ئهڤرۆ نيوز:
شهش لايهنێن نهرازى، گۆڕان، هاوپهیمانى، یهكگرتوو، كۆمهڵ، بزاڤا ئیسلامی و شیوعى د راگههاندنهكا ههڤپشك دا كو ئاراستهى كومسيونێ كريه دياركريه:هژمارتنا دهستى يا ژمارهكا كێما سندوقێن دهنگان، بهروڤاژى ياسايى و رێنمايى يه و شهرعيهتێ ددهته پرۆسا ساختهكاريێ.
ههر شهش لايهنان دياركريه كو پێدڤيه كومسيون ياسايا پهرلهمانێ عيراقێ وهكو خوه بجه بينيت و بێى چو لادانهك وهكو خوه بجه بينيت و ههمى سندوقان ب دهست بهژمێرن.
ئەڤرۆ، سالار دۆسكی:
رێڤهبهرێ پهيوهنديێن وەزارەتا ئەوقافێ و كارۆبارێن ئاینی ل حوكمەتا هەرێما كوردستانێ، مهريوان نهقشبهندى، بۆ ئەڤرۆ نيوز گۆت: نوكە ل گەل un مژوولین ل وان دەڤەرێن ددەستێ داعش دابوون ل شنگال و زمار چونكى حوكمەتا عیراقێ چو پارە بۆ نووژەنكرنا وان تەرخانەكریە، ب سەدان ملیۆن دينار بۆ جهێن شیعە مەزهەب هاتینە تەرخانكرن.
مەریوان نهقشبهندى ئەو ژی گۆت: جهێن كاكەیان ل كەركووكێ هندەك ژلایێ داعشێ ڤە هاتینە ژناڤبرن و هندەك ژلایێ حەشدا شەعبی ڤه كو پێگێری ب رێنمایێن حوكمەتا بەغدا نەكربوون و ئەڤە ژی دچارچؤڤێ دانوستاندێن مە دایە ل گەل un ل كەركووك و سەلاحەدین و دەشتا نەینەوا.
مەریوانی گۆت ژی: نوكە جهێن مهزهەبێ شیعی ل دەڤەرێن پێشتر ددەستێ داعش دا يێن دهێنە نووژەنكرن، بهلێ چ بۆ جهێن ئاینى يێن ئێزدی و كاكەیان ناهێتەكرن، لەوما ئەم ل گەل رێكخراوێن بیانی د دانوستاندنان داینە كو ئەڤ جهه ژی بهێنە نووژەنكرن.
ئهڤرۆ نیوز ، نهوزاد هلۆرى:
ب مهرهما زێدهتر ههڤنیاسین و ئهنجامدانا چالاكیێن جۆراوجۆر سهنتهرهكێ چیاڤانێن ههرێما كوردستانێ پشكدارێ ڤیستهڤالهكا چیایى ل توركیا بوون.
عهلى زوبێر، نوونهرێ سهنتهرێ بارزان بۆ ژینگهپارێزى و چیاڤانى بۆ ئهڤرۆ نیوز گۆت: (ب مهرهما زێدهتر ههڤنیاسین و پێكڤه كاركرن و ئهنجامدانا چالاكیێن جۆراوجۆر و راكێشانا گهشتیار و چیاڤانێن وهلاتێ توركیا بۆ ههرێما كوردستانێ ، ئهم وهكو سهنتهرێ بارزان بۆ ژینگه پارێزى و چیاڤانى پشكدارێ ڤیستهڤالا چیایان بووین ل توركیا).
زێدهتر گۆت: (ڤیستهڤال ل باكوورێ كوردستانێ و چیایێن گهڤهرێ و ناڤا كهڤیێن بهفرێ ل دهڤهرا ساتێ ب رێڤهچوو و تێدا نێزیكێ 160 گروپێن چیاڤانى پشكداربوون و بۆ دهمێ دو شهڤ و سێ رۆژان ڤهكێشا و چهندین برگه و بابهت و چالاكیێن جۆراوجۆر هاتنه ئهنجامدان و نیاسینهكا زۆر دناڤبهرا ههموو گرۆپان دا پهیدابوو، دبيت ل داهاتى ئهڤ یهك ببیته ئهگهر كو هند گهشتیار و چیاڤانێن وهلاتێ توركیا و باكوورێ كوردستانێ ژى سهرهدانا ههرێما كوردستانێ و دهڤهرێن چیایێن ههرێمێ بكهن).
ب گۆرهى ئاخفتنێن عهلى زوبێر، ههكه ڤیستهڤال ل ههرێما كوردستانێ بهێنهكرن، دێ بینهر و حهژێكهرێن زۆر ههبن و زێدهتر گۆت: (ل كوردستانێ چهندین دهڤهرێن چیایى و چیایێن بلند يێن ههين و رێژهیهكا زۆرا بهفرێ لێ دباریت و گول و گولزار و گیا و بێرمێن ئاڤێ سال ب سال ههنه و شیانێن وێ یهكێ ههنه كو ڤیستهڤالێن مهزن بهێنه ئهنجامدان و ئهڤ یهك دێ بیته ئهگهر كو سهرنجا گهشتیاران رابكێشت و داهاتهكێ باش ژى بۆ دهڤهرێن ههرێما كوردستانێ دهستڤه بهێت).
ئهڤرۆنيوز:
هژمارا كهسێن گيانێ خوه ژدهستداى ل دهڤهرا كيوبيك ل كهنهدا ژئهگهرێ بلندبوونا پلێن گهرمێ گههشتنه 54 كهسان.
دهستهيا راديۆيا كهنهدى (سى. بى.سى) ژزاردهڤێن بهرپرسێن كهنهدى بهلاڤكر” 28 كهسان ل باژێرێ مونتريال گيانێ خوه ژدهستدايه ويێن دى ل باشوورێ كيوبيك گيانێ خوه ژدهستدايه”.
بهلاڤكر ژى كو ئهو كهسێن گيانێ خوه ژدهستداين كهسێن دانعهمرن ب تايبهتى زهلامێن ب تنێ دژين وكهسێن درهوشێن خراب دا كو پتريا وان ئاريشێن بكارئينانا مادێن بێهوشكهر يان نهخوهشيێن دهمدرێژ يان نهخوهشيێن عهقلى ههبوون.
ل دووڤ ئاژانسا رويتهرز” فاكتهرێ سهرهكى يێ وان حالهتێن گيانێ ژدهستدانێ ژ ئهگهرێ بلندبوونا پلێن گهرمێ ل كهنهدا، نهبوونا ئاميرێن ساركرنا ههواى بوو دناڤ شوقێن وان دا”
ل دووڤ سهنتهرێ كهشناسیێ یێ كهنهدى، پلێ گهرمێ گههشتبوو 35 ێ، بهلێ پلا گهۆمێ ئهوا لهشێ مرۆڤى ههست پێ دكر گههشتبوو 45ێ.
ئهڤرۆنيوز:
پارتا داد وگهشهپێدانێ يا دهستههلاتدار ل توركيا (ئهكهپه) دياركر كو دووماهى سهرۆك وهزيران دديرۆكا توركيا يا نوو دا يێ هاتيه بهربژاركرن بۆ سهرۆكاتيا پهرلهمانێ توركى دخۆلا وى يا نوو دا.
مالپهرێ (تورك پرێس) يێ توركى بهلاڤكر، خۆلا نوو يا پهرلهمانێ توركى ئهڤرۆ دهست ب ب شێوهكێ فهرمى دهستپێكر پشتى ئهندامێن پهرلهمانى سووندا قانوونى خواندى وهكو پهرلهمانتار”.
دياركر ژى” بينالى يهلدرم دهێته هژمارتن دووماهى سهرۆك وهزيران دديرۆكا توركيا يا نوو دا پشتى ڤهگۆهاستنا توركيا بۆ سيستهمێ سهرۆكايهتيێ كو تێدا ههموو دهستههلاتێن بجهئينانێ دێ ددهستێ سهرۆك كۆمارى دابن وپۆستێ سهرۆك وهزيران دێ هێته ههلوهشاندن”.
ئهڤرۆنيوز:
بهرپرسێ راگههاندن وپهيوهنديێن كۆمسيۆنا بلند يا ههلبژارتن وراپرسى ل ههرێما كوردستانێ راگههاند 205 بنگههێن دهنگدانێ ل ههرێما كوردستانێ دێ هێنه ڤهكرن د ههلبژارتنێن پهرلهمانێ كوردستانێ.
شورهش حهسهن، برپرسێ راگههاندن وپهيوهنديێن كۆمسيۆنا ههلبژارتن وراپرسى ل ههرێما كوردستانێ بۆ كورستان تى ڤى گۆت” 84 بنگههێن دهنگدانێ دێ ل سلێمانيێ هێنه ڤهكرن و76 بنگه ل پارێزگهها ههولێرێ و 47 بنگه ل پارێزگهها دهۆكێ و8 بنگه ل پارێزگهها ههلهبجه”.
دياركر ژى” نووكرنا تۆماركرنا ناڤێن دهنگدهران كارێ پێدڤى يێ تێدا هاتيه ئهنجامدان ووهلاتى دشێن ل رۆژێن داهاتى بۆ دلنيابوون ژ ناڤێن خوه سهرهدانا بنگههێن دهنگدانێ بكهن”.
خوياكر ژى” ل رۆژا 7/7/2018 مه دهست ب وهرگرتنا ناڤێن بهربژارێن قهوارێن سياسى كريه كو تاكو 25/7/2018 دێ يا بهردهوام بيت”.
ئهڤرۆنيوز:
سهرۆكێ فراكسيۆنا پارتى ديموكراتى كوردستان ل پهرلهمانێ كوردستانێ، ئومێد خۆشناو، راگههاند، بۆ ههلبژارتنێن پهرلهمانێ كوردستانێ، پارتى خوه بۆ سهركهفتنا مهزن يا بهرههڤكرى.
ئومێد خۆشناو، دنڤيسينهكێ دا ل بهرپهرێ خوه دا ل سهر تۆرا جڤاكى يا فهيسبووكى ل بن ناڤێ ( بۆ ههلبژارتنان پارتى چ بكهت؟) دبێژيت” ل دهف خهلكێ كوردستانێ يا ئاشكرايه كو پارتى گهلهك يا جدى يه ورژده ل سهر وێ چهندێ كو ههلبژارتنێن پهرلهمانێ كوردستانێ ل دهمێ خوه ل 30 ئهيلوولێ بهێنه ئهنجامدان”.
گۆت ژى” ژبلى پهيرهوكرنا ديموكراسيهتێ ل كوردستانێ ومافێ خهلكێ كوردستانێ ددياركرنا نوونهرێن خوه، ئهو ههلبژارتن دێ خزمهتهكا گهلهك باش يا پرۆسا سياسى ورێكخستنا پهيوهنديان دناڤبهرا لايهنێن كوردستانێ كهت و دێ ههرێما كوردستانێ ب تيمهكا نوو دانوستاندنان ل گهل بهغدا ل سهر ههموو پرسان ئهنجام دهت”.
دياركر ژى” بۆ بهرههڤى وخوه ئامادهكرنا دروست يا پارتى ب تايبهتى بۆ ڤان ههلبژارتنان، پارتى ل سهر ههموو ئاستان وب پشت بهستن ب ئهندامێن خوه وپشتهڤانيا خهلكێ كوردستانێ، بۆ سهركهفتنا مهزن خوه بهرههڤكريه”.
ئاماژه دا” ههرچهنده بنكێ جهماوهرى يێ پارتى چاڤهرێ چهند گوهۆرين وپێنگاڤێن پارتى بوون، بهرى ههلبژارتنان، بهلێ ههكه ئهوژى نههێته كرن، باشترين وهفايا پارتى بۆ دهنگدهرێن خوه ئهوه ل دهستنيشانكرنا بهربژاران گهلهك يا هووربين بيت وهژمارهكا بيڤهر وبنهمايێن بنهرهتى يێ ههين كو پێدڤيه ل بهرچاڤ بهێنه وهرگرتن”.
ديسا گۆت” بۆ پارتى كو حزبهكا بێ گرفتێن ناڤخوهيى وئێكگرتى وبێ كێشا سهركردايهتيێ، گهلهك يا ب ساناهيه 100 بهربژارێن ههژى وپهسهندكرى وبسپۆرێن جۆراوجۆرێن دلسۆز ديار بكهت وپێدڤيه بزاڤێن مه ههموويان وهكو تاك وئۆرگانان ئهو بيت كو ليستا پارتى ڤێ جارى وهسا يا ب هێز بيت، كو دهنگدهرێ پارتى دههلبژارتنا بهربژارى دا يا بۆ ب ساناهى نهبيت كو دهنگى ب كێ بدهت، خواست ل سهر ههر 100 بهربژاران ههبيت وخوازيارێ دهرچوونا ههر ههموويان بيت”.
ئهڤرۆ نیوز ، نهوزاد هلۆرى:
پشكهكا مهزن يا گهشتیارێن باشوورێ عیراقێ و بیانى دهما كو سهرهدانا ههردو قهزایێن ئامێدیێ و ئاكرێ دكهن، ئهو ل گهل خوه تهحینا ئامێدیێ و سماقا زێبارێ دكرن چونكى ناڤ و دهنگیهكا مهزن و تامهكا خوهش يا ههى.
ههیسهم زێبارى، گهنجهكێ دهڤهرا زێبارێ یه و دوكانهكا تایبهت يا فرۆتنا متایێن كوردى ل ئاكرێ ههیه بۆ ئهڤرۆ نیوز گۆت: (ههر سال ل وهرزێ هاڤینێ رێژهیهكا مهزن یا گهشتیاران قهستا دهڤهرا ئاكرێ و هاڤینگههێن وێ دكهن و ل گهل خوه هندهك پێدڤیێن خوارنێ دكرن ب تایبهتى سماقێ ژ بهركو سماقا ئاكرێ ب گشتى و دهڤهرا زێبارێ ب تایبهتى ناڤودهنگى و تامهكا تایبهت يا ههى).
زێدهتر گۆت: (سماقا زێبارێ ل ههموو دهڤهرێن كوردستانێ دهێته فرۆتن و ل بهغدا و بهسرا و موسل و پتريا باژێرێن عیراقێ ناڤودهنگیهكا تایبهت ب ۆخوه پهیداكریه و گهلهك جاران هاتیه گوهلێبون كو ل ناڤهندا بهغدا هاتیه گازیكرن وهرنه سماقا زێبارێ، و ژبهرڤێ ههر گهشتیارهكێ بهێته دهڤهرا ئاكرێ بێى سماقا زێبارى ب زهحمهت بزڤریت).
ب گۆرهى پێزانينێن رێڤهبهریا چاندنێ ل ئاكرێ سالانه 11 هزار تهنێن سماقێ ل دهڤهرا زێبارى یا سهر ب ناحیا دینارته ڤه دهێته بهرههمئینان و سماق ل زێدهترى 200 گوندێن دهڤهرێ يا ههى.
ژلایهكێ دى ڤه رێبهر حهمید كو ئێكه ژ خودان بازارێن نێزیك سولاڤێ بۆ ئهڤرۆ نیوز گۆت: (نها ل پتريا دوكانێن سهنتهرێ قهزا ئامێدیێ ، تهحینا ناڤدار و ب تاما ئامێدیێ دهێته فرۆتن ، زێدهبارى كو رهنگ و شێوه و تامهكا خوهش ههیه، د ههمان دهم دا تهحینا ئامێدیێ ناڤودهنگییهكا مهزن يا ههی، ژبهركو ب دارا دهێته قهلاندن و ل بهر پهروانێن ئاشێن ئاڤا رووبارێ سیلاڤا ئامێدیێ دهێته چێكرن و رهنگ و شێوازهكێ 100% سرۆشتى ههیه و ب تهمام ژى پشت بهستنێ ب گونجیا خومالیا دهڤهرێ د بهستیت).
ئهڤرۆنيوز، عهزیز ههورامی
ژنهك ژلايێ پۆليسان ڤه هاته دهستهسهركرن ب تۆمهتا كوشتنا خهسيا خوه .
رێڤهبهريا پۆليسێن پارێزگهها سلێمانيێ دراگههاندنهكێ دا كو وێنهك گههشتيه ئهڤرۆنيوز بهلاڤكر” ل قهزا چهمچهمال تۆمهتبارهكا ژن هاته دهستهسهركرن ب تۆمهتا كوشتنا دهيكا ههڤژينێ خوه”.
دياركر ژى” پشتى گههشتنا هێزێن پۆليسان وتيمێن بهلگێن تاوان، تهرمێ (ر.م.س) كو ژيێ وێ 80 سالن هاته رهوانهكرن بۆ نوشداريا داد ل سلێمانيێ”.
ئاماژه دا” پشتى ئهنجامدانا ڤهكۆلينێن هوور ژلايێ پۆليسان ڤه، شيان وێ تۆمهتبارێ دهستهسهر بكهن كو تاوانا خهندقاندا خهسيا خوه ئهنجامداى كو ژدايكبوويا 1978 يه وب فهرمانا دادوهرى ول دووڤ مادێ 406 ژ قانوونا سزايا عيراقى هاتيه دهستهسهركرن ودانپێدان ب تاوانا خوه كريه”.
نيشاندان