ئه‌ڤرۆنيوز:

نوونه‌رێ حوكمه‌تا هه‌رێما كوردستانێ ل ئێكه‌تيا ئورۆپى دياركر دسه‌ره‌دانه‌كێ دا بۆ په‌رله‌مانێ ئورۆپى داخواز ژلايه‌نێ ئورۆپى هاتيه‌ كرن كارێ زێده‌تر بهێته‌ كرن بۆ خستنا فشارێ ل سه‌ر به‌غدا ژبۆ بجهئينانا مافێن دستوورى يێن هه‌رێما كوردستانێ.

دلاوه‌ر ئاژگه‌يى نوونه‌رێ حوكمه‌تا هه‌رێما كوردستانێ ل ئێكه‌تيا ئورۆپى د به‌رپه‌رێ خوه‌ ل سه‌ر تۆرا جڤاكى يا فيسبووكى به‌لاڤكريه‌” مه‌ سه‌ره‌دانا په‌رله‌مانێ ئورۆپى كر ول گه‌ل جێگرێ لژنا كاروبارێن ده‌رڤه‌ يێ په‌رله‌مانێ ئورۆپى( ئاناس ڤيستيسن) كۆمبووين”.

دلاوه‌رى گۆت” ته‌وه‌رێ سه‌ره‌كى يێ ديدارێ گه‌هاندنا په‌يام وسياسه‌تا حوكمه‌تا هه‌رێما كوردستانێ ودووماهى گورانكارى دپه‌يوه‌نديێن دناڤبه‌را هه‌رێما كوردستانێ وحوكمه‌تا فيدرالى ل به‌غدا، پرسا ده‌ڤه‌رێن دابراى وسياسه‌تا ته‌عريبكرنێ ل هنده‌ك ده‌ڤه‌ران وپێشێلكرنا دستوورى وداخستنا فرۆكخانان ونه‌ هنارتنا بودجا هه‌رێما كوردستانێ بوو”.

گۆت ژى” داخوازى ژلايه‌نێ ئورۆپى هاته‌ كرن كو كارێ زێده‌تر بهێته‌ كرن بۆ خستنا فشارێ بۆ سه‌ر به‌غدا ب مه‌ره‌ما بجهئينانا مافێن دستوورى يێن هه‌رێمێ”.

خوياكر ژى” ڤيستيسنى پشته‌ڤانيا خوه‌ بۆ گه‌لێ كوردستانێ وهه‌رێمێ ده‌ربرى وبه‌رهه‌ڤيا خوه‌ بۆ هه‌ر خۆره‌ پالپشتيه‌كێ نيشاندا وبريار هاته‌ دان دده‌مه‌كێ نێزيك دا چه‌ند پێنگاڤ وچالاكى ل سه‌ر ئاستێ په‌رله‌مانێ ئورۆپى بهێنه‌ ئه‌نجامدان وهه‌روه‌سا ئه‌ڤ بابه‌ته‌ بچنه‌ ددانوستاندنێ دا ل لژنا كاروبارێن ده‌رڤه‌ يا په‌رله‌مانێ ئورۆپى ول گه‌ل ليستێن دناڤ په‌رله‌مانى دا هه‌ماهه‌نگى بهێته‌ دروستكرن”.

ئه‌ڤرۆ نیوز، نه‌وزاد هلۆرى:

ژبه‌ر هه‌بوونا جهه‌كێ تایبه‌ت ب گه‌شتیاریا زڤستانێ كو چیایێ كوره‌كه‌ ، رۆژانه‌ نێزیكێ پێنج هزار گه‌شتیارێن ناڤخوه‌ و ده‌رڤه‌ سه‌ره‌دانا قه‌زا سؤران دكه‌ن و ده‌مێن خوه‌ دناڤ به‌فرێ دا دبورینن، رێڤه‌به‌رێ گه‌شتوگۆزارا سؤران دیاركر كو دێ چه‌ند جهه‌كێن دى یێن گه‌شتیارى ل سنورێ قه‌زا سؤران هێنه‌ چێكرن.

بارزان سۆران، رێڤه‌به‌رێ گه‌شتوگۆزارا قه‌زا سۆران بۆ ئه‌ڤرۆنیوز گۆت” ب پشته‌ڤانیا حوكمه‌تا هه‌رێما كوردستانێ و كه‌رت و كۆمپانیێن تایبه‌ت دوارێ گه‌شتوگوزارى دا ، كه‌رتێ گه‌شتوگوزارێ ل قه‌زا سۆران به‌ر ب پێشڤه‌ دچیت و نوكه‌ ل هه‌رچار وه‌رزێن سالێ گه‌شتیار دشێن مفاى ژ سرۆشت و دیمه‌ن و جهێن گه‌شتوگوزاریێن قه‌زا سۆران وه‌ربگرن ، بۆ نموونه‌ نها رۆژانه‌ نێزیكێ پێنج هزار گه‌شتیار سه‌ره‌دانا قه‌زا سۆران و چیایێ كوره‌ك دكه‌ن ب مه‌ره‌ما بوراندنا ده‌مه‌كێ خوش و كرنا یاریێن جوراوجور دناڤ دیمه‌نێن به‌فرێ دا”.

زێده‌تر گۆت” پتريا ئه‌و گه‌شتیارێن ب مه‌ره‌ما بوراندنا ده‌مه‌كێ خوش دناڤ كه‌ش و هه‌وایێ به‌فرێ دبورینن گه‌شتیارێن عه‌ره‌بن كو ژعیراقێ و لوبنانێ و چه‌ند وه‌لاته‌كێن دى نه‌، ئه‌ڤه‌ زێده‌بارى گه‌شتیارێن بیانى ژى دهێن و رێژه‌یه‌كا زۆر ژى ژ وان گه‌شتیاران ل پارێزگه‌هێن هه‌رێما كوردستانێ دهێنه‌ چیایێ كوره‌ك و قه‌زا سۆران ، مه‌ ژلایێ خوه‌ڤه‌ هه‌موو ئاسانكارى بۆ گه‌شتیار و كۆمپانیێن گه‌شتیارى كریه‌ داكو زێده‌تر سه‌ره‌دانا سۆران بكه‌ن”.

رێڤه‌به‌رێ گه‌شتوگۆزارا سۆران دیاركر ژى كو ل رۆژانێن بهێت دێ ڤیسته‌ڤالا سالانه ‌یا خلیسكانا سه‌ر به‌فرێ ل چیایێ كوره‌ك هێته‌ ئه‌نجامدان و گۆت “هه‌موو به‌رهه‌ڤى هاتینه‌كرن و چاڤه‌رێ ده‌مه‌كێ گونجاى دكه‌ین”.

ل دووڤ پێزانينێن رێڤه‌به‌ریا گه‌شتوگۆزاریا سۆران سالا بۆرى 80 هزار گه‌شتیاران قه‌ستا جهێن گه‌شتوگوزاریێن قه‌زا سۆران كربوو و نێزیكێ 20 جهێن گه‌شتوگوزارى لێ هه‌نه‌ و 80% ژ گه‌شتیار و جهێن گه‌شتوگوزاریێن هه‌ولێرێ دكه‌ڤنه‌ قه‌زا سۆران.

ئه‌ڤرۆنيوز:

بيڤه‌له‌رزه‌كێ ل ده‌مژمێر 11:15 ل شه‌ڤا بۆرى ل ده‌ڤه‌را گه‌رميان ل هه‌رێما كوردستانێ دا.

سيروان سالح شاره‌زايێ بيڤه‌له‌رزان داخۆيانيه‌كا رۆژنامه‌ڤانيدا گۆت” وێ بيڤه‌له‌رزێ ل ده‌ڤه‌رێن دناڤه‌به‌را ناحيا قۆره‌تو وگوندێ ره‌زوارى ل سنۆرێ ده‌ڤه‌را گه‌رميان دا وهيزا وێ 3،9 بوو ل دووڤ بيڤه‌ره‌ێ رێخته‌ر يێ جيهانى”.

دياركر ژى كو كووراتيا وێ بيڤه‌له‌رزى 9 كيلومه‌تر دبن ئه‌ردى ڤه‌بوو، به‌لێ چو زيان ل دووڤ خوه‌ نه‌هێلان.

ئاماژه‌ دا كو خه‌لكێ قه‌زا كه‌لار ژى هه‌ست ب وێ بيڤه‌له‌رزێ كر.

ئه‌ڤرۆنيوز:

ئه‌ڤرۆ ل ده‌مژێر 12 نيڤرۆ، سايلۆيل سلێمانيێ كو ل سالا 1978 ژلايێ كۆمپانيه‌كا رووسى هاتيه‌ ئاڤاكرن، هاته‌ په‌قاندن.

په‌قاندنا وێ سايلۆيێ كو رووبه‌رێ وێ 27 دونه‌م بوو، ب مه‌ره‌ما دروستكرنا پرۆژه‌كێ گه‌شتيارى وئاكنجيبوونێ يه‌ ب ناڤێ (داون تاون).

مه‌لا ياسين په‌يڤدارێ ئێكه‌تيا وه‌به‌رهێنه‌رێن كوردستانێ راگه‌هاند بوو”ئه‌و پرۆژه‌ پرۆژه‌كێ وه‌به‌رهێنانێ يه‌ ژلايێ وه‌به‌رهێنه‌ره‌كێ خه‌لكێ سلێمانيێ دهێته‌ بجهئينان كو دێ بيته‌ پرۆژه‌كێ گه‌شتيارى وئاكنجيبوونێ ودێ ب كواليتيه‌كا بلند هيته‌ بجهئينان ومه‌زاختيێن مه‌زن دێ لێ چن”.

ديسا گۆتبوو” ئه‌و په‌قينه‌ كاره‌كێ جياوازه‌ بۆ ديرۆكا سلێمانيێ وكوردستانێ وهه‌تا عيراقێ ژى، چونكى هه‌تا نوكه‌ ل سه‌نته‌رێ باژێران ئه‌م كاره‌ نه‌هاتيه‌ ئه‌نجامدان”.

په‌يڤدارێ ئێكه‌تيا وه‌به‌رهێنه‌رێن كوردستانێ ئاماژه‌ دا بوو كو ل به‌رامبه‌ر وێ چه‌ندێ سايلۆيه‌كا نوو وب كواليتيه‌كا باش ول دووڤ ستانداردێن جيهانى ل ده‌ڤه‌را شاره‌زوور يا هاتيه‌ دروستكرن وئاڤاهيه‌ك ژى بۆ فه‌رمانبه‌رێن وێ يێ هاتيه‌ دروستكرن”.

سه‌رۆكێ لژنا چاندنێ ل جڤاتا پارێزگه‌ها سلێمانيێ، كاسترۆ مه‌عروف، بۆ خه‌ندان گۆتبوو” ئه‌ڤه‌ سته‌مه‌كه‌ ل سلێمانيێ دهێته‌ كرن چونكى ب كوژمێ 100 مليۆن دۆلاران دا هێته‌ نووژه‌نكرن وبيته‌ سايلۆيه‌كا باشتر ژوێ ئه‌وا نوكه‌ هاتيه‌ دروستكرن”.