ئه‌ڤرۆنيوز:

ده‌سته‌يا ده‌ستپاكيێ ل هه‌رێما كوردستانێ رۆهنكرنه‌ك به‌لاڤكر وتێدا ره‌تكر ئه‌و ليستا ناڤێن دتۆرێن جڤاكى دا هاتيه‌ به‌لاڤكرن په‌يوه‌ندى ب ده‌سته‌يا ناڤبرى ڤه‌ هه‌بيت.

ا ده‌سته‌يا ده‌ستپاكيێ ل هه‌رێمێ د رۆهنكرنا خوه‌ دا دبێژيت” ده‌مێ چه‌ند رۆژانه‌ دتۆرێن جڤاكى دا ليسته‌ك به‌لاڤ دبيت ل دۆر وان كه‌سێن كو باده‌كێن گه‌نده‌ليێ هه‌ين وژئاليێ ده‌سته‌يا ده‌ستپاكيێ ل هه‌رێما كوردستانێ ڤه‌كۆلين دگه‌لدا دهێته‌ كرن، له‌وما ئه‌م ب هه‌موو ئاليه‌كى رادگه‌هينين كو به‌لاڤكرنا وێ ليستێ په‌يوه‌ندى ب ده‌سته‌يا ده‌ستپاكيێ ڤه‌ ننيه‌ وژئاليێ مه‌ڤه‌ نه‌هاتيه‌ به‌لاڤكرن”.

دياركرژى” ده‌سته‌يا ده‌ستپاكيێ ده‌زگه‌هه‌كێ فه‌رمى يه‌ وچالاكيێن خوه‌ ب فه‌رمى وب ئاشكرا به‌لاڤ دكه‌ت”.

ئه‌ڤرۆ نيوز، نيوار محه‌مه‌د سه‌ليم:

قايمقامێ قه‌زا سۆران راگه‌هاند كو له‌شكرێ توركيا ل ڤان رۆژان خوه‌ گه‌له‌ك نێزيكى گۆندان كريه‌ و به‌رده‌وام ئه‌و و په‌كه‌كه‌ روو ب روويێ ئێك دبن و ترسه‌كا زێده‌ ژى خستيه‌ دلێ وه‌لاتيێن وان گۆندان.

كرمانج عزه‌ت، قايمقامێ قه‌زا سۆران د داخۆيانيه‌كێ دا بۆ ئه‌ڤرۆ نيوز گۆت: “نێزيكى هه‌يڤه‌كێ يه‌ سوپايێ توركيا نێزيكى شه‌ش كيلۆمه‌تران نێزيك بوويه‌ ل چيايه‌كێ بچووك كو دبێژنێ ملێ پاوان و ل وێرێ باره‌گايێن خوه‌ يێن داناين”.

زێده‌تر گۆت: “ڤان دو شه‌ڤان پێشڤه‌هاتينه‌ ژ كيلۆمه‌تره‌كێ هه‌تا سێ كيلۆمه‌تران بۆ ده‌ڤه‌را سۆرك ل به‌رامبه‌ر گه‌ليێ ره‌ش كو دبێژنێ گه‌ليێ به‌رازا”.

ئاشكه‌را ژى كر كو مه‌ره‌ما وان ئه‌وه‌ وان رێيان بێخيته‌ بن چاڤدێريا خوه‌ و تۆنێلان ب ته‌قينيت و جهێ ڤه‌حه‌واندنێ بۆ خوه‌ دروست بكه‌ت و گۆت: “نه‌هاتينه‌ ناڤ ئاڤه‌دانيێ به‌لێ كێمتر ژ كيلۆمه‌تره‌كێ ژ وه‌لاتيان د دوورن و مه‌ترسيه‌كا گه‌له‌ك زێده‌ ل ده‌ف خه‌لكى هه‌يه‌”.

دا زانين ژى كو پێشبينى دهێته‌ كرن كو خه‌لك وان ده‌ڤه‌ران ب جهـ بهێليت ژ به‌ر گۆمانا هه‌بوونا شه‌رى د ناڤبه‌را په‌كه‌كێ و له‌شكرێ توركيا دا چونكو مه‌ره‌ما وان هه‌بوونا شه‌رى يه‌ د ناڤبه‌را هه‌ردو لايان دا.

ده‌رباره‌ى هه‌بوونا شه‌رى ژى كرمانج عزه‌ت گۆت: “رۆژانه‌ روو ب رووبوون د ناڤبه‌را له‌شكرێ توركيا و چه‌كدارێن په‌كه‌كێ دا يێ هه‌يى و تۆپبارانكرن ل تۆپخانه‌يێن له‌شكرێ توركيا و ب فرۆكان يا به‌رده‌وامه‌ و هه‌كه‌ شه‌ر مه‌زن ببت، وه‌لاتى دێ نه‌چار بن ده‌ڤه‌رێ ب جهـ ب هێلن”.

ب گۆره‌ى پێزانينێن ئه‌ڤرۆ نيوز گه‌له‌ك گۆند دكه‌ڤنه‌ وى سنورى و مه‌زنترين گۆندێ وان هه‌تا 300 خێزانان تێدا هه‌نه‌ و ب ره‌نگه‌كێ گشتى زێده‌ترى 500 خێزانان ل وان گۆندان دژين و ژيارا وان ل وه‌رزێ بوهارێ ب ره‌نگه‌كێ به‌رچاڤ ل سه‌ر گيايێن بوهارى يه‌.

قايمقامێ قه‌زا سۆران د ڤێ ده‌ربارێ دا گۆت: “نێزيكبوونا له‌شكرێ توركيا زيانه‌كا مه‌زن گه‌هانديه‌ وه‌لاتيان ژ لايێ ئابوورى ژى ڤه‌، ژ به‌ر مه‌ترسيا وان نه‌شێن بچنه‌ چيايى و گيايێن بوهارى ژى بۆ خوه‌ بينن”.