ئەڤرۆنیۆز، سالار دۆسكی:
ژڤانە سوباهى ئێك شەمبی 31/12/2017 ژ بەر قەیرانا دارایی ل هەرێما كوردستانێ هه‌ى ، كەنالەكێ ئەسمانی بهێتە داخستن.
هندرین محەمەد بەرپرسێ راگەهاندنا حزبا شيوعی یا كوردستانێ ئاشكراكر كو ژڤانە سوباهى ئێڤاری كەنالێ رێگا یێ ئەسمانی زمان حالێ حزبا شيوعی یا كوردستانێ ژ بەر قەیرانا دارایی بهێتە داخستن.
ئه‌ڤرۆنيوز:
رۆژنامه‌كا سعودى ئاشكراكر كو حوكمه‌تا عيراقێ پێشنيارێن ئێكه‌تيێ ل دۆر باده‌كێن هه‌لاويستى دناڤبه‌را به‌غدا وهه‌ولێرێ دا ره‌تكرن.
رۆژناما”عوكاز” يا سعودى دهژمارا خوه يا (7753) يا ئه‌ڤرۆ شه‌مبيێ 30/12/2017 به‌لاڤكر”ژێده‌رێن عيراقى يێن باوه‌رپێكرى دياركر كو هه‌موو پێشنيارێن شاندێ ئێكه‌تيێ ل دۆر بارودۆخێ پارێزگه‌ها كه‌ركووكێ ژلايێ حوكمه‌تا عيراقى ڤه هاتنه ره‌تكرن “.
وان ژێده‌ران بۆ رۆژناما سعودى دياركر ژى” حوكمه‌تا به‌غدا شاندێ ناڤبرى ئاگه‌هداركر كو ژچو بريارێن خوه ئه‌وێن ل دۆر هه‌رێما كوردستانێ وه‌رگرتن نازڤريت، وهه‌ر ئاخڤتنه‌ك ل دۆر ره‌وشا نوكه پێدڤى ب پێگيريێ پێكرنێ يه ب بريارێن په‌رله‌مان وحوكمه‌تا عيراقێ ودادگه‌ها فيدرالى”.
گۆت ژى” ئه‌و شاندێ پێكهاتى ژ هنده‌ك په‌رله‌مانتارێن كه‌ركووكێ ورزگار عه‌لى ئه‌ندامێ مه‌كته‌با سياسى يا ئێكه‌تێ وخالد شوانى ئه‌ندامێ جڤاتا سه‌ركردايه‌تيا ئێكه‌تيێ، داخواز ژ به‌غدا كر ده‌مێ بده‌ت ل دۆر بابه‌تێ گرێداى ب پرسا كه‌ركووكێ وده‌ڤه‌رێن دى يێن ناكۆكى ل سه‌ر هه‌ى وئه‌نجامدانا گه‌ره‌كا نوو يا دانوستاندنان”.
ئه‌ڤرۆنيوز:
سه‌رۆك وه‌زيرێن عيراقێ، حه‌يده‌ر عه‌بادى، بريارا راگرتنا خه‌رجكرنا مووچێ په‌رله‌مانتاران ده‌ركر ب مه‌ره‌ما دروستكرنا فشارێ ل سه‌ر جڤاتا نوونه‌رين عيراقێ.
مالپه‌رێ (أين) يێ ده‌نگوباسان يێ عيراقێ به‌لاڤكر” ب برياره‌كا راسته‌وخوه يا حه‌يده‌ر عه‌بادى سه‌رۆك وه‌زيڕين عيراقێ، مووچێ هه‌ر 328 په‌رله‌مانتارێن عيراقى هاتيه راگرتن وهه‌تا نوكه نه‌هاتيه خه‌رجكرن كو پێشتر ل ناڤه‌راستا هه‌موو هه‌يڤان دهاته خه‌رجكرن”.
ل دووڤ وى مالپه‌رى” راگرتنا خه‌رجكرنا مووچێ ئه‌ندامێن جڤاتا نوونه‌رێن عيراقێ بۆ وێ چه‌ندێ يه تاكو جڤاتا نوونه‌ران مووچێن په‌رله‌مانتاران كێم بكه‌ت، چونكى عه‌بادى چه‌ندين جاران داخوازا كێمكرنا وان مووچان كربوو ودگوت ئه‌و مووچێن بلند فشاره ل سه‌ر بودجا گشتى”.
ژلايێ خوه‌ڤه هژماره‌كا په‌رله‌مانتاران ره‌خنه ل عه‌بادى گرت كو هه‌تا نوكه يێ به‌رهه‌ڤ نينه بودجا نڤيسينگه‌ها خوه كێم بكه‌ت، ئه‌ڤه دده‌مه‌كى دا راوێژكار وستافێ وێ نڤيسينگه‌هێ مووچێن بلند وه‌ردگرن، به‌لێ دياره مه‌ره‌ما عه‌بادى تنێ جڤاتا نوونه‌ران بيت.
ئه‌ڤرۆنيوز:
بنيامێن ناتانياهۆ دپه‌يامه‌كا ڤيديۆكرى دا ل سه‌ر به‌رپه‌رێ خوه ل تۆرا تويته‌رى گۆت” به‌رى چه‌ند رۆژان وه‌زيرێ ده‌رڤه‌يێ ئيرانێ دتويته‌رێ خوه دا داخوازا جه‌ژنه‌كا خوه‌ش وئارام بۆ هه‌موو كريستيانان خوازت”.
ناتانياهۆى گۆت” پرسياردكه‌م ئايا ئه‌و كريستيانين دڤێ هه‌يڤێ دا ل ئيرانێ هاتينه ده‌سته‌سه‌ركرن، چ هزر دپيرۆزباهيێ دا دكر، به‌لكو پرسيار دكه‌م كا گه‌نجێن ئيرانێ چ هزر دڤێ پيرۆزباهيا وه‌زيرێ ده‌رڤه‌يێ ئيرانێ دا دكر”. گۆت ژى” به‌لێ مخابن رژێما ئيرانێ تويته‌ر يێ قه‌ده‌غه‌كرى، ژبلى بۆ به‌رپرسێن ئيرانى”.
ناتانياهۆى دپه‌ياما خوه دا گۆت” هزر بكه‌ن هوون دمالێن خوه‌دا يێ نڤێژێن خوه دكه‌ن وژنشكه‌كێڤه چه‌كدار هاتن دناڤ مالێن هه‌وه دا وهوون راكێشانه زيندانان، ئه‌و هه‌وه ئازار دده‌ن چونكى هه‌وه رێ وره‌سمێن خوه يێن ئايينێ مه‌سيحى ئه‌داكرن”.
دياركر ژى” پيرۆزباهيا كريستيانان ب هاتنا جه‌ژنا ژدايكبوونا عيسايێ مه‌سيح وراكێشانا كريستيانان بۆ زيندانان كوپيتكا نيفاقێ يه”.
ناتانياهۆى داخواز ئه‌داكرنا نڤێژان ژبۆ كريستيانێن ئيرانێ كر ئه‌وێن دبن ده‌ستهه‌لاتا ئێرانێ ڤه دژين وگۆته كريستيانێن ئيرانێ ” ئه‌م پشته‌ڤانێن هه‌وه‌ينه”.
ئه‌ڤرۆنيوز:
پشتى هووربينيكرنێ دليستا مووچێن هه‌ردو وه‌زاره‌تێن په‌روه‌ردێ وساخله‌ميێ ل هه‌رێمێ، به‌غدا دێ هووربينيێ د ليستا مووچێن وه‌زاره‌تا خواندنا بلند ل هه‌رێمێ دا كه‌ت.
محه‌مه‌د عوسمان ئه‌ندامێ جڤاتا نوونه‌رين عيراقێ راگه‌هاند” ل دووڤ پێزانين ودووڤچوونا مه، حه‌يده‌ر عه‌بادى سه‌رۆك وه‌زيرێن عيراقێ رازيبوونا خوه يا دياركرى ل سه‌ر هووربينيكرنێ دليستا مووچێن فه‌رمانبه‌رين وه‌زاره‌تا خواندنا بلند ل هه‌رێمێ يا دياركرى”.
وى په‌رله‌مانتارى زێده‌تر بۆ دوارۆژ گۆت” پشتى ب دووماهى هاتنا هووربينيێ دليستێن هه‌ردو وه‌زاره‌تێن په‌رۆوه‌ردێ وساخله‌ميێ دا، دێ كارێ هووربينيێ دليستا مووچێن وه‌زاره‌تا خواندنا بلند دا هێته كرن، چونكى وێ وه‌زاره‌تێ كێمترين گرفت يێن هه‌ين وفه‌رمانبه‌رێن وه‌همى تێدا نينن”.
دياركرژى” حوكمه‌تا عيراقێ تنێ دي مووچێن وان وه‌زاره‌تان هنێريت يێن هووربينى دليستێن مووچين وان دا هاتيه كرن وپشتى پشت راست بوونێ كو گه‌نده‌لى تێدا نينه”.
دياركر ژى” به‌غدا ل به‌ر نينه مووچێ هه‌موو وه‌زاره‌تێن هه‌رێمێ پێكڤه ب هنێريت”.
ئه‌ڤرۆنيوز:
ل دووڤ وى پرۆژه قانوونا حوكمه‌تا هه‌رێما كوردستانێ بۆ رێكخستنا خانه‌نشينێ ئاراسته‌ى په‌رله‌مانێ كوردستانێ كرى، هه‌ر خانه‌نشينه‌كێ پله بلند كو ژيێ وى دبن 50 ساليێ دا بيت، دێ خانه‌نشينيا وى هێته هه‌لوه‌شاندن وئه‌و كه‌سێن كو ب پله‌يا وه‌زير يان بريكارێ وه‌زيرى هاتينه خانه‌نشينكرن هه‌كه ئه‌و پۆسته ب كريار ب رێڤه نه‌بربن، دێ خانه‌نشينيا وان ژى هێته هه‌لوه‌شاندن.
ب گۆره‌ى پرۆژه قانوونا ژلايێ جڤاتا وه‌زيرێن هه‌رێما كوردستانێ بۆ په‌رله‌مانى هاتيه هنارتن، هه‌ر خانه‌نشينه‌كێ پله پلند كو ژيێ وى دبن 50 ساليێ دابيت، دێ خانه‌نشينيا وى هێته هه‌لوه‌شاندن.
فه‌رسه‌ت سۆفى ئه‌ندامێ لژنا قانوونى ل په‌رله‌مانێ كوردستانێ ژليستا پارتى ديموكراتى كوردستان گۆت” ئه‌و كه‌سێن ژ (كو‌ن فه‌يه‌كون) پلێن وان ب شێوه‌كێ نه‌ئاسايى ژ پله هه‌فت بۆ پله ئێك، دێ خانه‌نشينيا پلێن وان هێته هه‌لوه‌شاندن ودێ هێنه‌ڤه‌گه‌راندن بۆ جهێن خوه”.
سۆفى زێده‌تر بۆ دوارۆژ گۆت” ئه‌و قانوون يا تايبه‌ته ب پێداچوونێ ب مووچێن خانه‌نشينيا نه‌قانوونى وبجهئينانا پشكه‌ك ژ قانوونا خانه‌نشينيا عيراقى ل سه‌ر پله بلندان ل هه‌رێما كوردستانێ وكێمكرنا وه‌رگرتنا چه‌ند مووچێن دوباره وپێداچوون ورێكخستنا ده‌رمالێن ب شێوه‌كێ نه‌قانوونى هاتينه دروستكرن”.
ل دووڤ وى پرۆژه قانوونێ، ئه‌و كه‌سێن ل سه‌ر ميلاكێ حوكمه‌تێ هاتينه خانه‌نشينكرن ل گه‌ل وێ چه‌ندێ ژيێ وان يێ گونجايه بۆ خانه‌نشينيێ ، به‌لێ پێدڤيه 15 سالان خزمه‌ت هه‌بيت.
ژێده‌ره‌كى ژ رێڤه‌به‌ريا گشتى يا خانه‌نشينيێ ل هه‌رێمێ راگه‌هاند” دده‌مێ سێ خۆلێن بۆرى يێن په‌رله‌مانێ كوردستانێ 400 په‌رله‌مانتار يێن هاتينه خانه‌نشينكرن وده‌مێ ئه‌ڤ پرۆژه قانوونه دهێته په‌سه‌ندكرن ودبيته قانوون، دێ خانه‌نشينيا 69 په‌رله‌مانتارێن كه‌ڤن هێته هه‌لوه‌شاندن، چونكى ژيێ وان دبن 50 ساليێ دايه”.
ئەڤرۆ نیوز، نەوزاد هلۆری:
بازارێن فروتنا كەلوپەلێن بالا كو هندەك جاران ب بازارێن ده‌ستێ دويێ، بازارێن كەڤن و نوويا دهێنە نیاسین ، گەرمبوویە و ئەگەر ژی دزڤریت بۆ قەیرانا دارایی و گیروبونا موچەی و نەبوونا كاری، رۆژانە خەلكەكێ زور قەستا وان بازاران دكەت و پێدڤیێن خوە یێن رۆژانە ب بهایەكێ كێمتر ژ بازاری بدەستڤە دئینن.
محەمەد عەبدوللا وەلاتیەكێ بەردەرەشە و رۆژانە پێدڤیێن جودا جودا دفروشیت بۆ ئەڤرۆ نیوز گۆت” دەما چەند سالایە ئەز ل ڤێرێ كەلوپەل و پێدڤیێن جودا جودا دفرۆشم و بهايێن وان ژی گەلەك كێمترە ژ بازارێن نوو، نها خەلكێ زور قەستا بازارێن بالا دكەت بۆ كرینا پێدڤیێن خوە، ژ بەركو ل ڤێرێ كەلوپەل دئەرزانن و هەموو كەس نكارن پێدڤیێن نوو بكرن چونكی موچە نینن و قەیرانە”.
شێرزاد جومعە وەلاتیەكێ بەردەرەشێ یە دیاركر كو ئەو پێدڤیێن بازارێن بالا دهێنە فرۆتن كێمتر ژ وان كەلوپەلان نینن یێن كو ب بازارێن دى دهێنە فرۆتن و گۆت” پرانیا ئەو كەلوپەێن كو ل بازارێن بالا دهێنە فرۆتن ئەو كەلوپەلن كو كەسەكێ ڤیایە خانیێ خوە نوو بكەت و ئەو كەلوپەێن هەین ل ڤێرێ ب نیڤ بها و كێمتر دفرۆشیت ، یان ژی ب هندەك رێیا ل ئەوروپا و دەرڤە هاتینە و ل ڤێرە دهێنە فرۆتن ، یان ژی هندەك كەلوپەلن كو ژ كاركەفتینە پشتی هاتینە چێكرن ل ڤێرێ دهێنە فرۆتن ڤە ، بێگومان ئەڤ بازارە دەلیڤەكا زێرینە بۆهەژاران و وان كەسێن كو گەلەك كێمدەرامەتن”.
زێدەتر گۆت” هندەك جاران سەلاجە ب 100 هزار دیناران دهێنە فرۆتن ، ل بازاران هەتا 400 دۆلاران ناهێنە كرین، تێلەڤزیوون ب 50 بۆ75 هزار دیناران دهێنە فرۆتن و ل بازاران هەتا 300 دۆلاران ناهێنەكرین، ب ڤی رەنگی بهایێن جلكان و پێدڤیێن ناڤمالێ ب نیڤ بها و وكێمتر ژى دهێنە فرۆتن”.
ئه‌ڤرۆنيوز:
حوكمه‌تا عيراقى لژنه‌كا هه‌فت كه‌سى بۆ هووربينيكرنێ دليستا مووچه‌خۆرێن وه‌زاره‌تێن په‌روه‌ردێ وساخله‌ميێ ل هه‌رێما كوردستانێ پێكئينا كو دو ژوان كوردن .
ده‌زگه‌هێن راگه‌هاندنێ يێن عيراقێ به‌لاڤكريه كو حوكمه‌تا عيراقێ برياردايه ب پێكئينانا لژنه‌كێ بۆ هووربينێێ دليستێن مووچێن فه‌رمانبه‌رێن وان هه‌ردو وه‌زاره‌تێن هه‌رێمێ دا.
راگه‌هاندنا عيراقێ ناڤێن هه‌ر هه‌فت ئه‌ندامێن لژنێ ئاشكراكرينه ئه‌وژى:
قاسم عينايه‌ت نوونه‌رێ وه‌زاره‌تا پلاندانانێ ، سه‌رۆكێ لژنێ و تارق جاسم ئه‌ندامێ ده‌سته‌يا راوێژكارى و هه‌نا ئه‌حمه‌د رێڤه‌به‌را گشتى يا كاروبارێن كارگێرى ل وه‌زاره‌تا په‌روه‌ردا عيراقێ، نايف سامر رێڤه‌به‌رێ گشتى ل وه‌زاره‌تا په‌روه‌ردا عيراقێ، عه‌لى حسێن رێڤه‌به‌رێ گشتيێ پلاندانانێ ل وه‌زاره‌تا ساخله‌ميا عيراقێ، ڤيان حسێن رێڤه‌به‌را گشتى يا پلاندانانێ ل وه‌زاره‌تا ساخله‌ميێ ل هه‌رێما كوردستانێ، يوسف عوسمان سورچى رێڤه‌به‌رێ گشتيێ پلاندانانێ ل وه‌زاره‌تا په‌روه‌ردێ ل هه‌رێما كوردستانێ.
ڤيان حسێن رێڤه‌به‌را گشتى يا پلاندانانێ ل وه‌زاره‌تا ساخله‌ميێ ل هه‌رێما كوردستانێ، كو ئه‌نداما وێ لژنێ يه، دداخۆيانيه‌كێ دا بۆ ده‌زگه‌هێن راگه‌هاندنێ ل هه‌رێمێ، فه‌رمانا پێكئينانا وێ لژنێ پشتراستكر وگۆت” پشتى بێهنڤه‌دانا سه‌رێ سالێ دێ ده‌ست ب كۆمبوونان كه‌ين”.
ئەڤرۆ نیوز، باسم قاسم
دوهی ل دەمژمێر 11:00 شەڤێ گەنجەکی د ناڤ سەنتەرێ قەزا شنگالێ دا ب ده‌مانجێ دووماهى ب ژيانا خوه ئينا.
چالاکڤانێ مەدەنی هانی هەسکانی بۆ ئەڤرۆ نیوز ،گۆت” دوهی ل دەمژمێر 11:00 شەڤێ گەنجەکی بناڤێ (سافی خەلەف بالی ) کو ژیێ وی نێزیکی 27 سالان بوو، دەست دبه‌ته دەمانجێ وخوه دكۆژيت”.
هەسکانی بتر گۆت” هەتا نه‌كو نەهاتیە زانین کو ب ئەگەرێ چ ئەڤی گەنجی خوه كوشتيه”.
ئه‌ڤرۆ نيوز:
پرۆژێ قانوونا “چاكسازى د خانه‌نشينى و مووچه و ده‌رمالان دا” د 20 ماددان دا بۆ چاكسازى د وارێ مووچه و خانه‌نشينى، ب بڕيارا ژماره 129 يا جڤاتا وه‌زيران په‌سه‌ند كر و دێ ره‌وانه‌ى په‌رله‌مانێ كوردستانێ هێته كرن.
ئامانج ره‌حيم، سكرتێرێ جڤاتا وه‌زيرێن هه‌رێما كوردستانێ راگه‌هاند كو پيرۆژێ قانوونێ ميكانيزما ئاشكه‌را بۆ هاتيه دانان و ب گۆره‌ى بڕيارێ كو ئيمزا نێچيرڤان بارزانى، سه‌رۆكێ حوكمه‌تا هه‌رێما كوردستانێ ل سه‌ره و د 90 رۆژێن ئێكێ يێن سالا دارايى 2018 دڤێت بكه‌ڤيته وارێ بجهئينانێ. پرۆژه كو پرۆژه‌كێ هه‌ڤپشك يێ حوكمه‌ت و په‌رله‌مان و دامه‌زراوێن چاڤدێريێ و ده‌سپاكى و داخوازكه‌ريا گشتى و شورايه.
سكرتێرێ جڤاتا وه‌زيران ل هه‌رێما كوردستانێ دبێژيت: “ب هيڤى مه د ڤێ قووناغا قانوون دانانا په‌رله‌مانێ كوردستانێ زوو بهێته بجهئينان و ژ وێ گرنگتر ژى بجهئينانا وێ ژ لايێ هه‌موويان، هه‌تا كو دادپه‌روه‌رى بهێته سه‌پاندن و ئێدى مووچه‌خۆرێن شايسته نه‌بنه قوربانى ئه‌وێن ب نه‌ره‌وايى ژ پارێ گشتى مفادار دبن كو ب مخابنى ڤه ب هنده‌ك قانوونێن ره‌وا رێ پێ هاتيه دان.
نيشاندان