ئەڤرۆ نیۆز،زنار تۆڤی:
شرۆڤەکارەکێ عێراقی دبێژیت،حەیدەر عەبادی سەرۆک وەزیرێن عێراقێ ل بەرە ب لیستەکا جۆدا ژ دەولەتا یاسایێ بەشداریێ د هەلبژارتنێن داهاتی یێن پەرلەمانی دا بکەت.
ئەڤە د دەمەکێ دایە کو سەرۆک وەزیرێن عێراقێ ل حەفتیا بوری راگەهاند،کو هەلبژارتنێن پەرلەمانێ داهاتی دێ ل 15 ئەیارا سالا 2018 برێڤە چن.
ئەوا ل هەلبژارتنێن داهاتی جهێ بەحسکرنێ بیت شێوازێ بەشداریکرنا حەیدەر عەبادییە،کو پێشبینی دهێتە کرن ل گەل نوری مالکی، سەرۆکێ دەولەتا یاسا روو ب روو ململانەکا سەخت ببیت،ب ئەگەرێ هندێ کو مالکی مەزنترین هەڤپەیمانە دناڤ هەڤپەیمانیا شیعان دا.
هەرچەندە تا نوکە عەبادی بەحسێ شێوازێ بەشداریکرنا د وان هەلبژارتنان دا نەکریە، بەلێ عەلا مستەفا، شرۆڤەکارێ عێراقی دبێژیت:سەرۆک وەزیرێن عێراقێ تیمەکا راوێژکارێن تایبەت یێن عێراقی و بیانی هەنە و دبێژنێ دێ د کۆنگرە و هەڤپەیڤینێن خۆ دا چاوا بەحسێ پرسا هەلبژارتنان کەت.
عەلا مستەفا دبێژیت:سەرۆک وەزیرانی عێراقێ ب جددی هزر ل بەشداریکرنێ ل هەلبژارتنێن داهاتی دکەت ب لیستەکا جۆدا ژ لیستا نوری مالکی، چونکە مالکی یێ بوویە رکابەرەکی سیاسی بۆ وی و هەردولا نەڤێت پێکڤە کار بکەن.
هەروەسا گوتیە، عەبادی نەڤێت کەس د وان سەرکەفتنان دا بەشدار بیت،یێن وی سەرکەفتن تێدا ب دەستڤە ئینای.
ل دووڤ ژێدەرێن ئاگەهدار لیستا حەیدەر عەبادی دێ ب ناڤێ لیستا رزگاری و بنیاتنانێ بیت و دێ هەموو پێکهات و مەزهەب و کەسایەتیان ب خۆڤه گریت.
نيشاندان
