ئه‌ڤرۆ نيوز:
بەرپرسەکێ وەزارەتا ئەوقاف و کاروبارێن ئایینی ل حوکمەتا ھەرێما کوردستانێ ئاشکرا کر کو سەرەرای دەستپێکرنا وەرزێ عۆمرێ ئەڤ سالە ھێشتا چو وەلاتیێن ھەرێما کوردستانێ نەچووینە سعودیێ و گۆت: “ھێلا ئاسمانیا عیراقی داخواز ژ بەغدا کریە بۆ وەرزێ عۆمرێ دەست ب گەشتێن فڕۆکەڤانی ل ھەرێمێ بھێتەکرن”.
مەریوان نەقشبەندی، بەرپرسێ پەیوەندیێن وەزارەتا ئەوقاف و کاروبارێن ئایینی یا حوکمەتا ھەرێما کوردستانێ بۆ رۆژناما ئەڤرۆ دیار کر کو وەرزێ عۆمرێ د ئەڤ سالە دا دەستپێکریە، بەلێ ھێشتا چو وەلاتیێن ھەرێما کوردستانێ گەشتا عۆمرێ نەکریە، چونکی گەشتێن فڕۆکەڤانی ل ھەرێما کوردستانێ ھاتینە راگرتن و گۆت: “عۆمرەکارێن ھەرێما کوردستانێ د بەرھەڤ نینن ب رێیا فڕۆکەخانا بەغدا سەرەدانا وەلاتێ سعودیێ بکەن، چونکی ھەکە وەلاتی بخوازن گەشتا عۆمرێ بکەن پارەکێ زێدەتر دێ ھێتە مەزاختن، ئەڤە ددەمەکی دایە ل سالێن بۆری 30 ھەتا 50 ھزار کەسان ل ھەرێما کوردستانێ بۆ بجھئینانا عۆمرە سەرەدانا سعودیێ دکر”.
ناڤھاتی ئاماژە دا وێ چەندێ کو ھێلا ئاسمانیا عیراقی داخواز ژ حوکمەتا عیراقێ کریە، گەشتێن فڕۆکەڤانی بۆ وەرزێ عۆمرێ بھێنە دەستپێکرن ئەو ژی دچارچوڤێ گەشتێن مرۆڤی دا بھێتە ھژمارتن، وەکو ھێلا ئاسمانیا عیراقی دیار کری ھەکە گەشت ل ھەرێما کوردستانێ نەھێنە دەستپێکرن دێ زیانێن مەزن یێن مادی بەر ھێلا فڕۆکەڤانیا عیراقی کەڤن و گۆت: “ھەر وەلاتیەکێ گەشتا عۆمرێ بکەت 500 دۆلاران کریا ڤەگوھاستنێ ددەتە ھێلا عیراقی و 50 دۆلاران ژی دەنە حوکمەتا عیراقێ وەکو باج، بەلێ ھێشتا بەغدا بەرسڤا ھێلا ئاسمانیا عیراقی نەدایە”.

ئه‌ڤرۆنيۆز، نه‌وزاد:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ دوشه‌مبى راگه‌هاند، هه‌رێما كوردستانێ دووپاتيێ ل چاره‌كرنا ئاريشان ل گه‌ل به‌غدا ب رێين ئاشتى دكه‌ت وب چو شێوه‌يان ژى قه‌بوول ناكه‌ت مافێن وێ يێن دستوورى بهێنه‌ پيشێلكرن.

ئه‌ڤرۆ مه‌سرور بارزانى شيره‌تكارێ جڤاتا ئاسایشا هه‌رێما كوردستانێ پێشوازى ل رامون كاساس بالیوزێ ئێكه‌تیا ئوروپا ل عیراقێ كر و د كۆمبوونه‌كێ دا به‌حس ل داوى گورانكاریێن هه‌رێم و عیراق و جیهانێ كر.

بالیوزێ ئێكه‌تیا ئورۆپا ل عیراقێ  پشته‌ڤانیا ئێكه‌تیا ئورۆپا بۆ چاره‌سه‌ركرنا ئاریشه‌یێن دناڤبه‌را هه‌رێما كوردستانێ و عیراقێ ل سه‌ر بنه‌مایێن د‌ستوورێ عیراقێ و ب رێیا دانوستاندنان دوپاتكر و خواست ژى كو ب زووترین ده‌م ئالوزیێن دناڤبه‌را به‌غدا و هه‌ولێرێ ب داوى بهێن و نه‌مینن.

ژلایێ خوڤه‌ شيره‌تكارێ جڤاتا ئاسایشا هه‌رێما كوردستانێ به‌حس ل په‌یوه‌ندیێن له‌شكرى يێن هه‌رێما كوردستان و عیراقێ كر و گۆت: ( پێدڤیه‌ ئاریشه‌یێن به‌غدا و هه‌ولێرێ ژ بنه‌ره‌ت دا بهێنه‌ چاره‌سه‌ركرن داكو دچارچۆڤێ نه‌دادپه‌روه‌ریا دیرۆكى یا ل به‌رامبه‌ر گه‌لێ دهێنه‌كرن ده‌رباز بین و دووباره‌ نه‌بن ڤه‌).

مه‌سرور بارزانى دوپات ل چاره‌سه‌ركرنا ئاریشه‌یێن هه‌ردوولایان ب رێێن ئاشتیانه‌كر و گۆت : ( هه‌رێما كوردستانێ قه‌بوول ناكه‌ت  مافێن وێ یێن دستوورى بهێنه‌ پێشيلكرن و دخوازین جڤاكێ نیڤده‌وله‌تى زێده‌تر و باشتر بهێنه‌ سه‌ر خه‌ت ، داكو ئالوزیێن دناڤبه‌را هه‌ولێر و به‌غدا به‌ر ب ئالوزتر نه‌چن و بهێنه‌ چاره‌سه‌ركرن).