ئه‌ڤرۆ نیوز ، نه‌وزاد هلۆرى:
پشتى درۆستبوونا شه‌ر و روو ب رووبوونان دناڤبه‌را هێزێن پێشمه‌رگه‌ى و حه‌شد شه‌عبى و سوپایێ عیراقێ ، زێده‌بارى كو هژماره‌كا چه‌كدارێن حه‌شد هاتینه‌ كوشتن و برینداركرن و هژماره‌كا ترومبێلێن وان ژى ژناڤبرینه‌ ، د هه‌مان ده‌م دا فروكه‌یه‌كا بێ فروكه‌ڤان ژى یا حه‌شد شه‌عبى ئێخسته‌خوار.
سپێده‌یا ئه‌ڤرۆ ” پێنج شه‌مبى ” هێزێن پێشمه‌رگه‌ى فروكه‌یه‌كا بێ فروكه‌ڤان كو بو مه‌ره‌ما چاڤدێریێ ژلایى حه‌شد شه‌عبى و سوپایێ عیراقێ دهاته‌ بكارئینان ل مێحوه‌رێ سحێلا هاته‌ ئێخستن.
ژێده‌رێن هێزێن پێشمه‌رگه‌ى دده‌ن دیاركرن كو ئه‌وان هێرشێن حه‌شد و سوپایێ عیراقێ ل سحێلا ژناڤبرینه‌ و زیانێن زور ژى ب وان گه‌هاندینه‌.

ئه‌ڤرۆ نیوز ، هلورى:
وه‌سا بریاره‌ كو سوبه‌هى په‌رله‌مانێ كوردستانێ كوم ببیت ، ئه‌ندامه‌كا په‌رله‌مانێ كوردستانێ ژى دیاركر كو به‌رنامه‌یێ كارى یێ په‌رله‌مانێ كوردستانێ بو رونشتنا سوبه‌هى نه‌هاتیه‌ دیاركرن.

ل گوره‌ى نڤیساره‌كێ كو ئیمزا جێگرێ سه‌رۆكێ په‌رله‌مانێ كوردستانێ لسه‌ر هه‌یه‌ و دانه‌یه‌ك ده‌ست ئه‌ڤرۆ نیوز كه‌فتیه‌ ، سوبه‌هى رۆژا پێنج شه‌مبى رێكه‌فتى 26 چریا ئێكێ 2017 دێ په‌رله‌مانێ كوردستانێ كوم بیت و داخوازنامه‌یا به‌رهه‌بڤڤونێ ژى بو هه‌موو ئه‌ندامێن په‌رله‌مانێ كوردستانێ هاتیه‌ هنارتن.

ڤیان عه‌باس ئه‌نداما په‌رله‌مانێ كوردستانێ زێده‌بارى پشتراستكرنا نوچه‌یێ كومبوونا په‌رله‌مانێ كوردستانێ بو ئه‌ڤرۆ نیوز گۆت: ( هه‌تا نها به‌رنامه‌یێ كارى یێ په‌رله‌مانێ كوردستانێ نه‌هاتیه‌ راگه‌هاندن كا دێ لسه‌ر چ بیت ، به‌لێ ره‌نگه‌ ئه‌ڤ شه‌ڤ بهێته‌ راگه‌هاندن )

زێده‌تر گۆت: ( رونشتنا سوبه‌هى یا په‌رله‌مانێ كوردستانێ ژى دێ ل ده‌مژمێر 11:00ێ سپێدێ ده‌ستپێكه‌ت )

ئه‌ڤرۆ نیوز ، نه‌وزاد هلۆرى:
حكومه‌تا هه‌رێما كوردستانێ ل بارا ره‌وشا نهایا دناڤبه‌را هه‌رێما كوردستان و عیراقێ راگه‌هاندنه‌ك به‌لاڤكر و دیاركر كو هه‌ره‌شه‌یێن عیراقێ لسه‌ر كوردستانێ دێ ره‌وشێ به‌ر ب ئالوزتر به‌ت و چه‌ند پێشنیار ژى ده‌ركرن ژ وانا هەلپساردن ( سركرنا ) ئه‌نجامێن ریفراندۆمێ.

ئه‌ڤا ل خوارێ ده‌قا وێ یه‌
ئه‌ڤ بارودوخ و ئالوزى و مه‌ترسیێن كو روو ب روویێ عیراق و كوردستانێ بوین ، مه‌ هه‌مووان نه‌چار دكه‌ت كو ل ئاسته‌كێ به‌رپرسیاره‌تیه‌كا دیروكى بین و رێكێ نه‌ده‌ین كو بارودوخ زێده‌تر به‌ر ب شه‌ر و پێكدانان بچیت دناڤبه‌را هێزێن عیراقێ و پێشمه‌رگه‌ى.

هێرش و به‌ر ئێك كه‌فتنا هێزێن عیراقى و پێشمه‌رگه‌ى ل رێكه‌فتى 16/10/2017 هه‌تا ئه‌ڤرۆ زیانان ب هه‌ردوو لایان گه‌هاندینه‌ ، دبیت ژى ببیته‌ سه‌ده‌ما خون رشتنه‌كا به‌رده‌وام و ئه‌نجام دا تێكدانا په‌یوه‌ندیێن جڤاكیێن دناڤبه‌را پێكهاته‌یێن عیراقێ.
بێگومان شه‌ر دناڤبه‌را هه‌ردوو لایان دا نابیته‌ سه‌ده‌ما سه‌ركه‌فتنا چو لایان ، به‌لكو د هه‌موو وارێن ژیانێ دا وه‌لاتى به‌ر ب هه‌لدرێریێن گشتى ڤه‌ دبه‌ت ، ژبه‌رڤێ ب دیتنه‌كا هه‌ستكرن ب به‌رپرسیاره‌تیێ به‌رامبه‌ر گه‌لێ كوردستان و عیراقێ ، پێشنیار بو حكومه‌ت و رایا گشتى یا عیراق و جیهانێ دكه‌ین :

1- راگرتنا ده‌ملده‌ست یا ته‌قه‌ و هه‌موو جورێن كریارێن سه‌ربازى ل هه‌رێما كوردستانێ.
2- هەلپسارتن ( سركرنا ) ئه‌نجامێن ریفراندۆمێ كو ل كوردستانا عیراقێ هاتیه‌ ئه‌نجامدان.
3- ده‌ستپێكرنا دانوستاندنان دناڤبه‌را حكومه‌تا هه‌رێم و حكومه‌تا فیدرالى لسه‌ر بنه‌مایێن ده‌ستورێ عیراقێ.

حكوومه‌تا هه‌رێما كوردستانێ
24/10/2017