ئه‌ڤرۆ نيوز:
عه‌مار حه‌كيم سه‌رۆكێ هه‌ڤپه‌يمانيا نيشتيمانيا شيعه‌يان راگه‌هاند، پێدڤيه هه‌موو مادێن ده‌ستوورى بهێنه بجهئينان و كورد ژى پابه‌ندى ده‌قێن ده‌ستوورى بيت.
عه‌مار حه‌كيم سه‌رۆكێ هه‌ڤپه‌يمانيا نيشتيمانيا شيعه‌يان هه‌روه‌سا راگه‌هاند: پێدڤيه ناكوكيێن ناڤخويى ب دانوستاندن و ل گۆر ده‌ستوورى بهێنه چاره‌كرن، هه‌تاكو عيراق د خوشيان دا بژيت و خزمه‌تگوزارى بۆ وه‌لاتيان بهێنه دابينكرن.
ئه‌ڤرۆنيۆز:
وه‌زيرێ ده‌رڤه‌يێ فره‌نسا راگه‌هاند، ئه‌م ل گه‌ل وه‌زيرێ ده‌رڤه‌يێ ئه‌لمانيا رێكه‌فتين كو پێدڤيه ئيران ژ به‌رنامێ مۆشه‌كێن باليستى وحه‌زێن به‌رفره‌هبوونا هه‌ژموونا خوه ل ده‌ڤه‌رێ وده‌ست ب سه‌رداگرتنا وێ پاشڤه بچيت.
جان ئێف لۆدريان وه‌زيرێ ده‌رڤه‌يێ فره‌نسا، د كۆنگره‌كێ رۆژنامه‌ڤانيدا ل گه‌ل زيگمار گابريێل وه‌زيرێ ده‌رڤه‌يێ ئه‌لمانيا ل پاريسێ گۆت، مه بۆچوونين هه‌ڤپشك يێن هه‌ين وب پێدڤى دزانين، ئيران ژ به‌رنامێ مۆشه‌كێن باليستى وبزاڤێن ده‌ست ب سه‌رداگرتنا ده‌ڤه‌رێ پاشڤه بچيت.
ئيرانێ دوهى دوشه‌مبى 4/12/2017 راگه‌هاندبوو، پرسا مۆشه‌كێن باليستى يێن ئيرانێ جهێ دانوستاندنێ نينن.
ئه‌ڤرۆ نيۆز:
ئه‌مريكا راگه‌هاند، سه‌رۆكێ ئه‌مريكا دونالد ترامپ وسه‌رۆكێ فره‌نسا ئێمانوێل ماكرۆن ئه‌ڤرۆ په‌يوه‌نديه‌كا ته‌له‌فۆنى ئه‌نجامدا ول سه‌ر هه‌لويسته‌كى ل دۆر كێشێن به‌غدا وهه‌رێما كوردستانێ رێككه‌فتن.
كۆچكا سپى يا ئه‌مريكى دياركر كو ترامپى وماكرۆنى دپه‌يوه‌نديا ته‌له‌فۆنى دا رێككه‌فتن كو حوكمه‌تا عيراقێ وهه‌رێما كوردستانێ كێشێن خوه ب دانوستاندنێ چاره‌سه‌ر بكه‌ن.
ئه‌ڤرۆ نيوز:
مه‌سرور بارزانى راوێژكارێ ئه‌نجوومه‌نێ ئاسايشا هه‌رێما كوردستانێ ل گه‌ل هنارتيێ سكرتێرێ گشتى يێ نه‌ته‌وێن يه‌كگرتى كوم بوو، د ديداره‌كێ دا چه‌ندين پرس هاتنه شروڤه‌كرن، مه‌سرور بارزانى ئاماژه ب وێ يه‌كێ دا كو كه‌شێ هه‌لبژارتنان و ململانێن سياسى ل به‌غدا رێگرييێن سه‌ره‌كى نه به‌ره‌ڤ پێشڤه‌چوونان، به‌لێ نابيت وه‌لاتيێن كوردستانێ باجا ڤێ ره‌وشا به‌غدا بده‌ن، پێدڤيه ب زووترين ده‌م ده‌ست ب دانوستاندنان بهێـته كرن و ل دووڤ خشته و دياركرنا ده‌مى بهێته رێكخستن.
ئه‌ڤرۆ نيوز:
ئه‌ڤرو ل هولا كونفرانسان ب ئاماده‌بونا شێخ عمران بارزانی نوینه‌رێ سه‌روك بارزانی و فه‌رهاد ئه‌مین ئه‌تروشی پارێزگه‌رێ دهوكێ وسه‌ربه‌ست تروانشی به‌رپرسێ لقێ 1 وچه‌ند به‌رپرسێن حزبی وئیداری وله‌شكری وجه‌ماوه‌ركێ زور ئاهه‌نگا ماته‌مینی یا (40)روژیا شه‌هیدبونا فه‌رمانده وه‌حید باكوزی به‌رپرسێ لقێ 17 ل شنگالێ هاته ل دارخستن.
درێ ورسمان دا په‌یڤا بخێر هاتنێ ژلایێ قاسم ره‌شو كارگێرێ لقێ 17هاته خاندن ، پاش په‌یڤا سه‌ركردایه‌تیا پارتی دیموكراتی كوردستان ژلایێ سه‌ربه‌ست تروانشی به‌رپرسێ لقێ 1 هاته خاندن وسه‌ره‌خوشیێن سه‌ركردایه‌تیا پارتی گه‌هاندنه بنه‌مالا شه‌هیدی وچه‌ند ویستگه‌هێن خه‌بات وتێكوشینا فه‌رمانده وه‌حید باكوزی به‌رچاڤكرن وگوت ئاماده‌بونا مه ل ڤێ ئاهه‌نگا ماته‌مینی وه‌فاداری یه بو گیانێ شه‌هیدیێ وهه‌موو شه‌هیدێن رێبازا بارزانیێ نه‌مر وكوردایه‌تیێ وخواست كو هه‌موو كورد ل ئاستێ به‌رپرسیاریێ كار وخه‌باتێ بكه‌ن وهه‌موو هه‌ڤدوو بگرن بو ب ده‌ستڤه ئینانا مافێن گه‌لێ كورد.
پاش چه‌كێ فه‌رمانده وه‌حید باكوزی ژلایێ فه‌رمانده عیسا زێوه‌ی راده‌ستی كورێ شه‌هیدی كاك هوشه‌نگی هاته كرن كو به‌رده‌وامی ب رێبازا شه‌هیدی وكوردایه‌تیێ بهێته دان.
پاش په‌یڤا ئێكه‌تیا زانایێن ئاینی ئیسلامی ژلایێ مه‌لا جیهاد بێسفكی هاته خاندن ، ل دوڤدا فلمه‌كێ دیكیومه‌نتی كو ژلایێ لقێ 17 هاتبو ئاماده‌كرن ل دور ژیانا شه‌هیدی هاته نیشان دان.
هه‌ر دڤان رێ ورسمان 54 شه‌مالك هاتنه هلكرن كو ده‌ربرین ژ ژیێ شه‌هیدی دكر هه‌روه‌سا هوزان ژی هاتنه خاندن.
ل دوماهیێ په‌یڤا بنه‌مالا شه‌هیدی ژلایێ كورێ شه‌هیدی به‌رێز(هوشه‌نگ وه‌حید باكوزی) هاته خاندن وسوپاسیا وان لایه‌نان كر یێن ئه‌ڤ ئاهه‌نگا ماته‌مینی بو شه‌هید وه‌حید باكوزی سازكری وسوز دان كو به‌رده‌وامبن ل سه‌ر رێبازا بابێ خو كو ئه‌وژی رێبازا كوردایه‌تی وبارزانیێ نه‌مره.
بو زانین ل روژا 26-10-2017 ل میحوه‌ر زومار شه‌هید وه‌حید باكوزی وچه‌ند پێشمه‌رگێن قه‌رهره‌مان دئه‌ركێ به‌ره‌ڤانیكرنێ دا ژئاخا كوردستانێ شه‌هیدبن وخو گوری كورد وكوردستانێ كرن.
ئه‌ڤرۆ نيۆز:
وه‌زارتا ساخله‌ميێ ل هه‌رێما كوردستانێ راگه‌هاند، ده‌رمانێن نه‌خوه‌شيا تالاسيميايێ ژ به‌غدا يێن گه‌هشتينه هه‌وليرێ ول ڤێ هه‌فتيێ ژى به‌هرا هه‌ردو پارێزگه‌هێن سلێمانيێ ودهۆكێ دێ گه‌هيت.
خالس قادر په‌يڤدارێ وه‌زاره‌تا ساخله‌ميێ ل هه‌رێما كوردستانێ بۆ ده‌زگه‌هێن راگه‌هاندنێ گۆت، ژبه‌ركو كۆمپانيا ده‌رمانێن تالاسيميايێ دابين دكر يا هاتيه گوهۆرين، ده‌مێ گه‌هشتنا وان ده‌رمانان بۆ عيراقێ وهه‌رێما كوردستانێ گيروو بوويه، به‌لێ نوكه ئه‌و ده‌رمان يێن هه‌ين.
رۆناكبيره‌كێ ناڤدارێ عه‌ره‌ب رادگه‌هينيت، پێدڤيه هه‌ڤپه‌يمانيه‌كا عه‌ره‌بى- ئيسرائيلى دژى ئيرانێ بهێته پێكئينان.
عه‌بدوللا هه‌دله‌ق، روناكبير ونڤيسه‌رێ كوێتى دبه‌رنامه‌كێ كه‌نالێ (الراي) يێ كوێتى دا گۆت، هه‌موو وه‌لاتێن ديموكراتى دانپێدانێ ب ده‌وله‌تا ئيسرائيلێ دكه‌ن، تنێ ده‌وله‌تێن ديكتاتۆرى دانپێدانێ پێ ناكه‌ن.
هه‌دله‌ق ب ئاماژه‌كرن ب ب ئايه‌تا 21 ژ سۆره‌تا مائيده يا قورئانێ دبێژيت، ئه‌و ئاخا نوكه ئيسرائيل ل سه‌ر هاتيه دامه‌زراندن، ب درێژيا ديرۆكێ ئاخا جوهيان بوو ول سالا 1948 زڤرين سه‌ر ئاخا خوه.
ئه‌و روناكبيرێ كوێتى ره‌ت دكه‌ت ئيسرائيلێ ب داگيركه‌ر ب هژمێريت ورادگه‌هينيت، به‌رى دامه‌زراندنا ئيسرائيلێ چو ده‌وله‌ت ب ناڤێ فلستين نه‌بوون هه‌تا بهێته داگيركرن.
ناڤبرى ب پێدڤى دزانيت وه‌لاتێن كه‌نداڤێ عه‌ره‌بى وئيسرائيل وئه‌مريكا هه‌ڤپه‌يمانيه‌كا سێ قۆلى دژى ئيرانێ وميليشيا حزبوللا پێكبينن وژناڤ ببه‌ن.
بۆ ديتنا ئاخڤتنێن وى رۆناكبيرێ كوێتى كليكێ ل سه‌ر ڤى لينكى بكه:
ئه‌ڤرۆنيۆز:
پشتى عه‌لى باپير ئه‌ميرێ كۆمه‌لا ئيسلامى دداخۆيانيه‌كێ دا بۆ راديوا ده‌نگێ ئه‌مريكا راگه‌هاندى، هه‌ر ژ ده‌مێ نه‌مانا پۆستێ سه‌رۆكێ هه‌رێمێ، سه‌رێ مه يێ سڤك بووى. پارتى ديموكراتى كوردستان به‌رسڤا وى دده‌ت ودبێژيت ئه‌ڤ ئاخڤتنه يێن كه‌سه‌كێ سياسى نينن.
مه‌حموود محه‌مه‌د په‌يڤدارێ پارتى ديموكراتى كوردستان گۆت، هه‌ر پۆسته‌كێ ل هه‌رێما كوردستانێ هه‌بيت ئه‌ركه‌كێ نيشتمانى ل سه‌ر ملێ بوو وگه‌له‌ك ب باشى يێن ئه‌داكرين، وه‌كو دروستكرنا په‌يوه‌نديێن نێڤده‌لوه‌تى وسه‌ره‌دانێن به‌رپرسێن بلند يێن وه‌لاتان بۆ هه‌رێما كوردستانێ وئه‌و مافێن بۆ كوردان هاتينه بده‌ستڤه‌ئينان پشكه‌كا مه‌زن ژێ ڤه‌دگه‌ريت بۆ بزاڤێن سه‌رۆك بارزانى.
په‌يڤدارێ پارتى زێده‌تر بۆ دوارۆژ گۆت، پۆستێ سه‌رۆكێ هه‌رێمێ پۆسته‌ك بوو كو ژلايێ خه‌لكێ هه‌رێما كوردستانێ ڤه هاتبوو هه‌لبژارتن وده‌نگ پێدايه، له‌وما هه‌كه كه‌سه‌ك ژى ل ڤێرێ ووێراهه دناڤدلێ خوه‌دا كێشه ل گه‌ل وى پۆستى هه‌بيت، عه‌لى باپير دشێت زێده‌تر هزر تێدا بكه‌ت وب ديتنا من ئه‌ڤ ئاخڤتنه يێن كه‌سه‌كى نينن كو خوه ب سياسى دانيت.
سه‌باره‌ت ئاخڤتنه‌كا عه‌لى باپيرى كو گوتبوو، ل ده‌مێ هه‌بوونا پۆستێ سه‌رۆكێ هه‌ريمێ، چه‌ندين بريارێن شاش هاتنه دان وكورد تووشى ره‌وشه‌كا خراب گه‌هاندن، مه‌حموود محه‌مه‌د ئاماژه كر كو ئه‌ميرێ كۆمه‌لا ئيسلامى پێشتر ل گه‌ل ريفراندۆمێ بوو وشانازى ژى پێ دكر وگه‌له‌ك جاران ژى دگۆت، گۆمه‌لا ئيسلامى ژمێژه بريار يا داى وپرۆژه ژى يێ هه‌ى بۆ ريفراندۆمێ.
په‌يڤدارێ پارتى گۆت ژى، جهێ مه‌نده‌هوشيێ يه كو ئه‌ميرێ كۆمه‌لا ئيسلامى ده‌مێ ره‌وشا يا ل باربوو، ب وى شێوه‌ى پشته‌ڤانيا ريفراندۆمێ دكر ،نوكه ژى ره‌وش ب جۆره‌كێ دى هاتيه گوهۆرين، ئه‌و ب شێوازه‌كێ دى دئاخڤيت وئه‌ڤه دزڤريت بۆ كه‌سايه‌تيا وى.
ئه‌ڤرۆنيۆز:
وه‌زاره‌تا پێشمه‌رگه، ئه‌ڤرۆ دوشه‌مبى 4/12/2017 دبه‌ياننامه‌كێ دا راگه‌هاند قۆناغا ئێكێ ژ چاكسازيێن وێ دێ هێته بجهئينان.
ل دووڤ به‌ياننامه‌كا وه‌زاره‌تا پێشمه‌رگه‌ى كو ئه‌ڤرۆ هاتيه به‌لاڤكرن، كۆمبوونه‌كا تايبه‌ت ب پرۆسا چاكسازيێ ورێكخستنا هێزێن پێشمه‌رگێ كوردستانى هاته ئه‌نجامدان ب سه‌رپه‌رشتيا كه‌ريم شنگالى وه‌زيرێ پێشمه‌رگه ب وه‌كاله‌ت وب به‌رهه‌ڤبوونا فه‌ريق جه‌بار ياوه‌ر ئه‌ميندارێ گشتيێ وه‌زاره‌تێ وفه‌ريق جه‌مال محه‌مه‌د سه‌رۆك ئه‌ركانێن وه‌زاره‌تێ ورێڤه‌به‌ر وئه‌ندامێن بۆردێ چاكسازيێ وه‌زاره‌تا پێشمه‌رگه ونوونه‌رێن وه‌لاتێن ئه‌مريكا وبريتانيا وئه‌لمانيا.
وه‌زاره‌تا پێشمه‌رگه‌ى دبه‌يانناما خوه‌دا ئاماژه دا، ل ده‌ستپێكا كۆمبوونێ، بۆردێ چاكسازيێ ل وه‌زاره‌تێ رۆناهى خسته سه‌ر چاوانيا بجهئينانا خالێن پرۆسا چاكسازيێ ژروويێ گرنگيێ وپێدڤيێ وروشا گونجاى. كو وه‌كو قۆناغا ئێكێ دێ پێنج خالێن سه‌ره‌كى دناڤ پرۆسا چاكسازيێ دا هينه بجهئينان.
دياركر يه ژى، پشتى دانوستاندنێ ولێك گوهارتنا بۆچوونان دناڤبه‌را وه‌زيرێ پێشمه‌رگه‌ى ب وه‌كاله‌ت ونوونه‌رێن وه‌لاتێن هه‌ڤپه‌يمان كو سه‌رپه‌رشتێن پرۆسا چاكسازيێ نه، ل گه‌ل رێڤه‌به‌ر وئه‌ندامێن بۆردێ چاكسازيا وه‌زاره‌تێ، هه‌ر پێنج خالێن به‌رهه‌ڤكريێن بۆردێ چاكسازى، ژلايێ وه‌زيرێ پێشمه‌رگه‌ى ب وه‌كاله‌ت هاتن قه‌بوولكرن وخستنه دبوارێ بجهئينانێ دا.
ئه‌ڤرۆ نيۆز:
وه‌زاره‌تا كاره‌بێ ل هه‌رێما كوردستانێ، ئه‌ڤرۆ دوشه‌مبى، هوشداريه‌ك ل دۆر راوه‌ستانا دو ويستگه‌هێن كاره‌بێ دده‌ت ئه‌گه‌ر سوته‌مه‌نيا پێدڤى بۆ نه‌هێته دابينكرن.
وه‌زاره‌تا كاره‌بێ دبه‌ياننامه‌كێ دا كو ئه‌ڤرۆ دوشه‌مبى 4/12/2017 به‌لاڤبووى هوشاداريا راوه‌ستانا هه‌ردو ويستگه‌هێن هه‌ولێرێ وه‌مچه‌مال يێن به‌رهه‌مئينانا كاره‌بێ دده‌ت و دبێژيت، ل دووڤ وان پێزانينێن ژوه‌زاره‌تا سامانێن سروشتى هاتينه وه‌رگرتن، بارهه‌لگرێن ڤه‌گۆهاستنا سوته‌مه‌نيێ ژ بيرا (كورمور) تووشى رێگريێ بوون ژلايێ هنده‌ك كه‌سان ڤه ل ده‌ڤه‌رێ كو كار ل سه‌ر چێكرنا رێيه‌كێ بۆ خوه دكه‌ن.
به‌يانناما وه‌زاره‌تا كاره‌بێ زێده‌تر دبێژيت، ژئه‌گه‌رێ وان كارێن نه قانوونى، حوكمه‌تا هه‌رێما كوردستانێ ب گۆژمي 10 مليۆن دۆلاران زيانداربوو.
زێده‌تر دبێژيت، هه‌تا نوكه لايه‌نێن په‌يوه‌نديدار نه‌شياينه وێ ئاريشه چاره بكه‌ن وهه‌كه به‌رده‌وامبوو، دبيت هه‌ردو ويستگه‌هێن هه‌ولێرێ وچه‌مچه‌مال راوه‌ستن، ژبه‌ر داخستنا بيرێن به‌رهه‌مئينانا غازا سروشتى.
نيشاندان