ئه‌ڤرۆ نيوز:
مه‌سعود بارزانى په‌يامه‌كا هه‌ڤخه‌ميێ بۆ قوربانيێن بيڤه‌له‌رزا شه‌ڤا چوويى دهێنێريت و سه‌ره‌خوشيێ ل كه‌س و كاريێن قوربانيان و خه‌لكێ ده‌ڤه‌رێن زيانڤێكه‌فتى دكه‌ت.
سه‌رۆك بارزانى هيڤيا ساخبوونا بله‌ز بۆ بريندارێن روودانێ خواستيه و دياركريه: هه‌ڤخه‌ميا خوه دگه‌هينينه خه‌لكێ لێقه‌وماوى و زيانڤێكه‌فتى يێ هه‌ردو پارێزگه‌هێن كرماشان و هه‌له‌بجه.
ئه‌ڤرۆ نيوز:
جڤاتا وه‌زیرێن هه‌رێمێ راگه‌هاندنه‌ك به‌لاڤكر و ئاماژه ب وێ يه‌كێ كريه كو به‌غدا پێنگاڤێن نه‌دستوورى به‌رامبه‌ر كوردستانێ دهاڤێژيت
هه‌روه‌سا جڤاتا وه‌زیرێن هه‌رێمێ داخواز كريه هه‌موو كێشه ب رێیا دیلۆگێ د گه‌ل به‌غدایێ دا بهێن چاره‌كرن و حكومه‌تا ئیراقێ به‌حس ل پابه‌ندبوون ب ده‌ستوورى دكه‌ت، لێ ب كریار وه‌سان نینه.
هه‌روه‌سا ته‌كه‌زى ل ئێكرێزییا ناڤخوه‌یا هه‌رێما كوردستانێ كر
ئه‌ڤرۆنيۆز:
به‌رى ده‌مه‌كێ كێم هاريكاريێن توركيا بۆ زياندارێن بيڤه‌له‌رزا هه‌رێما كوردستانێ ب رێيا ده‌رگه‌هێ ئيبراهيم خه‌ليل يێ سنۆرى گه‌هشتنه هه‌ريمێ،
حوكمه‌تا توركيا ئه‌ڤرۆ دوشه‌مبى، راگه‌هاندبوو، هژماره‌كا كه‌لوپه‌لێن پێدڤى بۆ زياندارێن بيڤه‌له‌رزا باكوورێ عيراقێ (هه‌رێما كوردستانێ) هنارتينه.
جێگرێ سه‌رۆك وه‌زيرێن توركيا و په‌يڤدارێ حوكمه‌تا توركى، به‌كر بۆزداغ ل سه‌ر به‌رپه‌رێ خوه يێ تويته‌رى به‌لاڤكر، هزار چادر ژ ويلايه‌تا مۆشێ وچار هزار به‌ته‌نى ژ ويلايه‌تا دياربه‌كر يێن هاتينه هنارتن بۆ ده‌رگه‌هێ خابۆر يێ سنۆرى ل گه‌ل عيراقێ.
گۆت ژى، كۆمه‌لا هه‌يڤا سور يا توركى سێ هزار چادر ل گه‌ل كه‌لوپه‌لێن خوارنێ يێ پێدڤى ب شێوه‌كێ بله‌ز بۆ زيانڤه‌ێكه‌فتيێن بيڤه‌له‌رزێ هنارتينه.
ژلايێ خوه‌ڤه ئيسماعيل ياغجى به‌رپرسێ سه‌نته‌رێ هاوارهاتنێ ل كۆمه‌لا هه‌يڤا سۆر يا توركى ل ده‌ڤه‌را باشوورێ رۆژهه‌لاتا توركيا، هنارتنا هاريكاريێن مرۆڤايه‌تى بۆ عيراقێ پشتى بيڤه‌له‌رزا ل نێزيك هه‌له‌بجه داى راگه‌هاند و بۆ ئاژانسا (ئه‌نادۆل) يا توركى گۆت( هاريكارى پێكهاتبوون ژ سێ هزار چادران و10 هزار ته‌ختان و10 هزار به‌ته‌نى ولێنانگه‌هه‌كا گه‌رۆك).
دياركر ژى، كۆمه‌لا هه‌يڤا سۆر يا توركى يا ئاماديه بۆ هنارتنا هاريكاريێن زێده‌تر ل ده‌مێ پێدڤى.
سه‌رۆكێ حوكمه‌تا هه‌ريما كوردستانێ نێچيرڤان بارزانى دكونگرێ خوه يێ رۆژنامه‌ڤانێى دا ئه‌ڤرۆ ئێڤارى، سوپاسيا هه‌لويستێ حوكمه‌تا توركيا كر د پێشكێشكرنا هاريكاريان دا بۆ زياندارێن بيڤه‌له‌رزێ.
ئه‌ڤرۆنيۆز، نه‌وزاد:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ دوشه‌مبى راگه‌هاند، هه‌رێما كوردستانێ دووپاتيێ ل چاره‌كرنا ئاريشان ل گه‌ل به‌غدا ب رێين ئاشتى دكه‌ت وب چو شێوه‌يان ژى قه‌بوول ناكه‌ت مافێن وێ يێن دستوورى بهێنه پيشێلكرن.
ئه‌ڤرۆ مه‌سرور بارزانى شيره‌تكارێ جڤاتا ئاسایشا هه‌رێما كوردستانێ پێشوازى ل رامون كاساس بالیوزێ ئێكه‌تیا ئوروپا ل عیراقێ كر و د كۆمبوونه‌كێ دا به‌حس ل داوى گورانكاریێن هه‌رێم و عیراق و جیهانێ كر.
بالیوزێ ئێكه‌تیا ئورۆپا ل عیراقێ پشته‌ڤانیا ئێكه‌تیا ئورۆپا بۆ چاره‌سه‌ركرنا ئاریشه‌یێن دناڤبه‌را هه‌رێما كوردستانێ و عیراقێ ل سه‌ر بنه‌مایێن د‌ستوورێ عیراقێ و ب رێیا دانوستاندنان دوپاتكر و خواست ژى كو ب زووترین ده‌م ئالوزیێن دناڤبه‌را به‌غدا و هه‌ولێرێ ب داوى بهێن و نه‌مینن.
ژلایێ خوڤه شيره‌تكارێ جڤاتا ئاسایشا هه‌رێما كوردستانێ به‌حس ل په‌یوه‌ندیێن له‌شكرى يێن هه‌رێما كوردستان و عیراقێ كر و گۆت: ( پێدڤیه ئاریشه‌یێن به‌غدا و هه‌ولێرێ ژ بنه‌ره‌ت دا بهێنه چاره‌سه‌ركرن داكو دچارچۆڤێ نه‌دادپه‌روه‌ریا دیرۆكى یا ل به‌رامبه‌ر گه‌لێ دهێنه‌كرن ده‌رباز بین و دووباره نه‌بن ڤه).
مه‌سرور بارزانى دوپات ل چاره‌سه‌ركرنا ئاریشه‌یێن هه‌ردوولایان ب رێێن ئاشتیانه‌كر و گۆت : ( هه‌رێما كوردستانێ قه‌بوول ناكه‌ت مافێن وێ یێن دستوورى بهێنه پێشيلكرن و دخوازین جڤاكێ نیڤده‌وله‌تى زێده‌تر و باشتر بهێنه سه‌ر خه‌ت ، داكو ئالوزیێن دناڤبه‌را هه‌ولێر و به‌غدا به‌ر ب ئالوزتر نه‌چن و بهێنه چاره‌سه‌ركرن).
ئه‌ڤرۆنيۆز:
به‌رپه‌رسه‌كێ حوكمه‌تا عيراقێ دياركر بيڤه‌له‌رزا شه‌ڤا بۆرى چو كارتێكرن وزيان ل سكرێ مووسلێ نه‌كريه.
حه‌سه‌ن جه‌نابى وه‌زيرێ ژێده‌رێن ئاڤى ل عيراقێ ل سه‌ر به‌رپه‌رێ خوه يێ فيسبووكى به‌لاڤكر( سكرێ ده‌ربه‌نديخان نێزيكترين ده‌زگه‌ه بوو ژبنگه‌هێ بيڤه‌له‌رزێ وهنده‌ك كه‌ڤر وبه‌ر يێن كه‌فتينه دناڤ سكرى دا وهنده‌ك خانيێن نێزيكى وى يێن هه‌رفين).
گۆت ژى( سكرێ حه‌مرين دكه‌ڤيته بن سكرێ ده‌ربه‌نديخان، به‌لێ ره‌وشا وى سكرى يێ باشه وزيان نه‌گه‌هشتينێ).
ل دۆر سكرێ مووسلێ، وه‌زيرێ ژێده‌رێن ئاڤى ل عيراقێ به‌لاڤكريه كو چو كارتێكرن ل وى سكرى نه‌هاتيه كرن.
ئەڤرۆ نیۆز،زنار تۆڤی:
دادگەها فیدرالی یا عێراقێ ماوێ بریاردانێ دەربارەی ریفراندۆما سەربەخۆیا کوردستانێ دیاردکەت.
پێشتر ل رۆژا 2/11/2017، ئیاس سامۆک،پەیڤدارێ دادگەها فیدرالی یا عێراقێ راگەهاند،هەتاکو گوهێ خۆ نەدەنە بوچوونا حوکمەتا هەرێما کوردستانێ،نەشێن بریارێ دەربارەی دستووریبوون و نەبوونا ریفراندۆمێ بدەن.
حوکمەتا عێراقێ ب هێجەتا نەدستووریبوونێ،ل دادگەها فیدرالی یا عێراقێ سکالا ل سەر ریفراندۆمێ تۆمار کریە و داخواز کربوو کو ئەنجامێن وێ ریفراندۆمێ بهێنە هەلوەشاندن.
ئەڤرۆ دوشەمبی 13/11/2017، ئیاس سامۆک د بەیاننامەیەکێدا راگەهاندیە،کو دادگەها فیدرالی یا عێراقێ رۆژا (20/11/2017) بۆ بریاردانێ دەربارەی ریفراندۆما سەربەخۆیا کوردستانێ دیار کریە.
رۆژا 25 ئیلۆنێ 2017 وەلاتیێن باشۆرێ کوردستانێ چووینە سەر سندووقێن دەنگدانێ و زێدەتر ژ %92 یا دەنگدەران دەنگێ خۆ بۆ جۆدابوونا کوردستانێ ژ عێراقێ دایە.
ئه‌ڤرۆنيۆز:
سه‌رۆكێ توركيا ره‌جه‌ب ته‌يب ئه‌ردوگان به‌رى ده‌مه‌كێ كێم هنارتنا هاريكاريێن زێده‌تر بۆ هه‌رێما كوردستانێ ژئه‌گه‌رێ بيڤه‌له‌رزا شه‌ڤا بۆرى راگه‌هاند.
سه‌رۆكێ توركى دداخۆيانيه‌كێ دا بۆ رۆژنامه‌ڤانان به‌رى گه‌شتكرنا خوه بۆ رۆسيا گۆت( مه رێنمايى يێن ده‌ركرين بۆ هنارتنا هه‌موو ده‌سته‌يێن هاوارهاتنێ يێ توركى بۆ هه‌رێما باكوورێ عيراقێ).
ئه‌ردۆگانى گۆت ژى( نوكه 50 بارهه‌لگرێن هاريكاريان يێ ژ سنۆرى ده‌رباز دبن بۆ گه‌هاندنا وان هاريكاريان).
ئه‌ڤرۆنيۆز:
سه‌رۆكێ حوكمه‌تا هه‌رێما كوردستانێ، نێچيرڤان بارزانى، راگه‌هاند، كێشه يا دروستبووى دهنارتنا ده‌رمانان دا ژلايێ به‌غدا ڤه، كو ئه‌و ده‌رمان گه‌له‌ك دپێدڤى نه بۆ هه‌رێما كوردستانێ.
نێچيرڤان بارزانى، ئه‌ڤرۆ دكونفرانسه‌كێ رۆژنامه‌ڤانى دا گۆت( كێمكرنا هناتنا ده‌رمانان دده‌مه‌كى دايه هه‌تاكو نوكه ژى نێزيكى مليۆنه‌ك و500 هزار ئاواره ل هه‌رێما كوردستانێ دژين وب دروستكرنا گێشان دهنارتنا ده‌رمانان دا، دێ كێشه پتر بن).
رۆهنكر ژى( هه‌رێما كوردستانێ مه‌زاختيێن مه‌زن ل ئاواران دكه‌ت كو وان هژمارا ئاكنجيێن هه‌رێمێ ب رێژا 30% يا زێده‌كرى).
نێچيرڤان بارزانى دياركر( نوكه هه‌رێما كوردستانێ پێدڤى ب ده‌رمانان هه‌يه ول ڤى ده‌مى به‌غدا هنارتنا ده‌رمانان بۆ هه‌رێمێ يا كێمكرى وئه‌م يێن دبزاڤێن به‌رده‌وام دا بۆ چاره‌كرنا ڤێ گرفتێ).
ئه‌ڤرۆنيۆز:
شه‌ڤا بۆرى روودانه‌ك لێگدانێ دناڤبه‌را دو ترومبێلان دا ل ناحيا مانگێشكێ روودا و 10 كه‌س برينداربوون.
رێڤه‌به‌ريا هاتنوچوونا دهۆكێ راگه‌هاند، دوهی ب شەڤ ل دەمژمێر (22:30 ) ل سەر جادا ناحیا مانکێشکێ نێزیک گوندێ مه‌جلمەختێ روودانەکا هاتنوچوونێ دناڤبەرا دو ترومبێلان دا روودا ئه‌وژى ترومبێله‌كا بارهه‌لگر ژ جۆرێ كيا 2 ته‌ن وترومبێله‌كا تويۆتا پێك ئاب.
دياركر، ژئه‌نجامێن وێ روودانێ (10کەس) ب سەختی بریندار بوون و هاتنە ڤەگوهاستن بۆ نەخوه‌شخانا تەنگافیا ل باژێرێ دهۆکێ، هه‌روه‌سا زيان ب هه‌ردو ترومبێلان كه‌فتن.
رێڤه‌به‌ريا ناڤبرى ئاماژه دا كو ئەگەرێ روودانێ دزڤریت بۆو نەپێگريێ ب رێنمایێن هاتنوچوونێ و بکارئینانا له‌زاتيێ دهاژووتنێ دا.
ئه‌ڤرۆنيۆز، نه‌وزاد:
سه‌رۆكێ لژنا سۆته‌مه‌نيان ل جڤاتا پارێزگه‌ها دهۆكێ راگه‌هاند، به‌هرا پارێزگه‌ها دهۆكي ژ وێ رێژه‌يا گازا سپى ئه‌وا دێ حوكمه‌تا عيراقێ بۆ هه‌رێمێ هنێريت، 10 مليۆن لترن.
عه‌بدولسه‌مه‌د تێلى سه‌رۆكێ لژنا سۆته‌مه‌نيان ل جڤاتا پارێزگه‌ها دهۆكێ بۆ پاشه‌رۆژ گۆت( ئه‌م پێشبينيێ دكه‌ين به‌هرا پارێزگه‌ها دهۆكێ ژ وێ گازا سپى ئه‌وا به‌غدا دێ بۆ هه‌ريمێ ڤرێكه‌ت 10 مليۆن لتر بن).
ژلايه‌كێ دى ڤه مه‌حسن تاها رێڤه‌به‌رێ سۆته‌مه‌نيان ل دهۆكێ بۆ دوارۆژ گۆت( پارێزگه‌ها دهۆكێ پێدڤى ب 55 مليۆن لترێن گازا سپى هه‌يه وهه‌تا نوكه چو گازا سپى ژ به‌غدا نه‌گه‌هشتيه به‌رده‌ستێن مه كو ل سه‌ر وه‌لاتيان به‌لاڤ بكه‌ين).
نيشاندان