ه‌ڤرۆنيۆز:
وه‌زاره‌تا ده‌رڤه يا ئه‌مريكى راگه‌هاند، ئه‌مريكا يا به‌رده‌وامه ل سه‌ر بزاڤێن خوه دناڤبه‌را هه‌ولێرێ وبه‌غدا وداخواز ژێ دكه‌ت ده‌ست ب دانوستاندنان بكه‌ن ژبۆ چاره‌سه‌ركرنا ناكۆكى وكێشێن هه‌لاويستى دناڤبه‌را واندا.
هيزر نويرت، په‌يڤدارا فه‌رمى يا وه‌زاره‌تا ده‌رڤه يا ئه‌مريكى دكۆنگره‌كێ رۆژنامه‌ڤانى دا دياركر، هه‌تا نوكه حوكمه‌تا عيراقێ داخواز ژ ئه‌مريكا نه‌كريه رۆله‌كێ بگێريت بۆ نيزيكبوونا بۆچوونان دناڤبه‌را به‌غدا وهه‌ولێرێ دا.
ئه‌ڤرۆنيۆز:
ژێده‌ره‌كى ژ وه‌زاره‌تا دارايى وئابوورى ل هه‌رێما كوردستانێ راگه‌هاند، ل هه‌فتيا داهاتى وه‌زاره‌تا دارايى وئابوورى دێ خشتێ تايبه‌ت ب به‌لاڤكرنا مووچێن هه‌يڤا 9 يێن وه‌زاره‌تێن هه‌رێما كوردستانێ به‌لاڤ كه‌ت.
ژێده‌رێ ناڤبرى بۆ ئه‌ڤرۆنيۆز گۆت، ئێكه‌مين وه‌زاره‌ت مووچێ هه‌يڤا 9 پێ بهێته دان، دێ وه‌زاره‌تا پێشمه‌رگه بيت.
ئه‌ڤر نيوز: ره‌وان نهێلى:
محەمەد هاودیانى وەزیرێ کاروکاروبارێن جڤاکی يێ حوكمه‌تا هه‌رێمێ دياركريه، دياركريه كو ئه‌و هاتيه ئاگاداركرن ب هه‌بوونا كه‌يسه‌كێ توندوتيژيێ دژى زارۆيه‌كێ و دبێژيت: ئه‌ڤرۆ من سه‌ره‌دانا وى زارۆى كر ل نه‌خوشخانا راپه‌رين ، جهێ داخێ يه گه‌له‌ك ب ره‌نگه‌كێ نه‌مروڤايه‌تى ره‌فتار ل گه‌ل وى زارۆيێ ب ناڤێ يوسف هاتيه كرن، كو ژيێ وى نه‌هـ ساله، پشتى پشكنينێن ساخله‌ميێ بۆ هاتينه كرن دياربوويه كو دو هه‌يڤه خوارن پێ نه‌هاتيه دان و كێشا وى بۆ 10 كيلويان هاتيه خواريه و هێز تێدا نه‌مايه هاتن و چوونێ بكه‌ت.
ئه‌ڤرۆنيۆز:
وه‌زيرێ ده‌رڤه‌يێ ئه‌مريكا راگه‌هاند،كۆمارا ئيسلامى يا ئيرانى ب ره‌فتارێن خوه سه‌قامگيرى ل ل سووريێ ويه‌مه‌نێ ولوبنانێ يا تێكداى.
ريكس تيله‌رسۆن، وه‌زيرێ ده‌رڤه‌يێ ئه‌مريكا دكۆمبوونه‌كێ دا ل گه‌ل وه‌زيرێن ده‌رڤه يێن وه‌لاتين ئێكه‌تيا ئه‌ورۆپى وناتۆى گۆت” پشته‌ڤانيێ ل رێككه‌فتنا ئه‌تۆمى ل گه‌ل ئيرانێ دكه‌ين، هه‌رچه‌نده ب ره‌فتارێن خوه سه‌قامگيرى ل يه‌مه‌نێ وسووريێ ولوبنانێ يا تێكداى”.
داخۆيانيا وه‌زيرێ ده‌رڤه‌يێ ئه‌مريكا پشتى ده‌مه‌كێ كۆرت ژ كوشتنا عه‌لى عه‌بدوللا سالح سه‌رۆكێ يه‌مه‌نێ يێ به‌رێ دهێت كو دپۆسه‌كێ دا ل سه‌ر ده‌ستێ حوسيان (شيعێن يه‌مه‌نى) هاتبوو كوشتن.
ئه‌ڤرۆنيۆز:
رۆژنامه‌كا ئيسرائيلى به‌لاڤكر كو سه‌رۆك وه‌زيرێن ئيسرائيلێ دكۆنگره‌كێ رۆژنامه‌ڤانيدا راكه‌هاند، نوكه ده‌مێ وێ چه‌ندێ يه ل دژى ئيرانێ بزاڤێن خوه بێخينه كارى.
رۆژناما( ئۆرشه‌ليم تايمز) يا ئيسرائيلى دراپۆرته‌كا خوه‌دا به‌لاڤكريه، بنيامين ناتانياهۆ سه‌رۆك وه‌زيرێن ئيسرائيل، ئه‌ڤرۆ چارشه‌مبى 6/12/2017 دكۆنگره‌كێ رۆژنامه‌ڤانيدا گۆت” رێ ناده‌ين ئيرانێ ده‌ستهه‌لات وپێگه‌هێ خوه ل ده‌ڤه‌رێ ب تايبه‌تى ل سووريێ زێده‌تر بكه‌ت”.
ناتانياهۆ به‌حسێ وێ چه‌ندێ ژى كر كو ئيسرائيل رێ ناده‌ت ئيرانێ كو ل سووريێ بنگه‌هێن له‌شكرى يێ به‌رده‌وام دانيت.
سه‌رۆك وه‌زيرێن ئيسرائيلێ داخواز ژ جڤاكێ نێڤده‌وله‌تى كر كو به‌رهنگاريا گه‌شه‌كرنا مۆشه‌كێن باليستى يێن ئيرانێ وده‌ستهه‌لاتا ئه‌تۆمى وپشته‌ڤانيا وى وه‌لاتى ل تيرۆرێ، ببن.
ل به‌رانبه‌ر ڤان گه‌فێن ئيسرائيلێ، عه‌لى ئه‌كبه‌ر ويلايه‌تى شيره‌تكارێ عه‌لى خامه‌نه‌ئى رێبه‌رێ ئيرانێ بۆ كاروبارێن نێڤده‌وله‌تى، دياركر كو ئه‌و له‌شكرێ پاسداران وله‌شكرێ قودس ژ سووريێ ڤه‌ناكێشن ودێ درێژيێ ب كارێن خوه ده‌ن.
ئه‌ڤرۆنيۆز:
وه‌لاته‌كێ ئه‌ورۆپى برياردا 100 شيره‌تكارێن له‌شكرى بۆ مه‌شقكرنا هيزێن پێشمه‌رگه‌ى بهنێريت.
ل دووڤ ده‌نگوباسه‌كێ رۆژناما(يوكه‌ى ديفينس جۆرنال) يا سكوتلاندى، ئه‌و 100 شيره‌تكارێن له‌شكرى يێن سكوتلاندى دبوارێن مه‌شقا له‌شكرى، كاراكرنا هێزا په‌ياده، هاوارهاتنا بله‌ز يا نوشدارى وراكرنا بۆمبا دێ هاريكاريا پێشمه‌رگه‌ى كه‌ن.
دياركر ژى، ئه‌و 100 شيره‌تكارێن له‌شكرى، ئه‌فسه‌ر وسه‌ربازێن كه‌تيبا دويێ ژفه‌وجا شاهانه يا سكوتلاندى نه وبۆ ده‌مێ شه‌ش هه‌يڤان دێ مه‌شقێ ب پێشمه‌رگه‌ى كه‌ن.
سكوتلاندا، كو ئێك ژوه‌لاتێن بريتانيا مه‌زنه، ب هه‌مان شێوێ هه‌رێما كوردستانێ، ريفراندۆم بۆ سه‌ربخوه‌يێ ئه‌نجامدا، به‌لێ به‌رۆڤاژى وه‌لاتيێن كوردستانێ، كو ل 25 ئه‌يلوولا 2017 زێده‌تر ژ 92% ده‌نگ ب سه‌ربخوه‌يا كوردستانێ وجودابوونێ ژ عيراقێ داى، پتريا وه‌لاتيێن سكوتلاندا داخواز مانێ دچارچۆڤێ بريتانيا مه‌زن دا كربوو.
ئه‌ڤرۆنيۆز ، نه‌وزاد هلۆرى:
وه‌لاتیه‌كێ سنوورێ ناحیا دینارته یا سه‌ر ب قه‌زا ئاكرێ ڤه ده‌ستێ خوه دانايه سه‌ر پتريا دارێن كه‌زانان ل چیایێ پیرس ووه‌كو كه‌زاخه دبریت و ل به‌ره بكه‌ت فسته‌ق و ب مولكێ خوه دبینیت ، دارستان و پاوانا ئاكرێ ژى دیاركر كو ب چو شێوه‌یان رێ ب كه‌سێ ناهێته‌دان بێى موله‌ت كه‌زانان بكه‌ت فسته‌ق.
وه‌لاتيه‌كێ ناحیا دینارته یا سه‌ر ب قه‌زا ئاكرێ كو نه‌ڤیا ناڤێ خوه بێژیت دیاركر كو هنده‌ك كه‌سان ل سنررێ ناحیا دینارته ل به‌ره دارێن كه‌زانان ل چیایێ پیرس بكه‌ن فسته‌ق و بۆ ئه‌ڤرۆ نیوز گۆت” برینا داران ل چیایێ پیرس و هه‌موو ده‌ڤه‌ران قه‌ده‌غه‌یه، به‌لێ وه‌لاتیه‌ك دارێن كه‌زانان وه‌كو كه‌زاخه دبریت و دكه‌ت فسته‌ق كو ئه‌ڤه ژى بوویه جهێ دلگرانیا خه‌لكى”.
زێده‌تر گۆت” نێزیكێ هزار دارێن كه‌زانان هه‌نه، ئه‌و كه‌س ب مولكێ خوه دبینیت و نوكه پتريا وان دكه‌زاخه كرینه و دخوازیت بكه‌ت فسته‌ق، هه‌كه رێگرى لێ نه‌هێته‌كرن، ئێدى به‌رهه‌مێ كه‌زانێ ل چیایێ پیرس نامینیت و وه‌لاتى نكارن ئێدى بچنه كه‌زانان “.
ژێده‌ره‌كێ ژ فه‌رمانگه‌ها دارستان و پاوانا ئاكرێ كو ناڤێ وى ل ده‌ف ئه‌ڤرۆ نیوز يێ پاراستیه ، د داخۆيانيه‌كێ دا بۆ ئه‌ڤرۆ نیوز گۆت” راسته وه‌لاتیه‌كى بزاڤكرن كو دارێن كه‌زانان ل چیایێ پیرس وه‌كو كه‌زاخه ببریت و ل شوونا وان بكه‌ت دارا فسته‌قێ ئه‌و ژى ب رێیا كریارا به‌درمه ، به‌لێ پۆلیسێن دارستانێ پێحه‌سیان و ب زووترین ده‌م گه‌هشتنه چیایێ پیرس و رێگرى ل كارێ وان كر و راوه‌ستاندن”.
زێده‌تر گۆت” هه‌تاكو مۆله‌ت ژ رێڤه‌به‌ریا دارستان و پاوانان ل دهۆكێ نه‌هێته وه‌رگرتن، ب چو شێوه‌یان ناهێلین كو ئه‌و وه‌لاتى و چو وه‌لاتیێن دى دارێن كه‌زانان و دارێن دن ژى ببرن و بكه‌ن فسته‌ق”.
ل دۆر وێ چه‌ندێ بوچى بتنێ دارێن كه‌زانان دهێنه كه‌زاختن وبكارئینان وه‌كو دارا فسته‌قێ ، گۆت” دارا كه‌زانێ و دارا فسته‌قێ ژ ئێك توخمن و چیایێ پیرس ژى گه‌له‌ك دارێن كه‌زانان هه‌نه ، ئه‌ڤ چه‌نده ژى بووویه ئه‌گه‌ر كو ئه‌و كه‌س په‌نایێ بۆ دارێن كه‌زانان ببه‌ت و وه‌كو دارا فسته‌قێ بكاربینیت”.
ئه‌ڤرۆنيۆز:
سه‌رۆكێ لژنا وزێ وسامانێن سروشتى ل جڤاتا پارێزگه‌ها سلێمانيێ راگه‌هاند، ل هه‌فتيا بهێت ده‌ست ب به‌لاڤكرنا گازا سپى ل سه‌نته‌رێ باژێرێ سلێمانيێ دێ هێته كرن.
د. غالب محه‌مه‌د سه‌رۆكێ لژنا وزێ وسامانێن سروشتى ل جڤاتا پارێزگه‌ها سليمانيێ، گۆت، نوكه گازا سپى ل قه‌زا وناحيێن ده‌وروبه‌رى باژێرێ سلێمانيێ يا دهێته به‌لاڤكرن وتنێ مه ئێك مليۆن لتر يێن ماين كو ل وان ده‌ڤه‌ران به‌لاڤ بكه‌ين ول ده‌مێ هه‌فتيه‌كێ به‌لاڤكرن دێ ب دووماهى هێت.
غالبى زيده‌تر بۆ دوارۆژ گۆت، نوكه رۆژانه 3 هه‌تا 5 تانكه‌رێن گازا سپى بۆمه ژ عيراقێ دهێنه سلێمانيێ ورۆژانه كۆم دكه‌ين ودێ ل هه‌فتيا بهێت دناڤ سه‌نته‌رێ باژێرێ سلێمانيێ دا به‌لاڤكه‌ين .
ئەڤرۆ نیۆز،زنار تۆڤى:
رێڤه‌به‌رێ ناحیا كانى ماسێ سه‌ربه‌ست سه‌برى ئاكره‌یى بۆ ئه‌ڤرۆ نیۆز دیاركر:كانى ماسێ ل سالا 1928 بوویه ناحیه و سه‌ر ب قه‌زا ئامێدیێ ڤه‌یه،ئه‌ڤ ده‌ڤه‌ره ب چاندنێ و ب تایبه‌تى ب سێڤان یا بناڤوده‌نگه،هه‌روه‌سا ژبه‌ر هه‌بوونا كانى و ژێده‌رێن ئاڤێ كانى ماسێ جهه‌كێ گه‌له‌كێ خۆشه بۆ گه‌شتوگوزارێ ب تایبه‌تى ل وه‌رزێ هاڤینێ، هه‌وره‌سا ئاڤه‌كا ساخله‌م و ژینگه‌هه‌كا خۆش لێ هه‌یه،له‌ورا گه‌له‌ك ژ خه‌لكێ دهۆكێ و یێن ده‌ڤه‌رێن دیتر ژى ب مه‌ره‌ما گه‌شتكرنێ دهێنه ڤێ ده‌ڤه‌رێ،دیسا مه ب فه‌ر زانیه كو ئه‌م پیته‌ى و گرنگیێ ب لایه‌نێ گه‌شتوگوزاریا زڤستانى ژى بده‌ین.
ناڤهاتى گوت ژى:د به‌رنامێ مه دایه كو ئه‌ڤ ساله ب هه‌ڤكاریا كه‌رتێ تایبه‌ت گه‌شتوگه‌زاریا زڤستانى بۆ ڤێ ده‌ڤه‌رێ دابین بكه‌ین،ژبه‌ركو ل وه‌رزێ زڤستانێ به‌فره‌كا باش ل ڤێ ده‌ڤه‌رێ دباریت و ئه‌ڤ چه‌نده دبیته هاریكار بۆ هه‌بوونا گه‌ستوگوزاریا زڤستانى،هه‌وره‌سا هنده‌ك به‌لێنده‌ران به‌رهه‌ڤیا خوه دیاركریه كو ماتۆرێن ل سه‌ر به‌فرێ و پێدڤیێن دیتر یێن گه‌شتوگوزاریا زڤستانى ل ڤێ ده‌ڤه‌رێ دابین بكه‌ن و بتنێ ماسته‌ر پلان مایه و ل نێزیك ئه‌ڤ چه‌نده دێ كه‌فته د وارێ بجهئینانێ دا،دیسا خه‌لكێ مه ژى دێ مفاى ژڤێ چه‌ندێ بینیت،هه‌روه‌سا ده‌رگه‌هێ گۆمركا سه‌رزێرى ژى بوویه خاله‌كا بهێز بۆ هه‌بوونا گه‌شتوگوزاریا زڤستانى و رۆژانه گه‌له‌ك خه‌لك ژ باكۆر ژى سه‌ره‌دانا ڤێ ده‌ڤه‌رێ دكه‌ن و ئه‌ڤه‌ژى بوویه خاله‌كا دیتر بۆ ڤه‌ژاندنا كه‌رتێ ئابوورى و گه‌شتیارى و بازرگانى ل ڤێ ده‌ڤه‌رێ و بۆ سالێن بهێن ژى دێ ئه‌ڤ پرۆژه به‌رفره‌هتر لێ هێن.
ئه‌ڤرۆ نیۆز، نه‌وزاد هلۆرى:
ڤه‌گۆهاستنا باليۆزخانا ا ئه‌مریكا ل تئه‌لئه‌بیبێ بۆ قودسێ ، زورترین ئاخفتن و كارڤه‌دان ل په‌ى خوه هێلان ل جیهانێ ، و ره‌نگه ببیته سه‌ده‌ما درۆستبوونا شه‌ره‌كێ نوو ل ده‌ڤه‌رێ ، به‌رپرسێن ئه‌وروپا و عه‌ره‌ب هوشداریێن توند ل بارا ڤێ یه‌كێ دده‌ن ، و هه‌تا هنده‌ك ژ به‌رپرسێن ئه‌مریكا ژى ل وێ باوه‌ریێ نه كو ئه‌ڤ یه‌ك یاریكرنه ب ئاگرى.
ڤه‌گۆهاستنا باليۆزخانا ئه‌مریكا بۆ قودسێ وه‌سا دهێته هژمارتن كو دێ قودس بیته پایته‌ختێ ئیسرائیلێ و ئه‌ڤ یه‌ك ژى بوویه جهێ دلگرانیا فه‌له‌ستینیان و هوشداریێن درۆستبوونا شه‌ره‌كێ نوو دهێته‌كرن ل ده‌ڤه‌رێ ، به‌رپرسێن ئه‌ورۆپا و عه‌ره‌بى ژى دخوازن كو ئه‌ڤ یه‌ك نه‌هێته قه‌بوولكرن و داخوازێ ژ ئه‌مریكا دكه‌ن كو نه‌بیته ئه‌گه‌را درۆستبوونا چو شه‌ران ل ده‌ڤه‌رێ ، سه‌ره‌راى كو ئه‌ڤ یه‌ك بوویه جهێ دلگرانیا پشكه‌ك ژ به‌رپرسێن ئه‌مریكا ژى، به‌لێ ترامپ وه‌سا دده‌ت دیاركرن كو ئه‌وى د پرۆپاگندێن هه‌لبژاردنان دا سۆزا ڤێ یه‌كێ دابوویه و دێ هه‌ر بجهئينيت.
به‌رپرسێن ئه‌مریكا دده‌ن دیاركرن كو هه‌تا نها بریارا دووماهیێ بۆ ڤه‌گۆهاستنا باليۆزخانا ئه‌مریكا نه‌هاتیه دان و چاره‌نڤیسێ قودسێ ئێكه ژ بریارێن سیاسی يێن ئه‌مریكا كو ببیته سه‌ده‌ما چاره‌سه‌ركرنا ئاریشا سیاسی دناڤبه‌را ئیسرائیل و فه‌له‌ستینێ ، ژبه‌ركو ده‌ركرنا بریاره‌كا ب ڤى ره‌نگى دبيت ببیته سه‌ده‌ما درۆستبوونا شه‌ر و ئالوزیێن نوو نه‌ك تنێ ل فه‌له‌ستینێ، به‌لكو ل پرانیا وه‌لاتێن موسلمانان ل جیهانێ و دێ خوپێشاندان دژى ڤێ یه‌كێ هێنه‌كرن.
به‌رپرسه‌كێ بلند یێ ئه‌مریكا كو نه‌ڤیا ناڤێ وى بهێته به‌لاڤكرن بۆ ئاژانسا رویته‌رز دیاركر كو دبیت ئه‌ڤرۆ رۆژا چوارشه‌مبى دونالد ترامپ بریارا ڤه‌گۆهاستنا بالیوزخانا ئه‌مریكا ژ ته‌لئه‌بیب بۆ قودسێ بده‌ت ، ئه‌ڤه سه‌ره‌راى كو گارید كوشنه‌ر راوێژكارێ سه‌رۆكێ ئه‌مریكا رۆژا ئێكه‌شه‌مبیا بۆرى دیاركربوو كو هێشتا سه‌رۆكێ ئه‌مریكا بریارا دووماهيێ نه‌دایه.
پێشتر كوچكا سپى یا ئه‌مریكا دیاركربوو كو پرسا ڤه‌گۆهاستنا باليۆزخانا ئه‌مریكا ل ته‌لئه‌بیب بۆ قودسێ ، پرسه‌كه به‌رى نها ترامپ ب تایبه‌تى د ده‌ما هه‌لبژاردنان دا سۆزدابوو كو ئێكلا بكه‌ت ، به‌لێ به‌رپرسێن پله بلندێن ئه‌مریكا ل وێ باوه‌ریێ نه كو ره‌نگه ترامپ بریارا ڤه‌گۆهاستنێ پاش بێخیت ، به‌لێ رژده ژى كو هه‌ر ڤه‌گۆهێزیته قودسێ و بۆ ڤێ یه‌كێ ژى پلانه‌كا ب هێز دانایه.
هنده‌ك ژ به‌رپرسێن ئه‌مریكا ل وێ باوه‌ریێ نه كو ئه‌ڤ بریارا ئه‌مریكا دێ بیته سه‌ده‌م كو به‌رژه‌وه‌ندێن ئه‌مریكا ل رۆژهه‌لاتا ناڤه‌راست بێخیته ژێر مه‌ترسیێ ، هه‌موو دۆست و هه‌ڤپه‌یمانێن ئه‌مریكا ل ده‌ڤه‌رێ دلگران كرینه.
خالید كورێ سه‌لمانى كونسولێ سعودیێ ل ئه‌مریكا دده‌تن دیاركر كو هه‌ر راگه‌هاندنه‌كا ژلایێ ئه‌مریكا ل بارا چاره‌نڤیسێ قودسێ به‌رى چاره‌سه‌ربوونا ئاریشا دناڤبه‌را ئیسرائیل و فه‌له‌ستینێ بهێته هاڤێتن، دێ بیته سه‌ده‌ما درۆستبوونا ئالوزیان.
د هه‌مان ده‌م دا ئه‌یمه‌ن سه‌فدى وه‌زیرێ ده‌رڤه‌یێ ئوردن د په‌یوه‌ندیه‌كا تێله‌فونى دا ل گه‌ل ریكس تێره‌لسون وه‌زیرێ ده‌رڤه‌یێ ئه‌مریكا هوشداریێن توند دانه ئه‌مریكا ل بارا هاڤێتنا هه‌ر پێنگاڤه‌كا تاكلایه‌نانه ژلایێ ئه‌مریكا بۆ ڤه‌گۆهاستنا باليۆزخانا ئه‌مریكا ژ ته‌لئه‌بیب بۆ قودسێ ، و ئه‌ڤ یه‌ك ژى زڤراند بۆ هه‌بوونا ئه‌وى پێگه‌هێ مێژوويى و ئاینیێ دناڤبه‌را موسلمان و قودسێ هه‌یى ب گشتى و ئوردن و فه‌له‌ستینێ ب تایبه‌تى.
مه‌حمود عه‌باس كو ئێكه ژ مه‌زنه نوونه‌رێن رێكخراوا رزگاركرنا فه‌له‌ستنێ و سه‌رۆكێ فه‌له‌ستینێ دیاركر كو ڤه‌گۆهاستنا باليۆزخانا ئه‌مریكا بۆ قودسێ وه‌كو ماچا مرنێ یه و دێ بیته سه‌ده‌ما درۆستبوونا شه‌ر و ئالوزیێن نوو دناڤبه‌را هه‌ردو ده‌وله‌تان دا و بۆ هه‌موو جیهانا ئیسلامى ڤه‌گوهێزیت و هه‌بوونا هه‌ر بریاره‌كا ب ڤى ره‌نگى ره‌ت دكه‌ین، هه‌ڤده‌م حوسام زملت كو ئه‌و ژى ئێكه ژ نوونه‌رێن رزگاریخوازیا واشنتونێ دیاركر ئه‌گه‌ر ئه‌مریكا ب ڤى ره‌نگێ ره‌فتارێ بكه‌ت دێ ل دووماهیێ ده‌رئه‌نجامێن كاره‌ساتبار ژى هێنه چاڤه‌رێكرن.
دانێل بنجامین به‌رپرسێ به‌رێ يێ ده‌زگه‌هێ به‌رهنگاربوونا تیرۆرێ ل ئه‌مریكا كو نها مامۆستایه ل زانكویا دارتموس دیاركر كو ئه‌وا كو دهێته روودان یاریكرنه ب ئاگرى ژلایێ دونالد ترامپى ڤه.
ژلایه‌كێ دى ڤه ئیمانوێل ماكرۆن سه‌رۆكێ فه‌ره‌‌نسا د په‌یوه‌ندیه‌كا تێله‌فونى دا ل گه‌ل سه‌رۆكێ ئه‌مریكا ، دلگرانیا خوه دیاركر و دوپات ل وێ یه‌كێ هاته‌كرن كو پێدڤیه چاره‌نڤیسێ قودسێ ب رێككه‌فتنا ئاشتیانه دناڤبه‌را ئیسرائیل و فه‌له‌ستینێ و دامه‌زراندنا دو ده‌وله‌تان ل ده‌ڤه‌رێ بهێته چاره‌سه‌ركرن.
نيشاندان