ئه‌ڤرۆ نيوز:
ئاسو مه‌حمود سه‌ركرده ژ بزاڤا گۆران د كۆنفرانسه‌كێ رۆژنامه‌ڤانى دا دياركر، شانده‌كێ پارتى چوويه سلێمانيێ و ل گه‌ل بزاڤا گۆران كوم بوويه، گۆران ژى سێ خال بۆ داهاتوويا كارێ سياسى ل هه‌رێمێ پێشكێشى پارتى كرينه و چاڤه‌رێى به‌رسڤا پارتى دكه‌ن، برياره حه‌فتيا بهێت ژى شانده‌كێ حوكمه‌تێ سه‌ره‌ردانا گۆران بكه‌ت بۆ ڤه‌گه‌ريانا وه‌زيرێن گۆران.
دياركرژى كو وان پرۆژه‌ك بۆ گوهرانكاريان ل ناڤ حوكمه‌ت و دروستكرنا حوكمه‌تا ده‌مكى يان يا ئينتبقالى پێشكێشى پارتى كريه.
ئەڤرۆ نیۆز،زنار تۆڤی:
سیاسەتمەدار و شارەزایێن ئەمریکی، داخواز دکەن کو بەغدا پێشێلکاریێن دستووری بەرامبەری ھەرێما کوردستانێ رابگریت.
سیاسەتمەدار و شارەزایێن ئەمریکی ئاگەهداری هووردەکاری و پێشێلکاریێن دستووری یێن حوکمەتا عێراقێ نە ل بەرامبەر کوردان و داخواز دکەن:کو بەغدا پێشێلکاریێن میلیشیاتێن حەشدا شەعبی راوەستینیت و گوتۆبێژێن جددی و دۆستانە ل گەل ھەولێرێ دەست پێ بکەت.
راندا سلیما ڤەکۆلەر و رێڤەبەرا کاروبارێن ناکۆکی و دانوستاندنان، ل پەیمانگەها رۆژھەلاتا ناڤین ل واشنتۆن، رادگەهینیت، کو پێدڤیە گفتوگۆ دناڤبەرا ھەولێر و بەغدا دەست پێ بکەن، نابیت بەغدا خۆ ژڤی بابەتی ڤەدزیت،دڤێت باوەری ب پێکڤەژیانێ هەبیت، ھەر چ نەبیت دڤێت بەغدا بۆ ماوەیەکێ کورت یان ناڤنجی و واقعیانە یا ئامادە بیت،هەروەسا بەرامبەر پرسا سەربەخۆیێ ژی، کو رەنگە د داھاتیدا ببیتە ئەمرێ واقع.
ئه‌ڤرۆنيۆز:
داواكارێ گشتى ل دهۆكێ داخواز ژ دادگه‌ها ڤه‌كۆلينا دهۆكێ كر پێرابوونێن پێدڤى بهێنه وه‌رگرتن ل به‌رامبه‌ر سه‌رپێچيا خودانێ ئۆتێلا ركسۆس ل سه‌ر رێيا خزمه‌تگوزارى ل نێزيك رێڤه‌به‌ريا به‌رێ يا هاتنوچوونێ.
داواكارێ گشتى ل دهۆكێ ب نڤيسارا هژمار 29 ل 15/11/2017 كو هاتيه ئاراسته‌كرن بۆ دادگه‌ها ڤه‌كۆلينا دهۆكێ، ديار دكه‌ت كو رۆژانه گه‌له‌ك سكالا ژلايێ وه‌لاتيێن سه‌نته‌رێ پارێزگه‌هێ دهۆكێ بۆ دهێن ل دۆر وێ سه‌رپيچيا خودانێ ئۆتێلا ركسۆس ل سه‌ر رێيا خزمه‌تگوزارى ئه‌وا دكه‌ڤيته به‌رامبه‌ر جادا سه‌دى ل نێزيك رێڤه‌به‌ريا هاتنوچوونا به‌رێ.
داواكارێ گشتى دوێ نڤيسارا خوه‌دا داخوازا پێرابوونێن پێدڤى دكه‌ت كو خودانێ ئۆتێلێ پێگير بكه‌ن سه‌رپێچى بهێته راكرن تاكو وه‌لاتى بشێن وێ رێيا گرتى ژلايێ خودانێ ئۆتێلێ ڤه بكاربينن، كو بۆ به‌رژه‌وه‌نديا خوه يا تايبه‌ت گرتيه، چونكى رێ ژلايێ باژێرڤانيا دهۆكێ يا هاتيه چێكرن بۆ به‌رژه‌وه‌نديا گشتى وگرتنا وێ دهێته هژمارتن سه‌رپێچى ل سه‌ر مافێ گشتى وئه‌ڤ سه‌رپێچيا زيق ول به‌رده‌م چاڤێن هه‌موويان، ته‌حه‌ديه‌كه بۆ وه‌لاتيێن دهۆكێ.
ئه‌ڤرۆنيۆز:
وه‌زيرێ ناڤخوه‌يا عيراقێ، قاسم ئه‌عره‌جى، راگه‌هاند 50 هزار كارمه‌ندێن وه‌زاره‌تێ ل عيراقێ يێن هاتينه ده‌ركرن و300 هزار كارمه‌ندێن نه‌خوينده‌وار يێن ل وێ وه‌زاره‌تێ هه‌ين.
قاسم ئه‌عره‌جى دسه‌ره‌دانا خوه‌دا بۆ پارێزگه‌ها نه‌جه‌ف گۆت( ل وه‌زاره‌تا مه 300 هزار كارمه‌ندێن نه‌خوينده‌وار يێن هه‌ين كو نه‌دزانن بخوينم ونه ژى بنڤيسن وپێدڤيه پست به‌ستنێ ب خودان باوه‌رناما وده‌رچوويێن ئاماده‌ييان بكه‌ين وه‌كو پۆليس بهێنه دامه‌زراندن).
ئاشكراكر ژى كو وه‌زاره‌تا دارايى 50 هزار فه‌مانبه‌ر ژ وه‌زاره‌تا ناڤخوه‌يى يێن ده‌ركرين ژئه‌گه‌رێ قه‌يرانا دارايى ئه‌وا تووشى عيراقێ بووى.
ئه‌ڤرۆنيۆز:
كۆميسارا بلند يا سياسه‌تا ده‌رڤه وئاسايشێ ب سه‌ر ئێكه‌تيا ئورۆپى ڤه، فيدرێكا مۆگێرينى، ناه‌ك بۆ سه‌رۆك وه‌زيرێن هه‌رێما كوردستانێ نێچيرڤان بارزانى هنارت.
مۆگێرينى دناما خوه‌دا، زێده‌بارى سۆپاسى وپێزانين بۆ هه‌ڤپشكى و سه‌ركردايه‌تيا مه‌سعود بارزانى، خوه‌شحاليا ئێكه‌تيا ئورۆپى بۆ به‌رهه‌ڤى وبزاڤێن هه‌رێما كوردستانێ ژبۆ چاره‌سه‌ريا كێشان ل گه‌ل به‌غدا ب رێيا دانوستاندنێ نيشاندا ودياركر( ئه‌م ژ نێزيك وب نيگه‌رانى سه‌حدكه‌ينه پێشهاتێن مه‌يدانى، ده‌مێ چه‌ند هه‌فتيێن بۆرى ژى، ئێك ژكارێن سه‌ره‌كى يێن مه ئه‌وبوو رێگرى ل توندوتيژيێ بهێته گرتن ژهه‌ر لايه‌كى بيت، هه‌روه‌سا مه پشته‌ڤانيا وان بزاڤان كريه كو بۆ چاره‌سه‌ركرنا كێشان دهێنه كرن، وه‌كو پێرابوونێن ئه‌منى ل ده‌ڤه‌رێن ناكۆكى ل سه‌ر، ئێكه‌تيا ئورۆپى يا به‌رده‌وامه ژى دچاڤدێريكرنا ره‌وشێ ودێ هاريكاريێن مرۆڤى پێشكێش كه‌ت).
دوێ نامێ دا كو ئه‌ڤرۆ پێنجشه‌مبى 16/11/2017 ب رێيا كلاريس پاستۆرى نوونه‌را ئێكه‌تيا ئورۆپى ل هه‌رێما كوردستانێ گه‌هشتيه نێچيرڤان بارزانى، مۆگيرينى پشته‌ڤانيا ئێكه‌تيا ئورۆپى بۆ دانوستاندنێ دناڤبه‌را به‌غدا وهه‌ولێرێ دا دووپات دكه‌ت ودبێژيت( هه‌كه لايه‌ن داخوازێ ژێ بكه‌ن، ئێكه‌تيا ئورۆپى ل گه‌ل هه‌ڤكارێن خوه يێن نێڤده‌وله‌تى، يا به‌رهه‌ڤه هاندان وئاسانكاريان بۆ وێ دانوستاندنێ بكه كو بزانيت دێ يا ب مفادار بيت وئه‌نجامێن باش بۆ هه‌بن).
خوياكر ژى كو( نه تنێ ئێكگرتن وسه‌قامگيريا عيراقێ، به‌لكو ئێكگرتن وسه‌قامگيريا هه‌رێما كوردستانێ وده‌زگه‌هێن حومى ژى بۆ ئێكه‌تيا ئورۆپى يا گرنگه).
هه‌ر دوێ نامێ دا مۆگيرينى هه‌ڤخه‌ميا ئێكه‌تيا ئورۆپى ل گه‌ل هه‌رێما كوردستانێ ده‌ربرى بۆ قوربانيێن بيڤه‌له‌رزا رۆژا 12 ڤێ مه‌هێ كو چه‌ند ده‌ڤه‌رێن هه‌رێمێ ڤه‌گرتين.
ئه‌ڤرۆ نیوز، نه‌وزاد هلۆرى:
وه‌زاره‌تا سامانێن سروشتى ل هه‌رێما كوردستانێ ل دۆر داخۆيانيێن دو په‌رله‌مانتارێن بزاڤا گۆڕان و كۆمه‌لا ئیسلامى رۆهنكرنه‌ك به‌لاڤكر و ئاخڤتنێن وان ب بێ بنه‌ما و نه‌راست هژمارتن.
ئه‌ڤرۆ رۆژا پێنج شه‌مبى 16 چریا دوویێ 2017 وه‌زاره‌تا سامانێن سروشتى راگه‌هاندنه‌ك به‌لاڤكر و تێدا دبێژیت( به‌رێزان عه‌لى حه‌مه سالح وسوران عومه‌ر دچه‌ند سايتێن راگه‌هاندنێ داخۆيانى داينه ل دۆر گازا خام كو بۆ پالاوگان هاتينه دابينكرن، هه‌موو ئه‌و داخۆيانىێن وان داين ب بوختان دزانین و ره‌ت دكه‌ین و مخابن دڤێ ىه‌وشا نازك رابووينه ب ئاراسته‌كرنا وان تۆمه‌تان كومه‌ره‌ما وان تنێ جه‌واشه‌كاريه).
وه‌زاره‌تا سامانێن سروشتى درۆهنكرنا خوه‌دا دبێژيت(هه‌موو به‌رهه‌مێن په‌ترۆلا كو دهێته به‌رهه‌مئینان هه‌ر ژبۆ ناڤخوه‌یا هه‌رێما كوردستانێ یه و وه‌لاتی دێ مفایى ژێ وه‌رگرن و بهایێ وێ ژى هه‌ر هه‌مان ميكانيزما فرۆتنا په‌ترۆلا خاما هه‌رێما كوردستانێ یه ل به‌نده‌را جیهان).
د پشكه‌كا دى یا رۆهنكرنا خوه دا، وه‌زاره‌تا ناڤبرى دیاركر كو پێشوه‌خت پاره ژ وان هاتیه وه‌رگرتن و به‌رده‌وام ژى ژمێریارى ل گه‌ل دهێته‌كرن. ديسا ب هه‌مان شێوه‌یێ كومپانیا تێگرێس و ب هه‌مان پرۆسه رۆژانه 50 هزار ته‌ن بۆ كومپانیا قه‌یوان ل ته‌قته‌ق هاتیه دابینكرن بۆ هه‌مان مه‌ره‌م.
ئه‌ڤرۆنيۆز:
ئه‌ندامه‌كێ كورد ل په‌رله‌مانێ عيراقێ راگه‌هاند، په‌رله‌مانتارێن پێنج فراكسيۆنێن كوردى ل په‌رله‌مانێ عيراقێ كۆمبوونا ئه‌ڤرۆ يا په‌رله‌مانى بجه هيلا.
به‌ختيار شاويس، په‌رله‌مانتارێ فراكسيۆنا ئێكه‌تيێ بۆخه‌ندان گۆت، ئه‌و لژنا هاتيه دروستكرن ل سه‌ر وان په‌رله‌مانتارێن دريفراندۆما هه‌رێما كوردستانێ ده‌نگێ خوه‌داى، راپۆرتا خوه خواند وخواستن بێخنه ده‌نگدانێ.
گۆت ژى، په‌رله‌مانتارێن كورد داخوازكر ئه‌و ئه‌و ئه‌و راپۆرته نه‌چيته ده‌نگدانێ، له‌وما كۆمبوونا په‌رله‌مانى بجه هێلان.
خوياكر ژى، پشتى ده‌ركه‌فتنا په‌رله‌مانتارێن كورد ژ هۆلا په‌رله‌مانى، راپۆرت نه‌چو به‌ر ده‌نگدانێ.
ل 25 ئه‌يلۆلا بۆرى، ريفراندۆم ل دۆر جودابوونا هه‌رێما كوردستانێ ژ عيراقێ ل هه‌رێمێ وده‌ڤه‌رێن ناكۆكى ل سه‌ر هاته ئه‌نجامدان، هژماره‌كا په‌رله‌مانتارێن كورد ل په‌رله‌مانێ عيراقێ ب (به‌لێ) ده‌نگ دابوو، پاشى هنده‌ك په‌رله‌ماتارێن عيراقى باده‌كه‌ك دژى وا په‌رله‌مانتارێن كورد لڤاندبوو.
ئه‌ڤرۆنيۆز:
فراكسيۆنێن كوردستانى ل په‌رله‌مانێ عيراقێ به‌ياننامه‌ك ل دۆر ئاوارێن كه‌ركووكێ وخورماتوو وده‌ڤه‌رێن دى به‌لاڤكر وتيدا داخواز ژ حه‌يده‌ر عه‌بادى سه‌رۆك وه‌زيرێن عيراقێ كر پێنگاڤێن بله‌ز ب هاڤێژيت بۆ راگرتنا ده‌ستدرێژيێن ل سه‌ر مۆلك ومالێن وه‌لاتيان ل كه‌ركووكێ وخورماتوو وده‌ڤه‌رێن دى دهێته كرن.
ده‌قێ به‌يانناما فراكسيۆنێن كوردستانى ل به‌غدا:
هه‌تا نوكه ب ده‌هان هزار ئاوارێن سڤيل يێن كورد ل باژێرێن كه‌ركووكێ وخورماتوو ل باژێرێن كه‌ركووكێ وخورماتوو وده‌ڤه‌رێن ناكۆكى ل سه‌ر يێن ره‌ڤين ژبه‌ر هاتنا له‌شكرى وحه‌شدا شه‌عبى بۆ وان ده‌ڤه‌ران پشتى 16/10/2017 ودره‌وشه‌كا نه‌ئاسايى دا ژيان خوه دبۆرينن دوور ژ مال ومولك وبازارێن خوه ويێن دناڤ چادرگه‌هێن ده‌مكى وجهێن نه‌گونجاى ڤه كو كێمترين پێدڤيێن ژيانێ بۆ نه‌هاتينه دابينكرن، ئه‌و هه‌ر چاڤه‌رێ دكه‌ن كو حوكمه‌تا فيدرال ئاسايشێ وده‌ستهه‌لاتا قانوونێ بۆ باژێرێن وان بزڤرينيت هه‌تاكو بشێن بزڤرن بۆ ناڤ مال وحالێن خوه كو پشكه‌كا مه‌زن ب سلامه‌ت نه‌بوون ژتالانێ وسوتنێ وته‌قاندنێ ل سه‌ر ده‌ستێ هژماره‌كا گرۆپێن چه‌كدارى كو ب سه‌ر هێزێن ئه‌منى يێن عيراقى دهێنه هژمارتن.
ئه‌ڤرۆ كو ئێك هه‌يڤ دبۆريت ب سه‌ر وان روودانه، چو پێرابوون ژلايێ حوكمه‌تا عيراقێ نه‌هاتينه ئه‌نجامدان بۆ زڤراندنا هيڤى وئۆمێدێ بۆ وه‌لاتيێن كورد ولێپرسين نه‌هاتيه كرن ل گه‌ل وان كه‌سێن مال ودوكان وسامانێ وه‌لاتيان سوتين وته‌قاندين وتالانكرين.
پێكڤه‌ژيانا پێكهاتێن وان ده‌ڤه‌ران رووب روويێ مه‌ترسيه‌كا راسته‌قينه بوويه، چونكى وه‌لاتيێن سڤيل كو هه‌ست ب ئاراميێ نه‌كه‌ن ودلنيا نه‌بن ژژيان ومال ونامۆسا خوه، نه‌شێن بزڤرن بۆ جهێن خوه و كارێن خوه بجهبينن، ژئه‌گه‌رێ وێ شه‌پۆلا ئاوارابوونا ب هزاران فه‌رمانبه‌ران، دبيت كارێن خوه ژده‌ست بده‌ن وبده‌هان هزار زارۆك ژ خواندنا بێ به‌هر ببن ونه‌خوه‌شى گران ژى به‌لاڤ ببن ب تايبه‌تى وه‌رزێ زڤستانێ يێ ب رێڤه.
ب ناڤێ هه‌موو فراكسيۆنێن كوردستانى ل جڤاتا نوونه‌رێن عيراقێ، داخواز ژ به‌رێز سه‌رۆكێ جڤاتا وه‌زيران دكه‌ين كو پێنگاڤێن بله‌ز ودادپه‌روه‌رانه ب هاڤێژيت بۆ راگرتنا ده‌ستدرێژيێن ل سه‌ر مولك ومالێ وه‌لاتيان ل وان ده‌ڤه‌ران وئه‌و كه‌سێن ب وان كرياران رابووين روو ب روويێ قانوونێ بهێنه كرن ب تايبه‌تى ل خورماتوو، هه‌روه‌سا پێدڤيه ئه‌و باژێره ژدياردا چه‌كدارى بهێته پاقژكرن ژبلى پۆليسێن ناڤخوه‌يى وله‌ز بهێته كرن دهه‌لسه‌نگاندنا رێژا زيانان وبريار دان ل سه‌ر قه‌ره‌بووكرنا زيانداران ورێخوه‌شكرن ل به‌رامبه‌ر زڤرينا ئاواران بۆ جهێن خوه.
ئه‌ڤرۆنيۆز:
وه‌زاره‌تا ئه‌وقافێ ل هه‌رێما كوردستانێ راگه‌هاند رۆژا ئێكشه‌مبيا داهاتى ده‌واما فه‌رمى يه ونه بێهنڤه‌دانه.
نه‌به‌ز ئيسماعيل په‌يڤدارێ وه‌زاره‌تا ئه‌وقافێ گۆت، رۆژا ئێكشه‌مبى ل هه‌موو داموده‌زگه‌هێن حوكمه‌تا هه‌رێما كوردستانێ ده‌واما فه‌رمى يه.
به‌رى نوكه چه‌ندين ده‌زگه‌هێن راگه‌هاندنێ به‌لاڤكربوو كو رۆژا ئێكشه‌مبيا داهاتى ب هه‌لكه‌فتا رۆژا ژدايكبوونا پێغه‌مبه‌ر محه‌مه‌د (س.خ) بێهنڤه‌دانا فه‌رمى يه.
ئه‌ڤرۆنيۆز:
ئه‌ڤرۆ ل هه‌ولێرێ، ده‌سته‌يا سه‌رۆكاتيا په‌رله‌مانێ كوردستانێ وسه‌رۆكێن فراكسيۆنێن په‌رله‌مانى ل گه‌ل كونسۆل وجێگرێ كونسۆلان ونوونه‌رێن وه‌لاتان ل هه‌رێما كوردستانێ كۆمبووه.
ده‌سته‌يا سه‌رۆكاتيا په‌رله‌مانێ كوردستانێ، كۆنسۆل ونوونه‌رێن وه‌لاتان ئاگه‌هداركرن ل سه‌ر پێشيلكاريێن قانوونى ودارايى ئه‌وێن دپرۆژه قانوونا بودجا عيراقێ يا سالا 2018.
پشتى كۆمبوونێ، دكۆنگره‌كێ رۆژنامه‌ڤانى دا، جه‌عفه‌ر ئێمينكى جێگرێ سه‌رۆكێ په‌رله‌مانى راگه‌هاند، په‌رله‌مانى راسپاردا تمام بۆ دانوستاندنێن حوكمه‌تا هه‌رێما كوردستانێ ل گه‌ل به‌غدا به‌رهه‌ڤكريه وهيڤيخوازين دانوستاندن دناڤبه‌را هه‌ردولادا زوو ده‌ست پێ بكه‌ن.
بێگه‌رد تالبانى، سكرتێرا په‌رله‌مانێ كوردستانێ ژى گۆت، مه وه‌كو په‌رله‌مانێ كوردستانێ په‌ياما خه‌لكێ كوردستانێ گه‌هانده ناڤه‌ندێن نێڤده‌وله‌تى ونوونه‌رێن وه‌لاتان ل هه‌رێما كوردستانێ.
بێگه‌ردى گۆت ژى، په‌ياما مه ئه‌وبوو كو گه‌لێ كورد دڤێت دچارچۆڤێ دستوورێ عيراقێ دا دانوستاندن ل گه‌ل به‌غدا ده‌ست پێ بكه‌ن، بۆ وێ مه‌ره‌مێ ژى مه ل روونشتنا بۆرى يا په‌رله‌مانى راسپارده‌كا 18 خالى دابوو حوكمه‌تا هه‌رێمێ كو تێدأ به‌حسێ هه‌موو وان خال ومادان كريه كو دره‌شنڤيسێ بودجا عيراقێ دا هاتينه وهه‌تا نوكه نه‌چوونه جڤاتا نوونه‌ران وئيمزا ل سه‌ر نه‌هاتيه كرن، به‌لێ گه‌له‌ك پێشيلكارى ل سه‌ر مافێن دستوورى يێن هه‌رێما كوردستانێ يێن تێدا هه‌ين، وێ چه‌ندێ ژى دێ كاريگه‌ريه‌كا گه‌له‌ك مه‌زن ل سه‌ر ژيارا خه‌لكێ كوردستانێ هه‌بيت.
گۆت ژى، هه‌كه به‌غدا دانوستاندنێ ل گه‌ل هه‌رێما كوردستانێ ره‌ت بكه‌ت، بژارده‌يا خوه‌ڤه‌كێشانێ ژ پرۆسا سياسى ل عيراقێ يا ڤه‌كريه.
دده‌مێ چه‌ند رۆژێن بۆرى دا، پتريا وه‌لاتێن زلهێز هه‌لويستێ خوه ل دۆر ده‌ستپێكرنا دانوستاندنان دناڤبه‌را به‌غدا وهه‌ولێرێ دا راگه‌هاندبوو وپێشوازى ل وێ رۆهنكرنێ كربوو كو ژلايێ حوكمه‌تا هه‌رێما كوردستانێ هاتبوو ده‌ركرن بۆ ده‌ستپێكرنا دانوستاندنان دچارچۆڤێ دستوورى دا.
نيشاندان