ئه‌ڤرۆنيۆز:
رێڤه‌به‌ريا گشتى يا گه‌شناسيێ وبيڤه‌له‌رزان راگه‌هاند، ئه‌ڤرۆ 28/11/2017 بيڤه‌له‌رزه‌ك ل پارێزگه‌ها هه‌له‌بجه دا وچو زيان ل دووڤ خوه نه‌هێلان.
رێڤه‌به‌ريا ناڤبرى به‌لاڤكر كو ئه‌ڤرۆ ل ده‌مژمێر 4:22 ئێڤارى ب دووريا 17 كيلۆمه‌تران ژ پارێزگه‌ها هه‌له‌بجه وب كووراتيا 10 كيلۆمه‌تران، بيڤه‌له‌رزه‌ك روودا ووه‌لاتيان هه‌ست پێ كر.
رۆهنكر ژى، هێزا بيڤه‌له‌رزێ 4 پله بوو ل دووڤ بيڤه‌ره‌ێ ريخته‌ر يێ جيهانى، دياركر ژى كو چو زيان ژئه‌نجامێ وێ بيڤه‌له‌رزێ نه‌بوون.
ئه‌ڤرۆ نیۆز، زنار تۆڤى، ناجی به‌ده‌ل:
كوردستان ئه‌حمه‌د خودانا چه‌ندین مریشكێن خومالی بۆ ئه‌ڤرۆ نیۆز دیاركر ئه‌ڤه ماوێ پترى 15 سالانه مریشكان بخودان دكه‌م،به‌رى نوكه من نێزیكى 70 مریشك هه‌بوون و رۆژانه دو تا سێ ته‌به‌قێن هێكا دفروتن،لێ هه‌ر سال د ناڤبه‌را هه‌یڤا ده‌ه هه‌تاكو هه‌یڤا یازده ئێك دهێته مریشكان و پرانیا مریشكێن مه دمرن و ژه‌بر ئێشا مریشكان ئه‌ڤه چه‌ندین ساله مریشكێن مه زێده نابن و پتر 50 مریشك مرینه و هه‌روه‌سا ژبه‌ر ئێشێ گۆشتێ وان مریشكان ژى ناخوین و زێده‌تر گوت: ئه‌ڤ ئێشه ژبه‌ر گۆهۆرینێن سه‌قاى و گیا شینكى په‌یدا نابن، هه‌روه‌سا به‌رى چه‌نده‌كێ چه‌ندین مریشكێن مه مربوون و نۆشداره‌كێ ڤێتێرنه‌رى ئینا پێش مریشكان و زكێ مریشكه‌كێ شه‌قكر و وى گوت زه‌ركێ ئه‌ڤ مریشكه كوشتینه،هه‌روه‌سا پێى و سه‌ر و چاڤێن مریشكان ژى زه‌ر دبن و ل دووڤ دا دمرن،له‌ورا هه‌كه دڤان سالان دا مریشكێن مه ئێش نه‌هاتبایێ و نه‌مربان نوكه پترى 1000 مریشكان مه هه‌بان،هه‌ر چه‌نده ئه‌ڤ چه‌ندین ساله ئه‌ز زارۆیێن خوه ب داهاتێ وان مریشكان بخودان دكه‌م،هه‌روه‌سا ئه‌ڤ ساله ل چه‌ندین جهان مریشكێن خه‌لكێ مرینه.
ناڤهاتیێ زێده‌تر دیاركر:ئه‌و كه‌سێن مریشكان وان ڤه‌ده‌ر و مریشكێن خه‌لكێ نه‌چنه دناڤ مریشكێن وان دا،زوو ب زوو ئێش مریشكێن وان ناگرن و مریشكێن وان نامرن،چونكى ئه‌و مریشكێن خوه نا به‌رده‌ن و هه‌ر یێن دناڤا كولى دا،هه‌روه‌سا ئه‌م گه‌له‌ك جاران مریشكێن كارگه‌هێ دكه‌ینه دناڤا مریشكێن خوه یێن كوردى دا دبیت ئه‌ڤ ئێشه ژ وان بهێت و مریشكێن مه دمرن،دیسا هنده‌ك مریشكێن ژبه‌ر ڤێ ئێشێ دین دبن و هنده‌كان ژى چاڤێن وان كوره دبن،گه‌له‌ك سالان ژ ترسا ئێشا مریشكان مه هه‌موو مریشكێن خوه سه‌ر ژێ كرینه و مه گوتیه هه‌كه هه‌ر ئێش دێ هێتێ دێ سه‌ر ژێ كه‌ین و مه ئه‌ڤ چه‌نده ژ نه‌چارى كریه،لێ ئه‌م نه‌شێین چیچه‌لۆكان سه‌ر ژێ كه‌ین و ئه‌و هه‌موو ب ڤێ ئێشێ دمرن،هه‌روه‌سا هه‌ر ده‌مێ ئێش هاته مریشكان زوو پێ دمرن و خوه ل به‌ر ئێشێ ناگرن.
كوردستانێ دیاركر ژى:ئه‌م دخوازین حوكمه‌ت هاریكاریا مه بكه‌ت و ده‌رمان و پێدڤیێن تایبه‌ت ب ئێشا مریشكان ڤه بده‌ته مه،ژ پێخه‌مه‌ت ئه‌م ب شێین ب دروستى مریشكێن خوه بخودان بكه‌ین و ژ ئێشێن كوژه‌ك ب پارێزین،هه‌ر چه‌نده ئه‌م كولكێن وان ژى د گوهۆرین هه‌ر چو مفا تێ نینه و ئێش دگریت و دمرن.
مسته‌فا ئه‌حمه‌د خودان پرۆژه‌كێ بچووك یێ بخودانكرنا مریشكانه دبێژیت:ئه‌ڤه ماوێ چه‌ندین سالانه مریشكا بخودان دكه‌م و ئه‌ڤ ساله به‌رهه‌مێ مریشكێن مه هه‌موو مرینه و پتریا وان مامرك و چیچه‌لۆك مرینه و مریشكێن مه‌زن وه‌كى وان نه مرینه و ئه‌ڤ چه‌نده ڤه‌دگه‌ریت بۆ هه‌بوونا گه‌رمه‌كا زۆر د ئه‌ڤ ساله‌دا هه‌ر چه‌نده ئه‌ز هه‌ر سێ هه‌یڤان جاره‌كێ ده‌رمانێ كوتاندنێ یێ ل دژى ئێشێن مریشكان دده‌مه مریشكێن خوه،لێ هه‌ر دمرن و ئێشا ژ هه‌موویان دژوارتر بۆ مریشكان پلپلك دكه‌ڤنه مریشكان و خوینا وان هه‌موویێ دمێژیت و ژ گیانى خلاس دكه‌ت،هه‌روه‌سا ئه‌ڤه چه‌ندین ساله مریشكان بخودان دكه‌م،هندى پار و ئه‌ڤ ساله مریشكێن مه نه مرینه و گوت ژى:هه‌تاكو نوكه چو نۆشدارێن ڤێتێرنه‌رى یێن تایبه‌تمه‌ند مه نه‌ئیناینه كو ب دروستى ئێشا ڤان مریشكان دیار بكه‌ن، لێ هه‌كه هه‌ر سال مریشكێن مه نه‌مرن، ئه‌م دێ شێین خوه پێ خودان كه‌ین و دێ داهاته‌كێ باش بۆ مه ژێ هێت،چونكى خه‌لكێ مه حه‌زه‌كا زۆر ل سه‌ر هێكێن كوردى و دیكلێن كوردى بۆ خوارنێ یا هه‌ى،لێ ئه‌ڤ ئێشه دناڤ مریشكێن بیلادى دا په‌یدا دبیت و ب رێیا وان دهێته مریشكێن مه یێن كوردى و هه‌تاكو نوكه چو چاره ژى بۆ ڤێ ئێشێ نه‌هاتینه دیتن،لێ ژ نوكه وێڤه مه بریاردایه كو ئه‌م ئێدى مریشكێن بیلادى بخودان نه‌كه‌ین و وان مریشكان ناكه‌ینه دناڤا مریشكێن خوه یێن كوردى دا بۆ خودانكرنێ،چونكى وان مریشكان زیان گه‌هاندیه مریشكێن مه،هه‌روه‌شا مریشكا كوردى خوارنا وێ كێمتره و په‌ر خوه ل به‌ر ئێش و نه‌خۆشیان دگریت،دیسا هه‌كه مرۆڤ عه‌له‌فى و گه‌نمى نه‌ده‌ته مریشكێن بیلادى هێكان ژى ناكه‌ن.
چرا عیماده‌دین مسته‌فا بسپورێ ڤێتێرنه‌ری بۆ ئه‌ڤرۆ نیۆز دیاركر ده‌مێ گۆهارتنا وه‌رزێن سالێ ئه‌گه‌ره‌كێ هه‌رێ بهێزه بۆ سه‌رهلدانا نه‌خوشیێن بالندان و ل گه‌ل جورێن خوارنا بالندا كو گه‌رماتی و سه‌رماتیا وێ خوارنێ ئه‌گه‌رن بۆ نه‌خوشیان دڤی وه‌رزێ سالێ و نه‌خوشیێن ڤه‌گر ژی ب ئه‌گه‌رێ هه‌ر و بای هاتنا ڤایرۆسێ نه‌خوشی و ڤه‌گۆهاستنا وان و داكه‌تنا په‌لێن گه‌رماتیێ كو مریشكان پێدڤی ب پله‌یێن گه‌رماتیێ یه ل ده‌مێ هاتنا سه‌رمایێ بو قه‌ره‌بوكرنا وێ دبیته ئه‌گه‌رێن توشبوویێن زێده‌تر بڤان نه‌خوشیان.
ده‌ربارێ نه‌خوشیان چه‌وانیا پاراستن و دورخستنا وان ژ نه‌خوشیان بسپورێ ڤێتێرنه‌ری گۆت: دووڤچوونا ئه‌گه‌رێ نه‌خووشیا مریشكێن خومالی یێن كوردی وه‌ك رێژه و ژمارێن راست و دروست ل به‌رده‌ست نین و به‌ربه‌لاڤن ل هه‌موو ده‌ڤه‌رێن كوردستانێ و دشیان دا نینه بهێته زانین چه‌ندن و كۆنترۆلكرنا هه‌ر نه‌خوشیه‌كا وان بهێته كرن كو ئه‌و مریشكێن كوردی دبێژنێ، ل ده‌مێ مرن و نه‌خوشبوونا وان خودانێن وان دووڤ ناگه‌رن بزانن ئه‌گه‌ر چ نه و بوچ دمرن له‌ورا دووباره بوونا نه‌خوشیان ل ئه‌ڤی ده‌مێ دا هه‌ر سال سه‌رهلدده‌ت, ل وه‌رزێ زڤستانێ و هاتنا سه‌رمایێ نه‌خوشی په‌یدا و زۆر دبن ب ئه‌گه‌رێ لاوازیا گیانێ بالنده‌ی و كارتێكرن لێ دكه‌ت و رووب روویی نه‌خوشیێ و توش دبیتێ.
ئه‌ڤرۆنيۆز:
ئه‌ڤرۆ سيشه‌مبى 28/11/2017، سه‌رۆك مه‌سعود بارزانى پێشوازى ل سه‌رۆك وسكرتێر ونوونه‌رين پارتێن مه‌سيحى يێن كوردستانێ كر.
دديداره‌كێ دا، ره‌وشا سياسى يا هه‌رێما كوردستانێ وعيراقێ هاته به‌حسكرن، سه‌رۆك بارزانى سوپاسيا هه‌لويستێ نيشتمانى يێن پارتێن مه‌سيحى يێن هه‌رێما كوردستانێ كر دپشته‌ڤانيكرنا پرۆسا ريفراندۆمێ وبه‌حسێ وان ئه‌گه‌ران كر كو گه‌لێ كوردستانێ هانداى بريارا ئه‌نجامدانا ريفراندۆمێ بده‌ن وروودانێن پشتى ريفراندۆمێ ژى سه‌لماند كو بريارا گه‌لێ كوردستانێ چه‌ند يا دروست وره‌وا بوو.
د وێ كۆمبوونێ دا، به‌حس ل پرۆسا سياسى ل كوردستانێ هاته كرن ودووپاتى ل سه‌ر ئه‌نجامدانا هه‌لبژارتنێن هه‌رێما كوردستانێ به‌رى هه‌لبژارتنێن عيراقێ هاته كرن وه‌كو چاره‌سه‌ريه‌كا گونجاى بۆ پرۆسا سياسى يا هه‌رێما كوردستانێ.
د پشكه‌كا دى يا كۆمبوونێ دا، دووپاتى ل سه‌ر ماف وپشكداريا هه‌موو پێكهاتێن ئايينى ونه‌ته‌وى يێن كوردستانێ دپرۆسا سياسى دا وگره‌نتيا مافێن وان ددستوورێ پاشه‌رۆژێ يێ هه‌رێما كوردستانێ دا هاته كرن، كو به‌رى ئه‌نجامدانا ريفراندۆمێ دبه‌لگه‌نامه‌كێ دا يا په‌سه‌ندكرى بوو.
هه‌ر دهه‌مان كۆمبوونێ دا، دانوستاندن ل ره‌وشا ده‌ڤه‌رێن ده‌شتا نه‌ينه‌وا وگه‌فێن ل به‌رده‌م پێكڤه‌ژيانێ وپاشه‌رۆژا وان ده‌ڤه‌ران هاته كرن.
ئه‌ڤرۆنيۆز:
دادگه‌هه‌كا عيراقى فه‌رمانا ده‌سته‌سه‌ركرنا ريڤه‌به‌رێ پۆليسێن قه‌زا وناحيێن كه‌ركووكێ و12 ئه‌فسه‌رێن دى يێن پارێزگه‌ها كه‌ركووكێ ده‌ركر.
دادگه‌ها ڤه‌كۆلينێن ده‌ڤه‌را ره‌سافه ل به‌غدا ب نڤيسارا هژمار (21115) ل رۆژا 19/11/2017 فه‌رمانا ده‌سته‌سه‌ركرنا عه‌ميد سه‌رحه‌د قادر ريڤه‌به‌رێ پۆليسێن قه‌زا وناحيێن كه‌ركووكێ و12 ئه‌فسه‌رين دى يێن پله بلند يێن پۆليسێن كه‌ركووكێ ده‌ركر كوئه‌و نڤيساره ئاراسته‌ى رێڤه‌به‌ريا پۆليسێن پارێزگه‌ها كه‌ركووكێ كريه ب مه‌ره‌ما ده‌سته‌سه‌ركرنا وان.
ئەڤرۆ نیۆز،زنار تۆڤی:
بیڤەلەرز ب لەرزینا ژ نیشکەکێڤه یا دەریایی، بن زەڤیێ یان سەر زەڤیێ دهێتە گوتن،کو ل چینا دناڤ زەڤیێ دا روو ددەت.
رێنمایێن خۆپاراستنێ ژ بیڤەلەرزێ ئەڤەنە:
دەمێ تۆ هەست ب روودانا بیڤەلەرزێ دکەی،باشترە دوور بکەڤی ژ دۆلابێ و کتێبخانێ یان هەر کەلوپەلەکێ مەزن،چونکی د دەمێ بیڤەلەرزێدا ئەو ئەگەر هەیە کو کەلوپەلێن گران ب سەر تەدا بکەڤن و ساخلەمیا تە بکەڤیتە د مەترسیێ دا،هەروەسا دەست نیشانکرنا گونجایترین جه بۆ خۆپاراستنێ،ئەوە هەکە تۆ د مال دابی،باشترە ب لەز بچیە ژ دەرڤە،یان ژی هەکە تە دەلیڤا هندێ نەبیت بچیە ژ دەرڤە،ل ژێر مێزەکێ روونەخار یان ژی دناڤبەرا چارچۆڤەکێ دەرگەهێ ژوورەکێدا راوەستە.
دیسا ل دووڤ زانیاریان لێنانگەه ئێکە ژ مەترسیدارترین جهان،کو پێدڤیە د دەمێ بیڤەلەرزێدا ژێ دوور بکەڤی،یان ژی هەکە تۆ ژ دەرڤەبی؛خۆ دوور بکە ژ ستوونێن کارەبا سەر جادێ و ئاڤاهیان،هەروەسا ژ کێبلێن کارەبێ،خۆ ژ داروباری ژی دوور بکە،دیسا هەکە تۆ دناڤا ترۆمبێلێ دا بی و تە هەست ب بیڤەلەرزێ کر،ل جهێ خۆ راوەستە و بمینە دناڤا ترۆمبێلێ دا،هەروەسا هەکە تۆ ل فەرمانگەهێ بی یان ژی ل قوتابخانێ بی،ل دەمێ روودانا بیڤەلەرزێ باشترە بچیە ژێر مێزێ یان ژی بچیە د ژوورڤە و دوور بکەڤی ژ شووشەی و پەنجەرا و گلۆپان،یان ژی هەول بدە کو ب کەرەستەکێ قاییم سەرێ خۆ بپارێزی.
دەمێ بیڤەلەرز ب دوماهی هات،دڤێت ئامادەبی بۆ روودانا بیڤەلەرزەکا دیتر،چونکی هەمی گاڤا چەند دەمژمێران پشتی بیڤەلەرزا سەرەکی دێ بیڤەلەرزەکا دیتر روو دەت،ل حالەتێ هوسا دا ب هیچ شێوەیەکێ گلۆپێ یان ئامیرەکێ کارەبایی هەلنەکەن و باشترە روو بکەنە جهێن ڤەکری،هەروەسا ئەو کەسێن ب سەختی زیان گەهشتیێ نەجۆلینن،هەتاکو تیمێن هەوارهاتنێ ل تانا وان دهێن،دیسا ب هیچ شێوەیەکێ خۆ نێزیکی وان جهێن رووخیای نەکەن،یان ژی هەکە هەوە هەست ب بێهنا غازێ کر،ب هیچ شێوەیەکێ ماکینا ئاگری و جگارێ هەلنەکەن.
ئه‌ڤرۆنيۆز:
ژێده‌رێن راگه‌هاندنا ئيرانى به‌لاڤكر كو قاسم سلێمانى فه‌رماندێ له‌شكرێ قودس يێ ئيرانى، دشه‌رٍه‌كى دا ل سووريێ برينداربوويه.
په‌يامنێرێ كه‌نالێ (العالم) يێ ئيرانى ل باژێرێ ئه‌لبوكه‌مال يێ سوورى گۆت، سلێمانى پشكدارى دشه‌رِێ ئه‌لبوكه‌مال ب تنێ دا نه‌كريه، به‌لكو گه‌له‌ك جاران ل به‌ره‌يێن شه‌رِى ل سووريێ يێ به‌رهه‌ڤ بوو تايبه‌تى ل شه‌رِێ ئه‌لبوكه‌مال وجاره‌كێ برينداربوو.
دياركر ژى، قاسم سلێمانى سه‌رپه‌رشتيا شه‌رِێ ڤێ دووماهيێ يێ ئه‌لبوكه‌مال دكر، ژبه‌ركو شه‌رِه‌كێ گه‌له‌ك گرنگ بوو ومانا وى بۆ ده‌مه‌كێ درێژ ل ئه‌لبوكه‌مال وسه‌رپه‌رشتيكرنا شه‌رِى ل وێرێ وه‌كو ته‌حه‌ديه‌كێ بوو بۆ ئه‌مريكا كو به‌رى هێزێن سوريا ديموكراتى كو ئه‌مريكا پشته‌ڤانيا وان دكه‌ت، بگه‌هيته وى باژێرى كو له‌شكرێ سوورى وهه‌ڤپه‌يمانێن وى شيان وێ ئارمانجێ بده‌ستڤه‌بينن.
ئه‌ڤرۆنيۆز:
شيره‌تكارێ ئابووريێ سه‌رۆك وه‌زيرێن عيراقێ هژمارا مووچه‌خۆرێن عيراقێ ژ فه‌رمانبه‌ر وخانه‌نشينان ومفادارێن تۆرا پاراستنا جڤاكى وگۆژمێ هه‌يڤانه يێ بۆ دهێته مه‌زاختن ژلايێ حوكمه‌تا عيراقێ ڤه ئاشكراكرن.
د. موزهر محه‌مه‌د سالح شيره‌كارێ ئابووريێ سه‌رۆك وه‌زيرێن عيراقێ بۆ ده‌زگه‌هێن راگه‌هاندنێ يێن عيراقى دياركر كو ل عيراقێ هه‌شت مليۆن كه‌س مووچه‌ى وه‌ردگرن كو دبنه ئێك ل سه‌ر سێ ژ ئاكنجيێن عيراقێ، ئه‌وژى چار مليۆن فه‌رمانبه‌ر وچار مليۆن و300 هزار خانه‌نشين ودو مليۆن مفادارێن تۆرا پاراستنا جڤاكى يێن هه‌ين وبۆ وێ هژمارا مووچه‌خۆران ژى حوكمه‌تێ هه‌يڤانه پێدڤى ب 42 مليار ديناران يا هه‌ى.
شيره‌تكارێ ئابووريێ سه‌رۆك وه‌زيران عيراقێ دياركر، مه به‌رنامه وپلان يێن هه‌ين كو تاكو چه‌ند سالين دى، كه‌رتێ تايبه‌ت پێشبێخين ودلنيايێ تێدا بده‌ين كو ژيانا وان كه‌سێن ل كه‌رتێ تايبه‌ت كاربكه‌ن دێ يا گره‌نتى بيت تاكو خه‌لك به‌ر ب كه‌رتێ تايبه‌ت ڤه بچن نه‌كو كه‌رتێ حكومى.
ئەڤرۆ نیۆز،زنار تۆڤی:
ب جێبه‌جێكرنا رێكخراوا ئایسپو و پشته‌ڤانیا ECHO (کومسیۆنا ئورۆپی یا ھاریکاریا مرۆڤایەتی و پاراستنا سڤیلان) و ب هه‌ماهه‌نگی ل گه‌ل رێڤه‌به‌ریا گشتی یا ساخله‌میا دهۆك پرۆژێ خزمەتێن ساخلەمیێن هه‌وارهاتنێ بۆ نه‌خۆشخانا به‌روشكێ یا هه‌وارهاتنێ هاتە ڤەکرن و بۆدجا پروژەی ٣٥٠.٠٠٠ سێ سەد و پێنجی ھزار یورونە، کو یێ پێکھاتیە ژ:
– ئاڤاکرنا جھەکێ نوو یێ چاڤەرێکرنێ و نووژەنکرنا ژوورا پێشوازیکرنا نەخوشیێن گەلەک تەنگاف،هەروەسا بۆ پێشڤەبرنا خزمەتان دێ ھێنە پێشکێشکرن بۆ پێشوازیکرن و ئینان و برنا نەخۆشان (٨٥.٠٠٠) یۆرو.
– کرینا دەرمان و پێـدڤیێن نوشداری بۆ بەشێ پێشوازی و چاڤدێریا چر ل دووڤ پێدڤی و کێماسیێن نەخۆشخانێ (١٥٠.٠٠٠) یورۆ.
– پشتەڤانیکرنا تیمێن تەنگاڤیان پێگدھێن ژ ١٦ نوشدار و ٢٩ پەرستارا (٥٤.٠٠٠) یورۆ.
– ھاریکاریا تەکنیکی و ئەنجامدانا خولێن راھێنانێ د دەمێ کاریدا.
پرۆژە ھاتیە ئەنجامدان ژ ھەیڤا نیسانێ تا چریا دویێ ٢٠١٧.
پروژە ھاتیە ئەنجامدان وەک بەشەک ژ ستراتیژیا ھەڤپشک یا رێڤەبەریا گشتی یا ساخلەمیا پارێزگەھا دھوکێ ورێکخراوا AISPO (٢٠١٤-٢٠١٨) بو پشتەڤانیکرن و ب ھێزکرنا خزمەتێن ساخلەمیێ یێن هه‌وارهاتنێ و پێدڤی ل پارێزگەھا دھوکێ.
ب ئاماده‌بوونا جێگرێ پارێزگه‌ها دهوكێ بەهزاد عەلی ئاده‌م و دکتۆر نزار عسمەت ته‌یب رێڤه‌به‌رێ گشتی یێ ساخله‌میا پارێزگه‌ها دهوكێ و رێڤەبەریا نەخوشخانا دھۆک یا تەنگاڤیا دکتۆر عەبدولا ئیبراھیم و نوونەرێ ECHO لیوجی پاندولفی و تیمێ رێکخراوا AISPO (کومەلا ئیتالی یا ھەڤکاری دناڤبەرا گەلان) ل ھەرێما کوردستانا عیراقێ پرۆژێ ناڤبری هاته ڤه‌كرن.
ئەڤرۆ نیۆز ، زنار تۆڤی:
موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:کو ل سێ هەیڤێن بوری دا 79 روودانێن هاتنوچوونێ ل سەنتەرێ پارێزگەها دهۆکێ رووداینە.
ناڤهاتی گوت ژی:ل هەر سێ هەیڤێن 9.10.11 یێن سالا 2017 ل سەنتەرێ پارێزگەها دهۆکێ 79 روودانێن ترافیکێ رووداینە،کو د وان روودانان دا 53 کەس برینداربووینە و هەروەسا 2 کەسان ژی گیانێ خۆ ژ دەستدایە.
ئه‌ڤرۆنيۆز:
رۆژنامه‌كا لوبنانى به‌لاڤكر كو ئه‌مريكا ب پێدڤى دزانيت سه‌رۆك وه‌زيرێن عيراقێ يێ به‌رێ نورى مالكى بهێته تۆمه‌تباركرن ب به‌رپرسياره‌تيا كاره‌ساتێن قۆناغا بۆرى وداخواز ژ عه‌بادى ژى كريه كو پێدڤيه ڤێ كارى بكه‌ت.
رۆژناما (الاخبار) يا لوبنانى، دراپۆرته‌كا خوه‌دا به‌لاڤكريه كو شاندێن ئه‌مريكى چه‌ندين شيره‌ت ئاراسته‌ى حه‌يده‌ر عه‌بادى سه‌رۆك وه‌زيرێن عيراقێ كرينه ل دۆر چاوانيا شه‌رِێ دژى گه‌نده‌ليێ ب ريێا ستراتيژيه‌ته‌كێ كو ب وێ بشێت ل سه‌ر گه‌نده‌لكاران ب سه‌ركه‌ڤيت ژلايه‌كى ڤه و هه‌ڤركێن خوه ژ ئه‌وێن دوروبه‌رێن وى ڤالا كه‌ت ل قۆناغا ئێكێ، كو ئه‌و چه‌نده كو ب دووماهى ئينانا وان ژروويێ سياسى ڤه ب ساناهى ئێخيت.
دياركريه ژى، شاندێن ئه‌مريكى ل عه‌بادى راگه‌هانديه كو ئه‌و دراڤێ ل ده‌ف هه‌ڤرِكێن عه‌بادى دێ بيته گه‌ف ل سه‌ر وى وپێدڤيه ئه‌و دراڤه بهێته ڤه‌گه‌راندن دچارچۆڤێ هشككرنا ژێده‌رێن هێزا وان وبۆ عه‌بادى دووپات كريه كو پێدڤيه مالكى بهێته تۆمه‌تباركرن ب به‌رپرسياره‌تيا كاره‌ساتێن قۆناغا بۆرى
نيشاندان