ئه‌ڤرۆنيوز:
ئه‌ڤرۆ ئێكشه‌مبى 4/2/2018، وه‌لاتيه‌كێ 59 سالى خوه دمال دا خه‌ندقاند.
رێڤه‌به‌ريا پۆليسێن پارێزگه‌ها سلێمانيێ دبه‌رپه‌رێ خوه ل سه‌ر تۆرا فه‌سبووكى به‌لاڤكر” ئه‌ڤرۆ وه‌لاتيه‌كێ 59 سالى دمالا خوه‌دا ل تاحێ زێرينۆك ل باژێرێ سلێمانيێ خوه خه‌ندقاند ودووماهى ب ژيانا خوه ئينا”.
دياركر ژى” ته‌رمى وى يێ هاتيه هنارتن بۆ نوشدارێ داد وڤه‌كۆلين ل دۆر روودانێ يا ده‌ستپێكرى”.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ راگه‌هاند، ئه‌ڤرۆ ئێكشه‌مبى 4/2/2018، بيڤه‌له‌رزه‌كێ ل قه‌زا سۆران يا ب سه‌ر پارێزگه‌ها هه‌ولێرێ دا.
رێڤه‌به‌ريا ناڤبرى ل به‌رپه‌رێ خوه ل سه‌ر تۆرا فه‌يسبووكى به‌لاڤكر” ئه‌ڤرۆ بيڤه‌لره‌زه‌ك ب هێزا 3،2 ل دووڤ بيڤه‌رێ رێخته‌رى ب كووراتيا 10 كيلۆمه‌تران روودا كو سه‌نته‌رێ وێ ده‌ڤه‌را سۆران بوو”.
دياركر ژى” وه‌لاتيان هه‌ست ب بيڤه‌له‌رزێ كر، به‌لێ چو زيان په‌يدانه‌كرن”.
ئه‌ڤرۆنيوز:
په‌رله‌مانتاره‌كێ به‌رێ يێ عيراقێ ئاشكرا دكه‌ت كو رێككه‌فتنه‌كا نهێنى دناڤبه‌را ئه‌مريكا وهه‌رێما كوردستانێ دا پشتى ئه‌نجامدانا ريفراندۆمێ يا هاتيه كرن وژبه‌ر وێ چه‌ندێ پێگه‌هێ سياسى يێ حه‌يده‌ر عه‌بادى به‌رامبه‌ر حوكمه‌تا هه‌رێما كوردستانێ ددانوستاندناندا يێ لاوازبووى.
حه‌سه‌ن عه‌له‌وى، په‌رله‌مانتارێ به‌رێ يێ عيراقێ بۆ رۆژناما (شه‌رقولئه‌وسه‌ت) يا له‌نده‌نى گۆت” هه‌رێما كوردستانێ كو پشتى پرۆسا ريفراندۆمێ دپێگه‌هه‌كێ لاواز دابوو، رۆژ بۆ رۆژێ پێگه‌هێ وێ بلند دبوو وشيا لێك تێگه‌هشتنێ ورێككه‌فتنه‌كا نهێنى ل گه‌ل ئه‌مريكا ئه‌نجام بده‌ن كو ڤێ چه‌ندێ ژى ب شێوه‌كێ ئه‌رێنى پێگه‌هێ كوردى ددانوستاندناندا به‌رامبه‌ر حه‌يده‌ر عه‌بادى ب هيزكريه ب تايبه‌تى پشتى هه‌لويستێ ئه‌رێنى يێ نورى مالكى به‌رامبه‌ر هه‌رێما كوردستانێ”.
عه‌لوه‌ى گۆت ژى” حه‌يده‌ر عه‌بادى هه‌ڤركێن ب هێز يێن هه‌ين ب تايبه‌تى دناڤ حزبا خوه‌دا ونه‌شێت ب ساناهى پێنگاڤان ب هاڤێژيت”.
ئه‌ڤرۆنيوز:
ئه‌ندامه‌كێ لژنا ده‌ستپاكيێ ل په‌رله‌مانێ كوردستانێ راگه‌هاند، هه‌يكه‌لێ حوكمه‌تا هه‌رێمێ ب جۆره‌كى يه كو نيڤه‌ك وه‌زاره‌تێن نوكه هه‌ين دزێده‌نه.
فه‌رسه‌ت سوفى، ئه‌ندامێ په‌رله‌مانێ كوردستانێ ژليستا پارتى ديموكراتى كوردستان وئه‌ندامێ لژنا ده‌ستپاكيێ ل په‌رله‌مانى گۆت” هه‌يكه‌ل وقه‌بارێ حوكمه‌تا هه‌رێما كوردستانێ يێ مه‌زنه وپێدڤيه قانوونا بچووكرنا قه‌بارێ حوكمه‌تێ بهێته پێشكێشكرن”.
فه‌رسه‌تى زێده‌تر بۆ باس گۆت” حوكمه‌تا هه‌رێما كوردستانێ دێ ب 10 وه‌زاره‌تان ب رێڤوچيت، ئانكو نيڤه‌ك وه‌زاره‌تێن نوكه هه‌ين دزێده‌نه، دشياندايه 6 رێڤه‌به‌ريێن گشتى ل هه‌ولێرێ هه‌بن وپێدڤيه ب 21 رێڤه‌به‌ريێن گشتى نينه، له‌وما ئێك ژخالێن چاكسازيێ ئه‌وه، هه‌يكه‌لێ حوكمه‌تێ بهێته بچووكرن”.
خوياكر”هه‌كه تا دوهى بۆمه دچو سه‌رى كو ل پێناڤێ وێ چه‌ندێ حزب رێكبكه‌ڤن وه‌زاره‌تان زێده بكه‌ين، ژنوكه وپێڤه ئه‌و بۆمه ناچيته سه‌رى”.
ئەڤرۆ نیوز ، زنار تۆڤی:
ئاخفتنکەرێ وه‌زاره‌تا ڤەگوهاستنێ و گه‌هاندنێ ل حوکمه‌تا ھه‌رێما كوردستانێ گوتیە، ھه‌موو ئه‌و رێكارێن هاتینە داخواز كرن بۆ ڤەكرنا فرۆكه‌خانێن ھه‌رێما كوردستانێ ته‌مام بووینە،ب تنێ ئه‌و یا مای کو به‌غدا بریارا ڤەكرنا وان ده‌ربكەت.
د ماوێ بوریدا شاندەکێ حوکمه‌تا عێراقێ سه‌رەدانا ھه‌رێما كوردستانێ كریە و ل گه‌ل وه‌زاره‌تا ڤەگوهاستنێ و گه‌هاندنێ و وه‌زاره‌تا نافخۆ یا حوکمه‌تا ھه‌رێما كوردستانێ كۆمبوون ئه‌نجام داینە، تێدا رێككه‌فتن بۆ ڤەكرنا فڕۆكه‌خانێن ھه‌رێما كوردستانێ ئیمزاکرینە،لێ هەتا نوکە نەهاتینە ڤەکرن.
دڤی واریدا ئومێد محه‌مه‌د سالح ئاخفتنکەرێ وه‌زاره‌تا ڤەگوهاستن و گه‌هاندنێ یێ حوکمه‌تا ھه‌رێما كوردستانێ راگه‌هاندیە،کوو رێككه‌فتن دناڤبەرا ھه‌رێمێ و به‌غدا بۆ ڤەكرنا فڕۆكه‌خانێن ھه‌رێما كوردستانێ هاتینە كرن و چاڤه‌رێی هندێ دكه‌ین كو به‌غدا بڕیارا ڤەكرنا وان بدەت و فڕۆكه‌خانه بهێنە ڤەکرن، به‌لێ هەتا نوکە ماوێ ڤەكرنا وان دیار نینه.
ئه‌و ژی گوتیە، ھه‌موو رێكار ته‌مام بووینە،هەروەسا ئه‌و خالا بەحسێ پێدانا زانیاریێن ته‌ناهیێ ل فڕۆكه‌خانێن ھه‌رێما كوردستانێ بۆ به‌غدا دکەت هاتیە ته‌مام کرن و نوکە ھیچ رێكارێك نه‌مایه و ب تنێ یا مای کو بڕیارا ڤەكرنا وان بهێتە دان.
ل سالا 2017 حوکمه‌تا عێراقێ، ب بهانەیا ئه‌نجامدانا پرۆسا ریفراندۆمێ بۆ سه‌ربه‌خۆیا كوردستانێ، وه‌ك سزایه‌ك بۆ سه‌ر ھه‌رێمێ،فرۆكه‌خانێن ھه‌رێما كوردستانێ داخستینه و هەتا نوکە نەهاتینە ڤەکرن و د دائێخستینە،لدووڤ بۆچوونا چاڤدێران،ئەگەرێن ڤەنه‌كرنا وان ئابووریه، چونكی هه‌موو ئه‌و گه‌شتێن بۆ هه‌ردو فڕۆكه‌خانێن هه‌ولێر و سلێمانی دچوون،نوکە د چنە به‌غدا.
ئه‌ڤرۆ، نه‌وزاد هلۆرى:
رۆژانه ب رێیێن قاچاخ رێژه‌یه‌كا باش یا به‌رهه‌مێن سپیاتیێن ئاژه‌لان ژ ده‌ڤه‌را گه‌ڤه‌رێ ل باكوورێ كوردستانێ دگه‌هنه بازارێن ده‌ڤه‌را ئامێدیێ و دهۆكێ و ب بهایه‌كێ ئه‌رزانتر دفرۆشن ، ڤێ یه‌كێ كارتێكرن ل به‌رهه‌مێن خومالى كریه.
زێدان ئیسماعیل ئێكه ژ فرۆشیارێن به‌رهه‌مێن سپیاتیێن ئاژه‌لى ل باكوورێ كوردستانێ و دترومبێله‌كێ دا ل دێره‌لوكێ دفرۆتن بۆ ئه‌ڤرۆ نیوز گۆت” رۆژانه به‌رهه‌مێن ئاژه‌لى مینا په‌نیر و كه‌شك و ژاژى و چه‌ند به‌رهه‌مێن دى ب رێیێن قاچاخ و ده‌واران دگه‌هیته بازارێن سنورێ پارێزگه‌ها دهۆكێ ژ وانان ژى بازارێن ئامێدیێ و ده‌ڤه‌رێن دى و خه‌لكه‌كێ زۆر حه‌ژ به‌رهه‌مێن باكوورێ كوردستانێ دكه‌ت ژ به‌ركو تاما وان خوشتره و ئه‌و دشاره‌زاترن د درۆستكرنا به‌رهه‌مێن سپیاتیان دا”.
زێده‌تر گۆت” دبيت نێزیكێ 10 ده‌وارێن بارێن وان ئه‌ڤ سپياتيه بن د حه‌فتیێ دا بگه‌هنه بازاران و تێرا پێدڤیێن بازارێن ده‌ڤه‌رێ هه‌یه و زێده‌تره و ئه‌ڤ به‌رهه‌مه ل باكوورێ كوردستانێ يێ زۆره و ل باكوور بازارێ وان گه‌له‌ك نینه، ژ به‌رڤێ نه‌چارن ره‌وانه‌ى بازارێن ده‌رڤه‌یێ باكوورێ بكه‌ن “.
ل دۆر وێ چه‌ندێ كا بوچى ب ریێن قاچاخ دگه‌هنه بازاران، ناڤبرى گۆت”هه‌كه ب رێیا خالێن سنورى بگه‌هنه بازاراێن ده‌ڤه‌رێ ، دێ بهایێ وان بلندتر بیت و زیان ب وان كه‌ڤیت ئه‌وێن دفروشن ، ژبه‌رڤێ ئه‌و نه‌چاردبن ب رێیێن قاچاخ بگه‌هينن بازاران، ئه‌ڤه سه‌ره‌راى كو رێ ل به‌ر مه‌ترسیا بوردومانا فرۆكه و شه‌رێ په‌كه‌كێ و سه‌رما زڤستانێ یه ب تایبه‌تى به‌فرێ”.
زه‌ینه‌ب عه‌زو ژنه‌كا ده‌ڤه‌رێ یه و سالانه پشكه‌ك ژ به‌رهه‌مێن سپاتيان دفرۆشیت، بۆ ئه‌ڤرۆ نیوز گۆت” هه‌موو سالان ب تایبه‌تى د وه‌رزێ بوهار و زڤستانێ دا ئه‌م به‌رهه‌مێن خوه ره‌وانه‌ى بازاران دكه‌ین، به‌لێ ژ به‌ر هه‌بوونا به‌رهه‌مێن هاورده‌كرى ب تایبه‌تى ب رێیێن قاچاخ، به‌رهه‌مێن مه ل سه‌ر گوهێن مه دمینن و زیان ب مه دگه‌هیت ، ژبه‌رڤێ دخوازین كو لایه‌نێن شوله‌ژێ چاڤدێریا بازارى بكه‌ن و نه‌هێلن ئه‌و به‌رهه‌م ژ به‌رهه‌مێن خومالى ئه‌رزانتر بن، داكو زیان ب خه‌لكێ خوه‌جهێ ده‌ڤه‌رێ نه‌كه‌ڤیت “.
عومه‌ر محه‌مه‌د ئێكه ژ خودانێن فرۆتنا ده‌وارێن بارهه‌لگر ل سنورێ ده‌ڤه‌را ئامێدیێ بۆ ئه‌ڤرۆ نیوز گۆت” هه‌موو سالان ئه‌ز ده‌وارێن بارهه‌لگر دفرۆشمه وان كه‌سێن كو ل سنوران كاردكه‌ن و پێدڤیێن رۆژانه ڤه‌دگوهێزن و دبیت دناڤ وان كه‌سان ژى دا هه‌بن كارێ قاچاخيێ مینا به‌رهه‌مێن سپياتیان ڤه‌گوهێزن”.
مێهڤان نهێلى خودان په‌زه ل دێره‌لوكێ، بۆ ئه‌ڤرۆ نیوز گۆت” پشتى قه‌یرانا دارایى درۆست بووى ، هژماره‌كا زۆر ژ وه‌لاتیان ده‌ست ب خودانكرنا ته‌رش و كه‌والى كریه و سالانه ب رێیا فرۆتنا به‌رهه‌مێن خومالى داهاته‌كێ په‌یدا دكه‌ن ژ وانا فرۆتنا به‌رهه‌مێن سپیاتیان ، به‌لێ پێدڤیه لایه‌نێن په‌یوه‌ندیدار ژى هه‌ڤكاریا خودانێن ته‌رش و كه‌والى بكه‌ن داكو ئه‌و ژى ل سه‌ر كارێن خوه به‌رده‌وام بن ب تایبه‌تى دفرۆتنا به‌رهه‌مێن وان دا “.
ئه‌ڤرۆنيوز:
په‌رله‌مانتاره‌كێ نێزيك ژ سه‌رۆك وه‌زيرێن عيراقێ ئاشكراكر، نێچيرڤان بارزانى سه‌رۆك وه‌زيرێن هه‌رێما كوردستانێ، ب مه‌ره‌ما به‌حسكرنا پرسێن دناڤبه‌را حوكمه‌تا هه‌رێمێ وعيراقێ، دێ سه‌ره‌دانا به‌غدا كه‌ت.
عه‌باس به‌ياتى، ئه‌ندامێ جڤاتا نوونه‌رێن عيراقێ ويێ نێزيك ژ حه‌يده‌ر عه‌بادى سه‌رۆك وه‌زيرێن عيراقێ راگه‌هاند” ل دووڤ پێزانينێن مه، نێچيرڤان بارزانى سه‌رۆك وه‌زيرێن هه‌رێمێ دێ سه‌ره‌دانا به‌غدا كه‌ت وئه‌م پێشوازيێ ل وێ سه‌ره‌دانێ دكه‌ين وبه‌رى نوكه ژى ديدار دناڤبه‌را عه‌بادى ونێچيرڤان بارزانى هاتينه ئه‌نجامدان ودوان ديداران دا ل سه‌ر پرسێن دناڤبه‌را به‌غدا وهه‌ولێرێ دا دانوستاندنێن ئاڤاكه‌ر هاتينه كرن وديدارێن داهاتى دناڤبه‌را وان دا بێگومان دێ ئه‌نجامێن وان رێككه‌فتن ولێك تێگه‌هشتن بيت ب تايبه‌تى دانوستاندنێن ل سه‌ر هنارتنا مووچێ فه‌رمانبه‌رێن هه‌رێما كوردستانێ وڤه‌كرنا فرۆكخانان وخالێن سنورى ژى”.
عه‌باس به‌ياتى بۆ كوردستان 24 گۆت ژى” سه‌ره‌دانا داهاتى يا نێچيرڤان بارزانى درێژه‌پێدانا دانوستاندنێن دناڤبه‌را وى وعه‌بادى دايه كو دده‌مێ چه‌ند هه‌فتيێن بۆرى دا، دو ديدار ئه‌نجامداينه، له‌وما پێدڤيه بزاڤ بهێته كرن بۆ چاره‌سه‌كرنا كێشان”.
ئه‌ڤرۆ نیوز ، زنار تۆڤى:
ب ئه‌گه‌رێ وان هه‌موو پێشێلكاریێن توركیا هه‌مبه‌رى “ناتۆ” د ماوێ بوریدا كرین،ب تایبه‌تى ئاشكرابوونا هاریكاریكرنا گرووپێن تیرۆرستى و ل سووریێ و حه‌واندنا سه‌ركردێن تیرۆرستى و ده‌ستێوه‌ردان د كاروبارێن وه‌لاتان و گه‌له‌ك پرسێن دیتر،ژ وان ژى پشتكرن ل ناتۆ و به‌ستنا هه‌ڤپه‌یمانیێ ل گه‌ل رووسیا،وه‌كریه كو چاڤدیرێن سیاسى ئاخفتنێ ل سه‌ر ده‌ركرنا توركیا د ناتۆ دا بكه‌ن،ئه‌ڤه پترى 60 سالانه توركیا ئه‌نداما ناتۆیه،نوكه ئێكه ژ هیزێن سه‌ره‌كى یێن وێ هه‌ڤپه‌یمانیێ،لێ هوكارێن بهێزبوونا توركیا د ناتۆدا په‌یوه‌ندى ب نه‌رماتیا هه‌لویستێ ئه‌مریكا و ئورۆپا ڤه هه‌یه،ل هه‌مبه‌رى سیاسه‌تا توركیا دا د ماوێ بوریدا،نوكه توركیا به‌رۆڤاژى بنه‌مایێن دامه‌زراندنا ناتۆ دبزڤیت و ڤێ وه‌كریه،كو گه‌له‌ك ژ سیاسى و ڤه‌كۆله‌ران ده‌رگه‌هێ ده‌رخستنا توركیا د ناتۆدا ڤه‌كه‌ن و ئاخفتنێ ل سه‌ر دكه‌ن.
مایكل ج توتون ڤه‌كۆله‌رێ ئه‌مریكى د گۆتاره‌كێدا ل گۆڤارا”ورلد ئه‌فیرز” دبێژیت:ئه‌نقه‌ره گه‌له‌ك پێشێلكارى د بنه‌مایێن ناتۆدا كرینه،ل سه‌ر توركیا ئاشكرابوویه،كو هاریكاریا گرووپێن تیرۆرستى دكه‌ت و ده‌ستێوه‌ردانێ د كاروبارێن ولاتاندا دكه‌ت،یا ئاماده نینه پابه‌ند بیت،ب وان برگێن دناتۆدا هه‌ین،ل گه‌ل هندێ ژى هێرشكریه سه‌ر عه‌فرینێ،هه‌روه‌سا ده‌مێ واشنتۆن راگه‌هاندى،كو پشتگیریێ ل یه‌په‌گێ دكه‌ت ل باكۆرێ سووریێ،ئه‌ردۆغانى ب تۆندى به‌رسڤا ئه‌مریكا دایه و راگه‌هاندیه،به‌رى ئه‌و هێزه دروست بیت،دێ ژناڤبه‌ین،دیسا ئه‌ردۆغانى گوتیه،ئه‌مریكا دڤێت سۆپایه‌كێ تیرۆرستى ل سه‌ر سنورێ باشۆرێ توركیا دابمه‌زرینیت،دیسا ئه‌و بژارده ژى دایه ئه‌مریكا،یان دڤێت ده‌ست ژ هاریكاریا وێ هێزا تیرۆرستى به‌رده‌ت،یان ژى ئه‌م دنه‌چارین هێرش كه‌ینه سه‌ر عه‌فرینێ،مایكلى گوتیه”هێرشا توركیا یا راسته‌وخۆ ل دژى ئه‌مریكا ب روونى هه‌موو سنور ده‌ربازكرینه،ڤێجا ئه‌و سنوره د تۆكمه‌بن یان نه،ئه‌ڤه وێ دگه‌هینیت كو توركیا راسته‌وخۆ هێرشێ بكه‌ته سه‌ر وه‌لاته‌كێ ئه‌ندام د ناتۆدا،به‌لێ هێرشكرن بۆ سه‌ر هه‌ڤپه‌یمانه‌كێ ل ده‌رڤه‌ى ناتۆ دا یا ئالۆزتره.
ناتۆ ل سالا 1949 هاتیه دامه‌زراندن و ئارمانج ژێ به‌رهنگاربوونا هه‌ژموونا ئێكه‌تیا سووڤیه‌تیا جاران بوو ل سه‌ر ئورۆپا،ل سالا 1952 توركیا بوویه ئه‌ندام تێدا،ل وى ده‌مێ ناتۆ هاتیه دامه‌زراندن،هیچ مه‌ترسیه‌ك ل سه‌ر جڤاكێ نێڤده‌وله‌تى ب ناڤێ كۆمارا ئیسلامى یا ئیرانێ نه‌بوو،رژێما به‌عس ژى ل سووریێ یا ده‌ستهه‌لاتدار نه‌بوو،چو گرووپێن تیرۆرستى یێن كوردى نه‌بوون،داعش ژى نه‌بوو،لێ ب تنێ بزاڤا رزگاریخوازا كوردى هه‌بوو،لێ نوكه جیهان ب ره‌نگه‌كێ گه‌له‌ك مه‌زن هاتیه گوهۆرین،هه‌موو ده‌مان هه‌ڤپه‌یمانى ل دووف ده‌مى و جهى دهێنه گوهۆرین و ژ هه‌ڤالینیێ دبنه دوژمن،دیسا چو ده‌مان بریتانیا دوستێ ئه‌مریكا نه‌بوویه،چو ده‌مان رووسیا ژى دوژمنێ به‌رده‌وامێ ئه‌مریكا نینه،له‌وما بۆ قه‌بوولكرنا راستیان ئێدى توركیا هه‌ڤپه‌یمان نینه د ناتۆ دا،به‌لكو زێده‌تر وه‌ك دوژمن ده‌ردكه‌ڤیت،دیسا دوژمنداریا ناتۆ ل وى ده‌مى ده‌ركه‌فت،ده‌مێ توركیا ره‌تكرى كو ئاخا وێ ل شه‌رێ دژى رژێما سه‌دامى بكار بینیت،ئه‌گه‌ر ژى ئه‌و بوو،كو ئه‌نقه‌ره نه‌دڤیا كوردستان ببیته ناڤه‌نده‌كا بهێز یا ئابوورى و سه‌ربازى.
هه‌روه‌سا ئه‌ردۆغانى هاریكاریا ئیرانێ كر،بۆ ڤه‌گوهاستنا چه‌كى بۆ حزبوللا و پشتگیرى ل داعشێ كریه ل سووریا،داكو چو هه‌رێمێن كوردى ل باكۆرێ سووریێ دروست نه‌بن،وه‌ك ئه‌وا ل عێراقێ دروست بووى،دیسا ده‌مێ ئه‌ردۆغانى سه‌ره‌دانا رووسیا كرى،ناتۆ راگه‌هاندبوو،كو ئه‌ندامبوونا توركیا جهێ گۆمانێ نینه،لێ مایكلى گوتیه”بێگۆمان ئه‌ندامبوونا توركیا جهێ گۆمانێ یه.
ئه‌ڤرۆ نيوز:
بەرپرسێ پەێوەندى و راگەھاندنێ ل رێڤەبەریا ھاتنوچوونا دھۆکێ دیارکر کو ئەڤرۆ 4ى شوباتا 2018ێ د روودانەکا ھاتنوچوونێ دا د ناڤبەرا شیخان و ئەلقوش دا پێنچ کەس بوونە قوربانی.
ئازاد تەھا، بەرپرسێ پەيوەندى و راگەھاندنێ ل رێڤەبەریا ھاتنوچوونا دھۆکێ دیارکر کو نێزیک گۆندێ بێبانی ل سەر ناحیا ئەلقوش ڤە بۆ شێخان روودانه‌كا دلتەزینا ترافیکێ روودایە، د ئەنجام دا پێنچ کەس یێن بووینە قوربانی ژوانا ژی دو کەسان گیانی خوە ژ دەستدان و سێ کەس ژی بریندار بووینە.
گۆتژی: “ئەڤ روودانا ھاتنوچوونێ د ناڤبەرا ترۆمبێلەکا تایبەت و ترۆمبێلەکا بارھەلگر دا روودایە، ب مخابنی ڤە ژبلی زیانین دارایی زیانێن گیانی ژی ل دووڤ خوە ھێلان”.
نيشاندان