ئه‌ڤرۆنيوز:

رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند، سوباهى ئه‌ينيێ 27/4/2018 پێله‌كا باران بارينێ دێ هه‌رێما كوردستانێ ڤه‌گريت وزێده‌تر دێ ده‌ڤه‌رێن سلێمانيێ وگه‌رميان ب به‌ر وێ پێلێ كه‌ڤيت.

كه‌شناسيا هه‌رێمێ به‌لاڤكر” رۆژا ئه‌ينى هه‌رێما كوردستانێ دێ كه‌ڤيته‌ دبن كاريگه‌ريا نزمه‌ پاله‌پۆستويێ ده‌ريا سور وده‌ريا ناڤه‌راست وباران دێ ل پتريا ده‌ڤه‌رێن هه‌رێمێ باريت وهنده‌ك ده‌مان دێ بارانا ب هێز باريت وبريسى دێ دگه‌لدا بن”.

دياركر ژى” پێلا بارانێ دێ زێده‌تر سنورێ پارێزگه‌ها سلێمانيێ وسنورێ گه‌رميان ڤه‌گريت وئه‌گه‌رێ بلندبوونا ئاستێ ئاڤێ ژى ل وێ ده‌ڤه‌رێ يێ هه‌ى وئه‌ڤ كاريگه‌ريه‌ تاكو رۆژا ئێكشه‌مبى 29/4/2018 دێ يا به‌رده‌وام بيت”.

ئه‌ڤرۆنيوز:

جێگرێ سه‌رۆكێ په‌رله‌مانێ كوردستانێ راگه‌هاند، پرۆژێ چاكسازيێ دمووچه‌ى وخانه‌نشينيێ دا پێدڤيه‌كا فه‌ره‌ ورێ ناده‌ين موزايه‌دا سياسى پێ بهێته‌ كرن وئاماژه‌ دا كو ب پشتراستى ڤه‌ هه‌تا 15/5 ل هۆلا په‌رله‌مانى دێ ده‌نگ ل سه‌ر وێ پرۆژه‌ قانوونێ هێته‌ دان وپێدڤيه‌ بهێته‌ په‌سه‌ندكرن.

جه‌عفه‌ر ئێمينكى، جێگرێ سه‌رۆكێ په‌رله‌مانێ كوردستانێ بۆ مالپه‌رێ فه‌رميێ پارتى گۆت” پرۆژێ چاكسازيێ پێدڤيه‌كا نيشتمانى يه‌ ودبه‌رژه‌وه‌نديا خه‌لكێ كوردستانێ دايه‌، له‌وما رێ ناده‌ين ببيته‌ ده‌ستكه‌فت بۆ چو حزيه‌كێ وبۆ بانگه‌شا هه‌لبژارتنان بكاربينن”.

دياركر”هه‌ر ده‌مێ رێككه‌فتن ژئاليێ فراكسيۆنان ڤه‌ ل سه‌ر پرۆژه‌ى هه‌بوو، دێ راسته‌وخوه‌ چيته‌ دناڤ به‌رنامێ كارێ په‌رله‌مانى دا وهێته‌ په‌سه‌ندكرن، هه‌كه‌ ئه‌م هه‌تا رۆژا 12/5 راوه‌ستين ول 13/5 دێ مه‌ بريارا خوه‌ هه‌بيت وه‌كو سه‌رۆكاتيا په‌رله‌مانى، ب پشتراستى ژى ڤه‌ ل 15/5 دێ دانوستاندن ل سه‌ر وێ پرۆژه‌ قانوونێ هێته‌ كرن ودێ هێته‌ په‌سه‌ندكرن، له‌وما دێ خوه‌ گرين هه‌تا پشتى هه‌لبژارتنان، تاكو چو حزبه‌ك نه‌شێت موزايه‌دا سياسى پێ بكه‌ت، هه‌كه‌ ل به‌رى هه‌لبژارتنان سازان ل سه‌ر نه‌هاته‌ كرن”.

ئاماژه‌ دا” پرۆژه‌ چاكسازيێ بهايه‌كێ تايبه‌ت يێ هه‌ى وهه‌موو ئاليه‌كى پشت راست دكه‌ين ل 15/5 دڤێت بهێته‌ گه‌نگوشه‌كرن وپه‌سه‌ندكرن وئيمزا ل سه‌ر كرن وهه‌كه‌ ته‌وافوق ژى ل سه‌ر نه‌بيت، دێ ب زورينه‌ هێته‌ ده‌ربازكرن”.

سه‌باره‌ت وێ چه‌ندێ كو پارتى وئێكه‌تى رێ نادده‌ن پرۆژێ قانوونا چاكسازيێ دخانه‌نشيينێ دا ل په‌رله‌مانى بهێته‌ گه‌نگه‌شه‌كرن وپه‌سه‌ندكرن، جێگرێ سه‌رۆكێ په‌رله‌مانێ كوردستانێ گۆت” چو راستى بۆ وێ چه‌ندێ نينه‌ وئه‌ڤه‌ پرۆپاگندا وان ئاليانه‌ كو بۆ بانگه‌شا هه‌لبژارتنان دكه‌ن، مه‌ ديت چه‌ندين فراكسيۆنێن په‌رله‌مانى ل به‌رده‌م په‌رله‌مانى گۆت ئه‌م حه‌ز دكه‌ين روونشتن بهێته‌ ئه‌نجامدان تاكو ئه‌و پرۆژه‌ بهێته‌ ده‌ربازكرن، به‌لێ راست نه‌بوو، ئه‌ز نه‌شێم هه‌موو نهێنيان بێژم، به‌لێ مه‌ ل سه‌رۆكاتيا په‌رله‌مانى خوازت به‌رژه‌وه‌نديا بلند يا وه‌لاتيان بپارێزين ونه‌هێلين ئه‌ڤ پرۆژه‌يه‌ ببيته‌ پرۆپاگنده‌، به‌لێ فراكسيۆن ژى هه‌بوو كو پێ باش بوو پرۆژه‌ قانوون بهێته‌ په‌سه‌ندكرن، فراكسيۆن ژى هه‌بوو داخواز دكر ب ته‌وافوق بهێته‌ ده‌ربازكرن، هه‌كه‌ نه‌ بكه‌ڤيته‌ پشتى هه‌لبژارتنان”.

 ئه‌ڤرۆ نیوز، نه‌وزاد هلۆرى:

ئه‌ڤرۆ شه‌ش حزب و لایه‌نێن سیاسی يێن توركمانى كو ل هه‌رێما كوردستانێ كاردكه‌ن ، پشته‌ڤانیا خوه‌ بۆ لیستا 184 یا پارتى دیموكراتى كوردستان دوپات كر و بریاردا كو ده‌نگ بۆ سه‌رئێخستنا لیستا پارتى بده‌ن.

 د رۆهنكرنه‌كێ دا كو دانه‌یه‌ك ده‌ست ئه‌ڤرۆ نیوز كه‌فتیه‌، شه‌ش پارت و لایه‌نێن سیاسی يێن توركمانى كو ل هه‌رێما كوردستانێ كاردكه‌ن دیاركریه‌ كو هه‌رێما كوردستانێ جهێ پێكڤه‌ژیانا ئولى و نه‌ته‌وى یه‌ و دوژمنێن گه‌لێ كوردستانێ ژى د بزاڤێن به‌رده‌وام دانه‌ بۆ تێكدانا ره‌وشا كوردستانێ و ژناڤبرنا په‌یوه‌ندیێن ئولى و نه‌ته‌وى ژ وان تێكدانا په‌یوه‌ندیا دناڤبه‌را كورد و توركمانان.

د رۆهنكرنا وان دا زێده‌تر هاتیه‌ ، ل سایا حوكمه‌تا هه‌رێما كوردستانێ سه‌قامگيرى و ئاسایشه‌كا باش و گونجاى يا هه‌ى و هه‌موو مافێن پێكهاته‌یان د پاراستینه‌ ، ژبه‌رڤێ مه‌ وه‌كو پارت و لایه‌نێن سیاسی يێن توركمانى ل كوردستانێ بریاردایه‌ كو ده‌نگێن خوه‌ بۆ لیستا 184 یا پارتى دیموكراتى كوردستان بده‌ین و داخوازێ ژ هه‌موو جه‌ماوه‌رێ توركمان ژى دكه‌ین كو ده‌نگێ بۆ لیستا پارتى بده‌ن.

ئه‌و پارت ژى ئه‌ڤه‌نه‌ پارتا چاكسازى یا توركمانى، پارتا گه‌شه‌پێدانا توركمانى، پارتا رزگاريا نه‌ته‌وه‌ى یا توركمانى، پارتا دیموكراتى یا توركمانى، كومه‌لا روشه‌نبیرى یا توركمانى، كومه‌لا لیبرالیى یا توركمانى.