ئه‌ڤرۆنيوز:

كۆمسيۆنا بلند يا هه‌لبژارتنان ل عيراقێ راگه‌هاند، ئه‌ڤ شه‌ڤه‌ بانگه‌شا هه‌لبژارتنێن جڤاتا نوونه‌رين عيراقێ ل هه‌رێما كوردستانێ دێ ده‌ستپێكه‌ت.

زانا گه‌ردى، به‌رپرسێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ دداخۆيانيه‌كا رۆژنامه‌ڤانى دا راگه‌هاند” ل ده‌مژمێر 12 ئه‌ڤ شه‌ڤه‌ بانگه‌شا هه‌لبژارتنان ل هه‌رێما كوردستانێ دێ ده‌ستپێكه‌ت وهه‌تا 24 ده‌مژمێران به‌رى ده‌ستپێكرنا ده‌نگدانێ دێ يا به‌رده‌وامبيت”.

دياركر ژى”ل چه‌ند رۆژێن بۆرى دا، رێنمايى ورۆهنكرنێن پێدڤى يێن ب قه‌وارێن پشكدار دهه‌لبژارتنان دا هاتينه‌ دان كو پێدڤيه‌ وان رێنمايان بجهبينن وبه‌روڤاژى وێ چه‌ندێ پێرابوونێن قانوونى ل به‌رامبه‌ر هه‌ر به‌ربژاره‌كى وقه‌واره‌كى دێ هێنه‌ وه‌رگرتن”.

دهيته‌ زانين ئه‌ڤرۆ شه‌مبيێ 14/4/2018 بانگه‌شا هه‌لبژارتنان ب شێوه‌كێ فه‌رمى ل عيراقێ ده‌ستپێكر وژبه‌ركو رۆژا 14/4 دبيته‌ سالڤه‌كه‌را پرۆسا ئه‌نفالان ل هه‌ريما كوردستانێ، كۆمسيۆنا بلند يا هه‌لبژارتنان ل عيراقێ بريار دابوو بۆ ده‌مێ رۆژه‌كێ بانگه‌شا هه‌لبژارتنان ل هه‌رێما كوردستانێ بهێته‌ پاشخستن ئانكو بۆ رۆژا ئێكشه‌مبى 15/4/2018.

برياره‌ ل رۆژا 12/5/2018 هه‌لبژارتنێن جڤاتا نوونه‌رێ عيراقێ بهێنه‌ ئه‌نجامدان.

ئه‌ڤرۆنيوز:

ب هه‌لكه‌فتا بۆرينا 30 سالان ل سه‌ر پرۆسا ئه‌نفالان، حوكمه‌تا هه‌رێما كوردستانێ په‌يامه‌ك به‌لاڤكر وتێدا ئاماژه‌ كر كو به‌رده‌وام دخه‌ما ڤه‌گه‌راندنا رۆفاتێن ئه‌نفالكريايه‌ وداخواز ژ حوكمه‌تا عيراقێ كر كه‌سوكارێن ئه‌نفالكريان بهێنه‌ قه‌ره‌بووكرن.

حوكمه‌تا هه‌رێما كوردستانێ دپه‌ياما خوه‌ دا دبێژيت” پرۆسا جينوسايدكرنا گه‌لێ كوردستانێ يا ب ناڤێ ئه‌نفال كو ل سه‌ر ده‌ستێ رژێما ژناڤچوويێ يا عيراقێ هاتيه‌ ئه‌نجامدان، پرۆسه‌ك بوو بۆ نه‌هێلانا ناسناما نه‌ته‌وى يا كوردى، مرۆڤوئاخ وژينگه‌ها كوردستانێ پێكڤه‌ كره‌ ئارمانج وژبلى بێ سه‌روشوينكرن وكومۆلكوژيا نێزيكى 182 هزار مرۆڤێن بێ تاوان وسڤيل، بۆ ئه‌گه‌رێ وێرانكرنا ب هزاران گوندان وشێواندنا ژينگه‌ها كوردستانێ”.

هه‌ر د وێ په‌يامێ دا هاتيه‌” ژبلى بزاڤێن به‌رده‌وام بۆ ڤه‌گه‌راندنا رۆفاتێن پيرۆز يێن قوربانيێن ئه‌نفالان، ئاڤه‌دانكرنا گوند وژينگه‌ها وێرانكرى ل كوردستانێ وهاريكارى وباشتركرنا ره‌وشا كه‌سوكارێن سه‌ربلندێن ئه‌نفالكريان، به‌رده‌وام ژ كارێن سه‌ره‌كى يێن حوكمه‌تا هه‌رێمێ بوو وژبۆ ڤێ چه‌ندێ ئه‌وا دشيان دابيت كار يێ بۆ هاتيه‌ كرن وهه‌لبه‌ت كارێ زۆر ژى يێ ماى كو پێدڤيه‌ بهێته‌ كرن وحوكمه‌تا هه‌رێمێ ب ئه‌رك وبه‌رپرسياره‌تيا خوه‌ زانيت وكه‌مته‌رخه‌م نابيت”.

حوكمه‌تا هه‌رێمێ د په‌ياما خوه‌ دا ديار دكه‌ت”سه‌باره‌ت ناساندا پرۆسا درندانه‌يا ئه‌نفالێ ب جينوسايد ل ده‌رڤه‌، ئێك ژ كارێن جدى يێن حوكمه‌تا هه‌رێمێ بوو، ل عيراقێ ژى، دادگه‌ها تاوانان به‌رى هه‌ر ئاليه‌كى ئه‌ڤ پرۆسه‌سه‌ ب جينوسايد هژمارتيه‌ وهيڤيدارين ژ روويێ قه‌ره‌بووكرنا مادى ومه‌عنه‌وى يا كه‌سوكارێن ئه‌نفالكريان وگه‌ل وئاخا كوردستانێ، حوكمه‌تا عيراقێ وه‌كو ئه‌رك وبه‌رپرسياره‌تيه‌كا قانوونى وئه‌خلاقى يا خوه‌، پێنگاڤێن جدى وكريارى ب هاڤێژيت”.

زێده‌تر دياركر” گره‌نتيا ئێكانه‌ ورێگرى ل دووباره‌ نه‌بوونا هه‌ر پرۆسه‌كا شه‌رانگيانه‌ يا نه‌حه‌زێن گه‌لێ مه‌ يا هه‌ڤشێوێ ئه‌نفالێ وئه‌و كاره‌ساتا ب سه‌ر خووشك وبرايێن مه‌ يێن ئێزدى هاتى، ئێكرێزى وئێكه‌تيا ئالى وپێكهاتێن كوردستانێ يه‌، وه‌كو چاوان ئێكرێزيا مه‌ دپرسێن نيشتمانى ونه‌ته‌وى دا فاكته‌رێ سه‌ره‌كيێ سه‌رخستنا دۆزا ره‌وا وبده‌ستڤه‌ئينانا ئارمانجێن مه‌يه‌ بۆ پاشه‌رۆژه‌كا گه‌ش يا نه‌ڤيێن مه‌ وكوردستانه‌كا ئاڤه‌دان وپێشكه‌فتى ل بن سيبه‌را ئاشتيێ وخوه‌شگوزه‌رانيێ دا”.

حوكمه‌تا هه‌رێمێ ل دووماهيا په‌ياما خوه‌ دا خويا دكه‌ت” گه‌لێ كوردستانێ به‌رده‌وام شانازيێ ب كه‌لتۆرێ لێبۆرينێ يێ خوه‌ دكه‌ت، به‌لێ چو جاران ژى وان ئازاران ژبير ناكه‌ت كو ئه‌وێن دى ده‌ستێ غه‌درێ ل له‌ش وويژدان وياده‌زه‌ريا نه‌ته‌وى دروست كرىن، وه‌كو چاوان چو جاران ئه‌و ده‌ستێ هه‌ڤسۆزى ودلسۆزانه‌ ژى ژبير ناكه‌ت كو ژئاليێ دلسۆزان ودۆستێن مرۆڤايه‌تيێ وژيانێ بۆ هاتيه‌ درێژكرن”.