تنێ ل شێلادزێ نێزیکێ 80 چایخانان ھاتینە ڤەکرن
ئەڤرۆ نیوز، نەوزاد ھلۆری:
ژ ئەگەرێ نەبوونا دەلیڤێن کاری و دروستبوونا قەیرانا دارایی و سیاسی ل ھەرێما کوردستان و دەڤەرێ، 95% ژ گەنجان ب بەریکێن ڤالا و ب دەین دەمێن خوە ل چایخانە و كازینۆ و کافیان د بورینن، وەکو گەنج ددەنه دیارکرن کو ئەو ژ ھەموو تشتان بێزار بووينە و دخوازن جھێن شولەژێ ھاریکاریا وان بکەن بۆ زڤراندنا كاودانێن دەروونی و دارایى يێن وان.
جەگەر شێخان گەنجەکێ ناحیا شێلادزێ یا سەر ب سنوورێ قەزا ئامێدیێ ڤه‌يه بۆ ئەڤرۆ نیوز گۆت: (ژ ئەگەرێ دروستبوونا قەیرانا دارایی و سیاسی و کارتێکرنێن دەروونی، ئەم شەڤانە دھێينە چایخانە و كازینويان و دەمێن خوە د بورینین، نھا ئەز دەرچوویێ زانکۆیێ مە و چو کار نینن بکەم و حوکمەت و کەرتێ تایبەت چو دەلیڤێن کاری بۆ گەنجان پەیدا نەکرینە کو ئەم خوە پێڤە مژوول بکەین، ئەڤە سەرەرايی کو ل دەڤەرێ چو سەنتەرێن رەوشەنبیری و پێشەیی و فێرکاری و جڤاکی نینن کو گەنجێن مە خوە فێری کارەکێ ئەرێنی بکەن و پاشەرۆژا خوە گەرنتی بکەن).
زێدەتر گۆت: (ئەو کەسانێن کو سەرەدانا چەیخانان دکەن ل ھەموو ژیان دانە، بەلێ پرانیا وان گەنجان و ژیێ وان د ناڤبەرا 14 بۆ 55 سالیێ دایە، ئەوا کو جھێ دلگرانیا من و گەنجێن دی یە ئەوە کو پرانیا وان گەنجان ب بەریکێن ڤالا و ب دەین سەرەدانا وان جھان دکەن و ب قەر چا و خوارن و ڤەخوارنێن دن دخون و هه‌كه ئەم ب رۆژ کار بکەین بێگومان ئەم نکارین سەرەدانا ئەڤان جھان بکەین و ل وی دەمی دێ ل مال ھەمان تشتی ل مالێن خوە، خوین).
رێبەر رێکانی خودانێ ئێک ژ وان چایخانان بۆ ئەڤرۆ نیوز گۆت: (پرانیا وان کەسێن کو سەرەدانا چایخانان دکەن گەنجن و ھژمارەکا زۆر یا چایخانان ل سنوورێ قەزا ئامێدیی َھەنە و ھەر ب تنێ ل شێلادزێ نێزیکێ 80 چایخانان ھەنە، ئەم ل چایخانان چا و شێلم و باقلک و شەربەت و جگارە و چەرەزات و شیریناھیان دفرۆشین، بەلێ گەنج بەتالی و ب دەین خوارن و ڤەخوارنان دخون و ھەتا نیڤا شەڤێ ژی ب بەتالی دمینن).
ژ لایەکێ دن ڤە عیماد مەلا یاسین وەکو شارەزایەکێ جڤاکی و مامۆستایێ ئاینی يه ل سەر تەوەری دیارکر کو کارتێکرنێن دەروونیێن زۆر ل سەر گەنجان ھەنە و بۆ ئەڤرۆ نیوز گۆت: (گەنج سامانەکێ ب بھا یێ جڤاکی و پاشەرۆژا گەل و وەلاتی یە، بەلێ ب لێبۆرین ڤە ھەتا نھا حوکمەتا ھەرێما کوردستانێ ئەڤ گەنج و لاوە ب دەلیڤە نەدیتیە بۆ پڕکرنا بوشایی و بکارئێخستنا وان د ھەموو سکتەرێن ژیانێ دا کو ھند ئەو مفادار بیت ھند ژی گەنج و د ئەنجام دا ھەموو شیانێن وان دمرن و کارتێکرنێن زۆر ل سەر کەساتیا وان و جڤاکی ب گشتی دھێتەکرن).
زێدەتر گۆت: (گەنجێن مە بۆ کێمکرنا کارتێکرنێن دەروونی مافێ وایە ل وان جھان بگەریێن کو ئەو تێدا ھەست ب ئارامیێ بکەن، ژ بەر ڤێ ئێكێ ژى يێ نەچارە کو ل چایخانە و کافییتریا و كازینۆ و جھێن دن بگەریێت، خوە هه‌كه بزانیت کو دێ کارتێکرنێن دەروونی و جڤاکی و دارایێن نەرێنی ژی ل سەر ھێنەکرن، ژ بەر ڤێ پێدڤی یە حوکمەت و کەرتێ تایبەت و کەسانێن خودان شیان ب ھەر شێوەیەک بیت مفايی ژ شیانێن گەنجان وەربگرن ب دانا دەلیڤێن کاری و فێرکرنا وان ب رێیا سەنتەرێن رەوشەنبیری و جڤاکی و پێشەيی دا کو خزمەتا خوە و جڤاکی بکەن).
قەزا ئامێدیێ ژ شەش ناحیان پێکدھێت و نێزیکێ 200 چایخانان ھەنە، ب گورەيی رێنمایان نابیت چو ژ وان جھان ھەتا دەمژمێر 1:00ێ ب شەڤ دڤەکری بن.
نيشاندان
