ئه‌ڤرۆ نیوز ، نه‌وزاد هلۆرى:
ده‌سته‌یا سه‌ربخوه‌ى یا مافى مرۆڤى و كومسیوونا مافێن مرۆڤى ل عیراقێ ده‌مه‌ك به‌ریا نها ل هه‌ولێر د كونگره‌یه‌كێ رۆژنامه‌ڤانى دا دیاركر كو به‌لگه‌ ل ده‌ف وان هه‌نه‌ كو حه‌شد شه‌عبى و پولیسێن فیدرالى مافێن خه‌لكێ سڤێل ل كه‌ركوك و ده‌ردوران بنپێكرینه‌ و هه‌موو داتایێن ئه‌وان بنپێكرنان ژى به‌رچاڤكرن.

ده‌سته‌یا سه‌ربخوه‌ى یا مافێ مرۆڤى دیاركر كو هێرشا حه‌شد شه‌عبى و پولیسێن فیدرالى بو سه‌ر كه‌ركوك و ده‌ڤه‌رێن ده‌ردورا وێ بنپێكرنا ماددێن ده‌ستورێ عیراقێ دانه‌ نیاسین و ئاماژه‌ ب وێ یه‌كى ژى كر كو نابیت هێز دژى گه‌لێن عیراقێ بهێنه‌ بكارئینان ، و پێدڤى یه‌ ئاریشه‌ ب رێێن دانوستاندنان بهێنه‌ چاره‌سه‌ركرن.

ل گوره‌ى داتایێن ده‌سته‌یا سه‌ربخوه‌ى یا مافێ مرۆڤى نها ملیونه‌ك و 200 هزار ئاواره‌ و په‌نابه‌رێن ل كوردستانێ هه‌نه‌ كو هنده‌ك ژ وان به‌ر ب كه‌ركوكێ چوو بون ، ژ به‌ر هێرشێن حه‌شد شه‌عبى زێده‌ترى 150 هزار كه‌س كو نێزیكێ 25 هزار خێزانایه‌ ئاواره‌یێ ده‌ڤه‌رێ، دن یێن كوردستانێ بوون و ل ڤێ داویێ ژى كارێ مه‌ بتنێ بوویه‌ دوڤچوون.

هه‌ر ل گوره‌ى داتایێن وان پشكه‌كا دن ژى یا ئاوارێن كو مال و حالێن خوه‌ بجهـ هێلاى خه‌لكێ پردێ و خورماتو بوینه‌ و هنده‌ك ل كه‌مپان و هنده‌ك ژى ل هه‌یكه‌ل و مالێن خه‌لكى ئاكنجیبوینه‌ و پێدڤى ب خزمه‌تگوزارى و هه‌ڤكاریێن ماددى هه‌یه‌ و قوربانیێن ئێكێ ژى ژن و زاروك بوینه‌.

150 مالێن وه‌لاتیان ل خورماتو ژلایێ حه‌شد هاتینه‌ سوتن و چه‌ندا كه‌س ژى ب مه‌ره‌م هاتینه‌ كوشتن.

د داتایێن ده‌سته‌یا سه‌ربخوه‌ى یا مافێ مرۆڤى زێده‌تر ژى هاتیه‌ كو پێدڤى یه‌ رێكخراوێن نه‌ته‌وه‌یێن هه‌ڤگرتى و كونسلولخانه‌ و رێكخراوێن ڤێراگه‌هشتنا بله‌ز ب هانا ئاواره‌یان بهێن و هه‌ڤكاریێن ماددى بو بینن و فشارێ ژى بێخنه‌ سه‌ر حكومه‌تا عیراقێ به‌رامبه‌ر بنپێكرنا ئه‌وان مافێن مرۆڤى و قه‌ره‌بویا هه‌موو وان خێزانان ژى بهێته‌كرن و ب زوترین ده‌م ژى دانوستاندن بو ئاسایكرنا په‌یوه‌ندیێن دناڤبه‌را هه‌ولێر و به‌غدا بهێنه‌كرن.

ئه‌ڤرۆ نیوز ، هلورى:
فه‌رمانده‌یا هێزێن پێشمه‌رگه‌ى ل مێحوه‌رێ رۆژئاڤایێ كه‌ركوك – پردێ دیاركر كو د شه‌رێ ئه‌ڤرو دا كو دناڤبه‌را میلشیاتێن حه‌شد شه‌عبى و پێشمه‌رگه‌ى روودابوو 150 چه‌كدارێن حه‌شد هاتینه‌ كوشتن و برینداركرن و هه‌موو هێرشێن وان ژى هاتینه‌ شكاندن.

فه‌رمانده‌یا هێزێن پێشمه‌رگه‌ى ل مێحوه‌رێ رۆژئاڤایێ كه‌ركوك – پردێ راگه‌هاندنه‌ك به‌لاڤكر و ل گوره‌ى راگه‌هاندنا وان ئه‌ڤرۆ سپێدێ هێزێن حه‌شد شه‌عبى ب چه‌ك و توپخانه‌ و تانكێن ئه‌مبرامزێن ئه‌مریكى هێرشه‌كا مه‌زن و به‌ربه‌لاڤكر سه‌ر هیزێن پێشمه‌رگه‌ى ل پردێ به‌ر ب جادده‌یا پردێ بو هه‌ولێر دهاتن ، به‌لێ هێزێن پێشمه‌رگه‌ى ب قه‌هره‌مانانه‌ هاته‌ ده‌نگ و به‌ره‌ڤانى ل كوردستانێ و گه‌لێ سه‌ربلندێ كورد كر ، د شه‌ره‌كێ گران دا پێشمه‌رگه‌یان ب قه‌ره‌مانانه‌ هه‌موو هێرشێن وان ئێك ل دوڤ ئێكێ يێن داگیركه‌رێن حه‌شدا نه‌ شعبى ب هه‌مو هه‌ڤكاریێن وان یێن پاسدارێن ئیرانێ و خوفروشان ڤه‌ ژ ناڤبرن و پاشڤه‌ زڤراندن.

د راگه‌هاندنا وان دا زێده‌تر هاتیه‌: ( و د ئه‌نجامێ شه‌رى دا دوو ده‌بابه‌ كو ئێك ژ وان ئه‌مبرامز یا ئه‌مریكى بو ل گه‌ل موده‌ره‌عه‌كێ و زێده‌ترى 12 هه‌مه‌ر و ئامیرێن دن ژ ناڤبرن و هژماره‌كا زور ژى ژ چه‌كدارێن داعش كوشتن و برینداركرن كو ئه‌و ژى 150 چه‌كداربوون و پرانیا وان گه‌هاندینه‌ نه‌خوشخانه‌یێن كه‌ركوكێ ، ب مخابنیڤه‌ پێشمه‌رگه‌ى ژى شه‌ش شه‌هید و چه‌ند پێشمه‌رگه‌یه‌كێن بریندار هه‌نه‌ )

راگه‌هاندنا فه‌رمانده‌یا پێشمه‌رگه‌ى ل مێحوه‌رێ رۆژئاڤایێ كه‌ركوك ل پردێ سوپاسیا هه‌موو وان پێشمه‌رگه‌یان دكه‌ین ئه‌ڤێن كو پشكداربووین و سوپاسیا خه‌لكێ كوردستانێ و داخوازا بحه‌شتێ بو شه‌هیدان و سلامه‌تیێ بو برینداران ژى كر)

ئه‌ڤرۆ نیوز ، نه‌وزاد هلۆرى:
ئه‌ڤرۆ وه‌لاتیێن كه‌ركوك و هه‌ولێر ل به‌رامبه‌ر قونسولخانا ئه‌مریكا ل هه‌ولێر خرڤه‌بونه‌كا نه‌رازیوبونێ ئه‌نجام دا و داخوازكر كو ئه‌مریكا به‌رامبه‌ر ده‌ستدرێژیێن حه‌شد شه‌عبى بێده‌نگ نه‌بیت و حه‌شد كه‌ركوك و ده‌ڤه‌رێن وان ده‌ركه‌ڤن.

ئاسو كه‌ریم ئێك ژ رێكخه‌رێن ئه‌وى َخرڤه‌بوونێ بو ئه‌ڤرۆ نیوز گۆت: ( ئه‌ڤرۆ وه‌لاتیێن كه‌ركوك و هه‌ولێر و هژماره‌كا رێكخراوێن جڤاكێ سڤێل رابوون ب ئه‌نجامدانا خرڤه‌بونه‌كا نه‌رازیبونێ به‌رامبه‌ر قونسولخانا ئه‌مریكا ل هه‌ولێر ئه‌نجامدا و تێدا داخواز ل ئه‌مریكا كر كو به‌رامبه‌ر زێده‌گاڤیێن حه‌شد شه‌عبى بهێنه‌ ده‌نگ ژبه‌ركو ب چه‌كێ ئه‌مریكا وه‌لاتیێن سڤێل دهێته‌ شه‌هدیكرن و ئه‌ردێن وان د هێنه‌ وه‌رگرتن كو ئه‌ڤ یه‌ك ژى دژى بنه‌مایێن مرۆڤایه‌تى یه‌)

زێده‌تر گۆت: ( هێزێن حه‌شد شه‌عبى ب چه‌كێ ئه‌مریكى و ب هه‌ڤكاریا ئیرانێ و قاسم سلێمانى مالێن خه‌لكى تالان دكه‌ن و خه‌لكى رسوا دكه‌ن )

ئه‌ڤرۆ نیوز ، هلۆرى:

پارێزگارێ هه‌ولێر د كونگره‌یه‌كێ رۆژنامه‌ڤانى دا دیاركر كو چوو هه‌ره‌شه‌ و مه‌ترسى بو سه‌ر هه‌ولێر نینن و بزاڤێن خورت هه‌نه‌ كو دانوستاندن دناڤبه‌را هه‌رێم و عیراقێ بهێنه‌كرن ، و  دیاركر ژى كو ئه‌ڤا كو ل كه‌ركوكێ درۆست بووى ل چوو ده‌ڤه‌رێن هه‌رێما كوردستانێ درۆست نابيت.
نه‌وزاد هادى پارێزگارێ هه‌ولێر دكونگره‌یه‌كێ رۆژنامه‌ڤانى دا دیاركر كو چوو مه‌ترسى لسه‌ر هه‌ولێر نینن و گۆت: ( دنهادا بزاڤێن خورت دهێنه‌كرن كو دانوستاندن دناڤبه‌را هه‌ولێر و به‌غدا ب چاڤدێریا ئه‌مریكا و ب پشتبه‌ستن ب ده‌ستوورێ عیراقێ بهێنه‌كرن ، و نها چوو هه‌ره‌شه‌ و بریار نینن كو هێز ب ئاراسته‌یێ هه‌ولێر بهێنه‌ لڤاندن)
زێده‌تر گۆت: ( پێدڤى یه‌ ده‌زگه‌هێن راگه‌هاندنێ ب راستگویانه‌ كار بكه‌ن و ده‌روونێ خه‌لكى تێك نه‌ده‌ن و ب به‌رپرسیارانه‌ كار بكه‌ن و هه‌لویستێن كوردایه‌تى به‌لاڤ بكه‌ن)
پارێزگارێ هه‌ولێر دیاركر ژى كو ئه‌ڤا كو ل كه‌ركوكێ درۆست بووى ل چوو ده‌ڤه‌رێن هه‌رێما كوردستانێ درۆست نابن و گۆت ژى: ( ئه‌ڤ شه‌رێ كو ل ناحیا پردێ دهێته‌كرن ئه‌وه‌ كو حه‌شد شه‌عبى دخوازیت داگیر بكه‌ت ژ به‌ركو پردێ ناحیه‌كا كه‌ركوكێ یه‌ ، بریار لسه‌ر گرتنا وێ هاتیه‌دان ژلایێ عیراقێ)

ئه‌ڤرۆ نیوز ، هلورى:
پشتى كو ئه‌ڤرۆ هێزێن حه‌شد شه‌عبى به‌ر ب ئاراسته‌یێ ناحیا پردێ ل نێزیك كه‌ركوك ده‌ست ب هێرشه‌كێ كرى ، هێرشا وان ب توندى ژلایێ هێزێن پێشمه‌رگه‌ى هاته‌ شكاندن و زیانێن زور ژى ب وان گه‌هاندن.

ژێده‌رێن پێشمه‌رگه‌ى دده‌ن دیاركرن كو ئه‌ڤرۆ سپێدێ حه‌شد شه‌عبى به‌ر ب ئاراسته‌یێ ناحیا پردێ پێشروى كرن و بومبه‌بارانا ده‌ڤه‌رێ كر به‌لى َد پشترا هێزێن پێشمه‌رگه‌ى ل وان هاتنه‌ ده‌نگ و ب توندى به‌رسڤا وان دا و هێرشا وان ژى ب ته‌مامه‌تى شاند و زیان ژى ب وان گه‌هاندن.
ل گوره‌ى زانیاریان هه‌شت ترومبێلێن گوله‌نه‌برێن هه‌مه‌ر ژناڤبرینه‌ و ل داویێ نه‌چاربوون ڤه‌كێشن و ب ره‌ڤن.