ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، ل گه‌ل شانده‌كێ تيما ئێكتيا ئورۆپى بۆ چاكسازيێ دبوارێ ئاسايشێ دا ل عيراقێ كۆمبوو.

ئه‌ڤرۆ چارشه‌مبى 11/4/2018، مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ، ل گه‌ل ماركس ريته‌ر، به‌رپرسێ نڤيسينگه‌ها تيما ئێكه‌تيا ئورۆپى بۆ چاكسازيێ دبوارێ ئاسايشێ ل عيراقێ وشاندێ دگه‌لدا كۆمبوو، دديداره‌كێ دا كو كلاريس پاستۆرى، به‌رپرسێ نڤيسينگه‌ها ئێكه‌تيا ئورۆپى ل هه‌ولێرێ به‌رهه‌ڤ بوو، دانوستاندن ل دۆر ميكانيزما ره‌فتاركرنێ ل گه‌ل گه‌فێن ئه‌منى وپاراستنا گياني وه‌لاتيێن سڤيل هاته‌ كرن.

ل ده‌ستپێكێ ماركس ريته‌ر، پوخته‌ك ل دۆر ئه‌ركێ تيما ئێكه‌تيا ئورۆپى بۆ چاكسازيێ دبوارێ ئه‌منى ل عيراقێ وئارمانجا سه‌ره‌دانا خوه‌ بۆ هه‌رێما كوردستانێ به‌حسكر ودياركر كو كارێ وان بۆ هه‌موو عيراقێ يه‌ ويێ تايبه‌ته‌ ب پێشكێشكرنا هاريكاريا ته‌كنيكى وئاموژگارى بۆ رێكخستنێ وچاكسازيێ وپه‌ره‌پێدانا ستراتيژى دبوارێ ئه‌منى دا ل عيراقێ.

دپشكه‌كا دى ئا ئاخڤتنێن خوه‌ دا، ئاشكراكر كو دبه‌رنامێ وان دايه‌ وپێ خوه‌شه‌ دپاشه‌رۆژێدا دبوارێ ئه‌منى ورێكخستنێ دا هاريكاريا هه‌رێما كوردستانێ بكه‌ن.

سه‌باره‌ت كارێ تێمێ ل عيراقێ، مه‌سرور بارزانى ئاماژه‌ ب ره‌وشا ئاسايشێ ل هه‌رێما كوردستانێ دا وراگه‌هاند” ئاسايش تا راده‌كێ مه‌زن يا به‌رقه‌راره‌ وبه‌راوردكرن ل گه‌ل جهێن دى يێن عيراقێ يا جودايه‌”.

هه‌ڤده‌م شيره‌تكارێ جڤاتا ئاسايشا هه‌رێما كوردستانێ به‌رهه‌ڤيا هه‌رێمێ نيشاندا بۆ هه‌ر هاريكارى وره‌فتاركرنه‌كێ ب مه‌ره‌ما مفا وه‌رگرتنێ ژ هاريكاريێن ته‌كنيكى وئاموژگاريێن تيما ناڤبرى. دووپاتى ل وێ چه‌ندێ ژى كر كو ل هه‌رێما كوردستانێ دخوازين مفاى ژئه‌زموونا هه‌وه‌ وه‌ربگرين بۆ چاوانيا روو ب رووبوونا گه‌فێن ئه‌منى ب تايبه‌تى ئه‌وله‌ويه‌تا مه‌ پاراستنا گيانێ وه‌لاتيێن سڤيله‌.

ئه‌ڤرۆنيوز:

به‌رپرسێ ده‌سته‌يا كارگێريا مه‌كته‌با سياسى يا ئێكه‌تى نيشتمانى كوردستان هێرشه‌كا توند ل سه‌ر به‌رهه‌م سالح سه‌رۆكێ ليستا هه‌ڤپه‌يمانى بۆ ديموكراسێ ودادپه‌روه‌ريێ كر وراگه‌هاند، بناغێ شكاندنا حوكمه‌تا هه‌رێما كوردستانێ به‌رهه‌م سالحه‌.

مه‌لا به‌ختيار، به‌رپرسێ ده‌سته‌يا كارگێريا مه‌كته‌با سياسى يا ئێكه‌تى نيشتمانى كوردستان دداخۆيانيه‌كێ دا كو دمالپه‌رێ خوه‌ (چاڤدێر) دا به‌لاڤكريه‌، دبێژيت” به‌رهه‌م سالح دناڤ ئێكه‌تيێ دا يێ ب دووماهى هاتى ودكۆمبوونا دوهى 10/4/2018 دا ودكۆمبوونێن پێشتر ژى دا، بريار هاتيه‌ دان كو به‌رهه‌م سالح دناڤ ئێكه‌تيێ دا نينه‌”.

گۆت ژى” هه‌موو ئه‌و كه‌سێن دناڤ ئێكه‌تيێ دا كو دهه‌ر پله‌ وپۆسته‌كى دا بن، به‌لێ دليستا به‌رهه‌م سالحى دانه‌، هه‌موو دراڤ ومولكێ ئێكه‌تيێ دێ ژێ هێته‌ ستاندن ومووچێ وان ژئێكه‌تيێ دێ هێته‌ برين”.

مه‌لا به‌ختيارى دانپێدان ب وێ چه‌ندێ كر كو ئاخڤتن هه‌يه‌ چه‌ندين به‌رپرسێن ئێكه‌تيێ كارى وبانگه‌شێ بۆ ليستا به‌رهه‌م سالحى دكه‌ن ولڤينێن كۆمانلێكرى ژى يێن هه‌ين كو دناڤ ئێكه‌تيێ دا خه‌لكه‌ك يێ هه‌ى كارى بۆ به‌رهه‌م سالحى دكه‌ن، له‌وما لژنه‌كا ڤه‌كۆلينێ يا هاتيه‌ پێكئينان ل سه‌ر وان كه‌سان، پشتى پشتراستبوونێ، هه‌كه‌ ئه‌ندامێن مه‌كته‌با سياسى بن، دێ ئه‌ندامه‌تيا وان تاكو كۆنگره‌ى هێته‌ هه‌لاويستن بۆ وێ چه‌ندێ كۆنگره‌ بريارێ ل سه‌ر بده‌ت، به‌لێ هه‌كه‌ دخوار مه‌كته‌با سياسى دا بن، دێ هێنه‌ ده‌ركرن ژ ئێكه‌تيێ”.

مه‌لا به‌ختيارى دداخۆيانيا خوه‌ دا، بناغێ شكاندنا حوكمه‌تا هه‌رێما كوردستانێ بۆ به‌رهه‌م سالحى ڤه‌گه‌راند وگۆت” بناغێ شكه‌ستنا حوكمه‌تێ بۆ به‌رهه‌م سالحى دزڤريت، وى ده‌مێ ئه‌و سه‌رۆكێ حوكمه‌تا هه‌رێمێ، قه‌ره‌كێ مه‌زن ئينا سه‌ر حوكمه‌تێ”.

ئاشكرا كر ژى” ل سه‌رده‌مێ سه‌رۆكاتيا به‌رهه‌مى سالحى بۆ حوكمه‌تا هه‌رێما كوردستانێ، سه‌رمايه‌دار هه‌بوو نه‌كو 100% به‌لكو 800% مفا گه‌هشتيێ، هه‌كه‌ نه‌ تنێ بازرگانێن مادێن هوشبه‌ر وقه‌چاخچيێن فرۆشتنا هێرۆين  مفاى ب وێ رێژێ دكه‌ن”.

ئەڤرۆ نيوز:

ل رۆژا 14 / 4/ 2018 ل عیراقێ ھەوا ھەلبژارتنان دێ دەستپێکەتن، چەندێن ئالیێن کوردی ل کەرکووک دێ پشکدار بن یا کو نوکە ژ ئالیێ عیراقێ ڤە ھاتیە داگیرکرن، سەرۆک لیستا برایەتی د بێژیت، چو ھێزەکا کوردستانێ نەشێت ئالایێ کوردستانێ ددەمێ پرۆپاگندا ھەلبژارتنان دا ب کار بینیت.

رۆژا 16ی ئۆکتۆبەرا سالا بۆری ھێزێن عیراقێ ب ھەڤکاریا وەلاتێ ئیرانێ و چاڤشۆریەکا گرۆپەکێ ناڤا ئێکەتیێ دا کەرکووک پشتی حوکمڕانیا 15 سالا ھاتە داگیرکرن.

سەرۆکێ لیستا برایەتی یا جڤاتا پارێزگەھا کەرکووکێ مەحمەد کەمال بۆ رۆژناما ئەڤرۆ راگەھاند، ل کەرکووکێ چالاکیێن سیاسی بۆ حزبێن کوردی گەلەک یا بەرتەسک بوی، کو ھەتا نوکە ژی پشتی داگیرکرنا باژێرێ ناڤبری ژ ئالیێ حەشدا شەعبی و لەشکرێ عیراقێ، رێ بۆ بلندکرنا ئالایێ کوردستانێ نا ھێتە دان، بۆ وان حزبێن کوردی یێن بارەگایێن خوە ل کەرکووکێ ڤەکرین.

مەحمەد کەمال گۆت: ھێزێن داگیر کەرێن عیراقێ ل کەرکووکێ رێ نادەنە ئالیێن کوردی بۆ بلندکرنا ئالایێ کوردستانێ، چونکی لنک ھێزێن عیراقێ ئالایێ کوردستانێ ژ پرۆپاگندا ھەلبژاتنان گرنکترە و نابیت ئەو ئالایە بھێتە بلند کرن، وەکی گونەھباریەک دێ ل وان ئالان دنێرن یێن کو دڤێن ئالایێ کوردستانێ بلند بکەن.

سەبارەت ب دەستڤەئینانا کورسیێن کوردان ژی ناڤبری ھەروەسا خوەیاکر، ئەم وەکی پارتی مە بایکوتکرنا ھەلبژارتنێن باژێرێ کەرکووکێ کرینە، چونکی ئەو باژێر ژ ئالیێ ھێزێن عیراقێ ڤە ھاتیە داگیرکرن و باژێر بوویە بنگەھەکێ لەشکری، مللەتێ کورد نەشێت ب ئازادی بچیتە سەر سندۆقێن دەنگدانێ و دەنگێ خوە بدەت، لەورا ب باوەریا مە دڤێ ھەلبژارتنێ دا زیانەکا مەزن دێ بۆ کوردان ھەبیت، باشترین رێ ل دەڤەرێن دەرڤیا ھەرێما کوردستانێ یێن داگیر کرین ھەلبژارتن بھێنە پاشخستن، ھەکە حوکمەتا عیراقێ ئامادەنەبوو بھێتە پاشخستن، وی دەمی کورد ھەموو پێکڤە دڤێت باکوتکرنا ھەلبژارتنان بکەن.

مەحمەد کەمال گۆت: وەلاتیێن باژێرێ کەرکووکێ ھەتا نوکە ئاوارە و دەربەدەر بووینە، ژ بەر ھزر وبیرێن خوە یێن سیاسی نەشێن ڤەگەرن جھێن خوە ل کەرکووکێ، ئەڤجا دڤێ رەوشا ئالۆز دا ئەم دێ چەوا شێن پشکداریێ د پرۆسا ھەلبژارتنێن عیراقێ دا کەین، کو ئالیەکێ عیراقی یێ عەرەبی ب ھەموو رەنگەکی دڤێتن سەنگا کوردان کێم بکەت.

ئه‌ڤرۆنيوز:

زێده‌تر ژ 100 خودان پشكێن پرۆژێ گه‌شتياريێ چاڤيلاند ل سلێمانيێ، ئه‌ڤرۆ سێشه‌مبى 10/4/2018 سكالايه‌كا قانوونى دژى شاسوار عه‌بدولواحد خودانێ كۆمپانيا چاڤيلاند كر وداخواز دكه‌ن ل دووڤ قانوونێ ئه‌و بهێته‌ سزادان.

دسكالا خوه‌ دا بۆ دادوه‌رێ دادگه‌ها ڤه‌كۆلينێ ل سلێمانيێ، ئه‌ڤرۆ 100 خودان پشكێن چاڤيلاند داخوازا مافێ قانوونيێ خوه‌ دكه‌ن ودخوازن شاسوار و دو پارێزه‌رێن وى بهێنه‌ دادگه‌هكرن وبگه‌هنه‌ سزايێ خوه‌ يێ قانوونى.

د وێ سكالايێ دا هاتيه‌، ل سالا 2012 شاسوار عه‌بدولواحد ب رێيا فرت وفێلان كۆمپانيا چاڤيلاند دامه‌زراند وده‌ست ب پشك فرۆتنێ كر ب شێوه‌كێ نه‌ قانوونى وب مه‌ره‌ما ب قانوونيكرنا مامه‌لا دامه‌زراندنا كۆمپانيا خوه‌، هه‌ردو پارێزه‌رێن وى ئيمزايێن 99 خودان پشكێن چاڤيلاند بێ ئاگه‌هداريا وان سه‌خته‌كرن وكرنه‌ دامه‌زرێنه‌رێن كۆمپانيا وگرێبه‌سته‌كا نه‌قانوونى دروستكر و ب رێيا فرت وفێلێ سه‌رمايه‌كێ ئاشۆپى بۆ شاسوارى دياركر ب كۆژمێ 105 مليار ديناران.

خودانێن پشكێن چاڤيلاند دسكالا خودا دبێژن” شاسوار وهه‌ردو پارێزه‌رێن وى چه‌ندين كارێن نه‌قانوونى يێن دى يێن كرين ول سالا 2011 وهه‌تا نوكه‌ دبه‌رده‌وامن دفرت وفێلێن خوه‌ دا”.