ئەڤرۆ نيوز:
پشتی خوەنیشادانێن ل سەرێ سالێ ب ھزاران کەس ژ ئالیێ ھێزێن ئێمناھیێن ئیرانێ ڤە ھاتینە گرتن و خوەنیشادان ب دووماھی ھاتن، لێ جارەکا دی ب رێیا تۆرێن کۆمەلایەتی و ب پێشەنگیا ھندەک سازیێن ئیرانی یێن ل ئەمریکا و ئورۆپا رێکخستنەکا مەزن بۆ خوەنیشادانێن سەرتاسەری ل ئیرانێ دھێتە کرن، ل گۆر زانیاریان ئیرانێ بۆ رێگری کرن ل خوەنیشادانان ل چەندین باژێرێن مەزن ھێز کۆم کرینە دا نەھێلن خەلک خوەنیشادانان بکەت.

ل ئالیێ دی رەوشەنبیر و نڤیسەرێن ئیرانی ژی داخواز دکەن کو ریفراندۆمەک بھێتە کرن دا گەلێ ئیرانێ ب رەنگەکێ ئازاد د ریفراندۆمێ دا پشکدار بن دا ئاشکرا بیت کا خەلک سیستەمەکێ ئیسلامی دخوازیت یان نە؟ لێ ھەتا نھا بەرپرسێن ئیرانێ ل دۆر ڤێ یەکێ ھەلویستێ خوە دیار نەکرینە و نھا ب گشتی رەوشا ناڤخوەیی یا ئیرانێ ژی ئالۆز بوویە.

ئەڤرۆ نيوز:
رۆبرت فیسک بسپۆرێ بریتانی یێ کاروبارێ رۆژھەلاتا ناڤین دیار دکەت ژ بەر کو وەلاتێن زلھێز بەرژەوەندیێن وان ل یەمەنێ نینن و ژ بەر ھندێ ژی ل دۆر کارەساتێن مرۆڤی ل وی وەلاتی چو ھەلویستەکێ وان یێ دیار نینە، ئەمریکا و پرانیا وەلاتێن ئورۆپا بەرژەوەندیێن مەزن یێن ئابووری ل عیراقێ و سووریێ ھەنە و ژ بەر ھندێ ژی رۆژانە ھەلویستێ خوە ل دۆر وان ھەر دو وەلاتان دیار دکەن لێ رەوش ل یەمەنێ جودایە و ژ بەر ھندێ ژی بۆ وان گرنگ نینە کا ل یەمەنێ چ روو ددەت.

ناڤبری ھەروەسا دیار دکەت کو بێ ھەلویستیا جڤاکێ نێڤدەولەتی وەسا کریە کارەساتێن مەزن ل یەمەنێ روو بدەن و خەلک ژ برسان دمرن و جیھان ژی بێدەنگە.

ئه‌ڤرۆ نيوز:

پشتی ئەمریکا، روسیا و سووریێ ژی رازی نەبوون تورکیا ل دژی کانتۆنا عەفرینێ ئۆپەراسیۆنەکا سەربازی ئەنجام بدەت و تورکیا نھا چەکدارێن سوپایێ ئازاد بەرھەڤ دکەت دا کو ھێرشی ھەرێما شەھبا و کانتۆنا عەفرینێ بکەن و یەپەگە ژی ب دژواری بەرسڤا ھێرشێن تورکیا و سوپایێ ئازاد ددەت.
ل گۆر دەزگەھێن راگەھاندنێ تورکیا ب شاندەکا سەربازی و ھەوالگیریێ سەرەدانا روسیا و ھەڤپەیمانیا ئەتلانتک (ناتۆ) کر و ژ ھەر دو ئالیان خواست کو پشتەڤانیێ ل ئۆپەراسیۆنا وان ل دژی عەفرینێ بکەن و ژ روسیا خواستن کو رژێما ئەسەدی رازی بکەت دا کو ب فرۆکێن شەری ل عەفرینێ بدەن لێ روسیا و سووریێ نەرازیبوونا خوە ل ھەمبەر ڤێ داخوازا تورکیا نیشا دان و روسیا ژ تورکیا خواست رەوشا ھەی زێدەتر ئالۆز نەکەت.
د ڤێ مژارێ دا سیرگێی لاڤرۆڤ وەزیرێ دەرڤە یێ روسیا راگەھاند کو وان ھێزێن خوە یێن سەربازی ژ دەوروبەرێن عەفرینێ ڤەنەکێشاینە و گۆت: (ئەو نووچەیێن کو دبێژن روسیا ژ عەفرینێ ڤەکێشیایە نەراستن و ھێزێن مە دێ ل وێرێ بمینن و نابیت بێی رزامەندیا حوکمەتا سووریێ چو دەولەتەکا بیانی بکەڤیتە ئاخا سووریێ و سەروەریا وێ بنپێ بکەت و نھا ھێزێن مە و سووریێ قۆناغا ئازادکرنا ئدلیبێ دەستپێ کرینە و بۆ سەرکەڤتنا ڤێ پێنگاڤێ نابیت دەڤەرێن دی یێن سووریێ بھێنە ئالۆز کرن).
ھەروەسا پەیڤدارا وەزارەتا دەرڤە یا ئەمریکا و پەیڤدارێ پنتاگۆن ژی ب دو داخۆیانیێن جودا راگەھاندن کو ئەو ناخوازن تورکیا بکەڤیتە عەفرینێ و ژ تورکیا خواستن کو دەست ژ ھەولدانەکا ھێرشکرنا سەر عەفرینێ بەردەت و دڤێت ھەموو ھێزێن دۆست و ھەڤپەیمان بۆ ژناڤبرنا داعشێ کار بکەن و ھێرشکرنا سەر کوردان نە د بەرژەوەندا تورکیا دایە.
ل ئالیێ دی شاندەکا ژ نوونەرێن ھژمارەکا کۆمێن چەکدار یێن سەر ب سوپایێ ئازاد کو تورکیا پشتەڤانیا وان دکەت ژی سەرەدانا ئەمریکا کرن و ل گەل بەرپرسێن پنتاگۆنێ و وەزارەتا دەرڤە یا ئەمریکا کۆم بوون و ئەمریکا ژ شاندێ سوپایێ ئازاد خواست کو د شەرێ ل دژی تیرۆرێ دا ل گەل ھێزێن سووریا دیمۆکراتیک و یەپەگێ جە بگرن و بۆ شاندێ سوپایێ ئازاد ئاشکرا ژی کرن کو ئەو دخوازن ژ نوو ڤە کۆمێن نە رادیکال پەروەردە بکەن و د ھەر واری دا ھەڤکاریا وان بکەن. وەسا دھێتە پێشبینی کرن کو ئەمریکا ھژمارەکا زێدە کۆمێن چەکدارێن سەر ب سوپایێ ئازاد د بن بانێ خوە دا کۆم بکەت.
ل ئالیێ دی تورکیا بەردەوامیێ ددەتە کۆمکرنا ھێزێن سەربازی ل سەر سنورێ عەفرینێ و د چارچۆڤێ لھەڤھاتنا ل گەل ئەلنوسرا ژی ھێزێن خوە ل سەر سنورێ عەفرین و ئدلیبێ ژی کۆم دکەت و تۆپخانەیێن تورکیا دەڤەرێن سنوری یێن رۆژئاڤایێ کوردستانێ چار رۆژن بەردەوام تۆپباران دکەن و چەکدارێن سەر ب سوپایێ ئازاد ژی چار رۆژن بەردەوام گوللە ھاڤانان دھاڤێژنە ھەرێما شەھبا و گوندێن عەفرینێ و ل ھەمبەر دا ھێزێن کوردی ژی ب دژواری بەرسڤا تورکیا و سوپایێ ئازاد ددەن و د شەرێ چار رۆژان دا شەرڤانەکی کورد جانێ خوە ژ دەست دایە، پێنج چەکدارێن سوپایێ ئازاد ھاتینە کوشتن و دو سەربازێن تورک ژی بریندار بووینە.