ئه‌ڤرۆ نیوز:
شه‌رڤانه‌كێ هێزا دژه‌تیرۆرا یه‌په‌گێ ل ناوچه‌یا جندرێسێ یا عه‌فرینێ ل رۆژئاڤایێ كوردستانێ، دا كو ب ساخی نه‌كه‌ڤیته ده‌ستێ سوپایێ توركیا و ملیشیایێن وێ یێن سووری، خوه په‌قاند و داوی ب ژیانا خوه ئینا.
ئیلان دارا، ژ هێزا دژه‌تیرۆرا یه‌په‌گێ پشتی شه‌ره‌كێ دژوار دژی سوپایێ توركیا چه‌كدارێن سوپایێ ئازادێ سووریێ ل جندرێسێ كری، به‌ری بكه‌ڤیته ده‌ستێن وان هێزان دا خوه په‌قاند ژبه‌ركو ره‌ت كر ئه‌و هێزه وی ئێخسیر بكه‌ن.
یه‌په‌گێ د به‌یانه‌كێ دا ئه‌و یه‌ك پشتراست كر.
ئەڤرۆ نیوز ، زنار تۆڤی:
ئه‌ندامەکێ ليژنا نه‌فت و وزه‌یا په‌رله‌مانى ل عێراقێ، هورده‌كاریێن قانوونا كۆمپانيا نه‌فتا نيشتمانى دیاردکەت،کو لدووڤ وێ قانوونێ ب گۆژمێ 10% یا پارێ نه‌فتێ د بۆ وێ پارێزگەهان هێتە خه‌رجکرن،یاکو نەفتێ به‌رهه‌م دئینیت.
جه‌مال كۆچه‌ر، ئه‌ندامێ ليژنا نه‌فت و وزێ ل په‌رله‌مانێ عێراقێ گوتیە،د وێ پرۆژه قانوونێ دا 10% یا پارێ نه‌فتا پارێزگەهان بۆ وێ پارێزگەهێ هاتیە ته‌رخانكرن،یاکو نەفت تێدا، پشکەک ژ وی پاره‌ی دێ بۆ وەلاتیان بیت، 90% یا پارێ نه‌فتا وی پارێزگەهێ دێ بۆ حوکمه‌تێ بیە ،هەروەسا 10% ب سه‌ر سێ سندوقان دا دێ هێتە دابه‌شکرن،پشکەک بۆ راهێنان و گه‌شه‌پێدانا وان كارمه‌ندانه یێن كو ل وان كۆمپانيێن نه‌فتێدا كاردكه‌ن،پشکەک ژی بۆ بەرەبابێن داهاتی یێن وێ پارێزگەهێنه، پشکەک ژی بۆ خۆجهێن و پارێزگەهێ یە.
گوت ژی، هه‌ر پارێزگەهەکا برێیا ڤێ كۆمپانیا نه‌فتا نیيشتمانی نەفتێ بفرۆشیت و ڤرێکەتە ژ ده‌رڤە،دێ شێت ژ وێ 10% مفادار بیت،ژبەر هندێ بۆ ڤێ قانوونا نوو و رێنمايى و په‌يكه‌ر بۆ نەهاتیە ده‌رکرن،ئه‌و پاره يان دێ هێتەدان بۆ خەلکێ يان دێ بیتە بودجه و دێ بۆ وێ پارێزگەهێ چیت.
گوتیە ژی،ئه‌و قانوونە ژ حوکمەتێ نه‌هاتیه په‌رله‌مانی، هندەك كه‌سێن دناڤ په‌رله‌مانی دا ئه‌ڤ پرۆژه پێشنياركریە،لەورا هێشتا تانوپۆیا وێ قانوونێ ديارنينه ژلایێ جڤاتا وه‌زيران، دڤێت ده‌سته‌يه‌ك بۆ بهێته دروستکرن، ئه‌و ده‌سته‌يه دێ په‌يكه‌ر و تانوپۆ و چارچوڤەی بۆ دانیت، ئه‌و قانوونه ب تنێ بۆ چارچۆڤەکێ گشتى بۆ هاتیە دياركرن.
هەروەسا گوتیه،خالا نەباش ئەوە،کو ئه‌و ده‌سته‌يه بكه‌ڤیتە ژێر ده‌ستێ عه‌بادى،لەورا هندەکان مه‌ترسیا هندێ هه‌يه،کو ب دروستى ب كار نه‌ئینیت، چونكی ئه‌و كۆمپانيا د بنه‌ره‌تدا، ل سه‌ر بنه‌مایێ كۆمپانيا روسنه‌فتا رووسى و په‌يوه‌ندیا وێ كۆمپانيایێ ل گه‌ل پوتینی و كۆمپانيا ئيكسۆن موبيل یا ئه‌مريكى و په‌يوه‌ندى ل گه‌ل سه‌رۆكاتیا ئه‌مريكا و كۆمپانیا پى بى یا بريتانى و په‌يوه‌نديا وێ ل گه‌ل حوکمه‌تێ هاەیە دروستكرن،کو چاوا حوکمه‌تا وی بڤێت نه‌فتا كیژ وەلاتی بێخیتە ژێر ده‌ستهەلاتا خوە،برێیا وێ كۆمپانيا كارى بۆ دکەت.
دیارکر ژی،د داهاتی دا ئه‌ڤ كۆمپانيا نه‌فتا نيشتمانی دێ وەلێ هێت،کو كۆمپانيا ده‌ولەتێیە،دێ سياسه‌تا ده‌ولەتێ ژ دەرڤە و نافخوەیا وەلاتی په‌يره‌و کەت و ئه‌و كه‌رته ژی دێ کەڤیتە ده‌ستێ هندەك كه‌ساتیێن سياسه‌تمه‌دار، ئه‌ڤەژی پلانا وانە، ئه‌ڤەژی ئێکە ژ مه‌ترسيێن وێ قانوونێ.
سه‌باره‌ت جێبه‌جێكرنا وێ قانوونی ل پارێزگەهێن هه‌رێما كوردستانێ دیارکر،ژبەر هندێ کو ل هه‌رێمێ وه‌زاره‌تا سامانێن سروشتی یا هه‌رێمێ تاك لايه‌نه كارێ نەفتێ دکەت و نەفتێ دفروشیت،وان خالەک دانایه،هەکە هه‌رێم نه‌فتا خوە برێیا ڤێ كۆمپانيانیێ بفرۆشیت و مامه‌لێ ل گه‌ل بكەت،دێ ئه‌وا نوونەرەکێ وه‌زاره‌تا سامانێن سروشتی ل هه‌رێمێ بیتە ئێک ژ ئه‌ندامێن وێ دهستهیێ.
جەمالی گوت ژی،ژبەرکو حوکمه‌تا هه‌رێمێ وه‌ك وه‌زاره‌ت مامه‌لا نه‌فتێ دکەت، باوه‌رناكه‌م پارێزگايه‌ک بچیت، سه‌ره‌ده‌ریێ ل گەل ڤێ دهستهیێ و قانوونی بكەت،هەروەسا نه‌فتا پارێزگاها خوە برێیا وێ كۆمپانيێ بفرۆشیت و رێكکه‌فتنی ل گه‌ل بكەت، لەورا دبیت هه‌رێم ب ئێک پاكێج مامه‌لێ ل گه‌ل بكەت، يان ژی دێ ب ئێکجارى مامه‌لی ل گه‌ل کەت،يان ژی دێ بايكۆتێ کەت و مامه‌لێ ل گه‌ل ناكەت.
ئه‌ڤرۆ نيوز: بارزان سلێمان مزیرى
پشتى سێ روژێن به‌رزه‌بوونێ ته‌رمێ هاولاتیه‌كێ خه‌لكێ شێخان ب كوشتى هاته دیتن ل پارێزگه‌ها دیاله.
حاجى پیرو، بابێ وى كه‌سێ هاتیه كوشتن بۆ ئه‌ڤرۆ نيوز راگه‌هاند : كورێ من كاسبه و كه‌ره‌سته‌یێن خۆارنێ دفروتن ل به‌غدا وه‌ك هنگڤین و مێوژ ئه‌ڤ جوره خارنێن سه‌فه‌رى ، به‌رێ سێ روژا ل مال ده‌ركه‌فت و چۆ به‌غدا ب مه‌به‌ستا كاركرنێ پاشى بێده‌نگ ما ، پشتى سێ روژا ب دوڤرا چۆم ب كوشتى من دیته‌ڤه ل ناحیا شاره‌بان ل پارێزگه‌ها دیاله.
ناڤبرى گوتژى : كورێ من ب ناڤێ ( هه‌ژار) دایك بۆیێ سالا 1988 ێ یه و چه‌ندین ساله كارێ فروتنا كه‌ره‌سته‌یێن خوارنێ دكه‌ت , ژلایێ چه‌ند كه‌سێن نه‌ناس ڤه دهێته ره‌ڤاندن و پاشى دكوژن، ئه‌ڤرۆ پێنچ شه‌مبى ته‌رمێ وى من زڤرانده‌ڤه و ڤه‌شارت ل شێخان.
ئه‌ڤرو نیوز ، ئێقبال عومه‌ر:
ب مه‌ره‌ما نووكرنا سۆز و په‌یمانان و رێزگرتن بۆ خه‌بات و قوربانیدانا وان ئه‌ڤرو روژا 8/3/ 2018ێ ته‌خ و چینێن جۆدا جۆدا یێن كوردستانێ و قه‌زا ئامێدیێ سه‌ره‌دانا مه‌زارێ نه‌مران ل گوندێ بارزان كرن,ژلایێ شێخ خه‌لات بارزانى نونه‌رێ مه‌سعود بارزانى سه‌روكێ پاتى دیموكراتى كوردستان ڤه هاتنه پێشوازیكرن.
خه‌لات بارزانى نوونه‌رێ مه‌سعود بارزانى بۆ ئه‌ڤرو نیوز دا دیاركرن , كو ب مه‌ره‌ما نوكرنا سوزو په‌یمانان ل سه‌ر رێبازار پیروزا بارزانیێ نه‌مر و كاك ئدریسێ هه‌رده‌م ساخ , ئه‌ڤروب هه‌لكه‌فتا وه‌غه‌ركرنا بارزانیێ نه‌مر ته‌خ و چینێن جۆدا جۆدا یێن باشورێ كوردستانێ سه‌ره‌دانا مه‌زارێ نه‌مران ل گوندێ بارزان كرن و ژلایێ دام و ده‌زگه‌هێن حكومى و لێژنا سه‌رپه‌رشت ڤه هاتنه پێشوازیكرن, خه‌لات بارزانێ گوت: ژبلى شاندێن پارتى دێموكراتى كوردستان شاندێن دامو ده‌زگه‌هێن حكومى و حزبى ژى و ژهه‌مى لایه‌كى ڤه پێكهاتبین ئه‌ڤرو سه‌ره‌دانا بارزان كربی, ل ڤێ رێ دیار دبیت كو بارزانیێ نه‌مر نه‌ك بتنێ سه‌روكێ پارتى بى یان خه‌بات ژ بو باشورێ كوردستانێ بتنێ دكر, بارزانیێ نه‌مر سه‌روكێ ته‌ڤایا ملله‌تێ كورد بو و خه‌بات ژبو هه‌رچار پارچێن كوردستانێ دكر له‌وما دور ژ بیرو باوه‌رێن حزبایه‌تى خه‌لكێ كوردستانێ سه‌ره‌دانا مه‌زارێ نه‌مران دكه‌ن.
ژلایێ خوه‌ڤه وه‌لاتیه‌كێ قه‌زا ئامێدیێ ب ناڤێ شڤان عسمه‌ت كو سه‌ره‌دانا مه‌زارێ نه‌مران كر ل بارزان بو ئه‌ڤرونیوز گوت: هه‌مو گه‌لێن جیهانێ شانازیێ ب وان سه‌ركرده و رێبه‌ران دكه‌ن ئه‌وێن سه‌ركه‌فتن و ئازادیا ملله‌تێ خوه ب ده‌ستڤه ئیناى و ملله‌تێ خوه گه‌هاندیه قوناغا سه‌ركه‌فتنێ, له‌وما بومه كوردان ژى فه‌خرو شانازى و سه‌ربلندیه كو ئه‌م ژى خودان سه‌ركرده و رێبه‌ره‌كێ وه‌كو بارزانیێ نه‌مر بین یێ كو هه‌مى ژیانا خوه كریه دیارى پێخه‌مه‌تى ب ده‌ست ڤه ئینانا مافێ ره‌وایێ گه‌لێ كورد, بارزانیێ نه‌مر ئێكه ژ سه‌ركردێن هه‌ره مه‌زن یێن چه‌رخێ بیستێ یێ كو د تاریترین مێژویا گه‌لێ كورد دا شیاى زه‌نگلا روناهیێ بو رێكخستنا گه‌لێ كورد لێده‌ت و لبن ئێك ئالا و دروشمدا بوركانا شوره‌شا ئازادیێ ب سه‌ر هوڤه‌ترین دورژمنێن گه‌لێ كورد دا بپه‌قینیت, وبزانین كو گه‌لێ حوكمه‌ت و عه‌داله‌تا خوه گه‌هانده قه‌ناغا سه‌ركه‌فتنێ, لسه‌ر هه‌رتاكه‌كێ كورد ژى فه‌رزه كو سالانه سه‌ره‌دانا سه‌ر مه‌زارێ نه‌مرا بكه‌ت ل بارزان ژبه‌ركو بارزانیێ نه‌مر ملله‌تێ كورد ب جیهانێ دان یاسین و كورد ژ خه‌واگران هشیاركرن كو ئه‌ڤرو به‌رهه‌مێ خه‌بات و ماندیبون و قوربانى دانا بارزانى و پێشمه‌رگێن شوره‌شگیرێن وى یه.
ئەڤرۆ نیوز ، زنار تۆڤی :
زانكۆیا كەركووكێ دو رۆژان بەری ماوێ رۆژا جلێن كوردی، بریارەک ئاراستەی سەرجەم كۆلیژێن زانكۆیێ كریە و تێدا ب هەموو شێوەکێ لبەركرنا جلکێن دیتر،جۆدا ژ جلێن زانكۆیێ رەت دكەت و هەر چالاكی و ئاهەنگەکێ لناڤ كۆلیژان بۆ رۆژا جلێن كوردی ب توندی رەت دكەت.
د نڤێسینەکێدا سەرۆكاتیا زانكۆیا كەركووكێ کو ئاراستەی هەموو راگرێن كۆلێژان كریە،ئەڤ نڤێسینە ل رێكەفتی شەشی ئادارێ بەلاڤکریە،تێدا هاتیە، بۆ ل بەرچاڤگرتن و بەرژەوەندیا كار و رێگری ل هەر پێشێلكاریەکێ، سەرۆكێ زانكۆیێ ئەڤ رێکارە بەلاڤکرینە.
ئێكەم:رێگریکرن ل چوونا ژوورڤە بۆ هەر قوتابیەكێ بۆ ناڤ حەرەمێ زانكۆیێ،هەکە جلێن کوردی بکەتێ.
دویەم: نابیت ل هیچ هەلکەفتەکێ رۆژا لبەركرنا جلێن نەتەوەیی یان مللی ل زانكۆ و هەموو كۆلێژان بهێته ئەنجامدان.
سێیەم: رێگریکرن ل هەر جۆرە ئامیرەکێ دی جی بۆ ناڤ حەرەمێ زانكۆیێ دێ هێتە کرن،ب تنێ ب رەزامەندیا سەرۆكێ زانكۆ،دڤێت وان ئامیران ببنە ناڤ زانكۆیێ.
ئەڤ بریارا سەرۆكێ زانكۆیا كەركووكێ د ددەمەکێ دایە، ئەڤرۆ پێنجشەمبی رۆژا لبەرکرنا جلێن كوردیە و سالێن پێش خیانەتا 16 ئۆكتۆبەرێ ل زانكۆیا كەركووكێ و وی باژێری ب پیرۆزی رۆژا جلێن كوردی پیرۆز دهاتنە راگرتن.
ئه‌ڤرۆ نیوز ، نه‌وزاد هلۆرى:
ئه‌ڤرۆ ئێڤارى ل سه‌نته‌رێ قه‌زا ئاكرێ یا سه‌ر ب پارێزگه‌ها دهۆكێ گه‌نجه‌كێ ئاواره ب ده‌ستێ كه‌س و كارێن وى ب شاشى ڤه هاته كوشتن.
مه‌تین ئاكره‌ى رێڤه‌به‌رێ كه‌مپا ماملیان ل ئاكرێ بو ئه‌ڤرۆ نیوز گۆت: (ئه‌ڤرۆ ئێك ژ ئاواره‌یێن كه‌مپا ماملیان شه‌هیانا خوه دكه‌ت ، و پشتى كو بووك و زاڤا گه‌هشتیه جهێ داوه‌تێ ، ئێكسه‌ر كه‌س و كارێن وى ده‌ست ب ته‌قه‌یێ خوه‌شیێ دكه‌ن ، به‌لێ ب مخابنیڤه گوله‌یه‌ك ب كه‌سه‌كێ دكه‌ڤیت كو ئه‌و ژى برایێ زاڤایى بوو و دهێته كوشتن)
زێده‌تر گۆت: ( ئه‌و كه‌سه ب ناڤێ “مه‌سعود حسێن”ه و ژیێ وى 28 سالن و خه‌لكێ موسلێ یه و ل كه‌مپا ماملیان وه‌كو ئاواره دژیت ، و ته‌رمێ وى بو نه‌خوشخانا داد هاتیه ره‌وانه‌كرن داكو زێده‌تر ڤه‌كولین لسه‌ر روودانێ بهێته‌كرن)
ئەڤرۆ نیوز ، تۆڤی :
بالیۆزێ ئەمریكا ل عێراقێ گوتیە، سونێن عێراقێ ل بەردەم دەرفەتەکا مەزن و مێژوویی نە، بۆ هندێ کو پشتی 15 سالێن رووخاندنا رژێما بەعس، دووبارە دەستهەلاتێ بگرنەڤە دەست، ئەڤەژی د دیدارەکا بالیۆزێ ئەمریكا دڵ هات لگەل سەرۆكێ لیستا سوننیان ل هەلبژارتنێن داهاتیدا ل عێراقێ.
دیدار ل مالا سەلیم جبووری سەرۆكێ پەرلەمانێ عێراقێ هاتیە ئەنجام دان،و تێدا دۆگلاس سلێمان بالیۆزێ ئەمریكا ل عێراقێ ئاشكرا كریە،کو ئەزموونا حوكمكرنا شیعەیان ب تەمامی شكەستن ئینایە، ئەو زێدەتر مژۆلی هندێ نە کو نەیارێن خوە یێن سیاسی بشكێنن،ل جهێ پێشكێشكرنا خزمەتگوزاری و برێڤەبرنا دروست یا وەلاتی،لدووڤ شێوازێ ئەوان عێراق ب تەمامی دێ شكەستنێ ئینیت و ب هیچ شێوەیەكێ ناكەڤیتە سەر رێیا دیموكراتیێ،هەروەسا ژ شەرێ نافخۆ دوور ناكەڤیت.
سلیمانی گوتیە،شیعە دناڤ خوە ژی دا د ئێكگرتی نینن و ب تەمامی دابەش بووینە،لەورا دڤێت سوننی دەستهەلاتێ بگرنە دەست و كورد ژی دێ دوبارە مافێن خوە دەستەبەر کەن ب رێیا سندوقێن دەنگدانێ.
هەر چەندە ژێدەرێن راگەهاندنێ دبێژن، ئەمریكا یا رژدە کو د هەلبژارتنێن 12 ئەیارێ دا عەبادی دێ زۆرینەیا كورسییان ب دەست خوەڤە ئینیت و بۆ خولا دویێ دێ سەرۆكاتیا حوکمەتا عێراقێ وەرگریتەڤە،لەورا ب تنی ئاخفتنێن بالیۆزێ ئەمریكا ل عێراقێ،هاندانەکە بۆ سونیان،داکو ب گەرمی بچنە ناڤ پرۆسا هەلبژارتنان.
ئەڤرۆ نیوز ، زنار تۆڤی:
ریكس تیلرسون وەزیرێ دەرڤە یێ ئەمریكا ل 30 ئۆكتۆبەرا 2017 راگەهاندیە،کو هێزێن ئەمریكا دێ میننە ل عێراقێ و ژ عێراقێ ناچه،هەکە حوکمەتا عێراقێ ژی داخواز بکەت.
ئەڤ ئاخفتنا وەزیرێ دەرڤە یێ ئەمریكا د ئێک دەمدا سیاسەتا وەلاتێ خوە بۆ عێراقێ ئاشكرا دکەت،کو نوکە ژی مژۆلی دروستكرنا بنگەهەکێ دی سەربازینە، هەروەسا بەرسڤەکە ژی بۆ وان دەنگێن ل بەغدا داخوازا چوونا ئەمریكا دكەن،هەروەسا وەك بەرسڤەک بۆ تیلرسونی کو د كۆمبوونا ل گەل شاه سەلمانی پادشایێ عەرەبستانا سعوودی،کو حەیدەر عەبادی سەرۆك وەزیرێن عێراقێ ئامادە ببوو، راگەهاند کو دڤێت میلیشیاتێن چەكداری یێن سەر ب ئیرانێوەكو ئاماژەیەك بۆ میلیشیاتێن حەشدا شەعبی ڤەگەرنە ئیرانێ.
ئەمریكا پشتی شەرێ ئازادیا عێراقێ چەندین بنگەهێن سەربازی دامەزراندینە،وەکی بنگەهێ ئەسەد، بەلەد، تاجی، حەبانیە، سەدا مووسل، فرۆكخانا بەغدا، فرۆكخانا هەولێرێ و فرۆكخانا سەبازی ل حەریر، بنگەهێ سەربازیێ باشیك و كەرەم و كەی وەن، دهێتە چاڤەرێکرن کو بنگەهەکێ دیتر یێ سەربازی و ستراتیجی ل عێراقێ بهێته دامەزراندن،لدووڤ زانیارییان نوکە ئەمریكا 11 هزار چەكدار ل عێراقێ هەنە كە شەش هزار ژ وان شەركەرن، ئەڤەژی دیار دکەت،کو پێگەهێ ستراتیجی یێ عێراقێ بۆ ئەمریكا گرنگیا خوە هەیە.
بۆ ئەمریكا، عێراقێ گرنگیەکا سەبازی و تەناهی و هەوالگری و ئابووری و سیاسی هەیە، ئەڤەژی دیار دکەت،کو ئەمریكا پشتی 2003 گرنگی ب دروستكرنا بنگە و سەربازگەهێن سەربازی دایە،کو ئارمانجا سەرەكی ژێ ئەوە ب تایبەت یا سەرۆك دۆنالد ترەمپ،کو د ئێک دەمدا بەرهنگاربوونا هەژموونا ئیرانێ د عێراق و ڤێ دەڤەرێ دایە،لەورا ئەمریکا دەستبەرداری عێراقێ نابیت و پاشەکشێ ناکەت ل عێراقێ.
ئه‌ڤرۆ نیوز ، زنار تۆڤى:
حه‌سه‌ن ئه‌حمه‌د مسته‌فا چاڤدێره‌كێ سیاسى و ماسته‌ر د سیاسه‌ت و په‌یوه‌ندیێن نێڤده‌وله‌تى دا هه‌یه،د دیداره‌كێدا بۆ ئه‌ڤرۆ نیوز دبێژیت:هه‌ر سێ وه‌لاتێن توركیا و ئیرانێ و عێراقێ ل دژى هه‌رێما كوردستانێ پیلانه‌ك هه‌بوو،وێ پیلانێ ژى د ئێك تشت دا ل گه‌ل سیاسه‌تا نێڤده‌وله‌تى دا ئێك دگرت،كو ئه‌و ژى ئه‌و بوو د سیاسه‌تا نێڤده‌وله‌تى دا و ب تایبه‌تى یا ئه‌مریكا و رووسیا دا ئه‌وه،كو چو كیان بۆ كوردان نه‌هێنه چێكرن،له‌ورا یا پێدڤى ل سه‌ر كوردان ئه‌و بوو،كو وه‌كو به‌رهنگارى خوه فه‌رز بكه‌ن،هه‌ر چه‌نده ل سه‌ر ده‌مێ ریفراندۆمێ دا ئه‌و ده‌لیڤه بۆ كوردان چێبوو،لێ ژ ئه‌گه‌رێ خیانه‌تا مێژوویى یا جه‌رگبر ل 16 ئوكتۆبه‌رێ،هه‌تا راده‌یه‌كێ ئه‌و كارته ژ ده‌ستێ كوردان ده‌ركه‌فت،له‌ورا نه‌بوونا سیاسه‌ته‌كێ ژ لایێ وه‌لاتێن زلهێز ڤه،كو د به‌رنامێ وان دایه ده‌ستكاریێ د ڤێ ده‌ڤه‌رێ دا بكه‌ن،ئه‌و به‌رهه‌ڤیێن وه‌لاتێن ده‌وروبه‌ر هه‌نه بۆ لێدانا كیانێ كوردى،ل گه‌ل خیانه‌تا 16 ئوكتۆبه‌رێ ئه‌و وێره‌كى بۆ توركیا چێكر،كو پێنگاڤا ژناڤبرنا كوردان ل هه‌ردو پارچێن رۆژئاڤا و باشور بهاڤێژیت،ناڤهاتى گوت ژى:سه‌باره‌ت ئیرانێ ژى نوكه وێ ئاریشێن كوور ل گه‌ل ده‌وله‌تێن مه‌زن هه‌نه و دیسا نوكه ئیران راستى قه‌یرانه‌كا گه‌له‌ك دژوار بوویه،كو هه‌تا نوكه ئه‌ڤ چه‌نده د مێژوویا ئیرانێ دا روونه‌دایه،له‌ورا ئه‌وا ئیرانێ ڤیاى ب رێیا عێراقێ و توركیا كر،له‌ورا وێ هێرش نه‌كر،لێ توركیا پلانا خوه ده‌ستپێكریه،هه‌روه‌سا پلانا توركیا ب پله‌یا ئێكێ پشت ب نهێنیه‌كا گه‌له‌ك مه‌زن و هه‌ستیار دبه‌ستیت.
حه‌سه‌ن زێده‌تر دبێژیت:ل سووریێ ئه‌و دابه‌شبوونا هه‌یى نه‌عه‌داله‌تیه‌ك تێدا هه‌یه بۆ هێزێن مه‌زن،ئه‌و نه‌عه‌داله‌تى ژى ئه‌وه كو 83% ژ نه‌فت و گازا سرۆشتى و ژێده‌رێن ئاڤێ و پرۆژێن ئه‌له‌كتریكێ و زه‌ڤیێن چاندنێ یێن هه‌ره باش ل سووریێ هه‌موو د سنوورێ جۆگرافیێ ئه‌مریكا دانه و د ده‌ستێ یه‌په‌گێ دانه،د هه‌مان ده‌مدا و به‌رۆڤاژى ڤێ چه‌ندێ ئه‌و سنوورێن جۆگرافى یێن بێ مفا و بێ ژێده‌رێن سروشتى د ده‌ستێ رووسیا دانه،هه‌روه‌سا یه‌په‌گه ل وى جهى ژى هه‌نه،له‌ورا ئه‌ردۆگانى ب عاقلانه بۆ خوه ئه‌و ده‌لیڤه دیت و گوته رووسیا،ئه‌ز یێ ئاماده‌مه هێرشێ بكه‌مه سه‌ر ده‌ڤه‌رێن كوردى و وان ده‌ڤه‌رێن ل ژێر ده‌ستێ كوردان و هێزێن ئه‌مریكى ئینمه‌ده‌ر،هوون ژى هاریكاریا من بكه‌ن،هه‌روه‌سا رووسیا وه‌كو مه‌غدوره‌كێ خوه دبینیت،دیسا رووسیا ب حه‌قێ خوه دزانیت كو سووریا ب ره‌نگه‌كێ ته‌قلیدى و سه‌دان ساله ب جۆگرافیا خوه دزانیت و ئه‌ڤرۆ وێ یاریێ تێدا بكه‌ت،ژ پێخه‌مه‌ت چه‌نده‌كێ ژ وێ ترازیێ راست ڤه‌كه‌ت،له‌ورا ئه‌ردۆگانى ب ره‌نگه‌كێ زۆر زیره‌كانه ئه‌و یارى دناڤبه‌را وان هه‌ردو هێزان داكر،ئه‌و جۆرێ یاریا توركیا دكه‌ت،بناغه‌كێ گه‌له‌ك كوور هه‌یه و ل ده‌مێ خوه ژى ئه‌تاتوركى ب هه‌مان شێوه یارى دناڤبه‌را ئه‌مریكا و رووسیا دا كریه،وى دگوته ئه‌مریكا ئه‌ز هه‌ڤپه‌یمانێ ستراتیجى یێ هه‌وه مه،لێ مفا ژ رووسیا وه‌ردگرت،هه‌ر چه‌نده نوكه‌ژى توركیا هه‌موو پشته‌ڤانیه‌كا رووسى هه‌یه،ژ لایێ چه‌كى و جه‌بلخانه و راگه‌هاندنێ و كور و كۆمبوونێن نێڤده‌وله‌تى ڤه،هه‌روه‌سا رووسیا زانیاریێن هه‌والگیریێ ژى دده‌ته توركیا،ئه‌ڤه د ده‌مه‌كێ دایه،كو توركیا هه‌ڤپه‌یمانیا ئه‌مریكا یه،دیسا ئه‌مریكا ژى نه‌شێت به‌رهنگاریا هێزه‌كێ بكه‌ت،كو ئه‌ندامه د ناتۆ دا و هێزا ئێكێ یه د ڤێ ده‌ڤه‌رێ دا ژ لایێ له‌شكرێ پیاده ڤه د ناتۆ دا،ژبه‌ر هندێ توركیا دڤێت عه‌فرینێ بگریت،هه‌روه‌سا هه‌كه ئه‌و دۆخه ب ڤى ره‌نگى بچیت،توركیا دێ شێت عه‌فرینێ گریت،هه‌ر چه‌نده یه‌په‌گه به‌رهنگاریه‌كا ب هێز ژ عه‌فرینێ دكه‌ت،لێ وێ به‌ره‌ڤانیێ هه‌مبه‌رى رووسیا و توركیا چارچۆڤێ خوه هه‌یه.
ئه‌و چاڤدێره زێده‌تر دبێژیت:پشتى عه‌فرینێ توركیا دێ فشارێ ل سه‌ر ئه‌مریكا كه‌ت،هه‌ر چه‌نده ئه‌و فشار دێ د سیاسى و دبلۆماسى بن،دێ فشارێن وێ گوهۆرینا روویێ وێ ژ ناتۆیێ بۆ رووسیا بن،له‌ورا ئه‌مریكا ده‌لیڤا هندێ ناده‌تێ و دێ یا ئاماده بیت،كو مامه‌لێ ب كوردان بكه‌ت،ل سه‌ر بابه‌تێ كۆبانێ و جزیرێ،ئه‌مریكا دێ یا به‌رهه‌ڤ بیت،وان ده‌ڤه‌ران ته‌سلیمى له‌شكرێ سوورى بكه‌ت،چونكى ئه‌مریكا حه‌ز ناكه‌ت ئیسلاما سیاسى یا توندره‌و ل سه‌ر ده‌ستهه‌لاتێ بیت،چونكى ئه‌مریكا دناڤبه‌را ئیسلاما سیاسى و به‌شار ئه‌سه‌دى دا دێ به‌شارى هه‌لبژێریت،هه‌روه‌سا پشتى رۆژئاڤایێ كوردستانێ پێنگاڤا ئه‌ردۆگانى یا دویێ هێرشكرنه بۆ سه‌ر شنگالێ،هه‌م ژ لایێ سووریێ ڤه و هه‌م ژ لایێ پێشابیرێ ڤه،ئه‌ڤ چه‌نده گه‌له‌ك یا ب مه‌ترسیه ل سه‌ر هه‌رێما كوردستانێ،دڤێت سه‌ركردایه‌تیا كوردستانێ گه‌له‌ك ب رژدى ژ لایێ نێڤده‌وله‌تى ڤه بزاڤێ بكه‌ت و رێكێ نه‌ده‌ت،كو ئه‌ڤ پلانا توركى بهێته بجهئینان،چونكى ئارمانجا سه‌ره‌كى یا توركیا پێشابیرێ یه و دروستكرنا رێیه‌كێ یه دناڤ توركومانان دا بۆ ته‌له‌عفه‌ر،چونكى عێراقێ پێدڤى ب 100 ملیاران دۆلاران هه‌یه بۆ ئاڤه‌دانكرنا عێراقێ،هه‌كه ئه‌ڤ 100 ملیار دۆلاره ب رێیا ئیبراهیم خه‌لیل را بهێنه عێراقێ،ب لایه‌نێ كێم ڤه دێ 10 ملیار دۆلار ژ وان پاران گه‌هنه هه‌رێما كوردستانێ،له‌ورا وان نه‌ڤێت ئه‌و 10 ملیار دۆلاره بگه‌هنه كوردان،ژبه‌ر هندێ ئه‌و دێ ئاڤه‌دانكرنا عێراقێ ژى گیروكه‌ن،ژ پێخه‌مه‌ت ئه‌و قازانجه نه‌گه‌هیته هه‌رێما كوردستانێ ب رێیا ده‌رگه‌هێ ئیبراهیم خه‌لیل.
حه‌سه‌ن ئه‌حمه‌دى ئه‌و ژى دیاركر:پێنگاڤا سییێ یا توركیا هێرشكرنه بۆ سنوورێ پارێزگه‌ها سلێمانیێ،هه‌ر ژ گه‌رمیان و پێنجوین و هه‌له‌بجه هه‌تاكو دگه‌هیته سنوورێ شار باژێر و چیایێ ئاسوس و چیایێن پشت قه‌لادزێ و هه‌تاكو دگه‌هیته قه‌ندیلى و حاجى ئۆمه‌ران،هه‌كه ئه‌ڤ چه‌نده ب هێرشا پیاده ژى نه‌بیت،دێ زیانه‌كا مه‌زن گه‌هینیته ژێرخانا ئابوورى یا خه‌لكێ سلێمانیێ ب رێیا هه‌وایى،له‌ورا ئه‌ڤ پلانه گه‌له‌ك یا مه‌ترسیداره،پێدڤیه كورد ڤێ چه‌ندێ بزانن كو ئارمانجا توركیا ژ ڤێ هێرشكرنێ ب تنێ پارتى و ئێكه‌تى نینه،به‌لكو ئارمانجا وان هه‌موو خه‌لكێ كوردستانێ یه،هه‌ر ژ باشور هه‌تاكو رۆژئاڤا،له‌ورا دڤێت هه‌موو لایه‌نێن كوردستانێ خوه رێكبێخن،هه‌موو ل هه‌مبه‌رى ڤێ پلانا مه‌ترسیدار یا توركیا راوه‌ستن و دڤێت كورد فشاره‌كا مه‌زن ل سه‌ر عه‌بادى بكه‌ن،ژ پێخه‌مه‌ت عه‌بادى ته‌سلیمى ئیراده‌یا توركیا نه‌بیت،هه‌ر چه‌نده راگه‌هاندنا توركیا گوتیه،عێراق رازى بوویه كو توركیا هێرش بكه‌ته سه‌ر شنگالێ،به‌رامبه‌ر هندێ توركیا ل به‌عشیقه ب بێ ده‌نگى پاشڤه كشێ بكه‌ت،لێ هه‌كه كورد ببنه ئێك هه‌لویست ئه‌ڤ پلانا توركیا سه‌رناگریت،لێ هه‌كه كورد وه‌كو نوكه د ئێكگرتى نه‌بن،دێ ئه‌ڤ پلانا توركیا به‌ره‌ف پێشڤه چیت،هه‌روه‌سا هه‌كه توركیا دڤێ پلانا خوه دا سه‌ركه‌فت و ژ لایێ رۆژئاڤایێ كوردستانێ ڤه و گه‌هشته سنوورێ دناڤبه‌را عێراق و سووریێ دا،دێ زیانه‌كا مه‌زنتر ژ یا 16 ئوكتۆبه‌رێ ب كوردان كه‌ڤیت.
نيشاندان