ئه‌ڤرۆ نيوز:

وه‌زيرێ ناڤخۆ و وه‌زيرێ پێشمه‌رگه‌ى ب وه‌كاله‌ت، راگه‌هاند كو حوكمه‌تا هه‌رێما كوردستانێ چار رێكه‌فتن يێ ل گه‌ل به‌غدا ئيمزا كرين و نوكه‌ رێكه‌فتن ل به‌ر ده‌ستێ حه‌يده‌ر عه‌بادى سه‌رۆك وه‌زيرێن عيراقێ نه‌ و ئێك ژ وان گرێداى ڤه‌كرنا فرۆكخانێن هه‌رێما كوردستانێ يه‌.

كه‌ريم شنگالى وه‌زيرێ ناڤخۆ و وه‌زيرێ پێشمه‌رگه‌ى ب وه‌كاله‌ت، كو نوكه‌ ب سه‌ره‌دانه‌كێ ل وه‌لاتێن ئێكگرتى يێن ئه‌مريكايه‌، پشتى كۆمبوون ل گه‌ل به‌رپرسێن پله‌ بلندێن وه‌لاتێ ئه‌مريكا ل كوچكا سپى د به‌رسڤا پرسياره‌كا ره‌حيم ره‌شيد، په‌يامنێرێ ده‌زگه‌هێ سه‌ته‌لايتا كوردستان ئاشكه‌را كر كو حوكمه‌تا هه‌رێما كوردستانێ چار رێكه‌فتن ل گه‌ل به‌غدا ئيمزا كرينه‌ و نوكه‌ رێكه‌فتن ل به‌ر ده‌ستێ حه‌يده‌ر عه‌بادى سه‌رۆك وه‌زيرێن عيراقێ نه‌.

كه‌ريم شنگالى ئاشكه‌را ژى كر كو ئێك ژ وان رێكه‌فتنا ده‌رباره‌ى ڤه‌كرنا فرۆكخانێن هه‌رێما كوردستانێ و به‌رپرسێن ئه‌مريكا ژى پشته‌ڤانيا هه‌رێما كوردستانێ كريه‌ د ناڤ عيراقه‌كا فيدرال دا.

ئه‌ڤرۆ نيوز:

فراكسيۆنێن كوردى ل جڤاتا نوونه‌رێن عيراقێ بڕيار دا بايكوتا كۆمبوونا ئه‌ڤرۆ يا جڤاتا نوونه‌رێن عيراقێ بكه‌ن ئه‌وا بڕياره‌ حه‌يده‌ر عه‌بادى سه‌رۆك وه‌زيرێن عيراقێ تێدا ئاماده‌ بيت و راگه‌هاند كو پرۆژێ قانوونا بوودجێ ره‌ت دكه‌ن.

ئه‌ڤرۆ نيوز:

پەرلەمانێ عێراقێ بڕیاردایە 12ی ھەیڤا گولانا داھاتی ھەلبژارتنێن پەرلەمان و جڤاتا پارێزگەھێن عێراقێ بھێنە ئەنجامدان، نوونەرێن کوردان ژی ل پەرلەمانێ عێراقێ ئاماژە بوێ چەندێ دکەن، ئەو ل گەل پاشخستنا پڕۆسا ھەلبژارتنان بووین، ژبەر کو ھێشتا ھژمارەکا گەلەک یا وەلاتیێن عێراقی ئاوارەنە و دێ ئاستەنگ بۆچێبن ددەمێ ھەلبژارتنان دا، مامۆستایەکێ زانکۆیێ ژی دبێژیت، باشترە کورد ل کەرکووک و خورماتوو ھەلبژارتنان بایکۆت بکەن.

بێریڤان خەیلانی،پەرلەمانتارا کورد ل پەرلەمانێ عێراقێ بۆ رۆژناما ئەڤرۆ گۆت: راستە پەرلەمانی بڕیار لدۆر ژڤانێ ھەلبژارتنان دەرکریە و دێ ددەمێ خوەدا ل رۆژا 12ی ھەیڤا گولانا داھاتی ھێنە ئەنجامدان، بەلێ ئەم ل گەل پاشخستنا پڕۆسا ھەلبژارتناندابووین بۆ دەمێ سالەکێ یان شەش ھەیڤان، ھەتا کۆتلەیێن عەرەبێن سونی پڕۆژەیەکی بۆ ڤێ مەرەمێ پێشکەشی پەرلەمانی کر، ئەڤە ددەمەکی دایە پەرلەمانی چو دەستھەڵات نینە ھەلبژارتنان پاشپێخیت، چونکی ل گوڕ دستوورێ عێراقێ دڤێت د دەمێ چوار سالاندا ھەلبژارتن بھێنە ئەنجامدان، بەھانەیا کۆتلەیێن سونی ئەڤە بۆ دگۆتن پتریا خەلکێ مە ھێشتا ئاوارەیە و ڤەنەگەڕیایە سەر مال و حالێن ددەمێ رێڤەچوونا پڕۆسا ھەلبژارتنان دێ ئاریشە بۆ پەیدا بن، بەلێ

پەرلەمانی ھەر بڕیارا خوە دەرکرن ددەمێ خوەدا ھەلبژارتن بھێنە ئەنجامدان.
بێریڤان خەیلانی گۆتژی” داخوازا عەرەبێن سونە بەرۆڤاژی داخوازا عەرەبێن شیعەیە، ھندی کوردن پتریا مە دگەل پاشخستنێ بووین، ژبەرکو ھێشتا دەڤەرێن ل کەرکووک و دیالە و مووسل داگیرکرینە، عەرەبێن شیعە وەسا دبینن دڤێت ھەلبژارتن ددەمێ خوەدا رێڤەبچن وانژی ئەجێندایێن خوە ھەنە بۆ ھەلبژارتنان.

ژلایێ خۆڤەژی دکتۆر خەلیل ئیسماعیل مامۆستایێ زانکۆیێ بۆ رۆژناما ئەڤرۆ گۆت: ب درێژاھیا دیرۆکێ ھەر دەمێ حوکمەتا عێراقێ یا لاۆازبیت داخوازا دانوستانانکریە ل کوردان و بەرۆڤاژی ھەردەمێ عێراق یا بھێزبیت ئەڤە ھێرشکریە سەر ھەرێما کوردستانێ، لەوڕا نوکە پێدڤیە کورد ھەموو پێکڤە بایکۆتا ھەلبژارتنێن عێراقێ ل کەرکووکێ بکەن، ژبەرکو پشکداریا کوردان د ھەلبژارتناندا ل دەڤەرێن داگیرکری دێ زیانێن مەزن بۆ کوردان ھەبن، راستە ھەگەر پشکداریێ نەکەن دێ کۆرسیێن کوردا کێمتر بن، بەلێ نابیت ھەمبەر زیانێن مەزن یێن پاشە ڕۆژێ ئەم بۆ بدەستڤەئینانا چەند کۆرسیەکان پشکداری ھەلبژارتنان بکەین،بەغدا خوە ب سەرکەفتی دزانیت و دخوازیت کورد و عەرەبێن سونە بینیت بن دەستێ خوە.

دکتۆر خەلیل ئیسماعیل دیارکر” دەڤەرێن کوردستانی ددەمێ نوکەدا داگیرینە و بەغدا دێ ھێزێن سەربازی د پڕۆسا ھەلبژارتناندا بکارئینیت، بتایبەتی ل کەرکووک و خورماتوو، فەرەژی ھەموو لیستێن کوردی ئێک بگرن و بڤی شێوەیێ نوکە نەچنە پڕۆسا ھەلبژارتنان، ئاریشامە تنێ بۆ چوار سالێن داھاتی نینە ل دەڤەرێن کەرکووکێ بەلکۆ بۆ پاشەڕۆژێ دێ عێراق پیلانێن مەترسیدار بکارئنیت.