ئه‌ڤرۆ نيوز:
سپێده‌هيا ئه‌ڤرۆ عه‌لى عه‌بدولا ئێك ژ دامه‌زرێنه‌رێن سه‌ره‌كى يێن پارتى ديموكراتى كوردستان ل نه‌خۆشخانا هه‌ولێر گيانێ خوه ژ ده‌ست دا.
ب گۆره‌ى پێزانينان ئه‌ڤرۆ ته‌رمێ عه‌لى عه‌بدولا ناهێته ڤه‌شارتن و چاڤه‌رێ دهێته كرن خوه ل كه‌سوكارێن وى بگرن، هه‌تا ژ ده‌رڤه‌ى وه‌لاتى ڤه‌گه‌رن.
عه‌لى عه‌بدولا جێگرێ به‌رى يێ پارتى ديموكراتى كوردستان بوو، ئێك بوو ژ شوره‌شگێرێن كوردستانێ كو پتريا ژيانا خوه ل چيايى بۆ خزمه‌تكرنا وه‌لاتێ خوه ته‌رخان كربوو.
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كا په‌رله‌مانێ كوردستانێ راگه‌هاند كو هه‌رسێ فراكسيۆنێن پارتى و ئێكه‌تى و ئێكگرتوو ل سه‌ر درێژكرنا ماوێ قانوونى يێ په‌رله‌مانى رێكه‌فتن.
ئامينا زكرى، جێگرا سه‌رۆكا فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو هه‌رسێ فراكسيۆنێن پارتى ديموكراتى كوردستانێ و ئێكه‌تى نشتيمانى كوردستان و ئێكگرتوو ئيسلامى كوردستان ل سه‌ر زێده‌كرنا ماوێ په‌رله‌مانێ كوردستانێ ب ره‌نگه‌كێ قانوونى رێكه‌فه‌فتن.
ئامينا زكرى د داخۆيانيا خوه دا ئاشكه‌را كر كو ماوێ په‌رله‌مانێ كوردستانێ بۆ دو خولێن دى ب ره‌نگه‌كێ قانوونى هاته درێژكرن.
بڕياره ئه‌ڤرۆ په‌رله‌مانێ كوردستانێ ب روونيت و تێدا سه‌ره‌راى هه‌لبژارتنا سكرتێره‌كێ به‌رده‌وام بۆ په‌رله‌مانێ كوردستانێ، چه‌ند ئه‌ندام په‌رله‌مانێن نوو سووندا قانوونى ب خوه‌ن و ده‌ست ب كار بن.
د بڕگه‌كا دى يا به‌رنامێ كارى دا دێ ده‌نگى ل سه‌ر پرۆژێ درێژكرنا ماوێ كاركرنا گه‌را چارێ يا په‌رله‌مانێ كوردستانێ ده‌ن.
ئه‌ڤرۆ نیوز ، هلورى:
گرۆپه‌كێ ناڤا حه‌شد شه‌عبى داخوازا ده‌ركرنا هێزێن ئه‌مریكى ل عیراقێ دكه‌ن و دده‌ن دیاركرن كو نها شه‌رێ داعش داوى هات و پێدڤى ب وان نه‌مایه.
خه‌زعه‌لى ژ گرۆپێ عه‌سائیب ئه‌هلول حه‌ق یا سه‌ر ب حه‌شد شه‌عبى لسه‌ر تورا جڤاكى یا توێته‌رێ دیاركر كو پێدڤى یه وه‌زیرێ ده‌رڤه‌یێ ئه‌مریكا وێ یه‌كێ بزانیت كو دڤێت عیراقێ بجهـ بهێلیت و هێزێن ئه‌مریكا دڤێت دنهادا به‌رهه‌ڤیان بكه‌ن بو چونه ده‌رڤه‌یا لسه‌ر ئاخا عیراقێ.
ژلایێ یه‌كێ دن ڤه هادى عامرى سه‌ركرده‌یێ میلشیاتێن حه‌شد شه‌عبى دلگرانیا خوه ل داخویانیا وه‌زیرێ ده‌رڤه‌یێ ئه‌مریكا ده‌ربرى و دیاركر كو پێدڤى یه تێله‌رسوون داخوازا لێبورینێ بكه‌ت دژى ئه‌وان داخویانێن كو وى به‌رامبه‌ر حه‌شد شه‌عبى كرى.
دهێته زانین د سه‌ره‌دانا خوه دا بو به‌غدا وه‌زیرێ ده‌رڤه‌یێ ئه‌مریكا داخواز ل عه‌بادى كر بو كو گرۆپێن میلشیاتێن ئیرانى و هێزێن دن یێن بیانى و راوێژكارێن وان ژى دڤێت عیراقێ ده‌ركه‌ڤن و عیراق كونترولا ده‌ڤه‌رێ بكه‌ت.
ئه‌ڤرۆ نيوز، نيوار محه‌مه‌د سه‌ليم:
فه‌رمانده‌كێ پێشمه‌رگێ كوردستانێ راگه‌هاند كو ئه‌ڤرۆ سپێدێ چه‌كدارێن حه‌شدا شيعى هێرشى سه‌ر سه‌نگه‌رێن پێشمه‌رگه‌ى كرن ل ميحوه‌رێ مه‌حموديێ نێزيك ره‌بيعه، به‌لێ پێشمه‌رگێن كوردستانێ به‌رسينگێ هێرشێ گرت و تێكشكاند.
ئه‌ڤى فه‌رماندێ پێشمه‌رگێ كوردستانێ گۆتژى: “چه‌كدارێن حه‌شدا شيعى هێرشى سه‌ر سه‌نگه‌رێن پێشمه‌رگه‌ى كرن ل ده‌ڤه‌را مه‌حموديێ نێزيك ره‌بيعه، به‌لێ ژ لايێ فه‌رماندا له‌شكرێ تايبه‌تێ ئێك و گۆلان ڤه ب سه‌رپه‌رشتيا مه‌نسور بارزانى هاته تێكشكاندن و زيان ژى گه‌هاندنه چه‌كدارێن حه‌شدێ”.
ئه‌ڤى فه‌رماندێ پێشمه‌رگه‌ى يێ ئه‌ڤرۆ نيوز پاراستن ل سه‌ر گۆتنا ناڤێ وى كرى، خۆيا ژى كر كو د ڤێ هێرشێ دا هه‌مه‌ره‌ك و دو جێب هاتينه سۆتن و هێرشا وان هاته پاشڤه‌برن.
نه‌ڤه‌شارت ژى كو هێزێن وان يێن د ئاماده‌باشيێ دا و نوكه چه‌كدارێن حه‌شدا شيعى پاشڤه‌چووينه، به‌لێ يا ديار نينه كا دێ دووباره هێرشێ كه‌ن يان ژى نه.
ئه‌ڤرۆ نیوز ، هلورى:
وه‌زیرێ ده‌رڤه‌یێ ئه‌مریكا گه‌هشته به‌غدا و دهێته چاڤه‌رێكرن كو ل گه‌ل به‌رپرسێن پله بلندێن عیراقێ لسه‌ر ره‌وشا نها یا دناڤبه‌را به‌غدا و هه‌ولێر كوم ببیت.
ل گوره‌ى زانیاریێن چه‌ند میدیایه‌كان ئه‌ڤرۆ ئێڤارى ئه‌ڤرۆ تێله‌رسون وه‌زیرێ ده‌رڤه‌یێ ئه‌مریكا گه‌هشتیه به‌غدا و بریاره كو ل گه‌ل حه‌یده‌ر عه‌بادى سه‌رۆك وه‌زیرێن عیراقێ كوم ببیت.
دهێته چاڤه‌رێكرن كو پرسێن ڤێ داویێ دناڤبه‌را به‌غدا و هه‌ولێر و شه‌رێ تیرورستان و هاتنا له‌كرێ عیراقێ بو كه‌ركوك و ده‌ڤه‌رێن كوردستانیێن ده‌رڤه‌یێ هه‌رێما كوردستانێ بابه‌تێن سه‌ره‌كیێن دانوستاندنێن وان بن.
پێشتر هه‌ر وه‌زیره‌كێ د سه‌ره‌دانه‌كا چاڤه‌رێكرى دا هاتبیته به‌غدا د پشترا سه‌ره‌دانا هه‌ولێر ژى كریه و هه‌تا نها ناهێته زانین كا دێ وه‌زیرێ ده‌رڤه‌یێ ئه‌مریكا سه‌ره‌دانا هه‌ولێر كه‌ت یان نه.
ئه‌ڤرۆ نیوز ، نه‌وزاد هلورى
سه‌رۆكێ فه‌ره‌نسا ب رێیا تێله‌فونێ په‌یوه‌ندى ب سه‌رۆكێ هه‌رێما كوردستانێ كر ، زێده‌بارى ده‌ربرینا هه‌ڤخه‌میا خوه بو وێ ئالوزیێن كو دناڤبه‌را هه‌رێم و به‌غدا درۆست بوى ، د هه‌مان ده‌م دا پشته‌ڤانیا وه‌لاتێ خوه ژى ژ بو هه‌ردوو لایان دوپات كر.
ده‌قا په‌یوه‌ندیا سه‌رۆكێ فه‌ره‌نسا و سه‌رۆك بارزانى وه‌كو د مالپه‌را سه‌رۆكاتیا هه‌رێما كوردستانێ دا هاتى
ئێڤاریا ئه‌ڤرۆ رۆژا دوو شه‌مبى رێكه‌فتى 23/10/2017 ئیمانوێل ماكرون سه‌رۆكێ فه‌ره‌نسا ب رێیا تێله‌فونێ په‌یوه‌ندى ب سه‌روك بارزانى كر.
د په‌یوه‌ندیێ دا سه‌رۆم ماكروك دلگرانیا خوه ل بارا باردودوخێ ئالوزێ دناڤبه‌را به‌غدا و هه‌ولێر نیشاندا و داخوازكر كو هه‌ردوولا لسه‌ر خوه بن داكو شه‌ر و پێكدادانان درۆست نه‌بن و دوپات ژى كر كو باشترین رێك بو چاره‌سه‌ركرنا ئاریشه‌یێن وان دانوستاندن و گوتوبێژن.
هه‌ر د په‌یوه‌ندیا تێله‌فونى دا سه‌رۆك بارزانى بارودوخ و رووداوێن ڤێ داویێ دناڤبه‌را هه‌رێما كوردستان و عیراقێ بو سه‌رۆكێ فه‌ره‌نسا شرۆڤه‌كرن.
جهێ ئاماژه پێكرنێ یه بریاره كو سه‌رۆكێ فه‌ره‌نسا دڤى ده‌ربارى دا لسه‌ر بزاڤێن خوه به‌رده‌وام بیت بو ئاسایكرنا په‌یوه‌ندیێن دناڤبه‌را به‌غدا و هه‌ولێر داكو ب دانوستاندن ئاریشه‌یێن خوه چاره‌سه‌ر بكه‌ن.
ئه‌ڤرۆ نیوز ، هلورى:
ئاخفتنكه‌رێ پارتى دیموكراتى كوردستان دیاركر كو پارتى دیموكراتى كوردستان ل گه‌ل حكومه‌تا رزگارى نینه و ئه‌ڤ یه‌ك ژى ب بزاڤه‌ك بو گه‌هشتنا ده‌ستهه‌لاتێ بناڤكر ، ل بارا ده‌ستكاركێشانا بارزانى ژى دیاركر كو ئه‌ڤێ یه‌كێ په‌یوه‌ندى ب سه‌روكاتیا هه‌رێما كوردستانێ ڤه هه‌یه ، به‌لێ بارزانى دیاركریه كو ئه‌و خوه بو سه‌رۆكاتیا هه‌رێما كوردستانێ به‌ربژێر ناكه‌ت و رازى ژى نابیت كو بو وى ماوه‌یێ ده‌ستهه‌لاتا وى بهێته درێژكرن.
مە‌حمود محەمەد ئاخفتنكه‌رێ پارتى دیموكراتى كوردستان دیاركر كو دڤى ده‌مى دا حكومه‌تا رزگاریا نیشتمانى ژلایێ گۆڕان و هنده‌ك ژ لایه‌نێن دن دخوازن كو هنده‌ك ئاریشه‌یێن دن ل هه‌رێما كوردستانێ زێده بكه‌ن نه‌ك چاره‌سه‌ر بكه‌ن و بزاڤه بو گه‌هشتنا ده‌ستهه‌لاتێ و گۆت: ( پشتى كو وان لایه‌نان ڤیای خونیشاندانێن 17ێ شوباتێ و ماموستایان ئیستغلال بكه‌ن بو گه‌هشتنا ده‌ستهه‌لاتێ ، به‌لێ ب سه‌ر نه‌كه‌فتن ، درۆستكرنا حكومه‌ته‌كا بڤى ره‌نگى پێدڤى یه په‌رله‌مان شه‌رعیه‌تێ بو بده‌ت)
زێده‌تر گۆت: ( ئه‌ڤا كو ل كه‌ركوك درۆست بوى رێكه‌فتنا چه‌ند سه‌ركرده‌یه‌كێن ئێكه‌تى بویه ل گه‌ل هادى عامرى و عه‌بادى و حه‌شد شه‌عبى كو ئێكه ژ خیانه‌تان ل خوینا شه‌هیدان و كوردان ب گشتى و كه‌ركوكێ ب تایبه‌تى ،هه‌ر چه‌ند دكومبوونا دوكان دا بافێل تاله‌بانى دیاركر كو پرۆپوزه‌له‌ك هه‌یه به‌لێ ئه‌و یه‌ك دیارنه‌كر كو یێن رێكه‌فتین )
مە‌حمود محەمەد بو پشكا كوردى ل ده‌نگێ ئه‌مریكا دیاركر ژى كو چوو سه‌ركرده‌یه‌كێ پارتى پشكدارێ رێكه‌فتنا لسه‌ر كه‌ركوكێ نه‌بویه ، هه‌تا ئه‌و پێشمه‌رگه‌یێن كو لایه‌نگیریا پارتى ژى دكه‌ن ئاگه‌هدارێ ڤێ یه‌كێ نه‌بوینه و گوت ژى: ( ده‌ستكاركێشانا بارزانى ل پوستێ سه‌رۆكاتیا هه‌رێما كوردستانێ په‌یوه‌ندى ب سه‌روكاتیا هه‌رێما كوردستانێ ڤه هه‌یه ، هه‌رچه‌نده ئه‌ز ل وێ باوه‌ریێ نیمه كو هه‌لبژاردن ل ده‌ما خوه بهێنه‌كرن ، به‌لێ جه‌نابێ سه‌رۆك بارزانى خوه هه‌لنابژێریت و رازى ژى نابیت قانون بو وى بهێته گوهرین یان ژى ده‌ما سه‌رۆكاتیا وى بو بهێته درێژكرن )
ئاخفتنه‌رێ پارتى دیموكراتى كوردستان ئه‌و یه‌ك ژى دیاركر كو به‌رى ریفراندۆمێ لایه‌نێ كوردى پێ باشبویه كو ئاریشه‌یێن دناڤبه‌را هه‌ولێر و به‌غدا بدانوستاندن بهێنه چاره‌سه‌ركرن و گۆت ژى: ( پێدڤى یه هه‌رێم و به‌غدا بێ مه‌رج دانوستاندنان ده‌ست پێ بكه‌ن ب مه‌ره‌ما چاره‌سه‌ركرنا هه‌موو ئاریشه‌یێن خوه)
ئه‌ڤرۆ نیوز ، نه‌وزاد هلۆرى:
ده‌مه‌ك به‌ریا نها سه‌رۆكێ حكومه‌تا هه‌رێما كوردستانێ ل هه‌ولێر د كونگره‌یه‌كێ رۆژنامه‌ڤانى دا دیاركر كو بو چاره‌سه‌ركرنا ئاریشه‌یێن دناڤبه‌را هه‌ولێر و به‌غدا ئه‌و دێ دانوستاندنان ده‌ستپێكه‌ن و دیاركر ژى كو ئاریشه‌یا موچه‌یان دێ هێته چاره‌سه‌ركرن و دێ ده‌ستپێكه‌ت ڤه.
نێچیرڤان بارزان سه‌رۆكێ حكومه‌تا هه‌رێما كوردستانێ د كونگره‌یه‌كێ رۆژنامه‌ڤانى دا دیاركر كو هه‌موو هه‌ول و بزاڤێن خورت دهێنه‌كرن كو بارودوخێ نهایێ كوردستانێ بهێته چاره‌سه‌ركرن و گۆت: ( ژبه‌ر وان ئالوزیێن كو ل كه‌ركوك درۆست بووى 150 هزار كه‌س ئاواره بوینه ، هه‌لبه‌ت دڤێت بزانین ژى كو گه‌لێ كوردستانێ قوناغ و روژێن نه‌خوشتر ژى ژ ئه‌ڤرۆ دیتینه ، دنهادا گرنگترین تشت كو بهێته‌كرن ئه‌وه كو هه‌موو لایه‌نێن سیاسیێن كوردستانێ هه‌ڤدوو بگرن و ئێكده‌نگ بن و دڤێت ب رژدى كار لسه‌ر وێ یه‌كێ ژى بهێته‌كرن كو رێگرى ل وان كه‌سان بهێته‌كرن كو دبنه سه‌ده‌ما درۆستبوونا دوبه‌ره‌كیێ ل كوردستانێ)
زێده‌تر گۆت: ( نها ده‌مێ وێ یه‌كێ نینه كو لایه‌نێن سیاسیێن كوردستانێ هه‌ڤدو تومه‌تبار بكه‌ن ، به‌لكو ئه‌ڤ ئاریشه دێ مینن بو قوناغه‌كا دن ، ل گه‌ل به‌غدا دێ ب دانوستاندن ئاریشه‌یێن خوه چاره‌سه‌ر كه‌ین )
ل بارا پرۆژێ ته‌ڤگه‌را گۆڕانێ و راگه‌هاندنا حكومه‌ته‌كا رزگاریا نشتمانى نێچیرڤان بارزانى گۆت: ( ئه‌م دێ دانوستاندنان لسه‌ر پرۆژێ گۆڕانێ كه‌ین و د نهادا هوركاریێن پرۆژه‌ى نه‌گه‌هشتینه ده‌ستێ مه و مه چوو زانیارى لسه‌ر نینن)
سه‌رۆكێ حكومه‌تا هه‌رێما كوردستانێ دیاركر ژى كو ئه‌و پێشوازیێ ل ئاخفتنێن روسیا دگرن و ئاماژه ب وێ یه‌كێ ژى كر گرێبه‌ستێن وان دێ ل گه‌ل روسیا به‌رده‌وام بن و چوو په‌یوه‌ندى ب سیاسه‌تێ ڤه نینه و گۆت ژى: ( هه‌موو ده‌وله‌تێن جیهانێ ل گه‌ل وێ یه‌كێ نه كو به‌غدا و هه‌ولێر ب رێكێن ئاشتیانه ئاریشه‌یێن خوه ب دانوستاندن چاره‌سه‌ر بكه‌ن)
ل بارا موچه‌یان ژى گۆت: ( هه‌ول و بزاڤێن خورت دهێنه‌كرن بو چاره‌سه‌ركرنا موچه‌یان و به‌لێ دێ موچه هێنه‌دان)
ئه‌ڤرۆ نیوز ، نه‌وزاد هلۆرى:
ده‌مه‌ك به‌ریا نها هه‌ر ئێك ژ پارێزگارێ دهوك و سه‌رۆكێ ئه‌نجومه‌نێ پارێزگه‌ها دهۆكێ د كونگره‌یه‌كێ رۆژنامه‌ڤانى دا پشته‌ڤانیا خوه ژ بو حكومه‌تا هه‌رێما كوردستانێ دوپات كر و هاتنا هه‌موو هێزێن میلشیات و سوپایێ عیراقێ بو كه‌ركوك و ده‌ڤه‌رێن كوردستانیێن ده‌رڤه‌یێ هه‌رێما كوردستانێ و گرێدانا پارێزگه‌هێن هه‌رێمێ ب به‌غدا و دوو هه‌رێمى ل كوردستانێ ژى ره‌تكر.
فه‌رهاد ئه‌ترۆشى پارێزگارێ دهۆكێ دیاركر كو گرنگه وه‌لاتێن هه‌رێمێ گوهداریا پروپاكنده و ئاخفتنێن عیراق و لایه‌نێن دن نه‌كه‌ن و گۆت : ( ل گوره‌ى ده‌ستوورێ عیراقێ رێ ب دامه‌زراندن و چێكرنا چوو میلشیاتان ل عیراقێ ناهێته‌دان و دیسان نابیت ژى چوو ئاریشه دناڤبه‌را پێكهاته‌یێن عیراقێ ب چه‌ك و شه‌رى بهێنه چاره‌سه‌ركرن ، به‌لكو تنێ رێك بو چاره‌سه‌ركرنا هه‌ر ئاریشه‌یه‌كێ بتنێ دانوستاندن و به‌رى ریفراندوم و پشتى ریفراندومێ ژى سه‌ركردتیا سیاسیا كوردستان و گه‌لێ كوردستانێ ژى داخوازا دانوستادنان ، و گه‌لێ كوردستان و سه‌ركرداتیا سیاسیا كوردستانێ ژى نه‌یا په‌شیمانه لسه‌ر ئه‌نجامدانا ریفراندۆمێ)
زێده‌تر گۆت: ( ئه‌م وه‌كو كارگێریا پارێزگه‌ها دهۆك و ئه‌نجومه‌نا پارێزگه‌ها دهوكێ پشته‌ڤانیا خوه بو حكومه‌تا هه‌رێما كوردستان و هێزێن پێشمه‌رگه‌ى دوپات دكه‌ین ژ به‌ركو بتنێ ئه‌و نونه‌رێن راسته‌قینه‌یێن گه‌لى َكوردستانێ و پارێزڤانێن كوردستانێ نه ، پێدڤى یه گه‌لى َكوردستانێ و سه‌ركرداتیا سیاسیا كوردستانێ ژى دناڤ خوه دا زێده‌تر ئێكگرتى و ئێك رێزبن ژ بو ده‌بازكرن و چاره‌شه‌ركرنا هه‌موو ئاریشه‌یێن خوه )
فه‌رهاد ئه‌ترۆشى د درێژاهیا ئاخفتنێن خودا دیاركر ژى كو ئه‌و وه‌كو پارێزگه‌ها دهۆكێ رێ ب چوو هێز و لایه‌نان ناده‌ن بهێنه ناڤا خاكا هه‌رێما كوردستانێ ب تایبه‌تى پارێ.گه‌ها دهۆك بێى بریارا حكومه‌تا هه‌رێما كوردستانێ و گۆت ژى: ( هه‌تا نها چو بریار نینن بو هاتنه ناڤا چوو هێزان بو ناڤا ده‌ڤه‌رێن پارێزگه‌ها دهۆك و پێشمه‌رگه د به‌رهه‌ڤیێ دایه بو هه‌ر حاله‌ته‌كێ نه‌خواستى ، دیسان پشته‌ڤانیا خوه بو پارێزگارێ كه‌ركوك و ئه‌نجومه‌نێ پارێزگه‌ها كه‌ركوك دوپات دكه‌ین و هه‌ر ئه‌ون نونه‌رێن خه‌لكێ كه‌ركوك )
پارێزگارێ دهوكێ ئه‌و یه‌ك ژى دیاركر كو میلشیاتێن حه‌شد شه‌عبى ناهێلن ل قوتابخانێن ده‌ڤه‌را زومار ب كوردى بخوینن و گوت ژى: ( ب چوو شێوه‌یه‌كێ ئه‌م وه‌كو پارێزگه‌ها دهۆك ره‌فتاركرنا راسته‌وخۆ ل گه‌ل به‌غدا قبول ناكه‌ین و دوو هه‌رێمیێ ژى ره‌ت دكه‌ین و گه‌لێ كوردستانێ قانون و رێسایێن ب رێڤه‌برنا خوه‌یێن تایبه‌ت هه‌نه)
ئه‌ڤرۆ نیوز ، هلورى:
سه‌رۆكێ فراكسوونا پارتى دیموكراتى كوردستان ل په‌رله‌مانێ كوردستانێ دیاركر كو رۆژا سێشه‌مبیا بهێت په‌رله‌مانێ كوردستانێ دێ كوم بیت.
دڤى واریدا” ئومێد خوشناوسه‌رۆكێ فراكسوونا پارتى دیموكراتى كوردستان ل په‌رله‌مانێ كوردستانێ دیاركر كو رۆژا سێشه‌مبیا بهێت په‌رله‌مانێ كوردستانێ دێ كوم بیت و گۆت: ( د كومبوونا په‌رله‌مانێ كوردستانێ دا دێ دانوستاندن لسه‌ر هاتنا حه‌شد شه‌عبى و سوپایێ عیراقێ بو ده‌ڤه‌رێن كوردستانیێن ده‌رڤه‌یێ هه‌رێما كوردستانێ كه‌ت )
زێده‌تر بو K24 گوت: ( ئێكا دن ژ پرسێن كو په‌رله‌مانێ كوردستانێ دێ لسه‌ر كوم بیت پرسا هه‌لبژاردنێن كوردستانێ هێنه به‌حسكرن)
نيشاندان