ئه‌ڤرۆ نیوز ، زنار تۆڤى:
ب ئه‌گه‌رێ وان هه‌موو پێشێلكاریێن توركیا هه‌مبه‌رى “ناتۆ” د ماوێ بوریدا كرین،ب تایبه‌تى ئاشكرابوونا هاریكاریكرنا گرووپێن تیرۆرستى و ل سووریێ و حه‌واندنا سه‌ركردێن تیرۆرستى و ده‌ستێوه‌ردان د كاروبارێن وه‌لاتان و گه‌له‌ك پرسێن دیتر،ژ وان ژى پشتكرن ل ناتۆ و به‌ستنا هه‌ڤپه‌یمانیێ ل گه‌ل رووسیا،وه‌كریه كو چاڤدیرێن سیاسى ئاخفتنێ ل سه‌ر ده‌ركرنا توركیا د ناتۆ دا بكه‌ن،ئه‌ڤه پترى 60 سالانه توركیا ئه‌نداما ناتۆیه،نوكه ئێكه ژ هیزێن سه‌ره‌كى یێن وێ هه‌ڤپه‌یمانیێ،لێ هوكارێن بهێزبوونا توركیا د ناتۆدا په‌یوه‌ندى ب نه‌رماتیا هه‌لویستێ ئه‌مریكا و ئورۆپا ڤه هه‌یه،ل هه‌مبه‌رى سیاسه‌تا توركیا دا د ماوێ بوریدا،نوكه توركیا به‌رۆڤاژى بنه‌مایێن دامه‌زراندنا ناتۆ دبزڤیت و ڤێ وه‌كریه،كو گه‌له‌ك ژ سیاسى و ڤه‌كۆله‌ران ده‌رگه‌هێ ده‌رخستنا توركیا د ناتۆدا ڤه‌كه‌ن و ئاخفتنێ ل سه‌ر دكه‌ن.
مایكل ج توتون ڤه‌كۆله‌رێ ئه‌مریكى د گۆتاره‌كێدا ل گۆڤارا”ورلد ئه‌فیرز” دبێژیت:ئه‌نقه‌ره گه‌له‌ك پێشێلكارى د بنه‌مایێن ناتۆدا كرینه،ل سه‌ر توركیا ئاشكرابوویه،كو هاریكاریا گرووپێن تیرۆرستى دكه‌ت و ده‌ستێوه‌ردانێ د كاروبارێن ولاتاندا دكه‌ت،یا ئاماده نینه پابه‌ند بیت،ب وان برگێن دناتۆدا هه‌ین،ل گه‌ل هندێ ژى هێرشكریه سه‌ر عه‌فرینێ،هه‌روه‌سا ده‌مێ واشنتۆن راگه‌هاندى،كو پشتگیریێ ل یه‌په‌گێ دكه‌ت ل باكۆرێ سووریێ،ئه‌ردۆغانى ب تۆندى به‌رسڤا ئه‌مریكا دایه و راگه‌هاندیه،به‌رى ئه‌و هێزه دروست بیت،دێ ژناڤبه‌ین،دیسا ئه‌ردۆغانى گوتیه،ئه‌مریكا دڤێت سۆپایه‌كێ تیرۆرستى ل سه‌ر سنورێ باشۆرێ توركیا دابمه‌زرینیت،دیسا ئه‌و بژارده ژى دایه ئه‌مریكا،یان دڤێت ده‌ست ژ هاریكاریا وێ هێزا تیرۆرستى به‌رده‌ت،یان ژى ئه‌م دنه‌چارین هێرش كه‌ینه سه‌ر عه‌فرینێ،مایكلى گوتیه”هێرشا توركیا یا راسته‌وخۆ ل دژى ئه‌مریكا ب روونى هه‌موو سنور ده‌ربازكرینه،ڤێجا ئه‌و سنوره د تۆكمه‌بن یان نه،ئه‌ڤه وێ دگه‌هینیت كو توركیا راسته‌وخۆ هێرشێ بكه‌ته سه‌ر وه‌لاته‌كێ ئه‌ندام د ناتۆدا،به‌لێ هێرشكرن بۆ سه‌ر هه‌ڤپه‌یمانه‌كێ ل ده‌رڤه‌ى ناتۆ دا یا ئالۆزتره.
ناتۆ ل سالا 1949 هاتیه دامه‌زراندن و ئارمانج ژێ به‌رهنگاربوونا هه‌ژموونا ئێكه‌تیا سووڤیه‌تیا جاران بوو ل سه‌ر ئورۆپا،ل سالا 1952 توركیا بوویه ئه‌ندام تێدا،ل وى ده‌مێ ناتۆ هاتیه دامه‌زراندن،هیچ مه‌ترسیه‌ك ل سه‌ر جڤاكێ نێڤده‌وله‌تى ب ناڤێ كۆمارا ئیسلامى یا ئیرانێ نه‌بوو،رژێما به‌عس ژى ل سووریێ یا ده‌ستهه‌لاتدار نه‌بوو،چو گرووپێن تیرۆرستى یێن كوردى نه‌بوون،داعش ژى نه‌بوو،لێ ب تنێ بزاڤا رزگاریخوازا كوردى هه‌بوو،لێ نوكه جیهان ب ره‌نگه‌كێ گه‌له‌ك مه‌زن هاتیه گوهۆرین،هه‌موو ده‌مان هه‌ڤپه‌یمانى ل دووف ده‌مى و جهى دهێنه گوهۆرین و ژ هه‌ڤالینیێ دبنه دوژمن،دیسا چو ده‌مان بریتانیا دوستێ ئه‌مریكا نه‌بوویه،چو ده‌مان رووسیا ژى دوژمنێ به‌رده‌وامێ ئه‌مریكا نینه،له‌وما بۆ قه‌بوولكرنا راستیان ئێدى توركیا هه‌ڤپه‌یمان نینه د ناتۆ دا،به‌لكو زێده‌تر وه‌ك دوژمن ده‌ردكه‌ڤیت،دیسا دوژمنداریا ناتۆ ل وى ده‌مى ده‌ركه‌فت،ده‌مێ توركیا ره‌تكرى كو ئاخا وێ ل شه‌رێ دژى رژێما سه‌دامى بكار بینیت،ئه‌گه‌ر ژى ئه‌و بوو،كو ئه‌نقه‌ره نه‌دڤیا كوردستان ببیته ناڤه‌نده‌كا بهێز یا ئابوورى و سه‌ربازى.
هه‌روه‌سا ئه‌ردۆغانى هاریكاریا ئیرانێ كر،بۆ ڤه‌گوهاستنا چه‌كى بۆ حزبوللا و پشتگیرى ل داعشێ كریه ل سووریا،داكو چو هه‌رێمێن كوردى ل باكۆرێ سووریێ دروست نه‌بن،وه‌ك ئه‌وا ل عێراقێ دروست بووى،دیسا ده‌مێ ئه‌ردۆغانى سه‌ره‌دانا رووسیا كرى،ناتۆ راگه‌هاندبوو،كو ئه‌ندامبوونا توركیا جهێ گۆمانێ نینه،لێ مایكلى گوتیه”بێگۆمان ئه‌ندامبوونا توركیا جهێ گۆمانێ یه.
ئه‌ڤرۆ نيوز:
بەرپرسێ پەێوەندى و راگەھاندنێ ل رێڤەبەریا ھاتنوچوونا دھۆکێ دیارکر کو ئەڤرۆ 4ى شوباتا 2018ێ د روودانەکا ھاتنوچوونێ دا د ناڤبەرا شیخان و ئەلقوش دا پێنچ کەس بوونە قوربانی.
ئازاد تەھا، بەرپرسێ پەيوەندى و راگەھاندنێ ل رێڤەبەریا ھاتنوچوونا دھۆکێ دیارکر کو نێزیک گۆندێ بێبانی ل سەر ناحیا ئەلقوش ڤە بۆ شێخان روودانه‌كا دلتەزینا ترافیکێ روودایە، د ئەنجام دا پێنچ کەس یێن بووینە قوربانی ژوانا ژی دو کەسان گیانی خوە ژ دەستدان و سێ کەس ژی بریندار بووینە.
گۆتژی: “ئەڤ روودانا ھاتنوچوونێ د ناڤبەرا ترۆمبێلەکا تایبەت و ترۆمبێلەکا بارھەلگر دا روودایە، ب مخابنی ڤە ژبلی زیانین دارایی زیانێن گیانی ژی ل دووڤ خوە ھێلان”.
ئه‌ڤرۆ نيوز:
ل دووڤ ئامارێن رێڤەبەریا گشتی یا ساخلەمیێ ل پارێزگەھا دھۆکێ كو مالپه‌رێ نوش نيوز ل سالا 2017 ئەو کەسێن گیانێ خوە ژ دەستدای ل پارێزگەھا دھۆکێ (4457) وەلاتی بووینە و دەە ئەگەرێن سەرەکی یێن مرنێ ئەڤێن ل خوارێ دیارکرینە:
1- نەخۆشیێن دلی بووینە ئەگەرێ مرنا (1150) وەلاتیان.
2- نەخۆشیێن مێشکی و دەمارێن خوینێ بووینە ئەگەرێ مرنا (590) وەلاتیان.
3- نەخۆشیێن دومدرێژ و ڤەگر بووینە ئەگەرێ مرنا (461) وەلاتیان.
4- نەخۆشیێن پەنجەشێرێ بووینە ئەگەرێ مرنا (431) وەلاتیان.
5- نەخۆشیێن زارۆیان و یێن پێش وەخت بووین بووینە ئەگەرێ مرنا ( 353) زارۆیان.
6- نەخۆشیێن میزەرۆیێ و کوئەندامێ زاوزێ بووینە ئەگەرێ مرنا ( 241) وەلاتیان.
7- روودانێن ترۆمبێلا بووینە ئەگەرێ مرنا ( 202) وەلاتیان.
8- نەخۆشیێن ھەناسێ بووینە ئەگەرێ مرنا ( 190) وەلاتیان.
9- تەقینێن جورا و جور بووینە ئەگەرێ مرنا ( 117) وەلاتیان.
10- نەخۆشیێن سوتنێ بووینە ئەگەرێ مرنا (112) کەسان.
ئەڤرۆ نيوز:
ھێنری کسینجەر وەزیرێ بەرێ یێ دەرڤە یێ ئەمریکا ل دۆر شکەستنا بزاڤێن کو ل ژێر ناڤێ چاکسازیێ د ڤان چەند سالێن بۆری دا ل ئیرانێ دەرکەفتینە و نەشیاینە چو گوھۆرینان بکەن دیار دکەت کو یێن ھەتا دوھی خەلک دکوشتن و پارێزڤانێ سەرەکی یێ رژێما ئیرانی بوون، نھا ژ بەر بەرژەوەندیێن خوە بەحسێ گوھۆڕینان دکەن، لێ ھێشتا ژی وەکو کەسەکێ ھشکباوەر ھزر دکەن و تنێ تشتێ وان دڤێت کورسیکا دەستھەلاتێ یە، ژ بەر ھندێ ژی ھەتا نھا نەشیاینە ببنە نوونەرێن راستەقینە یێن گەلێ ئیرانێ.
ناڤبری ئاماژە ب ھندێ ژی دکەت کو گەلێ ئیرانێ داخوازا گوھۆڕینا سیستەمی دکەت و بزاڤا کەسک و سەرھلدانێن ڤێ دووماھیێ ل ئیرانێ نیشانێن ھندێ نە کو گەلێ ئیرانێ ژ سیستەمێ نھا بێزار بووینە لێ مخابن کەسێن وەکو موسەوی و کەروبی بووینە ئەگەرێ ھندێ کو دەنگ و داخوازیێن خەلکی ببنە قوربانیا بەرژەوەندیێن وان و ژ بەر ھندێ ژی ھەتا نھا سەرەرای داخوازیێن خەلکی چو گوھۆڕین ل ئیرانێ دروست نەبووینە.
ئه‌ڤرۆ نيوز:
پەیامنێرێ رۆژناما گاردیان ژ عەفرینێ راگەھاند کو دەولەتا تورکیا ب فرۆکێن شەری و گولە ھاوان و تۆپێن دوورھاڤێژ گوندێن عەفرینێ و مالێ وەلاتیێن سڤیل بۆمبەباران دکەت و د ناڤا ١٥ رۆژان دا نێزیکی چارسەد وەلاتیێن سڤیل ژ ئەنجاما ھێرشێن تورکیا جانێ خوە ژ دەست داینە و بریندار بووینە.
مارتین شولۆڤ پەیامنێرێ رۆژناما گاردیان یا برتانیا د داخۆیانیەکی دا راگەھاند کو ل عەفرینێ کارەساتەکا مەزن یا مرۆڤی روو دایە و سوپایێ تورکیا و چەکدارێن سوپایێ ئازاد گوندێن عەفرینێ و مالێن وەلاتیێن سڤیل بۆمبەباران و تۆپباران دکەن و د ئەنجاما ھێرشێن وان دا نێزیکی چارسەد وەلاتیێن سڤیل بووینە قوربانی و نەخوەشخانەیێن عەفرینێ ب بریندارێن سڤیل کو پرانیا وان ژن و زارۆکن پر بووینە و دەرمان ژی گەلەک کێمن.
پەیامنێرێ گاردیان راگەھاند ژی کو مخابن تورکیا و چەکدارێن سوپایێ ئازاد ب تەمامی ھێرشی وەلاتیێن سڤیل دکەن و گۆت: (من ب چاڤێن خوە گوندێن ژ بەر ھێرشا فرۆکێن شەری و تۆپان وێران بووینە دیت و وەلاتیێن کو شیاینە گیانێن خوە رزگار بکەن بەر ب ناڤەندا عەفرینێ و گوندێن دی رەڤیاینە و ژیانا خەلکێ سڤیل ب تەمامی ل ژێر مەترسیێ دایە و ب تەمامی کارەساتەکا مرۆڤی روو دایە).
ل ئالیێ دی ل گوندێن سەر سنورێن عەفرینێ و باکورێ کوردستانێ شەر ب دژواری بەردەوام دکەت و دەولەتا تورکیا یەپەگێ ب ھاڤێتنا سارۆخان بۆ ناڤ باژێرێن کلیس و رەیھانلی تۆمەتبار دکەن و ل ھەمبەر دا بەرپرسێ کۆمسیۆنا پاراستنا کانتۆنا عەفرینێ راگەھاند کو د دەستێ وان دا ساروخێن دوورھاڤێژ نینن و دەزگەھێ ھەوالگیریا تورکیا (میت) ب خوە ساروخان دھاڤێژیتە ناڤەندا باژێرێن خوە و مەرەما وان ئەڤە کو د رایا گشتی یا جیھانێ دا ھێرشا سەر عەفرینێ و کوشتنا وەلاتیێن سڤیل رەوا نیشا بدەن و گۆت: (پەرلەمانتارێن پارتا گەل یا کۆماریا و ھژمارەکا رۆژنامەڤانێن تورکیا ژی ئاشکرا کرن کو ساروخ ژ ناڤا ئاخا تورکیا ڤە دھێتە ھاڤێتن و رۆژنامەڤانێن جیھانی و پەیامنێرێن کو نھا ل عەفرینێ نە ژی راگەھاندینە کو کوردان چو سارۆخ نەھاڤێتنە ناڤەندێن باژێرێن تورکیا ئانکۆ ئاشکرایە بەرپرسێن دەولەتا تورکیا درەوان دکەن و نە دوورە کو ھەموو تاوانێن وان یێ دژی مرۆڤاتیێ بھێنە ئاشکرا کرن).
ل ئالیێ دی د شەرێ رۆژا ١٤ و ١٥ دا ھێزێن یەپەگێ ل بلبلێ و راجۆ ھێرشێن دژوار برنە سەر سەربازێن تورک و چەکدارێن سەر ب تورکیا ڤە و شیان ٣٤ سەرباز و چەکدار بکوژن و چار کەسان ژی دیل بگرن، د ڤێ مژارێ دا رام عەبدولرەھمان بەرپرسێ کۆمەلا مافێ مرۆڤ یا سووریا کو بنگەھێ وێ ل بریتانیایە راگەھاند کو حەتا نھا ب تنێ ٣% ژ ئاخا عەفرینێ کەڤتیە ژێر کۆنترۆلا سوپایێ تورکیا و چەکدارێن سوپایێ ئازاد و تورکیا و سوپایێ ئازاد زێدەتر ھێرشی گوندان و وەلاتیێن سڤیل دکەن و د رۆژا ١٤یێ ئۆپەراسیۆنا سوپایێ تورکیا دا ھەشت سەربازێن تورک جانێ خوە ژ دەست داینە و سەربازێن تورک و چەکدارێن سوپایێ ئازاد نەچار ماینە خوە ژ گوندان ڤەکێشین).
ئەڤرۆ نيوز، ئەیاد بەرواری:
پشتی چەندین مەھێن گرژیبوونێ دناڤبەرا بەغدا وھەرێمێ ونەبوونا دانوستاندنان، ل ڤێ دووماھیێ سەرۆک وەزیرێن عیراقێ دەرگەھێن دانوستاندن ل گەل ھەرێمێ ڤەکرینە وبەردەوام دکۆنگرێن خوە یێ رۆژنامەڤانی یێن ھەفتیانە دا بەحسێ رژدبوونا حوکمەتا خوە ل سەر ھنارتنا مووچێن فەرمانبەرێن کوردستانێ دکەت وھەتا گەھشتیە وێ رادێ چەندین لژنێن دانوستاندنێ ویێن ھووربینیێ دلیستێن فەرمانبەرین چەند وەزارەتێن ھەرێمێ ڤرێکەت بۆ مەزاختنا مووچێن وان.
پێزانین وەسا دیاردکەن کو نەرمبوونا عەبادی ل بەرامبەر ھەرێما کوردستانێ ژبەر دو ھۆکارانە، یا ئێکێ نێزیکبوونا ھەلبژارتنێن گشتی یە ل عیراقێ کو دێ ل 12/5/2018 ھێنە ئەنجامدان وپێدڤیا عەبادی ب دروستکرنا مەزنترین ھەڤالبەندی پشتی ھەلبژارتنان، ژلایەکێ دی ڤە ژبەر مەرجێن بەنکا نێڤدەولەتی یە ب پێنەدانا چو قەران ب عیراقێ، ھەکە دەست ب دانوستاندنان ل گەل ھەرێما کوردستانێ نەکەت وپارەی وبودجەی بۆ کوردستانێ نەھنێریت.
حوکمەتا عیراقێ دەست ب پێنگاڤێن لادانا سزایێن ل سەر ھەرێما کوردستانێ سەپاندین کر، ل دەستپێکێ ھژمارەکا بەنکی ب ناڤێ حوکمەتا ھەرێما کوردستانێ ڤەکر وپاشی وەزارەتا دارایی یا عیراقێ ئاگەھداریا بەنکا ناڤەندی یا عیراقی کر ب مەزاختنا کوژمێ 250 ملیار دیناران بۆ ھەرێما کوردستانێ، ئەو کوژمە ب کریار یێ گەھشتیە ھەرێما کوردستانێ وپشکا دویێ یا پارەی ژی دێ ھێتە ھنارتن.
دەزگەھێن راگەھاندنێ وەسا بەلاڤکر کو ئەو کوژمێ پارەی یێ تایبەتە ب مووچێن کارمەندێن ھەردو وەزارەتێن پەروەردێ وساخلەمیێ، بەلێ وەزارەتا دارایی ل ھەرێما کوردستانێ دیارکر کو ئەو پارە یێ گەھشتیە لقێ بەنکا ناڤەندی یا عیراقی ل ھەولێرێ کو ب سەر عیراقێ ڤەیە ونەھاتیە ھنارتن بۆ وەزارەتا دارایی یا ھەرێمێ، ھەرێما کوردستانێ ژی نوکە چاڤەرێ بەغدایە تاکو ب نڤیسارا فەرمی ھووردەکاریێن وی کوژمێ پارەی بۆ ب ھنێریت.
ئەو پێشڤەچوونا دناڤبەرا بەغدا وھەولێرێ پشتی کۆمبوونا حەیدەر عەبادی سەرۆک وەزیرێن عیراقێ ونێچیرڤان بارزانی سەرۆک وەزیرێن ھەرێما کوردستانێ ل بەغدا کو ئەو کۆمبوونە بەری سەرەدانا نێچیرڤان بارزانی بوو بۆ ئیرانێ وپاشی ل کوربەندێ دافۆس یێ جیھانێ ل سویسرا ژی دووبارە کۆمبوون، بەرپرسێن ھەردولا کۆمبوونا عەبادی ونێچیرڤان بارزانی ل دافۆس ب کۆمبوونەکا بەرھەمدار ھژمارتبوو.
ژلایەکی دی ڤە، عەزیز کازم پەرلەمانتارێ رەوتێ (حکمە) ب سەرۆکاتیا عەمار حەکیم راگەھاند” جڤاتا نوونەرێن عیراقێ بریار دا ب ھەلوەشاندنا دۆرپێچا ل سەر مامەلێن دراڤی ل گەل بەنک ودەزگەھین دارایی ل ھەرێما کوردستانێ، پشتی کو ئەو ئارمانجا کو ئەو بریار ل پێناڤی وێ دابوو ھاتیە دێ، ھەڤدەم جڤاتا نوونەران مەرج بۆ بەنکا ناڤەندی یا عیراقی دانایە کو ھەیڤانە راپۆرتەکا تایبەت ب دەستھەلاتا بەنکان ومامەلێن وان ورۆلێ وان دپاراستنا داراییا گشتی پێشکێشی لژن تایبەتا جڤاتا نوونەران بکەت”.
مەحموود عوسمان، سیاسەتمەدارێ کورد، دداخۆیانیەکێ دا بۆ رۆژناما (العربی الجدید) دبێژیت” عەبادی دخوازیت گرفتان ل گەل ھەرێما کوردستانێ ب دووماھی بینیت ودەرگەھێ دانوستاندنێ دناڤبەرا ھەردولا ڤەکەت وئەڤە ژی یا ھەڤدەمە ل گەل پێکئینانا ھەڤپەیمانیێن ھەلبژارتنان، سەرۆک وەزیرێن عیراقێ دترسیت لایەنێن دی وان گرفتان بۆ بدەستڤەئینانا بەرژەوەندیێن سیاسی وحزبی بکاربینن “.
ئه‌ڤرۆ نيوز:
پشتی داگیرکاریا بۆسەر دەڤەرێن کوردستانیێن دەرڤەیا ئیدارەیا حوکمەتا ھەرێما کوردستانێ ھاتیە بجھئینان، نوکە پیلانەکا مەترسیدارتر تێتە بجھئینان ئەوژی لادانا بەرپرس و رێڤەبەرێن ئیدارەیا وان دەڤەرانە بۆ کەسێن عەرەب و تورکومانێن شیعە، بەرپرسێن کوردژی ئاماژە بوێ چەندێ دکەن، دەستھەلاتدارێن عیراقێ دخوازن ب زەبری ھێزێ پۆستێن ئیداری ژ کوردان وەربگرن.
دکتۆر موسەنا ئەمین، سەرۆکێ فڕاکسیۆنا یەکگرتوویا ئیسلامی لپەرلەمانێ عیراقێ بۆ رۆژناما ئەڤرۆ گۆت: وەرگرتنا پۆستێن ئیداری ل کوردان بۆ لاوازکرنا کوردانە ل دەڤەرێن ھاتینە داگیرکرن، چونکە کورد ل دەڤەرێن ھاتینە داگیرکرن زۆربەیا دەستھەلاتێن خوە ژدەستداینە بەغدا ل کەرکووک و نەینەوا و خورماتوو چو نەمایە ھەمبەر کوردان نەکەت، ھەر ل وێرانکرنا دەڤەرێن کوردستانی ھەتا دگەھیتە لادانا بەپرس و رێڤەبەرێن کورد، ئەف رەفتارێن دەستھەلاتدارێن عیراقێ بەرۆڤاژی بنەمایێن دستووری و قانوونێن عیراقێ یە، ئەف پڕۆپاگندەیێن حەیدەر عەبادی سەرۆک وەزیرێن عێراقێ دکەت بۆ ئێک پارچەیا عیراقێ تنێ گۆتنێن بێکریارن.
ژلایێ خۆڤەژی ئەرسەلان عەلی، بەرپرسێ لیژنا ناوچا خورماتوو یا پارتی دیموکراتی کوردستان بۆ رۆژناما ئەڤرۆ گۆت” پشتی داگیرکرنا دەڤەرێن کوردستانی ژلایێ عیراقێ ڤە بەغدا دخوازیت ب رێیا بکارئینانا ھێزێ گۆھڕینان د پۆستێن ئیداری دا بکەت، ھەر بۆ نموونە لڕۆژێن بۆری پۆستێ قایمقامێ خورماتوو ب ھێزێ ل کوردان ھاتە وەرگرتن و ھژمارەک عەرەبێن ئەندامێن جڤاتا قەزا خورماتو بەرھەڤنەبوون دەنگی بۆ لادانا قایمقامێ کورد بدەن، بەلێ حەشدا شەعبی و ھێزێن عیراقی گەف ل ئەڤان ئەندامانکرن و نەچاربوون دەنگی بدەن بۆ لادانا قایمقامێ کورد و دانانا قایمقامەکێ دی،ل خورماتوو ھەموو پۆستێن ئیداری ل کوردان ھاتینە وەرگرتن و تنێ بەحس یێ ھەی بۆ تەناکرنا رەوشا دەڤەرێ ئێک پۆست بدەنە کوردان ئەوژی ھێشتا دیارنیە دێ چ پۆستەکبیت.
مەھدی موبارەک رێڤەبەرێ گشتیێ چاندنا کەرکووکێ ژی بۆ رۆژناما ئەڤرۆ دیارکر، ل کەرکووکێ ھەمان سیناریۆیا نەینەوا و خورماتوو تێتە بجە ئینان و زێدەترژی، چونکە ل جھێ من کەسەکێ تورکومان کریە رێڤەبەرێ چاندنا کەرکووکێ، کو ئەو کەس خەلکێ کەرکووکێ نینە و ل قەزا تەلەعفەر ئیناینە، ھەروەسا جێگرژی کەسەکێ عەرەبێ سونە دانایە، ھەتا رێڤەبەرێن لقێن چاندنێ ل قەزا و ناحیێن کەرکووکێ ھاتینە گۆھڕین بۆ کەسێن عەرەب و تورکومان، پیلانا لادانا بەرپرس و رێڤەبەرێن کورد پتر کەرکووک ڤەگرتیە و بەغدا داخوازیت ھەموو رێڤەبەر و بەرپرسێن ئیداری سەر ب وانڤە بن و کورد نەھێلاینە د ئیدارەیا کەرکووکێ دا.
ئه‌ڤرۆ نيوز:
کەنالێ (NRT) نوکە یێ بوویە زمان حالێ حزبا نەوەی نوێ ب سەرکرداتیا شاسوار عەبدلواحید، ھەر کارمەندەکێ نەبیتە ئەندام دحزبا وی دا دھێتە دەرخستن، یان ژ دێ نەچار بیت دەستان ژ کارێ خوە بەردەتن، ژ ئالیێ خودانێ کەنالێ ناڤبری ڤە.
مەم بورھان قانع رێڤەبەرێ گشتیێ (NRT) تایبەت بۆ رۆژناما ئەڤرۆ راگەھاند، ل شەڤا 2شوباتێ من دەست ژ کارێ خوە وەک رێڤەبەرێ گشتیێ کەنالێ ناڤبری بەردایە، کو نوکە من چو پەیوەندی ب کارگێریا وی کەنالی ڤە نەمایە.
وەسا دیارە ھەر کەسێ ھز و بوچوونێن وی ل گەل حزبا شاسواری نەبن دێ ژ کەنالێ (NRT) ھێتە دەرخستن، کو بەری حەفتیەکێ دیسا سوھەیب شێخ کاکە مەحمود رێڤەبەرێ بەرێ یێ دیجیتال راگەھاندنا (NRT)، ژبەر پۆستەکێ فێسبۆکی، ژ وی کەنالی ھاتە دەرخستن، و رێڤەبەرێ گشتیی یێ کارگێریا کەنالێ (NRT) مەم بورھان قانع دەست لکارکێشانا وی بدەستێن خوە نڤیسی بوو، کو د ھەیڤا بوری دا سوھەیب شێخ ئەحمەدی ھەر بۆ رۆژناما ئەڤرۆ راگەھاندن بوو، ئەز دلگرانم ژ کەساتیەکا وەکی مەم بورھان قانع کو بناڤێ من دەستکاریا ژ کارێ ب دەستێن خوە بنڤسیت، و بوویە دار دەستێن شاسواری د کارێ پیشەیی رۆژنامەڤانیی دا، و ئەو ھەموو نڤیسارێن خوە ل پشت گوە خستن.
سەبارت ئەگەرێ دەست ژ کار کێشانا خوە، بورھان قانع دبێژیت، ئەو پۆستێ من د فێسبوکێ خوەدا ئینایە خوار، ھەموو کەس دزانن و تێدگەھن کا بوچی من دەست ژ کارێ کەنالێ(NRT) بەردان.
پشتی دروستکرنا لیستا نەخێر بۆ ریفراندۆما سەربخوەیا کوردستانێ، ژ ئالیێ شاسوار عەبدلواحید، دەست بەردانێن ب کووم ژ کەنال و دەزگەھێ (NRT) دەست پێکرن.
ئه‌ڤرۆ نیوز، نه‌وزاد هلۆرى:
ئه‌ڤرۆ ئێڤارى ب به‌رهه‌ڤبوونا هژماره‌كا یاریكه‌رێن ئه‌وروپى و ئه‌مریكى و ناڤخوهيى، ڤیسته‌ڤالا خلیسكانا ل سه‌ر به‌فرێ ل ده‌ڤه‌را باله‌كایه‌تى یا سه‌ر ب قه‌زا چومان ڤه هاته ئه‌نجامدان.
ئه‌حمه‌د قادر، قایمقامێ قه‌زا چومان بۆ ئه‌ڤرۆ نیوز گۆت” ئه‌ڤرۆ ئێڤارى ب به‌رهه‌ڤبوونا هژماره‌كا یاریكه‌رێن ئه‌وروپى و ئه‌مریكى و ناڤخوهيى، ڤیسته‌ڤالا سيێ يا خلیسكانا ل سه‌ر به‌فرێ ل ده‌ڤه‌را باله‌كایه‌تى یا سه‌ر ب قه‌زا چومان ڤه هاته ئه‌نجامدان كو ژلایێ
قایم‌قامیا قه‌زا چومان و رێڤه‌به‌ریا گه‌شتوگۆزارێ ب هه‌ڤكاریا كومپانیا Vik group یا كه‌رتێ تایبه‌ت هاته ئه‌نجامدان”.
زێده‌تر گۆت” مه‌ره‌م ژ ڤێ ڤیسته‌ڤالێ سه‌رنجراكێشان بۆڤێ جۆره ياريا گه‌شتيارى و گرنگیدانه ب كه‌رتێ گه‌شتوگۆزارا زڤستانێ ڤه ل سنوورێ قه‌زا چومان و بده‌ستڤه‌ئینانا داهاتیه‌كێ یه بۆ خه‌لكێ ده‌ڤه‌رێ، ژ به‌ركو چومان و باله‌كایه‌تى سرۆشته‌كێ جوان و دلڤه‌كه‌ر يێ هه‌ى”.
نيشاندان