ئه‌ڤرۆنيوز:
له‌شكرێ عيراقێ هنارتنا هێزه‌كا خوه بۆ سكرێ مووسل راگه‌هاند.
ليوا “نه‌جم جبوورى” فه‌رماندێ ئوپه‌راسيۆنێن نه‌ينه‌وا گۆت” هێزا هاتيه هنارتن پێكدهيت ژ150 سه‌ربازێن تايبه‌تمه‌ند ب كارێن چاڤدێريێ ڤه، دگه‌لدا 150 هه‌مه‌ر و20 ترومبێلێن له‌شكرى يێن ڤه‌گۆهاستنێ و20 ترومبێلێن تايبه‌ت ب راكرنا مينان”.
جبوورى زێده‌تر بۆ شه‌فه‌ق نيوز گۆت”مه‌ره‌م ژهنارتنا ڤێ هێزا له‌شكرى، پاراستنا سكرێ مووسلێ يه ژهه‌ر هێرشه‌كا تيرۆرستى”.
ئه‌ڤرۆ نیۆز ، ره‌مه‌زان هه‌رنى :
ئه‌ڤرۆ روژا هه‌ینى 8.12.2017 ل تلسقوف ب به‌رهه‌ڤبوونا فه‌رمانده‌یێن پێشمه‌رگه‌یێ كوردستانێ و كونسولێ ئه‌مریكا ل هه‌ولێرێ و هژماره‌كا مه‌تران و هاولاتیێن مه‌سیحى كه‌نیسه‌یا مارگوركیس ل تلسقوف هاته ڤه‌كرن، پشتى ل سالا 2014 ێ داعشێ كه‌نیسه وێرانكرنى سه‌ر ژنوو هاتیە نووژه‌نكرنڤه و ئەڤرۆ مه‌راسیمه‌كا ئایینێ مه‌سیحى تێدا هاته برێڤه‌برن و ئەڤ چەندە هات ژبه‌ر وێ ئارامیا هێزێن پێشمه‌رگه‌ى ل وێ ده‌ڤه‌رێ دروستكرى.
ئەڤرۆ نیۆز ، زنار تۆڤی:
رێڤەبەرێ دەزگەهێ رەوشەنبیری و ھشیاریێ ل وەزارەتی پێشمەرگەی، ئاماژە ب هندێ دا کو تا نوکە ھێزێن ھەڤپەیمانان بەردەوامن ل ھەڤکاریکرن و ھەماھەنگیێ ل گەل ھێزێن پێشمەرگەی.
ھەلگورد حکمەت رێڤەبەرێ دەزگەهێ رەوشەنبیری و ھشیاریێ ل وەزارەتا پێشمەرگەی، بۆ باس راگەهاند:ھەڤپەیمان د بەردەوامن ل سەر ھاریکاریکرنا ھێزێن پێشمەرگێ کوردستانێ، چ ب رێیا مەشق و راھێنان و چ ب رێیا ژوورا عەمەلیاتێن ھەڤبەشە، ئەڤ ھەمانگییە دێ یا بەردەوام بیت تا تەمامبوونا ئەرکێن مە.
هەروەسا گوت ژی:بۆ ڤێ ژی مە پێدڤی ب درێژەدانا وێ ھەمانگیێ ھەیە،ب شاهدیا ھەڤپەیمانان د ماوێ بوری دا هێزێن پێشمەرگەی رۆلەکێ قارەمانان دیتیە ل دوماهی ئینان ب داعشان، ئەڤ ئەرکە دێ یێ بەردەوام بیت و مە د ماوێ بوری دا سەردانەک بۆ واشنتۆن کریە و ل وێرێ ژی مە جەخت ل هندێ کریە کو دڤێت ژوورا ئۆپەراسیۆنا ھەڤبەش یا ھەڤپەیمانان و ھێزا پێشمەرگەی بەرفرەهی هەبیت و درێژ ببیت.
ئاشکراکر ژی،کو ل ماوێ بوری دا کۆمەکا مەشق و راھێنان ب ھێزا پێشمەرگەی هاتیه کرن،ل گەل هندێ ژی مە ھێلا تەماسێ ل گەل سوپایێ عێراقێ ھەیە،هەروەسا دڤێت ھەڤپەیمان ژی سەرپەرشتیا وێ هێلا تەماسێ بکەن.
ئه‌ڤرۆنيوز:
پشتى وێ بيڤه‌له‌رزا سپێده‌يا زوو يا ئه‌ڤرۆ ل هه‌له‌بجه وده‌ربه‌نديخان داى، به‌رى ده‌مه‌كێ كێم جاره‌كادى بيڤه‌له‌رزه‌كێ ل چه‌ند ده‌ڤه‌رێن هه‌رێما كوردستانێ دا.
دارا حه‌سه‌ن، رێڤه‌به‌رێ كه‌شناسى وبيڤه‌له‌رزان ل پارێزگه‌ها سلێمانيێ راگه‌هاند” به‌رى ده‌مه‌كێ كێم بيڤه‌له‌رزه‌كێ ل سنورێن قه‌زايێن ده‌ربه‌نديخان وشاره‌زوور وسه‌يد سادق ل پارێزگه‌ها سلێمانيێ دا ووه‌لاتيێن وان ده‌ڤه‌ران ژترسان دا ژ مالێن خوه ده‌ركه‌فتن”.
داراى دياركر”هێزا وێ بيڤه‌له‌رزێ 4.5 بوو” گۆت ژى ” روودانێن بيڤه‌له‌رزان دێ يا به‌رده‌وام بيت”.
زێده‌تر بۆ دوارۆژ گۆت” ئه‌ڤرۆ بيڤه‌له‌رزا دويێ يه دهێته روودان كو بيڤه‌له‌رزا ئێكێ ل سنوورێ پارێزگه‌ها هه‌له‌بجه بوو”.
خوياكر ژى” هه‌تا نوكه ئه‌م نزانين كا زيانێن مادى وگيانى هه‌بوون يان نه”.
ئاشكراكر ژى” روودانا ڤان بيڤه‌له‌رزان دێ يا به‌ردوامبيت هه‌تاكو چينێن ئه‌ردى ب تمامى ئێك دگرن كو پشتى بيڤه‌له‌رزا ب هێزا رۆژا 12/11/2017 جودا بووين، به‌لێ مه‌ترسى ل سه‌ر وه‌لاتيان نابيت”.
ئه‌ڤرۆنيۆز:
ده‌زگه‌هێ ئه‌تلانتيك كاونسل يێ ڤه‌كۆلينان راپۆرته‌ك ل دۆر (ئيران ل عيراقێ) به‌لاڤكر وتێدا دبێژيت، پێزانينێن ئه‌مريكا ل دۆر هه‌ژموونا ئيرانێ ل عيراقێ ددروست نينن، چونكى ئيران ب نهينى وئالۆزى سياسه‌تێ ل عيراقێ دكه‌ت.
ئەتلانتیك کاونسل كو ده‌زگه‌هه‌كێ ناڤدارێ ئەمریکی یە وهه‌ر ژ سالا 1961ل دۆر سیاسەتا دەرڤه يا وه‌لاتان راپۆرتان به‌لاڤ دكه‌ت، دبێژيت، ، پشتى ڤه‌كێشانا ئه‌مريكا ژ عيراقێ ل سالا 2011، ئيران بوو كاريگه‌رترين هێزا ده‌ره‌كى ل عيراقێ، ئه‌وژى رێككه‌فت نه‌بوو، به‌لكو پلان وبه‌رنامێ ته‌هرانێ بوو بۆ عيراقێ.
راپۆرتا وى ده‌زگه‌هێ ئه‌مريكى يێ ڤه‌كۆلينان ئاماژه ب وێ چه‌ندێ كر كو عيراقێ ته‌نها وه‌لاته‌كێ رۆژهه‌لاتا ناڤين نينه بۆ ئيرانێ، به‌لكو هه‌ڤسوويه‌كێ گرنگه ژى، چونكى هزار و400 كيلۆمه‌ترێن سنورى دگه‌لدا يێن هه‌ين، لێك گوهارتنا بازرگانى سالانه دناڤبه‌را عيراقێ وئيرانێ دا دگه‌هيته 12 مليار دۆلاران، زێده‌بارى وێ چه‌ندێ ئيران 15% ژ به‌رهه‌مێن خوه يێن په‌ترۆلى هنارده‌ى عيراقێ دكه‌ت.
راپۆرتا ناڤبرى به‌حس دكه‌ت كو ئيران ب شێوه‌كێ نهێنى يا دعيراقێ دا وچالاكيێن وێ دئالۆزن، له‌وما پێزانينێن واشنتۆن ل دۆر كاريگه‌ريا ئيرانێ ل عيراقێ ددروست نينن.
دبێژيت ژى، ده‌رئه‌نجامێ ڤێ ئه‌ندێ، پێدڤيه ئه‌مريكا وێ چه‌ندێ بزانيت كو ئه‌و پێزانينێن مه ل دۆر هه‌ژموونا ئيرانێ ل عيراقێ هه‌ين، دباشترين حاله‌تدا ددروست نينن، زێده‌بارى وێ چه‌ندێ ژى، نه‌بوونا پێزانينان يا زێده‌تر بووى ژئه‌گه‌رێ نه رۆهنيا پرۆسا برياردانا ئيرانى، كو بوويه ئه‌گه‌رێ وێ چه‌ندێ كو شيانێن ئه‌مريكا بۆ تێگه‌هشتنا پلان وسياسه‌تا ته‌هرانێ، دسنوردار بن.
ل دۆر ريفراندۆما سه‌ربخوه‌يا كوردستانێ، ده‌زگه‌هێ ئه‌تلانتيك كاونسل رۆهن دكه‌ت، ئيرانێ رۆله‌كێ سه‌ره‌كى دسزادانا كوردان دا هه‌بوو ژبه‌ر ئه‌نجامدانا وان بۆ ريفراندۆما سه‌ربخوه‌يێ ل ئه‌يلوولا 2017، ئه‌و چه‌نده ژى بۆ بنبركرنا هه‌مان پێنگاڤێ دناڤ كوردێن ئيرانێ دا بوو.
ئه‌ڤرۆنيوز:
سپێده‌يا ئه‌ڤرۆ ئه‌ينيێ 8/12/2017 بيڤه‌له‌رزه‌كێ ب هێزا 4.5 ل دووڤ بيڤه‌رێ رێمخته‌ر يێ جيهانى، ل پارێزگه‌ها هه‌له‌بجه وقه‌زا ده‌ربه‌نديخان د.
دارا حه‌سه‌ن رێڤه‌به‌رێ كه‌شناسى وبيڤه‌له‌رزان ل پارێزگه‌ها سلێمانيێ راگه‌هاند، بيڤه‌له‌رز ل ده‌مژمێر 4:55 ل سپێده‌يا ئه‌ڤرۆ ئه‌ينيێ ب دووراتيا 10 كيلۆمه‌تران ژ سه‌نته‌رێ باژێرێ هه‌له‌بجه روودا وكووراتيا وێ 10 كيلۆمه‌تر بوو.
داراى بۆ ده‌زگه‌هێن راگه‌هاندنێ دياركر كو هێزا وێ بيڤه‌له‌رزێ 4.5 بوو ل دووڤ بيڤه‌رێ رێخته‌رى يێ جيهانى وچو زيانێن گيانى نه‌هاتينه تۆماركرن.
ل دووڤ رێڤه‌به‌ريا گشتى يا كه‌شناسى وبيڤه‌له‌رزان ل هه‌رێما كوردستانێ، پشتى بيڤه‌له‌رزا ب هێز ئه‌وا ل هه‌رێما كوردستانێ داى ل شه‌ڤا 12/11/2017، هه‌تا نوكه زێده‌تر ژ 600 بيڤه‌له‌رزێن دى ل هه‌رێما كوردستانێ يێن هاتينه تۆماركرن.
ئه‌ڤرۆنيوز:
ئه‌ڤ شه‌ڤه ئه‌ينيێ 7/12/2017، سه‌رۆكێ جڤاتا نوونه‌رێن عيراقێ راگه‌هاند، پرۆژه قانوونا بودجا سالا 2018 پله بلندكرن تێدا نينه ودبيت مووچێن فه‌رمانبه‌ران ژى بهێنه كيمكرن.
سه‌ليم جبوورى، سه‌رۆكێ جڤاتا نوونه‌رين عيراقێ دچارچۆڤێ پشكداريا وى دبه‌رنامه‌كێ ته‌له‌ڤزيۆنى دا كو ئه‌ڤ شه‌ڤه هاتيه به‌خشكرن، به‌حسێ پرۆژێ قانوونا بودجا سالا 2008 كر وگۆت” دپرۆژێ قانوونا بودجا 2018 دا پله بلندكرن تێدا نينه وب چو شيوه‌كى پله بلندكرن بۆ فه‌رمانبه‌ران ناهيته ئه‌نجامدان”.
گۆت ژى” دبيت دپرۆژه قانوونا بودجه‌ى دا، مووچێن فه‌رمانبه‌ران بهێنه كێمكرن”.
به‌رى نوكه ئه‌شواق جاف ئه‌نداما كورد د جڤاتا نوونه‌رين عيراقێ دا بۆ ئه‌ڤرۆ نيوز راگه‌هاندبوو”به‌نكا دراڤى يا نێڤده‌وله‌تى فشاران ل حوكمه‌تا عيراقێ دكه‌ت بۆ كيمكرنا مووچێن فه‌رمانبه‌ران”.
ئه‌ڤرۆنيوز:
ده‌سته‌يا ده‌ستپاكيێ ل هه‌رێما كوردستانێ دنڤيساره‌كا فه‌رمى دا بۆ سه‌رۆكاتيا په‌رله‌مانێ كوردستانێ ره‌خنێ ل لێبۆرينا گشتى دگريت ودبێژيت “لێبۆرينا گشتى تنێ ل وان وه‌لاتان ب رێڤه دچيت كو سه‌روه‌ريا قانوونێ وه‌كو پێدڤى نينه”.
ده‌سته‌يا ده‌ستپاكيێ ل هه‌رێما كوردستانێ دنڤيسارا خوه يا هژمار 146 ل 19/11/2017 بۆ سه‌رۆكاتيا په‌رله‌مانێ كوردستانێ دبێژيت”ل ڤان رۆژان په‌رله‌مانێ كوردستانێ خواندنا ئێكێ بۆ قانوونا لێبۆرينا گشتى كريه وب باشى دبينين بۆچوونا خوه ل سه‌ر وى بابه‌تى بێخينه به‌رده‌ست”.
دوێ نڤيسارێ دا هاتيه ژى” لێبۆرينا گشتى ديارده‌كا خرابه وتنێ ل وان وه‌لاتان ب رێڤه‌دچيت كو سه‌روه‌ريا قانوونێ وه‌كو پێدڤى نينه، چونكى رێگريێ ل سزادانا تمامى يا تاوانباران دكه‌ت كو ده‌مێ سزايێن خوه تمام بكه‌ن”.
زێده‌تر دبێژيت” ب كريار يا هاتيه سه‌لماندن كو به‌هرا مه‌زن ژوان كه‌سێن لێبۆرينا گشتى بۆ دهێته ده‌ركرن، دوباره دزڤرن بۆ ئه‌نجامدانا تاوانان، كو ئه‌ڤه ژى باوه‌ريێ ب ده‌زگه‌هێن ده‌وله‌تێ لاواز دكه‌ت”.
ده‌سته‌يا ده‌ستپاكيێ خويا ژى دكه‌ت” ل دۆر تاوانێن گه‌نده‌ليێ كو دمادا ئێكێ/ برگا حه‌فتێ ومادا چارێ و15 ژ قانوونا ده‌سته‌يا ده‌ستپاكيێ يا هژمار 3 ل سالا 2011 يا راستڤه‌كرى دا هاتى، دخوازين دپرۆسا په‌سه‌ندكرنا پرۆژێ قانوونێ دا، تۆمه‌تبارێن گه‌ندليێ بهێنه ڤه‌ده‌ركرن، چونكى ڤه‌ده‌رنه‌كرنا وان دێ هانده‌ره‌كێ گرنگ بيت بۆ تاوانبارێن گه‌نده‌ليێ وهه‌موو وه‌ستيانا ده‌سته‌يا ده‌ستپاكيێ، ديوانا چاڤدێريا دارايى، داواكارێ گشتى، ده‌ستهه‌لاتا دادوه‌رى ب كاركرنێ ل سه‌ر ب سه‌دان كه‌يسان دێ ب هه‌ده‌ر ده‌ت، دده‌مه‌كى دا كو هه‌موو فراكسيۆنێن په‌رله‌مانى به‌رده‌وام دووپاتيێ ل سه‌ر دژايه‌تيا گه‌نده‌ليێ دكه‌ن”.
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ، برياره‌كا نوو ل دۆر شێوازێ وه‌رگرتنا سولفا عه‌قارى ژ وه‌لاتيان ده‌ركر وئاماژێ دده‌ت بۆ گيرۆكرنا هه‌ر هه‌يڤه‌كێ زێده‌تر ژ ئێك مليۆن و400 هزار دينار دێ هێنه وه‌رگرتن.
وه‌زاره‌تا دارايى وئابوورى ل هه‌رێمێ ب نڤيسارا خوه يا هژمار 15062 كو ل رۆژا 5/12/2017 هاتيه ده‌ركرن وتێدا به‌حسێ وه‌رگرتنا سولفێن عه‌قارى ژوه‌لاتيان دكه‌ت.
ل دووڤ وێ بريارا وه‌زاره‌تا دارايى، وه‌رگرتنا سزاى دێ ل سه‌ر ره‌سيدێ پشكێ بيت وبۆ گيرۆبوونا قه‌رى دهه‌يڤه‌كێ دا، دێ گۆژمێ ئێك مليۆن و416 هزار دينار ژوه‌لاتيان هێته وه‌رگرتن.
سولفا عه‌قارى ل دووماهيا سالا 2008 تاكو 2012 گۆژمێ 25 مليۆن دينار بۆ وه‌لاتيێن ئاكنجى ل ده‌رڤه‌ى باژێران و20 مليۆن دينار بۆ سه‌نته‌رێن باژێران دهاته مه‌زاختن وب زێده‌تر ژ 60 هزار وه‌لاتيێن هه‌ريما كوردستانێ هاتيه دان.
پشتى قه‌يرانا دارايى ل هه‌رێما كوردستانێ ل 2014، حوكمه‌تا هه‌رێمێ بريار دابوو كو وه‌رگرتنا قه‌رين سولفا عه‌قارى ژفه‌رمانبه‌ران بهێته راگرتن، به‌لێ وه‌رگرتنا قه‌رى ژ وه‌لاتيان يا به‌رده‌وامه.
ئه‌ڤرۆ نیوز، نه‌وزاد هلۆرى:
ئه‌ڤرۆ ئێڤارى ل سه‌نته‌رێ قه‌زا سوران، كه‌سه‌كێ برایێ هه‌ڤژینا خوه كوشت، رێڤه‌به‌ریا پۆلیسێن سوران ژى ئه‌گه‌ر زڤراندن بۆ كێشه‌كا جڤاكى كو به‌رى دو هه‌یڤان هاتیه روودان.
رائيد (هه‌وار ئه‌رگوشى) په‌يڤدارێ پۆلیسێن قه‌زا سوران بۆ ئه‌ڤرۆ نیوز گۆت” ئه‌ڤرۆ ئێڤارى ل ناڤا سه‌نته‌رێ قه‌زا سوران كه‌سه‌كێ برایێ هه‌ڤژینا خوه كوشت كو ژیێ وى 34 سال بوون”.
زێده‌تر گۆت” ئه‌گه‌رێ روودانێ دزڤریت بۆ كێشه‌یه‌كا جڤاكى دناڤبه‌را كوژه‌ك و بكوژى دا كو به‌رى دو هه‌یڤان دناڤبه‌را وان دا هاتیه روودان ، پۆلیسان ته‌رمێ وى كه‌سێ هاتیه كوشتن هنارتيه نوژداریا داد ل سوران وبكوژ ژى هاتیه ده‌سته‌سه‌ر‌كرن و ڤه‌كۆلین ل سه‌ر روودانێ يا ده‌ستپێكرى”.
نيشاندان