ئه‌ڤرۆ نيۆز:
سه‌رۆك وه‌زيرێن هه‌رێما كوردستانێ راگه‌هاند، دچار خالاندا بۆچوونا هه‌رێما كوردستانێ مه گه‌هانده سه‌رۆكي فره‌نسا وپاريس دشێت رۆل هه‌بيت دچاره‌سه‌ركرنا كێشێن دناڤبه‌را حوكمه‌تا هه‌رێمێ وعيراقێ.
نێچيرڤان بارزانى سه‌رۆك وه‌زيرێن هه‌رێما كوردستانێ دكۆنگره‌كێ رۆژنامه‌ڤانيێ هه‌ڤپشك دا ل گه‌ل ئێمانوێل ماكرۆن سه‌رۆكێ فره‌نسا، گۆت، من ب پێدڤى زانى سوپاسيا ماكرۆنى بكه‌م كو پێشوازى ل مه كرى ل كۆچكا ئه‌ليزێه وسوپاسيا فره‌نسا دكه‌ين بۆ هه‌موو ئه‌و هه‌لويستێن ديرۆكى به‌رامبه‌ر گه‌لێ كوردستانێ وگه‌لێ عيراقێ هه‌بوو، سوپاسيا فره‌نسا دكه‌ين بۆ هه‌موو وان هاريكاريێن ل گه‌ل هه‌رێما كوردستانێ وعيراقێ كرى دژى تيرۆرستێن داعشێ.
بارزانى دووپاتى ل سه‌ر وێ چه‌ندێ ژى كر كو فره‌نسا دشێت رۆله‌كێ سه‌ره‌كى دچاره‌سه‌ركرنا كێشێن دناڤبه‌را حوكمه‌تا هه‌رێما كوردستانێ وحوكمه‌تا عيراقێ بگێريت.
نێچيرڤان بارزانى ئاشكراكر كو بۆچوونا خوه دچار خالان دا گه‌هانده سه‌رۆكێ فره‌نسا وپێگيريا هه‌رێما كوردستانێ ب عيراقه‌كا ئێكگرتى و فيدرال كو رێز ل دستوورى بهێته گرتن دووپاره كر وگۆت، مه ب سه‌رۆكێ فره‌نسا راگه‌هاند كو چو كێشه مه نينه ل دووڤ دستوورێ عيراقێ ل بابه‌تێ ده‌ستهه‌لاتا فيدرالى ل خالێن سنورى، هه‌روه‌سا مه پێ راگه‌هاند كو ئه‌م دبه‌رهه‌ڤين بۆ دانوستاندنا ئاڤاكه‌ر بۆ چاره‌سه‌ركرنا هه‌موو كێشان ل پيناڤێ سه‌قامگيريا ده‌ڤه‌رێ دچارچۆڤێ دستوورێ عيراقێ دا.
سه‌رۆك وه‌يزرێن هه‌رێما كوردستانێ نه ڤه‌شارت ژى كو پێشتر مه بۆچوونا خوه ل دۆر بريارێن دادگه‌ها فيدرالى يا دياركرى ومه ئاماژه ب وێ چه‌ندێ دايه كو رێزێ ل بريارا دادگه‌ها فيدرالى دگرين.
ل دۆر ريفراندۆمێ ژى، نێچيرڤان بارزانى گۆت، سه‌باره‌ت ريفراندۆمێ ، ئه‌م يێن دقۆناغه‌كا نوو دا، ئه‌و بابه‌ته يێ ب دووماهى هاتى ووه‌كو حوكمه‌تا هه‌رێما كوردستانێ مه بۆچوونا خوه يا ده‌ربرى ومه رێز ل بۆچوونا دادگه‌ها فيدرالى يا گرتى، پرسيار ئه‌وه مه دڤێت سه‌قامگيرى ل عيراقێ هه‌بيت يان نه؟ ئه‌م وه‌كو هه‌رێما كوردستانێ دبه‌رهه‌ڤين دچارچۆڤێ عيراقه‌كا ئێكگرتى كيشێن خوه ل سه‌ر بنه‌مايێن دستوورى ل گه‌ل عيراقێ چاره‌سه‌ر بكه‌ين، ئه‌و پێگيريا مه ژى مه ب سه‌رۆكێ فره‌نسى راگه‌هانديه كو دبه‌رهه‌ڤين بۆ هاريكاريا به‌غدا ب گۆره‌ى دستوورى ل دۆر بابه‌تێ هه‌بوونا وان ل خالێن سنورى.
نيشاندان
