ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ خشته‌كێ نوو يێ مووچه راگه‌هاند و تێدا ژڤانێ دانا مووچێ خانه‌نشينا دياركر.
ب گۆره‌ى ڤى خشته‌يى ل رۆژێن دوشه‌مبى و سێشه‌مبى رێكه‌فتى 4 و 5ى كانوونا ئێكێ 2017 دێ مووچێ خانه‌نشينێن پێشمه‌رگه‌ى هێته به‌لاڤكرن.
ل رۆژێن چارشه‌مبى و پێنجشه‌مبى رێكه‌فتى 6 و 7ى كانوونا ئێكێ دێ مووچێ خانه‌نشينێن مه‌ده‌نى هێته به‌لاڤكرن.
ئه‌ڤرۆ نيوز:
نوكه ل پيرمام مه‌سعود بارزانى سه‌رۆكێ پارتى ديموكراتى كوردستان و د. فوئاد مه‌عسوم سه‌رۆك كۆمارێ عيراقێ يێ د كۆمبوونێ دا.
هه‌ر ديسا ئه‌ڤرۆ ل هه‌ولێر فوئاد مه‌عسوم ل گه‌ل نێچيرڤان بارزانىن سه‌رۆك وه‌زيرێن هه‌رێما كوردستانێ و قوباد ته‌له‌بانى جێگرێ سه‌رۆك وه‌زيران كۆمبوو و كاودانێن كه‌ركووك ده‌سپێكر و دانوستاندنا ل گه‌ل حوكمه‌تا عيراقێ گه‌نگه‌شه‌كر.
ئه‌ڤرۆ نيوز:
حوكمه‌تا هه‌رێما كوردستانێ ب هه‌لكه‌فتا ژ دايكبوونا حه‌زره‌تێ محه‌مه‌د سلاڤێن خودێ ل سه‌ر بن، هه‌ر وه‌كو سالێن بۆرى رۆژا پێنجشه‌مبى 30ى چريا دويێ 2017 كره بهێنڤه‌دانا فه‌رمى.
سه‌فين دزه‌يى، ئاخفتنكه‌رێ فه‌رميێ حوكمه‌تا د په‌يامه‌كێ دا پيرۆزباهيا موسلمانێن كوردستانێ و جيهانێ كر و هيڤى خواست ئه‌ڤ هه‌لكه‌فته ببيته پشته‌ڤانه‌ك بۆ ئێكرێزى و ب ده‌ستڤه‌هاتنا هه‌موو هيڤيێن گه‌لێ كورد.
دزه‌يى گۆت: “ب ڤێ هه‌لكه‌فتێ رۆژا پێنجشه‌مبى 30ى چريا دويێ 2017 ل ده‌موده‌زگه‌هێن حوكمه‌تێ بهێنڤه‌دانا فه‌رمى يه”.
ئەڤرۆ، نیوز، مەحمود نھێلی:
د سەرەدانەکێ بو دەڤەرا ئامێدیێ، ئەڤرۆ 29/11/2017 فەرھاد ئەتروشی پارێزگەرێ دھوکێ و شاندەکێ د گەل دا سەرا رێڤەبەریا ناحیا دێرەلۆک دا و ژلایێ سامی ئوشانە رێڤەبەرێ ناحیا دێرەلۆک و ھەژمرەکا بەرپرس و رێڤەبەرێن میری پشوازی لێھاتە کرن.
پاشان جەنابێ پارێزگاری و شاندێ میری یێ دگەلدا ل گەل رێڤەبەرێ ناحێ و قایمقامێ ئامێدیێ و بەرپرسێ لقا ھەژدا یا پارتی و چەندین رێڤەبەرێن دی کومبوو و تا ئامادەکرنا ڤی نوچەی کومبوون یا بەردەوام بوو.
سەرۆکێ لژنا قانوونی و ناڤخوە و مافێ مرۆڤی ل جڤاتا پارێزگەھا دھۆکێ بۆ رۆژناما ئەڤرۆ دیار کر، گرتنا جادا خزمەتگۆزاری ژ لایێ ئۆتێلا ریکسۆس ڤە یا نەقانوونی یە، ژ بەرکو دژی بەرژەوەندیا گشتی یە.
ئدریس ھەرکی، سەرۆکێ لژنا قانوونی و ناڤخوە و مافێ مرۆڤی ل جڤاتا پارێزگەھا دھۆکێ خویا ژی کر، ئەو جادەیا خزمەتگۆزاری یا سەرەکی یە و ب فەرماندە، دادگەە، قایمقامیا دھۆکێ و چەندین جھێن دی یێن گشتی ڤە یا گرێدایە، وان ھەموویان رێ یا ڤەکری، ب تنێ ئۆتێلا رکسۆس یا مای و نەڤەکریە و گۆت: “وەکو قانوون کارەکێ نەقاوونی یە، چونکو دژی بەرژەوەندا گشتی یە و نابیت بەرژەوەندا کەسۆکی ل سەر یا گشتی بھێتە خستن”.
ھەرکی ئاشکرا ژی کر، داخوازکارێ گشتی ل سەر بابەتی سکالا بلندکریە و لژنا خزمەتگۆزاری یا جڤاتێ سەردانا ئۆتێلا رێکسوس کریە، ئەوانژی بەھانێن خوە ل سەر گرتنێ ھەبووینە، دیسا دیارکرن کو بەری ئۆتێلا خوە بدانن چو جادە د نەخشەی دا نەبووینە و گۆت: “ھەکە بەری دانانا وێ ئۆتێلێ ئەو جادە د نەخشەی دا نەبیت مادەم جادە ھاتیە ڤەکرن و د بەرژەوەندا گشتی دایە دڤێت جادە بھێتە ڤەکرن”.ي
ئدریس ھەرکی گۆتژی: “ھەکە بەری پرۆژە بھێتەدانان ئەو جادە د نەخشەی دا ژی نەبیت، دڤێت حوکمەت قەرەبوویا خودانێ ئۆتێلێ بکەت، لێ ھەکە د نەخشەی دا بوویە و ئۆتێل ھاتیەدانان دڤێت جادە بھێتە ڤەکرن، دڤێت بەرژوەندیا خودانێ ئۆتێلێ ژی بھێتە پاراستن، چونکو پارەکێ مەزن یێ لێ مەزاخی، لێ بەرژەوەندا گشتی ھەموو دەما بەری بەرژەوەندایا تایبەتی یە”.
ئەڤرۆ نيوز:
بەرپرسێ راگەھاندنا رێڤەبەریا پولیسێن پاریزگەھا دھۆکێ ئاشکراکر کو بکوژێن (عادل سەدیق ئەحمەد زێوکی) یێ بەرنیاس ب (شینو زێوکی) ھاتینە دیارکرن و ئێک ژێ ھاتیە دەستەسەرکرن.
رائیدێ ماف پەروەر ھێمن سلێمان بەرپرسێ راگەھاندنا رێڤەبەریا پولیسێن پارێزگەھا دھۆکێ بۆ رۆژناما ئەڤرۆ گۆت: تاوانبارەک ھاتیە دەستەسەرکرن، سێ ژی رەڤینە و دوڤچوونا ل سەر روودانێ یا بەردەوامە، ھەر تشتەکێ گرێدایی روودانێ دیاربوویە و تاوانباری ژی دانپیدان ل سەر روودانێ کریە.
ھێمنی ئەو ژی ئاشکراکر کو ئەڤان کەسا (شینو زێوکی) مێھڤان کربوو ل مالەکێ ل کومەلگەھا دومیز دخانی ڤە کوشتیە، ئەگەرێ روودانێ ژی ئاریشەکا جڤاکی بوویە دناڤبەرا ئەڤان کەسان دا.
ھەڤدەم ھێمن سلێمان ئەو ژی گۆت: ھەر ھەمان رۆژا وەلاتی (شینو زێوکی) بەرزەبووی ھاتبوو کوشتن، ھەر ھەمان رۆژ جەنازێ وی بۆ چیایێ زاوا ڤە گوھاست بوو، بەرپرسێ راگەھاندنا پولیسان ئاشکراکر ژی کو تاوانبارێ ھاتیە دەستەسەرکرن ژیێ وی 35 سالن، ل رێکەفتی 27ى چريا دويێ 2017 ب شەف ھاتیەگرتن.
بەرپرسێ راگەھاندنا پولیسێن پاریزگەھا دھۆکێ ئەو ژی دیارکر کو ئەف روودانە ھاتەدیارکرن ب ھەفکاریا ھێزێن ئاسایشێ و پاراستنێ بوویە.
جھێ ئاماژەکرنێ یە کو ل ئەینی یا بوری رێکەفتی 24ى چريا دويێ تەرمێ ناڤبری ل گەل ترۆمبێلا وی ل چیایێ زاوە ھاتبوو دبتن و ئەو چار رۆژ بوو یێ بەرزە.
ئه‌ڤرۆ نيوز:
ئەنجوومەنێن پارێزگەھێن ھەرێما کوردستانێ مژوولی بەرھەڤکرنا پڕۆژە قانوونا ئەنجوومەنێن پارێزگەھانە، سەرۆکێ لیژنا قانوون و ناڤخو و مافێ مرۆڤی ل ئەنجوومەنی پارێزگەھا دھۆکێ ژی دیاردکەت کو مەرەم ژ راستڤەکرنێ بۆ پێدانا دەسھەلاتێن زێدەترە ب ئەنجوومەنێن پارێزگەھان.
ئدریس ھەرکی، سەرۆکێ لیژنا قانوون و ناڤخوە و مافێ مرۆڤی ل ئەنجوومەنێ پارێزگەھا دھۆکێ بۆ رۆژناما ئەڤرۆ گۆت: لژنێن قانوونی ل ھەر سێ ئەنجوومەنێن پارێزگەھێن ھەرێما کوردستانێ بزاڤان دکەن پڕۆژە قانوونەک بھێتە بەرھەڤکرن بۆ راستڤەکرنا قانوونا ھژمارە سێ یا سالا 2009ێ ئەوا ھاتیە دەرکرن و تایبەت ب ئەنجوومەنێن پارێزگەھان، ھەتا نوکە پێنگاڤێن باش ھاتینە ھاڤێتن بۆڤێ مەرەمێ پشتی گەھشتینە قۆناغا دووماھیێ دێ پڕۆژە قانوون بۆ سەرۆکایەتیا جڤاتا وەزیران ھێتە بلندکرن، ھەتا بھێتە ھنارتن بۆ پەرلەمانێ کوردستانێ و بھێتە پەسەندکرن، چونکە ئەگەر بۆ ڤێ خۆلێ ژی نەبیت بۆ ھەلبژارتنێن داھاتی ب قانوونا نوو کار ب ئەنجوومەنێن پارێزگەھان بھێتەکرن.
ھەرکی گۆت ژی” مەرەم ژ راستڤەکرنا قانوونا ئەنجوومەنێن پارێزگەھان بۆ ڤێ چەندێ یە دەستھەلاتێن بەرفەرھتر ب ئەنجوومەنێن پارێزگەھان بھێنەدان، ھەر ژ پەیڕەوکرنا سیستەمێ لامەرکەزی ھەتا مەزاختنا بودجەی بۆ پارێزگەھان، چونکە ئەم دخوازین ھەر وەزارەتەکا بودجەی بۆ پارێزگەھێ دیاری بکەین دەستھەلاتا ئەنجوومەنێ پارێزگەھێ بیت ئەف پارە ل چو پڕۆژەیەکی بھێتە مەزاختن و کیرێ پێدڤیە، ھەروەسا دانانا رێڤەبەرێن گشتی بکەڤیتە دەستێ ئەنجوومەنیدا نە وەکی نوکە تنێ چەند ناڤەک ژلایێ ئەنجوومەنی بھێنە پەسەندکرن.
ئه‌ڤرۆنيۆز:
ئه‌ڤ شه‌ڤه هێزه‌كا ئه‌مريكى گه‌هشته كه‌ركووكێ ول سه‌ربازگه‌ها كه‌يوان جهگير بوو، چه‌ندين فرۆكه ژى بۆ چاڤدێريا كاروانێ وێ هيزێ ل ئه‌سمانێ كه‌ركووكێ دهێن ودچن.
محه‌مه‌د عوسمان ئه‌ندامێ جڤاتا نوونه‌رين عيراقێ ژ فراكسيۆنا ئێكه‌تيێ بۆ دوارۆژ راگه‌هاند، هاتنا وێ هيزا ئه‌مريكى وجهگيربوونا وان ژبۆ وێ چه‌ندێ يه خه‌لكى وئێمناهيا پاريزگه‌ها كه‌ركووكێ بپارێزن.
دياركر ژى، برياره ژۆره‌كا ئوپۆراسيۆنان بهيته دامه‌زراندن وهه‌موو هێزێن له‌شكرى وئه‌منى يێن كه‌ركووكێ تێدا پشكداربن.
هه‌مان په‌رله‌مانتارى بۆ تۆرا رووداو ژى گۆت، زێدتر ژ 40 هه‌مه‌رين له‌شكرێ ئه‌مريكى يێن گه‌هشتينه كه‌ركووكێ وهنارتنا هێزێن هه‌ڤپه‌يمانان ب رێيا ئه‌ردى وئه‌سمانى يا به‌رده‌وامه.
ئه‌ڤرۆنيۆز:
شاره‌زايه‌كێ قانوون ودستوورێ عيراقێ راگه‌هاند، فشارێن عه‌بادى ل سه‌ر هه‌ريما كوردستانێ، دێ هه‌لوه‌شاندنا عيراقێ ددوڤ خوه‌دا ئينن ودياركر كو بريارا دادگه‌ها فيدرالى يا عيراقى برياره‌كا سياسى يه نه‌كو قانوونى ودستوورى.
د.عابد خالد سه‌رۆكێ پشكا زانستێن سياسى ل زانكۆيا سلێمانيێ گۆت، فشارێن حه‌يده‌ر عه‌بادى ل سه‌ر هه‌ريما كوردستانێ، به‌رۆڤاژى دستوورێ عيراقێ نه وئارمانج ژێ ئه‌وه، ل ده‌مێ هه‌لبژارتنێن 2018 به‌رامبه‌ر نورى كالكى كو وى ل به‌ر جاره‌كادى بهێته سه‌ر ده‌ستهه‌لاتێ، پێگه‌هێ خوه ب هێز بكه‌ت.
ئاماژه دا، دستوورێ عيراقێ رێ ب وێ چه‌ندێ نه‌دايه كو ده‌ستهه‌لاتا بجهئينانێ هه‌رێما كوردستانێ سزا بده‌ت، تنێ دادگه‌ها فيدرالى يا عيراقى دشێت وى كارى بكه‌ت. گۆت ژى، مه‌ره‌ما عه‌بادى ئه‌و نينه هه‌رێما كوردستانێ بينيته سه‌ر دستوورێ عيراقێ، به‌لكو ئارمانجا وى يا سه‌ره‌كى ئه‌وه كوردان وه‌كو كارته‌كێ بۆ كۆمكرنا ده‌نگان بكاربينيت، ژلايه‌كى دى ڤه بزاڤا وێ دكه‌ت گه‌لێ كورد ژده‌ست نه‌ده‌ت، بۆ وێ چه‌ندێ دهه‌لبژارتنێن داهاتى دا باوه‌ريا خوه پێ مسوگه‌ر بكه‌ت.
وى شاره‌زايێ دستوورێ عيراقێ زێده‌تر بۆ باسنيۆز رۆهنكر، هه‌كه ددستوورێ عيراقێ دا به‌نده‌كا دياركرى هه‌با كو رێگريێ ل ريفراندۆما هه‌رێما كوردستانێ بكه‌ت، وى ده‌مى ريفراندۆم دا هێته هه‌لوه‌شاندن، گۆت ژى، له‌وما دده‌مه‌كى دا رێگرى ل ريفراندۆمێ ددستوورى دا نه‌هاتيه كرن، بزاڤا هه‌لوه‌شاندنا وێ ژى يا دروست وقانوونى نينه، بريارا دادگه‌ها فيدرالى ژى، برياره‌كا سياسى يه نه‌كو قانوونى ودستوورى يه.
خوياكر ژى، هه‌كه عه‌بادى دفشارێن خوه‌دا ل سه‌ر هه‌رێما كوردستانێ يێ به‌رده‌وام بيت، ئه‌گه‌ره‌كێ مه‌زن يێ هه‌ى كو هه‌لوه‌شاندنا عيراقێ ددووڤ خوه‌دا بينيت وگۆت، راسته نوكه عيراق ل به‌رامبه‌ر هه‌رێما كوردستانێ يا ب هيزه، به‌لێ دبيت رۆژه‌ك بهێته كورد ب هيز ببن ووى ده‌مى هه‌موو كارێن عه‌بادى دێ هه‌لوه‌شاندنا عيراقێ ددوڤ خوه‌دا ئينن.
ئه‌ڤرۆنيۆز:
ئه‌ميندارێ گشتيێ ئێكگرتووى ئيسلامى كوردستان راگه‌هاند، د سه‌ره‌دانا مه‌دا بۆ توركيا، مه بريار ب ده‌ستێن وى وه‌لاتى ديتن و بزاڤێ دكه‌ين په‌يوه‌نديێن توركيا وهه‌رێمێ ئاسايى ببن و هه‌تا راده‌كێ باش به‌ره و پێشڤه‌چوون يا هه‌ى بۆ چاره‌سه‌ريێ.
سه‌لاحه‌دين محه‌مه‌د به‌هائه‌دين ئه‌ميندارێ گشتيێ ئێكگرتووى ئيسلامى كوردستان پشتى سه‌ره‌دانه‌كا چه‌ند رۆژى بۆ توركيا، زڤرى هه‌ريما كوردستانێ ودكۆنگره‌كێ رۆژنامه‌ڤانى دا ل دهۆكێ ل دووڤ مالپه‌رێ فه‌رميێ ئێكگرتووى، گۆت، سه‌ره‌دانا مه بۆ توركيا يا سه‌ركه‌فتى بوو.
دياركر ژى، ئاساييكرنا ره‌وشا هه‌رێما كوردستانێ وتوركيا ب ئه‌ركێ خوه دزانين، له‌وما مه بزاڤكر په‌يوه‌نديێن هه‌رێمێ وتوركيا ئاسايى بكه‌ين.
زێده‌تر گۆت، توركيا كاريگه‌ريا خوه يا هه‌ى ل ده‌ڤه‌رێ وئه‌ڤ چه‌نده پێدڤى دكه‌ت په‌يوه‌ندى ل گه‌ل وى وه‌لاتى نه‌هێنه برين وهه‌تا راده‌كێ باش به‌ره‌ف پێشڤه‌چوون يا هه‌ى بۆ چاره‌سه‌ريێ.
نيشاندان