ئەڤرۆ نیوز ، زنار تۆڤی :
پشتی راگرتنا گەشتێن ئەسمانی ژ لایێ بەغداڤە بۆ ماوەیەکێ درێژ،ئەڤرۆ ئەینیێ 13.4.2018 جارەکادی ئێکەمین گەشتا ئەسمانی یا راستەوخۆ ژ فرۆکخانا تێگەل بەرلین بۆ فرۆکخانا هەولێرێ دەست پێکریە،هەروەسا د ڤێ حەفتیا بهێت دا دێ گەشتێن ئەسمانی یێن راستەوخۆ ل دوسلدرۆف و فرانکفورت و میۆنشن بۆ هەولێرێ دەست پێکەن.
ئه‌ڤرۆنيوز:
رێكخه‌رێ پلێتا ئاهێن خوارنێ دناڤبه‌را وه‌زاره‌تا بازرگانيا عيراقێ وهه‌رێما كوردستانێ دا راگه‌هاند، به‌غدا بريار دايه كۆمپيوته‌رێ هه‌ولێرێ وسلێمانيێ ودهۆكێ يێ تايبه‌ت ب رێڤه‌برنا مامه‌لێن پلێتا ئاهێن خوارنێ بۆ ڤرێكه‌ين وب ڤێ چه‌ندێ دێ كێشه بۆ وه‌لاتيێن هه‌رێما كوردستانێ دروست بن.
وه‌زاره‌تا بازرگانى وپيشه‌سازى ل هه‌رێما كوردستانێ دده‌مێ بۆرى دا ره‌تكربوو چاپا نوو يا پلێتا ئاهێن خوارنێ بۆ سالا 2018 ژ به‌غدا وه‌ربگريت، ژبه‌ركو زمانێ كوردى ل سه‌ر پلێتێ هاتبوو لادان، پاشى وه‌زاره‌تا بازرگانيا عيراقێ زمانێ كوردى بۆ پلێتێ زێده‌كر وده‌مێ چه‌ند رۆژانه يا ڤرێكرێ هه‌رێمێ بۆ به‌لاڤكرنێ، به‌لێ ل گه‌ل وێ چه‌ندێ رێنمايه‌كا نوو يا ڤرێكرى كو بوويه ئه‌گه‌رێ كێشه‌كا دى.
حسێن سه‌برى، رێكخه‌رێ پلێتا ئاهێن خوارنێ دناڤبه‌را وه‌زاره‌تا بازرگانيا عيراقێ وهه‌رێما كوردستانێ گۆت” به‌غدا رێنمايى بۆمه ڤرێكريه وب فه‌رمى داخواكريه كومپيوته‌رێ هه‌ولێرێ وسلێمانيێ ودهۆكێ يێ تايبه‌ت ب پلێتا ئاهێن خوارنێ بۆ ڤرێكه‌ين وبه‌غدا دبێژيت نابيت كومپيوته‌رێ تايبه‌ت ب پلێتا ئاهێن خورانێ ڤه ل هه‌رێما كوردستانێ بيت، كو ژ سالا 1991 وهه‌تا ئه‌ڤرۆ يێ ل هه‌رێما كوردستانێ”.
حسێن سه‌برى زێده‌تر بۆ مالپه‌رێ فه‌رميێ پارتى ديموكراتى كوردستان گۆت” ل دووڤ وێ بريارا به‌غدا، هه‌موو مامه‌لێن وه‌لاتيێن هه‌رێما كوردستانێ يێن تايبه‌ت ب پلێتا ئاهێن خوارنێ ڤه دێ ل به‌غدا بن وئه‌و دێ كاركه‌ن ودبێژين مامه‌له دێ ب رێيا پۆسته‌ى بۆمه ڤريكه‌ن، مه‌ژى پۆسته نينه وهه‌ر مامه‌له‌كا كێشه هه‌بيت، پێدڤيه وه‌لاتى سه‌ره‌دانا به‌غدا بكه‌ت تاكو بۆ بهێته چاره‌كرن”.
گۆت ژى” تنێ ل پارێزگه‌ها دهۆكێ سێ هزار سه‌رۆك خێزانان كێشه يا بۆ دروست بووى، ئه‌ڤه ژ بلى پارێزگه‌هێن هه‌ولێرێ وسلێمانيێ كو ئامارێن تمام يێن وان ل به‌ر ده‌ست نينه، له‌وما مه دوهى ب فه‌رمى داخوازيه‌ك ئاراسته‌ى وه‌زاره‌تا بازرگانيا هه‌رێمێ وحوكمه‌تا هه‌ريمێ كريه بۆ چاره‌كرنا ڤێ كێشێ وچاڤه‌رێ دكه‌ين تا بزانين ئه‌نجامێ هه‌ماهه‌نگيێ ودانوستاندنان ل گه‌ل به‌غدا دێ چاوان بيت”.
ئه‌ڤرۆنيوز:
پشتى د تۆرێن جڤاكى دا وێنه‌كێ عادل موراد سه‌رۆكێ جڤاتا ناڤه‌نديا ئێكه‌تى نيشتمانى كوردستان ل سه‌ر كورسيا نه‌خوه‌شيێن خودان پێدڤيێن تايبه‌ت ل ده‌رڤه‌ى وه‌لاتى هاتيه به‌لاڤكرن، ئاماژه ب هاتيه كرن كو يێ نه‌خوه‌شه ول شورۆپا چاره‌سه‌رى بۆ دهێته كرن، به‌لێ ئه‌ڤ ده‌نگوباسه نه‌هاتيه پشتراستكرن.
نيڤرۆيا ئه‌ڤرۆ ئه‌ينيێ 13/4/2018، له‌تيف نێروه‌يى په‌يڤدارێ جڤاتا ناڤه‌نديا ئێكه‌تيێ، پشتى كۆمبوونا سه‌ركردايه‌تيا ئێكه‌تيێ، نه‌خوه‌شيا عادل مورادى بۆ رۆژنامه‌ڤانان پشتراستكر.
له‌تيف نێروه‌يى گۆت” عادل موراد يێ نه‌خوه‌شه ول ده‌رڤه‌ى وه‌لاتى چاره‌سه‌رى يا بۆ دهێته كرن ودكۆمبوونێ ژى دا مه به‌حسكر” به‌لێ نێروه‌يى يێ به‌رهه‌ڤ نه‌بوو هوورده‌كاريێن نه‌خوه‌شيا عادل مورادى بێخيته به‌رده‌م رۆژنامه‌ڤانان ورايا گشتى.
عادل موراد، ئێك ژ دامه‌زرێنه‌رێن ئێكه‌تى نيشتمانى كوردستانه ل سالا 1976.
ئەڤرۆ نیوز ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا دیارکرن:د روودانەکا ترافیکێ دا ل زاخۆ گەنجەکێ گیانێ خوە ژ دەستدا.
ناڤهاتی ئەو یەک ژی دا خویاکرن: ل سپێدەهیا ئەڤرۆ ئەینیێ 13.4.2018 ل دەمژمێر ( 11:20) نیڤرۆ ل ناڤ سەنتەرێ قەزا زاخۆ ل جادا دادگەها زاخۆ و ل نێزیکی بانکا هیزل ترۆمبێلەکا تایبەت ئۆپل ڤیکترا ب رەنگێ سور ژ ئەنجامێ ب لەز هاژوتنێ ترۆمبێلا ل ژێر کونترۆلا شۆفێری دەرکەفتیە و خوە ل ستوونەکا کارەبێ دایە و د ئەنجامێ ڤێ روودانێدا کەسەکێ گیانێ خوە ژ دەست دایە و هه‌روه‌سا زیانێن به‌رچاڤ ژی ب ترۆمبێلا وی كه‌فتینە.
ئەڤرۆ نیوز ، تۆڤی :
فراکسیۆنا پارتی ل پەرلەمانێ کوردستانێ روهنکرنەک ده‌رباره‌ی موچێ یه‌که‌یا پاسه‌وانان بەلاڤکریە و تێدا هاتیە،ب خۆشحالی ڤە پشتی کو حوکمه‌ت شیای پێداچوونێ د مووچێ فه‌رمانبه‌ران دا بکەت و سیسته‌مەکێ نوو یێ مووچه‌ی راگه‌هاندی،تا راده‌کێ باش بزاڤ هاتیە کرن،کو رێژه‌یا پاشکەفتی کێم بکەت و مووچەی بلند بکەت،به‌لێ چه‌ند رۆژن نەرا‌زیبوونەکا ره‌وا،ژ لایێ به‌رێزان ل یه‌که‌یا پاسه‌وانان هه‌بوو،کو مووچێ ئه‌وان نەهاتبوو ده‌ستکاری کرن،ئەم ژ فراکسیۆنا پارتی ب هووری و جددی ل گه‌ل به‌رێزان ژ وه‌زارەتا نافخۆ و دارایی و یه‌که‌یا پاسه‌وانان ل سه‌ر خه‌ت بووین بۆ ڤێ مه‌به‌ستێ،ب خۆش حالی ڤە نوکە ژ لایێ به‌رێز وه‌زیرێ نافخۆ هاتینە دلنیاکرن،کو مووچێ یه‌که‌یا پاسه‌وانان ژی لدووڤ سیسته‌مێ نوو یێ مووچەی دێ هێتە ده‌ستکاری کرن،لەوما ئەم وه‌ک فراکسیۆنا پارتی هەوە دلنیا د‌که‌ین،کو هەموو گاڤا دێ پشتەڤانێ داخوازیێن هەوە یێن ره‌وا و هەموو فه‌مانبه‌رێن کوردستانێ بین.
فراکسیۆنا پارتی دیموکراتی کوردستان
ئەڤرۆ نیوز ، زنار تۆڤی :
ئەڤرۆ ئەینیێ 13-4-2018 دەمژمێر 2 پشتی نیڤرۆ دێ تیروپشکا قۆناغا بەری دوماهیێ یا چامپیۆنزلیگێ هێتە راکێشان و چاڤەرێیا دو یاریێن بهێز دهێتە کرن.
شێوازێ تیروپشکێ ل ڤێ قۆناغێ رێکێ ددەت،کو دو یانەیێن ئێک وەلات روو ب روو ئێک ببن،هەروەسا یاریێن چوونا ڤێ قۆناغێ دێ ل رۆژا 24-25-4- 2018 هێنە ئەنجامدان و یاریێن ڤەگەریانێ دێ ل 1-2-5-2018 برێڤەچن.
هەروەسا یاریا دوماهیا ڤی وەرزێ خولا یانێن قارەمانێن ئورۆپی دێ ل رۆژا 26-5-2018 ل کییڤ ل پایتەختێ ئوکرانیا هێته ئەنجامدان.
دیسا ئەڤرۆکە دێ تیروپشکا قۆناغا بەری دوماهیێ یا یورۆپالیگێ ژی هێتە راکێشان.
ئەڤرۆ نیوز ، زنار تۆڤی :
بریكارێ وه‌زاره‌تا نافخۆ یا هه‌رێما دیارکر،کو پاشکه‌فتێ مووچێ هێزێن نافخۆ هاتیە كێمکرن و پەرلەمانتارەکێ گوتیە ژی كێمكرنا پاشكه‌فتێ مووچێ هێزێن ئاسایشێ هاتیە کرن 22.7% كو پێشتر رێژەیا 34.1% یا مووچێ وان هاتبوو پاشکه‌فت كرن.
د كۆمبوونا دناڤبەرا هەردوو وه‌زارەتێن نافخۆ و دارایی یێن هه‌رێمێ،رێژه‌یا پاشکه‌فتێ مووچێ هێزێن نافخۆ و هەڤشێوێن فه‌رمانبه‌رێن مه‌ده‌نی لێ هاتە كرن، به‌لێ ئەڤ سیستەمە بۆ هێزێن ئاسایشێ یێ جۆدایە و پێشتر بریارا كێمكرنا پاشکه‌فتێ لێ هاتیە دان.
جه‌لال شێخ كه‌ریم، بریكارێ وه‌زاره‌تا نافخۆ یێ هه‌رێمێ گوتیە چه‌ند رۆژن بریارا كێمكرنا رێژه‌یا پاشکه‌فتێ مووچێ هێزێن ئاسایشا هه‌رێمێ هاتیە دان.
دەرباره‌ی کێمكرنا رێژه‌یا پاشکه‌فتا هێزێن ئاسایشێ، قادر ره‌زگه‌یی ئه‌ندامێ لیژنه‌یا نافخۆ و ئاسایش و جڤاتا خۆجهیێن په‌رله‌مانێ كوردستانێ راگه‌هاندیە بریارا كێمكرنا پاشکه‌فتا مووچێ هێزێن ئاسایشێ هاتیە دان، ب شێوه‌کێ کو رێژه بۆ 22.7% هاتیە كێمكرن،کو پێشتر ب رێژەیا 34.1% یا مووچێن وان هاتبوو پاشکه‌فت كرن.
گوتیە ژی ئه‌و مووچێ بۆ ئاسایشێ و هێزێن نافخۆ دهێته دان، مووچێ هەیڤا كانوونا دویێ یێ 2018 یه و پێ دچیت کو ل حەفتیا بهێت دێ مووچێ وان هێتە دابه‌شکرن.
ئەڤرۆ نیوز ، زنار تۆڤی :
ئێکەتیا نشتیمانیا کوردستانێ پێنج بەرپرسێن دی یێن دناڤ رێزێن خوە دا دەرخستن،ئێکەتیێ ئەگەر ژی بۆ وێ ئێکێ زڤراندینە کو وان پێنج بەرپرسان پەیوەندی ب ئالیەکێ دیتر ڤه کریە.
د دو بریارێن جودا دا ئێکەتیا نشتیمانیا کوردستانێ، ل رۆژێن دەھـ و یازدەیی ڤێ هەیڤێ ژ لایێ مەکتەبا رێکخستنا ئێکەتیێ ڤە ھاتینە دەرکرن، سێ کارگێرێن مەلبەندان ل گەل دو ئەندامێن کۆمیتەیان د ناڤ رێزێن خوە دا دەرکرینە.
ئێکەتیێ د بریارێن خوە دا ئاشکرا کریە: کو ئەو بەرپرسێن دناڤ رێزێن ئێکەتیێ ھاتینە دەرخستن، بۆ لایەکێ دیتر یێ سیاسی کار دکەن.
بەری نوکە ژی مەکتەبا سیاسیا ئێکەتیێ ب ھەمان ئاوایی چەندین بەرپرسێن دی د ناڤ رێزێن خوە دا ب ھەمان ئەگەر دەرخستینە.
نيشاندان