌ڤانى دا راگه‌هاند كو پارتى دێ پێگريێ ب هه‌موو رێسا و قانوونێ كۆمسيۆنێ كه‌ت و چو كێشه‌ ژى ل سه‌ر وێ چه‌ندێ نابن، ئه‌نجامێن هه‌لبژارتنان ب ده‌ست يان ژى ب ئه‌لكترۆنى بهێنه‌ هژمارتن.

ئه‌ڤرۆ نيوز:

دەستەیا ده‌ستپاكيێ ل ھەرێما کوردستانێ داخویانیەک بەلاڤکریە و تێدا دیارکریە، دو کەس ب ‏تۆمەتا گەندەلیێ ھاتینە سزادان ئێک ژ وانا چەکێ پارێ بەلێندران کڕیە و پشتی دەرچوونا ‏سزایێ قانوونی پارە ژی بۆ گەنجینا گشتی ھاتیە ڤەگەڕاندن ھەروەسا کەسەکێ دی پارێ ‏کارەبا وەلاتیان بریە و پشتی وەرگرتنا پارەی ئەو ژی ھاتیە سزادان.‏

دەستەیا ده‌ستپاكيێ ل ھەرێما کوردستانێ داخویانیەک ل دۆر ھەردو بادەکێن گەندەلیێ ‏بەلاڤکریە و وێنەک ب دەست رۆژناما ئەڤرۆ کەفتیە و تێدا ھاتیە: “د درێژاھیا ئەڤان ‏بڕیارێن ل دادگەھێن ھەرێما کوردستانێ ل دۆر کەیسێن گەندەلیێ دھێنە دەرکرن و ژ لایێ ‏دەستەکا ڤەکۆلینێ ل دەستەیا دەستپاکیێ دھێنە ھنارتن بۆ دادگەھێن تایبەتمەند ل ‏دادگەھا تاوانێن سلێمانیێ دو کەس ب تۆمەتا گەندەلیێ ھاتینە حوکەکرن”.‏

دەستەیا ده‌ستپاكيێ ئاماژە ب ڤێ چەندێ ژی کریە کو کەسەکێ تاوانبار رابوویە ب کڕینا ‏چەکێ بەلێندەرا ل بازاڕی و مەزاختنا ئەڤان چەکا ب رێیا بانکێ ب نەقد، تۆمەتبار ب ‏غیابی ھاتە سزادان ئەو ژی حەفت سال زیندانیکرن و ڤەگەڕاندنا نێزیکی دوو ملیار ‏دیناران ژ بووی گەنجینا گشتی، ھەروەسا تاوانبارەکێ دی رابوویە ب برنا پارێ وەلاتیان ‏ئەڤێ بۆ کریا کارەبێ ھاتیە دان و ئەو ژی پشتی ڤەکۆلینێ سزایێ حەفت سال زیندانیکرنێ ‏بۆ ھاتە ڤەبڕین دگەل ڤەگەڕاندنا پارەی بۆ گەنجینا گشتی.‏

ئه‌ڤرۆ نيوز:‏

‎ ‎ئەندامەکێ دەزگەھێ ھەلبژارتنێن پارتی دیموکراتی کوردستان ئاشکرا کر، نێزیکی 100 ‏ھزار دەنگێن پارتی ل نەینەوا نەھاتینە ھژمارتن و دبێژیت: مە پارتی رێیا قانوونی گرتیە ‏بەر و ھەتا نوکە بدەھان سکالا ل سەر کۆمسیۆنێ ل نەتەوێن ئێکگرتی و دادگەھا فیدڕال ‏تۆمارکرینە.‏

ھەوار محەمەد، ئەندامێ دەزگەھێ ھەلبژارتنێن پارتی بۆ رۆژناما ئەڤرۆ گۆت: “ل ‏ھەلبژارتنێن 12ی ئایارێ یێن جڤاتا نوونەرێن عیراقێ ب مەرەما شکاندنا پارتی ‏ئاستەنگێن زۆر بۆ دەنگێن پارتی ھاتنە چێکرن و ب تنێ ل سنوورێ پارێزگەھا نەینەوا ‏نێزیکی 100 ھزار دەنگێن پارتی ژ لایێ کۆمسیۆنێ ڤە نەھاتینە ھژمارتن کو پتریا وان ژی ‏دەنگێن ناڤا کەمپێن دھۆکێ و کوردێن ئێزدی بوون، بەھانەیا سۆتنا دەنگێن پارتی ژ لایێ ‏کۆمسیۆنێ بۆ ڤێ چەندێ ڤەگەڕاندن ئەنجامێن ناڤا میمۆریێ سندۆقێن دەنگدانێ د دەمێ ‏خوە دا نەگەھشتینە سەنتەرێ ڤاڤارتنا دەنگان”. ‏

ھەوار محەمەد گۆتژی: “مە بزاڤێن زۆر کرینە بۆ ھژمارتنا دەنگێن دەنگدەرێن خوە ل ‏ھەموو دەڤەران، بەلێ مخابن دیارە بزاڤێن مە د بێ ئەنجام بووینە، لەوڕا مە وەکی ‏دەزگەھێ ھەلبژارتنێن پارتی ھەتا نوکە 80 سکالا ل سەر کۆمسیۆنێ تۆمارکرینە و ‏سکالایێن خوە ژی مە ل دادگەھا بلندا فیدڕالی و نەتەوێن ئێکگرتی و کۆمسیۆنێ ‏تۆمارکرینە ھەتا ئەڤ شاشیێن ھاتینەکرن بھێنە راستڤەکرن و دەنگێن وەلاتیان نەھێنە ‏سۆتن”.‏