ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ راگه‌هاند كو سوبه‌هى 31ى چريا ئێكێ 2017 دێ مووچێ هه‌يڤا ته‌باخێ يێ جڤاتا ئاسايشا هه‌رێما كوردستانێ هێته به‌لاڤكرن.
ئاشكه‌را ژى كر كو ل رۆژێن چارشه‌مبى و پێنجشه‌مبى 1 و 2ى چريا دويێ يا 2017ێ كو دێ مووچێ هه‌يڤا ته‌باخێ يێ ده‌زگه‌هێ ئاسايشێ هێته به‌لاڤكرن
ئەڤرۆ نیۆز،زنار تۆڤی:
هەرێما کوردستانێ و لایەنێن عێراقی ل سەر چەند خالەکان رێککەفتن و بریار هاتەدان سەرجەم کێشێن هەلاویستی یێن دناڤبەرا هەردو لایان دا ب گورەی دستووری عێراقێ بهێنە چارەسەر کرن.
ل دووڤ وان زانیارییان،د گوتۆبێژێن دو رۆژێن بوری یێن دناڤبەرا وەزارەتا پێشمەرگەی و وەزارەتا بەرگرییا عێراقێ و ب چاڤدێرییا لایەنێ ئەمریکی،هەولێر و بەغدا ل سەر سنوورێ نوکە یێ هەرێما کوردستانێ رێککەفتینە.
هەڤدەم بریار هاتیە دان کو هەموو پرسێن هەلاویستی ب گورەی دستووری بهێنە چارەسەر کرن و هێزەکا هەڤبەش بۆ دەڤەرێن (مەحمودیە، سحێلا، فەیدیێ، شێخان، ئەلقۆش، گوێر، مەقلوب و خازری) بهێتە پێک ئینان.
هەروەسا: ”هێزەکا هەڤبەش یا پاسەوانێن سنووری، پێشمەرگە و ئەمریکا دێ دەرگەهێ سنووری یێ پێشابوورێ برێڤە بەن“.
ئه‌ڤرۆ نيوز:
ل هه‌يڤا ئيلۆنا سالا 2017ێ نێزيك 150 هزار رێڤينگان ل كۆمه‌لگه‌ها ده‌رگه‌هێ نێڤده‌وله‌تى يێ ئيبراهيم خه‌ليل هاتنوچوون كريه د ده‌مه‌كى دا ل هه‌يڤا ته‌باخێ زێده‌ترى 152 هزار كه‌سان هاتنوچوون كريه.
ل دووڤ راپۆرته‌كا نڤيسينگه‌ها ئاكنجيبوون و پاسپۆرتان ل ده‌رگه‌هێن نێڤده‌وله‌تى يێ ئيبراهيم خه‌ليل 129 هزار و 734 رێڤينگان ل ده‌رگه‌هێ ئيبراهيم خه‌ليل هاتنوچوون كريه.
ل دووڤ نڤيسينگه‌ها ناڤبرى 70 هزار و 207 رێڤينگ هاتينه ناڤ هه‌رێما كوردستانێ و ژ وان ژى 32 هزار و 425 هزار هه‌لگرێن پاسپۆرتێن عيراقينه و 35 هزار و 849 رێڤينگ هه‌لگرێن پاسپۆرتێن توركى نه و هزار و 933 رێڤينگ ژى هه‌لگرێن پاسپۆرتێن بيانى نه.
هه‌ر ب گۆره‌ى ڤێ راپۆرتێ 59 هزار و 527 رێڤينگ ب رێيا ده‌رگه‌هێ ئيبراهيم خه‌ليل چووينه وه‌لاتێ توركيا و ژ وان ژى 21 هزار و 749 رێڤينگ هه‌لگرێن پاسپۆرتێن عيراقى نه و 34 هزار و 311 رێڤينگ هه‌لگرێن پاسپۆرتێن توركى نه و سێ هزار و 467 هه‌لگرێن پاسپۆرتێن بيانى نه.
ل دووڤ هه‌مان راپۆرتا نڤيسينگه‌ها ئاكنجيبوون و پاسپۆرتان ل ئيبراهيم خه‌ليل ل هه‌يڤا ته‌باخێ 152 هزار و 83 رێڤينگان ب رێيا ده‌رگه‌هێ نێڤده‌وله‌تى يێ ئيبراهيم خه‌ليل هاتنوچوون كريه.
ئه‌ڤرۆ نيوز، نيوار محه‌مه‌د سه‌ليم:
شڤێدى خرڤه‌بوونه‌كا جه‌ماوه‌رى ل زاخۆ و هاته كرن و پاشان ژى هنده‌ك سنێل و گه‌نجان هێرش كره سه‌ر باره‌گايێن ئێكه‌تى نشتيمانى كوردستان و بزاڤا گۆڕان و سۆتن و هێرش كريه سه‌ر كوليژا له‌شكرى ژى ل زاخۆ و ل دهۆكێ ژى هنده‌ك گه‌نج ل به‌ر ده‌رگه‌هێ كه‌نالێ ئێن ئار تى كۆم بوون، بێى كو چو زيانان بگه‌هيننه كه‌نالێ ناڤرى.
بۆتان محسن قايمقامێ قه‌زا زاخۆ د داخۆيانيه‌كێ دا بۆ ئه‌ڤرۆ نيوز راگه‌هاند كو دوهى دره‌نگى شه‌ڤ هنده‌ك سنێل و گه‌نجان هێرش كره سه‌ر باره‌گايێن ئێكه‌تى نشتيمانى كوردستان و بزاڤا گۆڕان ل زاخۆ و سۆتن.
بۆتان محسن ئاماژه ب وێ چه‌ندێ ژى كر كو ژ بلى زيانێن ماددى چو زيانێن گيانى نه‌بوون و گۆت: “ئه‌ڤرۆ ره‌وش يا ئارامه”.
قايمقامێ قه‌زا زاخۆ خۆيا ژى كر كو ئه‌و وه‌كو به‌رپرسێ يه‌كا ئيدارى ل گه‌ل ده‌زگه‌هێن ئه‌منى يێن باژێرى ئه‌ڤرۆ دێ كۆمبوونان كه‌ن دا كو يا پێدڤى بهێته كرن.
بۆتان محسن نه‌ڤه‌شارت ژى كو هه‌ر دوهى ده‌زگه‌هێن ئه‌منى ل جهێ روودانێ ئاماده بووينه و چه‌ند كه‌سه‌ك ژ ئه‌گه‌رێ ڤان روودانان ده‌سته‌سه‌ركرينه.
نه‌ڤه‌شارت ژى كو نوكه دێ پێرابوون ل گه‌ل وان كه‌سێن ب ڤان كرياران رابووين هێنه وه‌رگرتن ب ره‌نگه‌كێ قانوونى و ئه‌گه‌رێن سه‌ره‌كى يێن ئه‌نجامدانا ڤان كرياران دێ ئاشكه‌را بن.
هه‌ر شڤێدى پارێزگارێ دهۆكێ ژى كۆنگره‌كێ رۆژنامه‌ڤانى ئه‌نجام دا و تێدا سه‌ره‌راى ئيدانه‌كرنا ڤێ كريارێ، ته‌كست ل سه‌ر وێ چه‌ندێ ژى كر كو ئه‌وان ده‌زگه‌هێن ئه‌منى يێن ده‌ڤه‌رێ راسپاردينه دا كو چو روودانێن نه‌خواستى نه‌هێنه ئه‌نجام دان.
پارێزگارێ دهۆكێ ئاماژه ب وێ چه‌ندێ ژى كر كو هنده‌ك گه‌نجێن گه‌له‌ك كێم ل به‌ر ده‌رگه‌هێ كه‌نالێ ئێن ئار تى ژى ئاماده ببوون، به‌لێ هێزێن ئه‌منى ژ جهێ ده‌ستنيشانكرى ده‌ركرن و نه‌هێلا چو تشتێن نه‌خواستى روو بده‌ن.
فه‌رهاد ئه‌ترووشى ئاماژه ب وێ چه‌ندێ ژى كر كو ئه‌و هزر دكه‌ن كو ده‌ستێن ده‌ره‌كى ژى يێن ل پشت هه‌ين، ژ به‌ر كو هێرشكرنه سه‌ر كوليژا له‌شكرى ل زاخۆ تشته‌كێ گۆماناوى يه.
نه‌ڤه‌شارت ژى كو چه‌ندين كه‌س ل زاخۆ و دهۆك ب مه‌ره‌ما ڤان كرياران هاتينه ده‌سته‌سه‌ركرن و دێ پێرابوونێن قانوونى ل دژى وان كه‌سان هێنه وه‌رگرتن.
شڤێدى جڤاتا ئاسایشا كوردستانێ هوشداریه‌ك ل بارا ره‌وشا نهایا هه‌رێما كوردستانێ به‌لاڤكر و داخوازێ ل هه‌موو وه‌لاتیێن باژێر و باژێركێن كوردستانێ دكه‌ت كو ئارامیێ بپارێزن و رێكێ ب خه‌لكێ ئاژاوه‌گێر نه‌ده‌ن كو هێرشێن هه‌وه بكه‌ن و ئاژاوه‌گێریێ بكه‌ن.
پارتى ديموكراتى كوردستان ژى شڤێدى به‌ياننامه‌ك به‌لاڤكر و تێدا دیاركر كو ئه‌و وه‌كو پارتى دیموكراتى كوردستان ب توندى ئیدانا ئه‌وان روودانان دكه‌ن و گۆت: “داخوازێ ل هه‌موو ده‌زگه‌هێن په‌یوه‌ندیدار دكه‌ین كو ب زوترین ده‌م ئه‌نجامده‌رێن ئه‌وان ئاژاوه‌گێریان ده‌سته‌سه‌ر بكه‌ن و پێرابوونێن قانوونى ل گه‌ل وان كه‌سان وه‌ربگرن، د هه‌مان ده‌م دا داخوازێ ل وان ده‌زگه‌هان ژى دكه‌ین كو هوشیارێ پاراستنا بنگه‌هـ و باره‌گایێن هه‌موو حزبان بكه‌ن و رێكێ نه‌ده‌ن ئاژاوه‌گێر و خرابكار بزاڤێن شێواندنا بارودوخێ كوردستانێ بكه‌ن).
حكومه‌تا هه‌رێما كوردستانێ ژى د ده‌رباره‌ى روودانێن شڤێدى یێن زاخۆ راگه‌هاندنه‌ك به‌لاڤكر و تێدا هاتیه كو ئه‌و روودان، كریاره‌كا ئاژاوه‌گێرى بوویه و خواست كو هێزێن ئه‌منى ب ئه‌ركێ پاراستنا باره‌گایێن حزبى و حكومى بۆ سیاسى كه‌ن و رێ ل ئاژاوه‌گێران بگرن و سزایێن توند ژى بده‌نه به‌ر وان كه‌سان.
ب گۆره‌ى ئه‌و پێزانينێن ب ده‌ست ئه‌ڤرۆ نيوز كه‌فتين ژ ئه‌نجامێ روودانێن شڤێدى ل قه‌زا زاخۆ 10 كه‌س هاتينه ده‌سته‌سه‌ركرن. ئه‌ڤرۆ نيوز په‌يوه‌ندى ب رێڤه‌به‌ريا پۆليسان ژى كر، به‌لێ د ئاماده‌نه‌بوون چو ئاماران بده‌نه ده‌ست.
ئەڤرۆ نیۆز،زنار تۆڤی:
ل دووڤ رێككەفتنەکا هەردو وەزارەتێن نافخۆ یا حوکمەتا عێراقێ و هەرێما كوردستانێ ئەو پۆلیس و ئەفسەرێن ب ئەگەرێ روودانێن 16ئۆكتۆبەرێ ئاوارەبووین،دێ ڤەگەرنە سەر كارێن خۆ.
ل دووڤ ئاخفتنا رێڤەبەرێ پۆلیسێن قەزا و ناحیێن كەركووكێ هەر ئەڤرۆ دێ 263 ئەفسەر و پۆلیسێن سنوورێ كەركووكێ ڤەگەرنە سەر كارێن خۆ.
عەمید سەرحەد قادر بەحس ل هندێ ژی كریە،کو هەر ئەفسەر و پۆلیسەکێ چەك یان ترۆمبێل ل دەف بیت، دڤێت ل گەل خۆدا ڤەگەرینیتە سەر كاری، ئەڤە هەموو ل دووڤ رێككەفتنا دناڤبەرا هەردو وەزارەتێن نافخۆ یێن عێراقێ و هەرێما كوردستانێ نە.
ل 16ئۆكتۆبەرێ حەشدا شەعبی و سوپایێ عێراقێ، پەلامارا دەڤەرێن كوردستانی یێن دەرڤەی ئیدارا هەرێما كوردستانێ دان و كۆنترۆل كرن،ب ڤێ چەندێ بەشەکێ زۆر یێ خەلکێ و هێزێن ئەمنی ئاوارە بووینە.
ئه‌ڤرۆ نيوز:
بریکارێ وەزارەتا پێشمەرگەی خویاکر، مورلا پێشمەرگەی گەلەکا بلندە و ل سەنگەران دانە دبەرھەڤن بۆ ھەر ھێرشەکا ل سەر کوردستانێ و سەنگەرێن پێشمەرگەی چۆ ئاریشە ژی نینە، ھەموو پێشمەرگە د بەرھەڤن ب ھێزەکا مەزن ڤە .
سەربەست لەزگین بریکارێ وەزارەتا پێشمەرگەی بۆ ئەڤرۆ دیارکر، ئەم وەک ھێزێن پێشمەرگەی ناخوازین چۆ ھێرشەکا دی بھێتە سەرکوردستانێ بەلێ ھەر ھێزەکا بڤێت ھێرشێ بکەت، سەر کوردستانێ پێشمەرگە دێ بەرەڤانیێ کەت، پێشمەرگە دێ ھەر ل وان جھا مینیت ئەوێن نوکە لێ بەرەڤانیێ ل کوردستانێ دکەن، ھەتا دەمەکێ نەدیار کا دێ رەوشا دەڤەرێ گەھیتە چۆ قوناغەکێ.
بریکارێ وەزارەتا پێشمەرگەی ئاشکرا کر ژی، ھەتا نوکە چۆ رێککەفتنەک نەھاتیە کرن و ھەکە شەر ل سەر کوردستانآ دروست بۆ ئەم دێ بەرسڤا وان ھێرش کەران دەین کو بڤێت زیانێ ب کوردستانێ بگەھینن ھەردەما شەر ھاتە کرن ھەکە رێککەفتن ژی ھاتبیتە کرن وی دەمی ھەموو رێککەفتن دێ ھێنە ژناڤبرن و کار ب وان رێککەفتنا ناھێتە کرن.
لەزگین خویاکر، ھەکە ھێزەکێ ھێرشکرە سەر کوردستانێ وی دەمی پێشمەرگە ب ھەموو شیانێن خۆە ڤە دێ بەرسڤا دوژمنان دەت ناھێلن دوژمن نزیکی پێشمەرگەی و سەنگەرێن کوردستانێ ببن ھەرچەندە ل ڤان شەرێن دووماھیێ ژی چەکدارێن حەشدا شەعبی چەکێن گران ب کارئینا بوون بەلێ لبەر چاڤ ڤەکری و ھوشیاریا پێشمەرگەی نەشێن بەردەوام بن و ھەرجار توشی شکەستنێ دبن.
ئەڤرۆ نيوز:
بڕیارە ئەڤرۆ رۆژا دوشەمبی رێکەفتی 30ی چریا ئێکێ 2017 دەرگەھێ تانان ل ئەنجامێن زانکۆلاین ب روویێ قوتابیێن دەرچوویێن پۆلا 12 ئامادەیی بھێتە ڤەکرن.
عەباس ئەکرەم ئاخفتنکەرێ ب ناڤێ وەزارەتا خواندنا بلند و ڤەکۆلینێن زانستی ل ھەرێما کوردستانێ راگەھاند کو ب مەرەما وەرگرتنا تانە و رەخنێن قوتابیان کو ل پۆلا 12 ئامادەیی دەرچووینە و فورما زانکۆلاین پڕکریە، ژ سوبەھی وێڤە دەرگەھێ وەرگرتنێ ل ھەمبەر رەخنێن وان ڤەکەت و ھەر کەسەکێ/کەسەکا رەخنە ھەبیت د رێیا زانکۆلاین ب رەنگەکێ ئۆنلاین رەخنێن خوە تۆمار بکەت و پاشان ژی کار ل سەر بکەت.
دو سالە وەزارەتا خواندنا بلند و ڤەکۆلینێن زانستی ل ھەرێما کوردستانێ کار ب ھەردو شێوازێن زانکۆلاین و وەرگرتنا ئێکسەر دکەت بۆ وەرگرتنا دەرچوویێن پۆلا 12ێ ئامادەیی ل زانکۆ و پەیمانگەھێن کوردستانێ.
ئه‌ڤرۆ نيوز:
رێڤەبەرێ دەرگەھێ پێشابیری ل پارێزگەھا دھۆکێ دیارکر کو دەرگەھێ سێ مالکا ئێک دەقیقە ژی نەھاتیە گرتن و 24 دەمژمێران یێ ڤەکریە و بەردەوام کاری دەرگەھێ سێ مالکا و پیشابیری دا د ناڤبەرا باشوور و رۆژئاڤایێ کوردستانێ دا دھێتە کرن.
شەوکەت بەربھاری، رێڤەبەرێ دەرگەھێ پێشابیری ل پارێزگەھا دھۆکێ دیارکر کو رۆژانە بەردەوام 400 کەس ھاتنوچوونێ د ناڤبەرا رۆژئاڤایی کوردستانێ و باشووری کوردستانێ دا دکەن، ھەتا ئەڤرۆ 29ى چريا ئێكێ2017 دەرگەھێ سێ مالکا یێ سنۆری د گەل دەرگەھێ پێشابیرێ یێ سنۆری ڤەکریە و چو ئاریشەک نینە و بەردەوام ھاریکاریێن مرۆڤایەتی بۆ رۆژئاڤایێ کوردستانێ دھێنە رەوانەکرن درێیا دەرگەھێ پیشابیری و سێ مالکا ل رۆژئاڤایێ کوردستانێ.
ئاماژە دا وی چەندی ژی کو ھەموو کارێن بازرگانیی و مرۆڤایەتی د بەردەوامن د ناڤبەرا باشوور و رۆژئاڤایێ کوردستانێ دا ب رێیا دەرگەھی سێ مالکا ل رۆژئاڤایێ کوردستانێ و دەرگەھێ پیشابیری ل باشووری کوردستانێ و ھەموو کار ئاسایی دھێتە برێڤەبرن و چو ئاریشەک نینە، دەنگی گرتنا دەرگەھێ سێ مالکا ژی رەت دکەین نوکە یێ ڤەکریە.
ئه‌ڤرۆ نیوز ، هلورى:
حكومه‌تا هه‌رێما كوردستانێ ل بارا روودانێن ئه‌ڤ شه‌ڤه یێن زاخو و هێرشكرنا بو سه‌ر باره‌گایێن ئێكه‌تى راگه‌هاندنه‌ك به‌لاڤكر و تێدا هاتیه كو ئه‌و روودان ، كریاره‌ك ئاژاوه‌گێرى بوویه و خواست كو هێزێن ئه‌منى ب ئه‌ركێ پاراستنا باره‌گایێن حزبى و حكومى بو سیاسى كه‌ن و رێكێ ل ئاژاوه‌گێران بكه‌ن و سزایێن توند ژى بدانن به‌ر وان كه‌سان.
ئه‌ڤا ل خوارێ ده‌قا وێ یه
( دیاره ئه‌ڤ شه‌ڤه ل چه‌ند جهێن هه‌رێما كوردستانێ بزاڤا ئاژاوه‌گێریێ و توندوتیژیێ هاتینه‌كرن، و بویه ئه‌گه‌را دلگرانى و ترسا وه‌لاتیان ، داخوازێ ل هه‌موو هێزێن ئاسایش و پولیسان دكه‌ین كو كونترولا ره‌وشێ بكه‌ن و رێكێ نه‌ده‌ن چوو كریارێن نه‌خواستى روو بده‌ن و رێكێ ژى ل هه‌موو ده‌ستدرێژیێن لسه‌ر باره‌گایێن حزبى و ناڤه‌ندێن حكومى و سیاسى بكه‌ن. وه‌سا دیاره ده‌سته‌كێ ئاژاوه‌گێریێ هه‌یه كو دخوازیت ئاژاوه‌گێریى و توندوتیژیێ بكه‌ن ، ئه‌م ب توندى ئیدانه دكه‌ین و هوشداریێ دده‌ین كو هه‌ركه‌سێ ئاژاوه‌گێریێ و توندوتیژیێ بكه‌ت ، دێ ب توندى هێته سزادان ، هه‌روه‌سا داخوازێ ل وه‌لاتیێن خوشتڤى دكه‌ین كو بزڤرن مالێن خوه و ئارامیێ ب پارێزن و هه‌موو هه‌ڤكار و هه‌ماهه‌نگ بن ل گه‌ل هێزێن ئه‌منى)
نيشاندان