ئه‌ڤرۆ نيوز:
ئه‌ڤرۆ ئێڤارى، مه‌ولود چاویش ئوغلۆ، وه‌زیرێ ده‌رڤه یێ توركیا ب رێیا ته‌له‌فۆنێ په‌یوه‌ندى ب نێچیرڤان بارزانى، سه‌رۆك وه‌زیرێ هه‌رێما كوردستانێ كر و ژبه‌ر وه‌غه‌را دلۆڤان بارزانى سه‌ره‌خۆشى ل سه‌رۆك وه‌زیر نێچیرڤان بارزان و مالباتا وى كر.
چاوش ئغلۆیى هه‌ڤخه‌مییا خوه گه‌هانده سه‌رۆك وه‌زیرێن هه‌رێمێ و داخواز كر داوى نه‌خوه‌شییا مالباتا بارزانى بیت.
نێچيرڤان بارزانى، سوپاسییا په‌یوه‌ندی و هه‌ڤخه‌مییا وه‌زیرێ ده‌رڤه یێ توركیا كر.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ ژڤانێ ده‌ستپێكرنا هه‌وا هه‌لبژارتنێن جڤاتا نوونه‌رێن عيراقێ ل هه‌رێما كوردستانێ دياركر.
ئه‌ڤرۆ دوشه‌مبى 2/4/2018، كۆمسيۆنا بلند يا هه‌لبژارتنان ل عيراقێ بريار دا رۆژا ئێكشه‌مبى 15/4/2018 هه‌وا هه‌لبژارتنان ل هه‌رێما كوردستانێ ده‌ست پێ بكه‌ت.
كۆمسيۆنا هه‌لبژارتنان ل عيراقێ، رۆژا 14/4/2018 دياركربوو بۆ ده‌ستپێكرنا هه‌وا هه‌لبژارتنان، به‌لێ ل هه‌رێما كوردستانێ ئه‌و رۆژه دبيته سالرۆژا ئه‌نفالان وجينوسايدكرنا گه‌لێ كوردستانێ، له‌وما بريار هاته دان هه‌وا هه‌لبژارتنان ل رۆژا پاشتر ل هه‌رێما كوردستانێ ده‌ست پێ بكه‌ت.
ئه‌ڤرۆنيوز:
به‌رپرسه‌كێ پێشمه‌رگه‌ى ئه‌ڤرۆ دوشه‌مبى 2/4/2018، ئاشكراكر كو په‌كه‌كه ل بن ناڤه‌كێ دى يا دشنگالێ دا ماى وخوياكر كو عيراقێ هێز نه‌ئيناينه شنگالێ.
فه‌ريق(جه‌مال ئێمينكى) سوپاسالارێ پێشمه‌رگه‌ى، گۆت”ئه‌و چه‌ندا دهێته به‌حسكرن كو په‌كه‌كێ يا خوه ژشنگالێ ڤه‌كێشاى، چو راستى بۆ نينه، چونكى په‌كه‌كه ل بن ناڤه‌كى دى ل وى سنورى يا ماى”.
فه‌ريق جه‌مالى گۆت ژى” عيراقێ چو هێز نه‌ئيناينه شنگالێ”.
سوپاسالارێ پێشمه‌رگه‌ى زێده‌تر بۆ وشه گۆت” هه‌ماهه‌نگى دناڤبه‌را عيراقێ وپه‌كه‌كێ دا يا هه‌ى ونێزيكى هزار چه‌كدارێن يه‌په‌شه، وه‌كو پشكه‌ك ژ ميليشيێن حه‌شدا شه‌عبى، مووچه‌ى ژ حوكمه‌تا عيراقێ وه‌ردگرن”.
هه‌روه‌سا گۆت” ئه‌و چه‌ندا ل دۆر شنگالێ دناڤبه‌را عيراقێ وتوركيا وپه‌كه‌كێ هه‌ى، ره‌نگه ته‌كتيك بيت وپاشه‌رۆژا ده‌ڤه‌رێ ب تمامى يا ديار نينه، به‌لێ مه‌ترسى يا هه‌ى ل سه‌ر شنگالێ وخه‌لكێ وێ ژى هه‌ست ب ترسێ دكه‌ن”.
ئه‌ڤرۆنيوز:
مالپه‌ره‌كێ جيهانى يێ تايبه‌ت ب پێشبينى وده‌نگوباسێن سه‌قاى ڤه دياركر كو ل دووماهيا حه‌فتيا بهێت دێ باران بارين ل چه‌ندين ده‌ڤه‌رێن هه‌رێما كوردستانێ ده‌ستپێكه‌ت.
مالپه‌رێ Accuweather يێ جيهانيێ يێ سه‌قاى، پێشبينيێ دكه‌ت ل رۆژا چارشه‌مبى 11/4/2018 باران ل پتريا ده‌ڤه‌رێن هه‌رێما كوردستانێ بباريت وبۆ ده‌مێ پێنج رۆژان دا دێ به‌رده‌وامبيت.
ئه‌ڤرۆنيوز:
به‌رپرسه‌كێ حوكمه‌تا عيراقێ ئاشكراكر كو وه‌لاتێ وى دێ رێككه‌فتنه‌كا له‌شكرى ل گه‌ل سێ وه‌لاتان ئه‌نجامده‌ت بۆ پاراستنا سنورێ عيراقێ ل گه‌ل وان هه‌رسێ وه‌لاتان.
قاسم ئه‌عره‌جى، وه‌زيرێ ناڤخوه‌يا عيراقێ، ئه‌ڤرۆ ده‌شه‌مبى 2/4/2018 دداخۆيانيه‌كا رۆژنامه‌ڤانى دا كو ل رۆژناما (الديار) يا لوبنانى دا هاتيه به‌لاڤكرن به‌حسێ رێككه‌فتنه‌كا له‌شكرى يا نوو كر كو عيراق دێ ل گه‌ل سێ وه‌لاتێن دى ئه‌نجامده‌ت.
ئه‌عره‌جى دياركر” ئه‌ڤ رێككه‌فتنا له‌شكرى وه‌كو پێدڤيه‌كێ يه بۆ قۆناغا پشتى شكه‌ستنا داعشێ ومه‌ره‌ما سه‌ره‌كى ژى پاراستنا سنورێن عيراقێ ل گه‌ل وان هه‌رسێ وه‌لاتايه كو ئه‌وژى ئوردن وكوێت وسعوديه نه”.
وه‌زيرێ ناڤخوه‌يا عيراقێ خوياكر ژى” وه‌كو ستراتيژ بۆ به‌رهنگاربوونا داعشێ ل سالا 2018، دێ سالا پشته‌ڤانيا هێزێن پاراستنا سنورى وهێزێن هه‌والگيريێ بيت، ئه‌ڤ چه‌نده ژى عيراقێ پێدڤى ب وه‌لاتێن جيران دكه‌ت”.
ئه‌ڤرۆنيوز:
ئه‌ندامه‌كێ جڤاتا نيشتمانى يا كوردى ل سووريێ راگه‌هاند، داخوازدكه‌ين ئه‌وێن عه‌فرينێ ب رێڤه دبه‌ن خه‌لكێ عه‌فرينێ ب خوه بن ورازى نابين چو كه‌سه‌كێ بيانى ببيته واليێ وى باژێرى.
پشتى توركيا وله‌شكرێ سووريێ ئازاد ده‌ست ب سه‌ر عه‌فرينێ دا گرتى وپاشى چه‌كدارێن له‌شكرێ ئازاد ده‌ست ب تالانكرن وده‌ركرنا كوردان كرى وزيانێن مه‌زن گه‌هاندينه كوردێن وى باژێرى،نوكه برياره جڤاته‌كا 35 كه‌سى بهێته دروستكرن كو 20 ژوان دێ كورد بن و كه‌سه‌كى ژ پارێزگه‌ها هاتاى يا توركى بينن وبكه‌نه واليێ وى باژێرى وسه‌رپه‌رشتيێ بكه‌ت، به‌لێ هێشتا ئه‌ڤه نه‌چوويه دبوارێ بجهئينانێ دا.
ل دۆر ڤێ چه‌ندێ نه‌واف حه‌سن، ئه‌ندامێ جڤاتا نيشتمانى يا كوردى ل سووريێ بۆ مالپه‌رێ فه‌رميێ پارتى ديموكراتى كوردستان گۆت” ئه‌م وه‌كو ئه‌نه‌كه‌سه دبزاڤ ودانوستاندنێن به‌رده‌وام داينه بۆ وێ چه‌ندێ ئه‌و كه‌سێن عه‌فرينێ ب رێڤه‌دبه‌ن، خه‌لكێ عه‌فرينێ ب خوه بن وكه‌سێن بيانى نه‌بن، چونكى ئه‌ڤه مافێ وى خه‌لكى يه وهه‌كه توركيا كاره‌كێ ب وى شێوه‌ى بكه‌ت، ئه‌م ژێ قه‌بوول ناكه‌ين وجڤاكێ نێڤده‌وله‌تى ژى دێ هێته سه‌ر هێلێ، به‌لێ ئه‌م وه‌كو ئه‌نه‌كه‌سه ب فه‌رمى پشكدار نينين دوى جڤاتێ دا ئه‌وا برياره بهێته دروستكرن”.
نه‌واف حه‌سه‌ن دياركر” زيانه‌كا مه‌زن ژئه‌گه‌رێ شه‌رى يا گه‌هشتيه خه‌لكى وزێده‌تر ژ 500 هزار كه‌سان يێن ئاواره بووين وهه‌تا نوكه ژى پشكه‌كا مه‌زن ژێ نه‌زڤرينه سه‌ر جهێن خوه، له‌وما ئه‌م داخواز دكه‌ين ئه‌و خه‌لكه بزڤريت ژبۆ وێ چه‌ندێ خه‌لكه‌كى دى نه‌ئيننه جهێ وان وته‌عريب بكه‌ن، چونكى په‌يه‌دێ داخوازى ژ خه‌لكى كرى نه زڤريت وئه‌ڤه كاره‌كێ شاشه وپێدڤيه رێگرى ل زڤرينا خه‌لكى نه‌هێته كرن”.
ئه‌ڤرۆنيوز:
شانده‌كێ وه‌زاره‌تا بازرگانى وپيشه‌سازى ل هه‌رێما كوردستانێ ئه‌ڤرۆ دوشه‌مبى 2/4/2018 گه‌هشته به‌غدا ب مه‌ره‌ما دانوستاندنێ ل گه‌ل به‌رپرسێن وه‌زاره‌تا بازرگانيا عيراقێ.
نه‌وزاد ئه‌دهه‌م، رێڤه‌به‌رێ گشتيێ بازرگانيێ ل وه‌زاره‌تا بازرگانى وپيشه‌سازى ل هه‌رێمێ راگه‌هاند” شاندێ هه‌رێمێ ب مه‌ره‌ما ئينانا پلێتا ئاهێن خوارنێ يا سالا 2017 – 2018 سه‌ره‌دانا به‌غدا كريه”.
دياركر ژى” پشتى زڤرينا شاندێ هه‌رێمێ دێ پلێتا ئاهێن خوارنێ يا نوو هێته به‌لاڤكرن وئه‌ڤ پسۆله بۆ وه‌رگرتنا خۆراكى وهنده‌ك مامه‌لێن وه‌لاتيان ل فه‌رمانگه‌هان دهێته بكارئينان”.
رێڤه‌به‌رێ گشتيێ بازرگانيێ زێده‌تر بۆ وشه گۆت” هه‌ماهه‌نگيه‌كا تمام ل گه‌ل وه‌زاره‌تا بازرگانيا عيراقى يا هه‌ى بۆ چه‌ندين پرسان وگه‌له‌ك جاران شاندێ وان ژى سه‌ره‌دانا هه‌رێما كوردستانێ كريه”.
ئه‌ڤرۆنيوز:
ئه‌ندامه‌كێ لژنا ئێمناهيێ وبه‌رگريێ ل جڤاتا نوونه‌رێن عيراقێ، ئه‌ڤرۆ دوشه‌مبى 2/4/2018 راگه‌هاند، دو هزار چه‌كدارێن تيرۆرست ل بيابانێن پارێزگه‌ها ئه‌نبار ژئاليێ ئه‌مريكا ڤه دهێنه پاراستن وده‌مێ سێ سالايه مه‌شق وراهێنانان پێ دكه‌ت.
حه‌سه‌ن سالم، ئه‌ندامێ لژنا ئێمناهيێ وبه‌رگريێ ل جڤاتا نوونه‌رێن عيراقێ، ل دووڤ ئاژانسا راگه‌هاندنا عيرااقى، گۆت” گرۆپه‌كا تيرۆرستى ل نهالا حۆران ل بيابانا پارێزگه‌ها ئه‌نبار يا هه‌ى كو زێده‌تر ژ دو هزار چه‌كداران ژ چه‌ندين ره‌گه‌زنامێن بيانى وعه‌ره‌بى ب خوه‌ڤه دگريت”.
گۆت ژى” هێزێن ئه‌مريكى هه‌بوون ل وێ ده‌ڤه‌رێ يا هه‌ى وچه‌ك يێ دايه وى گرۆپى ومه‌شق دده‌ت ژى وهه‌ر ئه‌و هێزێن ئه‌مريكى زێره‌ڤانيێ ژى ل وان ده‌ڤه‌ران دكه‌ن يێن ئه‌و گرۆپ لێ هه‌ين ب مه‌ره‌ما پاراستنا وان ژ ئۆپه‌راسيۆنێن له‌شكرێ عيراقى”.
دياركر ژى” هێزێن ئه‌مريكى هێلا سوور ل وى سنورى يا داناى ل ده‌ڤه‌رێن ئه‌و گرۆپا تيرۆرستى لێ هه‌ين ل به‌رده‌م پێشڤه‌چوونا هێزێن عيراقى”.
ئاماژه دا” ده‌مێ سێ سالايه ئه‌و گرۆپه دناڤ خه‌نده‌ك وسه‌ربازگه‌هێن بن ئه‌رد دژين”.
ئه‌ڤرۆنيوز:
نڤيسينگه‌ها سه‌رۆك بارزانى به‌لاڤكر، پشتى وه‌غه‌ركرنا خودێ ژێ رازى دلوڤان ئيدريس بارزانى ل رۆژا دوشه‌مبى 2/4/2018، بۆ جه‌ماوه‌رێ خوه‌شتڤيێ كوردستانێ وهه‌موو ئاليه‌كى رادگه‌هينين كو به‌هيا خودێ ژێ رازى دلوڤان ئيدريس بارزانى ل رۆژا سێشه‌مبى 3/4/2018 بۆ ده‌مێ سێ رۆژان ل هۆلا هه‌لكه‌فتان ل باژێركێ سه‌لاحه‌دين دێ ل ڤان ده‌مان ب رێڤه‌چيت:
سپێده‌يان: ژ ده‌مژمێر 9 هه‌تا 12
ئێڤاران: ژ ده‌مژمێر 2 هه‌تا 5
ئه‌ڤرۆنيوز:
سه‌رۆك وه‌زيرێن عيراقێ په‌يوه‌ندى ب نێچيرڤان بارزانى سه‌رۆك وه‌زيرێن هه‌رێما كوردستانێ كر وسه‌ره‌خوه‌شيێن خوه ئاراسته‌ى وى كرن ب وه‌غه‌ركرنا برايێ وى دلوڤان ئيدريس بارزانى.
حوكمه‌تا هه‌رێما كوردستانێ به‌لاڤكر، ئه‌ڤرۆ سه‌رۆك وه‌زيرێن عيراقێ په‌يوه‌ندى ب سه‌رۆك وه‌زيرێن هه‌رێما كوردستانێ كر وهه‌ڤخه‌ميا خوه ل گه‌ل نێچيرڤان بارزانى ومالباتا بارزانى دياركر.
دياركر ژى، عه‌بادى هيڤى خواست خودێى مه‌زن ره‌حمه‌تى ب به‌هه‌شتا خوه شاد بكه‌ت وئه‌ڤه دووماهى خه‌م بيت بۆ مالباتا بارزانى، ژئاليێ خوه‌ڤه نێچيرڤان بارزانى سوپاسيا عه‌بادى كر بۆ وێ په‌يوه‌نديێ وپێشكێشكرنا سه‌ره‌خوه‌شيێ وهه‌ڤخه‌ميێ.
نيشاندان