ئه‌ڤرۆنيوز:

وه‌زاره‌تا دارايى وئابوورى ل هه‌رێما كوردستانێ بريار دا ژ نوكه‌ وپێڤه‌ پارێ مامۆستايێن وانه‌بێژ ل هه‌رێمێ هه‌يڤانه‌ بهێنه‌ به‌لاڤكرن.

وه‌زاره‌تا دارايى وئابوورى ب نڤيسارا خوه‌ يا هژمار (2999) كو ل رۆژا پێنجشه‌مبى 5/4/2018 ب ئيمزا رێباز حه‌ملان وه‌زيرێ دارايى وئابوورى ده‌ركرى، بريار دا ژ نوكه‌ وپێڤه‌ هه‌يڤانه‌ پارێ وانه‌بێژيێ بهێته‌ به‌لاڤكرن.

دپشكه‌كا دى يا بريارا وه‌زاره‌تا دارايى دا هاتيه‌، پارێ وانه‌بێژيا سپێده‌يان وپارێ سه‌ره‌دانا وه‌زاره‌تا خواندنا بلند، ئانكو ئه‌و مامۆستايێن ل زانكۆيان وه‌كو وانه‌بێژ وانان دبێژن، دێ ب شێوه‌كێ هه‌يڤانه‌ بيت، به‌لێ هه‌كه‌ دحاله‌ته‌كى دا ژبه‌ر رۆتينێن كارگێرى مه‌زاختنا پاره‌ى هاته‌ پاشخستن، دێ ل هه‌يڤا پاشتر دا بۆ هێته‌ مه‌زاختن.

پارێ وانه‌بێژێن باوه‌رناما دكتۆرايێ حه‌فت هزار دينارن ويێن ماسته‌رى شه‌ش هزار دينار ويێن به‌كالوريۆس ودبلۆما بلند پێنج هزار دينار ودبلۆمێ چار هزار دينار، به‌لێ پارێ وانه‌بێژيێ ل وه‌زاره‌تا په‌روه‌ردێ بۆ هه‌ر ده‌مژمێره‌كێ ل دووڤ باوه‌رنامێن وان دناڤبه‌راسێ هه‌تا شه‌ش هزار دينارايه‌.

ئه‌ڤرۆنيوز:

رێڤه‌به‌رێ گشتيێ خانه‌نشينيێ ل هه‌رێما كوردستانێ راگه‌هاند، پشتى ب دووماهى هاتنا به‌لاڤكرنا مووچێ وه‌زاره‌تان، راسته‌وخوه‌ دێ مووچێ خانه‌نشينان هێته‌ به‌لاڤكرن.

حازم ئيسماعيل، ريڤه‌به‌رێ گشتيێ خانه‌نشينيێ ل هه‌رێمێ گۆت” ليستا مووچێ خانه‌نشينان دێ ل دووڤ سيسيته‌مێ نوو يێ پاشكه‌فتا مووچان بيتوئه‌م چاڤه‌رێ دكه‌ين كو وه‌زاره‌تا دارايى مه‌ ئاگه‌هدار بكه‌ت ورۆژا به‌لاڤكرنا مووچێن خانه‌نشينان ديار بكه‌ت”.

ناڤبرى دداخۆيانيه‌كا رۆژنامه‌ڤانى دا گۆت ژى” ئه‌م نزانين ئه‌و مووچێ خانه‌نشينان ئه‌وێ دێ هێته‌ به‌لاڤكرن، مووچێ هه‌يڤا ئێك يێ ئه‌ڤ ساله‌يه‌، يان يێ هه‌يڤێن سالا بۆرى يه‌، چونكى وه‌زاره‌تا دارايى دێ بريارێ ل سه‌ر وێ چه‌ندێ ده‌ت”.

ئه‌ڤرۆنيوز:

رێڤه‌به‌رێ گشتيێ په‌يوه‌نديێن دناڤبه‌را حوكمه‌تا هه‌رێما كوردستانێ وكۆمارا ئيسلامى يا ئيرانى، راگه‌هاند، برياره‌ ل ده‌ستپێكا هه‌يڤا گۆلانا 2018، كۆنفرانسه‌كێ بازرگانيێ مه‌زن ل هه‌ولێرێ بهێته‌ سازكرن ب پشكداريا به‌رپرسێن ئيرانێ وعيراقێ وهه‌رێما كوردستانێ وجڤاتا وه‌زيرێن هه‌رێما كوردستانێ ژى يا به‌رهه‌ڤيان بۆ وى كۆنفرانسى دكه‌ت.

عه‌بدوللا ئاكره‌يى، رێڤه‌به‌رێ گشتيێ په‌يوه‌نديێن دناڤبه‌را حوكمه‌تا هه‌رێما كوردستانێ وكۆمارا ئيسلامى يا ئيرانى گۆت” پشتى سه‌ره‌دانا پارێزگه‌رێ هه‌ولێرێ بۆ ئازربايجانا رۆژئاڤا، هه‌ردو پارێزگه‌هێن ئورميه‌ وئازربايجانا رۆژئاڤا گرنگيێ ب ده‌رگه‌هێ حاجى عومران يێ سنورى دده‌ن، تاكو ئالۆگوريا بازرگانى دناڤبه‌را هه‌ردو ئاليان دا زێده‌تر ببيت وئه‌و كێشه‌ وگرفتێن هه‌ين بهێنه‌ چاره‌سه‌ركرن، پاشى ل سه‌ر داخوازا مه‌ كۆنفرانسه‌كێ بازرگانيێ مه‌زن دناڤبه‌را هه‌رێما كوردستانێ وپارێزگه‌هێن سه‌ر سنورێ هه‌رێما كوردستانێ ل ئاليێ كۆمارا ئيسلامى يا ئيرانى ل هه‌ولێرێ بهێته‌ ئه‌نجامدان، برياره‌ ئه‌و كۆنفرانس ل رۆژا 2/5/2018 بهێته‌ سازكرن وبۆ ده‌مێ دو رۆژان دێ به‌رده‌وام بيت”.

ئاكره‌يى زێده‌تر بۆ وشه‌ گۆت” دوى كۆنفرانسى دا، به‌رپرس وبازرگان وسه‌رمايه‌دارێن باژێرێن كرماسان وسنه‌ وئازربايجانا رۆژئاڤا ورۆژهه‌لات، رێڤه‌به‌رێن گشتى يێن پارێزگه‌هان وژۆرێن بارزگانى يێن وان هه‌ر چار پارێزگه‌هان وته‌هرانێ وستافێ ئالوگوريا بازرگانى دناڤبه‌را هه‌رێما كوردستانێ وئيرانێ وباليۆزێ ئيرانێ ل عيراقێ وبه‌رپرسێن عيراقى، يێن هاتينه‌ داخوازكرن بۆ پشكداريێ دوى كۆنفرانسى دا”.

خوياكر ژى” ئارمانج ژ وى كۆنفرانسى ئه‌وه‌ كو بزاڤ بهێته‌ كرن په‌يوه‌نديێن بازرگانى دناڤبه‌را هه‌رێما كوردستانێ وئيرانێ پێشڤه‌تر بچن وپيشانگه‌هێن بازرگانى وكارئاسانى زێده‌تر ل ده‌رگه‌هێن سنورى بهێنه‌ ئه‌نجامدان، كو ده‌رگه‌هێن په‌روێزخان وپاشماخ وحاجى عومران ب خوه‌ڤه‌ دگريت”.

كۆمارا ئيسلامى يا ئيرانى ل سه‌ر داخوازا حوكمه‌تا عيراقێ، ژ ئه‌گه‌رێ ئه‌نجامدانا ريفراندۆما سه‌ربخوه‌يا هه‌رێما كوردستانێ، ده‌مێ چه‌ند هه‌يڤان ده‌رگه‌هێن سنورى يێن دناڤبه‌را ئيرانێ وهه‌رێما كوردستانێ داخستن، به‌لێ پاشى ده‌رگه‌هێن سنورى هاتن ڤه‌كرن وئالوگوريا بازرگانى دناڤبه‌را هه‌رێمێ وئيرانێ گه‌شه‌كر.