ئه‌ڤرۆ نیوز ، هلورى:
وه‌زاره‌تا پێشمه‌رگه‌ى یا حكومه‌تا هه‌رێما كوردستانێ راگه‌هاندنه‌ك به‌لاڤكر و تێدا دیاردكه‌ت كو جاره‌ك دن سه‌ر ژ نوو دێ هێلا ته‌ماس دناڤبه‌را هه‌ولێر و به‌غدا هێنه‌ رێكخستن.

ئاخفتنكه‌رێ وه‌زاره‌تا پێشمه‌رگه‌ى یا حكومه‌تا هه‌رێما كوردستانێ راگه‌هاندنه‌ك به‌لاڤكر و دیاركركو ل گوره‌ى رێكه‌فتنا ئوپه‌راسیوونا كونترۆلكرنا موسل كو دناڤبه‌را هه‌رێما كوردستان و حكومه‌تا فیدرالى یا عیراقێ ب چاڤدێریا هه‌ڤپه‌یمانان هاتیه‌ دانان و ئیمزاكرن و بریار لسه‌ر دابوو كو ئه‌و ژى هێلا ته‌ماسا دناڤبه‌را هێزێن پێشمه‌رگه‌ى و سوپایێ عیراقێ دێ ب ره‌نگه‌كێ مینیت كو روژه‌كێ به‌را ئوپه‌راسیوونا كونترولكرنا موسل ل رێكه‌فتى 17/10/2017 هاتبویه‌ ێگیركرن)

د راگه‌هاندنا وان دا زێده‌تر هاتیه‌: ( نها ژى هه‌ردوو لا دێ پێگیریێ ب ئه‌وێ رێكه‌فتێ كه‌ن و ل ڤان رۆژان ژى دا دێ جاره‌ك ده‌ن هێلا ته‌ماس ل گوره‌ى رێكه‌فتنێ دێ سه‌ر ژ نوو هێنه‌ رێكخستن ڤه‌)

ئه‌ڤرۆ نیوز ، نه‌وزاد هلۆرى:

سه‌رۆكێ هه‌رێما كوردستانێ مه‌سعود بارزانى لسه‌ر ره‌وشا كه‌ركوكێ و هاتنا هێزێن عیراقى بو كه‌ركوك و ده‌ڤه‌رێن ده‌رڤه‌یێ كارگێریا هه‌رێما كوردستانێ په‌یامه‌ك به‌لاڤكر و تێدا دیاركر كو ئه‌ڤا كو ل كه‌ركوك روویداى بریاره‌كا ئێكلایه‌نى چه‌ند كه‌سه‌كان بویه‌ دناڤا لایه‌نه‌كێ سیاسیێ نافخوه‌یا كوردستانێ ، و خوینا شه‌هیدێن گه‌لێ كوردستانێ بو سه‌ربخوه‌یێ به‌لاش ناچیت.

ئه‌ڤا ل خوارێ ده‌قا وێ یه‌

بناڤێ خودێ مه‌زن و دلوڤان

جه‌ماوه‌رێ خوشتیڤێ كوردستانێ

رایا گشتى یا كوردستان و عیراق و جیهانێ

ب درێژاهیا دیروكێ گه‌لێ كوردستان لژێر هه‌ره‌شه‌ و سته‌مێ دا بوویه‌ و مافێن وان هاتینه‌ بنپێكرن ، دڤێ دیروكێ دا گه‌لێ كوردستانێ به‌ره‌ڤانى ل ناسنامه‌یا خوه‌ كریه‌ و توشى جینوساید و كومكوژیان هاتیه‌ ، دوماهی جار ژى په‌له‌مارا دراندانه‌یا تیرورستێن داعشێ بویه‌ بو سه‌ر كوردستان و جینوسایدكرنا كوردێن ئێزدى بوویه‌

ل گه‌ل ڤێ یه‌كێ ژى گه‌لێ كوردستانێ هه‌رده‌م ب دیتنه‌كا ئاشتیانه‌ پێنگاڤێن چاره‌سه‌ریێ گرتینه‌ به‌ر و چو اران ژى مه‌ شه‌ر نه‌ڤیانه‌ ، به‌لكو شه‌ر لسه‌ر مه‌ هاتیه‌ سه‌پاندن و مه‌ هه‌موو بزاڤ كرینه‌ بو چاره‌سه‌ریا ئاشتیانه‌ داینه‌ بو مانه‌ڤا خوه‌ بو گه‌هشتن ب ئارمانجێن خوه‌ ، ئامانا سه‌ره‌كى ژى هه‌رده‌م ئاسایش و مافێن گه‌لێ كوردستانێ بوینه‌.

وه‌لاتیێن خوشڤى

ئه‌ڤا كو ل باژێرێ كه‌ركوكێ روویدایى ، ئه‌نجامێ بریارا ئێكلایه‌نیا چه‌ند كه‌سه‌كان بوویه‌ دناڤ لایه‌نه‌كێ سیاسیێ نافخوه‌یا كوردستانێ ،و بویه‌ ئه‌گه‌را وێ یه‌كێ كو هێزێن پێشمه‌رگه‌ى ب ره‌نگێ هاتیه‌ دیتن پاشڤه‌زڤرین و ژ ئه‌نجامێ ئه‌وێ پاشڤه‌زڤرینێ ژى ، هێلا ته‌ماسا به‌رى ده‌ستپێكرنا ئوپه‌راسیوونا ئازادكرنا موسل ل رێكه‌فتى 17/10/2016 دناڤبه‌را به‌غدا و هه‌ولیر بوویه‌ كو ببوویه‌ بنه‌مایێ تێگه‌هشتنا ل چه‌وانیا به‌لاڤكرنا هێزێن عیراقى و هه‌رێما كوردستانێ.
جه‌ماوه‌رێ كوردستانێ پشتراست دكه‌ین ئه‌وا كو پێدڤى یه‌ دێ هێته‌كرن ، دپێناڤ پاراستنا ده‌ستكه‌فتێن مه‌ و ئارامى و ئاسایشا خه‌لكى دێ ئه‌نجام ده‌ین.

نها ژى دوپاتیێ لسه‌ر پاراستنا ئێكرێزى و خوراگریا گه‌لێ كوردستانێ و هێزێن سیاسى دكه‌ین و داخوازێ ل هه‌موو ده‌زگه‌هێن راگه‌هاندنێ ژى دكه‌م ب ره‌نگه‌ك گشتى كو ب دیتنه‌كا هه‌ستیار و به‌رپرسیاره‌تیا نه‌ته‌وه‌یى و نیشتمانى ره‌فتارێ ل گه‌ل بارودوخێ هه‌ستیارێ كوردستانێ و عیراقێ بكه‌ن.

گه‌لێ خوه‌ راگرێ كوردستانێ ، جه‌ماوه‌رێ دلسووز و خوبه‌خش و پێشمه‌رگێن قاره‌مان و كه‌س و كارێن سه‌ربلندێن شه‌هیدان ، ئه‌و خوونا كو زاروكێن هه‌وه‌ د رێیا ئازادیا كوردستانێ دا رشتى ، ئه‌ڤرۆ ژى هه‌ر د رێژن ، ئه‌و ده‌نگێ زه‌لالێ كو بو سه‌ربخوه‌ى یا كوردستانێ هه‌وه‌ كرى و گه‌هاندیه‌ گه‌لان و وه‌لاتێن جیهانێ ، روژه‌كێ ل روژان به‌لاش ناچیت و به‌لاش ژى ناده‌ین.
گه‌لێ كوردستان ب هیمه‌ته‌كا ب هێز و قاره‌مانانه‌ چ زوو بیت یان دره‌نگ دێ جاره‌ك دن هه‌ر گه‌هیته‌ ئارمانا خوه‌ یا ره‌وا و پیروز ، ئه‌ڤرۆ رۆژا باوه‌ربوونه‌ ب هێز و ئێكرێزیا گه‌لێ مه‌.

ئه‌ڤرۆ نيوز:

پەیامێک لە سەرۆکی ھەرێمی کوردستان

بەناوی خودای بەخشندە و میھرەبان

جەماوەری خۆشەویستی کوردستان

ڕای گشتیی کوردستان و عێراق و جیھان

بە درێژایی مێژوو گەلی کوردستان لەژێر ھەڕەشە و زوڵمدا بووە و مافەکانی پێشێل کراوە. لەو مێژووەدا گەلی کوردستان بەرگریی لە ناسنامەی خۆی کردووە و تووشی جینۆساید و کۆمەڵکوژی ھاتووە کە دوایینیان پەلاماری دڕندانەی تیرۆریستانی داعش بووە بۆ سەر کوردستان و جینۆسایدی کوردانی ئێزیدی. لەگەڵ ئەوەیشدا گەلی کوردستان ھەمیشە لە ڕوانگەی چارەسەری ئاشتیانەدا ھەنگاوی ناوە و ھیچ کاتێک شەڕمان نەویستووە، بەڵکو شەڕمان بەسەردا سەپێندراوە و ھەموو ھەوڵێکمان بۆ چارەسەری ئاشتیانە داوە بۆ مانەوەمان و گەییشتنمان بە ئامانجەکانمان. ئامانجی سەرەکیشمان ھەمیشە ئاساییش و مافەکانی گەلی کوردستان بووە.

ھاووڵاتیانی خۆشەویست

ئەوەی لە شاری کەرکووک ڕووی داوە، دەرئەنجامی بڕیاری تاکلایەنەی چەند کەسێک لەنێو لایەنێکی سیاسیی ناوخۆی کوردستان بوو، کە دواجار بووە ھۆی ئەوەی ھێزەکانی پێشمەرگە بەو شێوەیەی کە دیترا پاشەکشە بکەن و لە دەرئەنجامی ئەم پاشەکشەیە، ھێڵی تەماسی پێش دەستپێکردنی ئۆپەراسیۆنی ئازادکردنی موسڵ لە 17ـی 10ـی 2016 لەنێوان بەغدا و ھەولێر بووە بە بنەمای لەیەکگەییشتن لە چۆنییەتیی بڵاوەپێکردنی ھێزەکانی عێراقی و ھەرێمی کوردستان.

جەماوەری کوردستان دڵنیا دەکەینەوە ئەوەی پێویستە و دەکرێ، لەپێناو پاراستنی دەستکەوتنەکانمان و ئارامی و ئاساییشی خەڵکدا ئەنجامی دەدەین.

ئێستایش داکۆکی لەسەر پاراستنی یەکڕیزی و خۆڕاگریی گەلی کوردستان و ھێزە سیاسییەکان دەکەینەوە و، داوایش لە دەزگەکانی ڕاگەیاندن دەکەم بە گشتی لە ڕوانگەی ھەستکردن بە بەرپرسیارێتیی نەتەوەیی و نیشتیمانی مامەڵە لەگەڵ بارودۆخی ھەستیاری کوردستان و عێراقدا بکەن.

گەلی خۆڕاگری کوردستان، جەماوەری دڵسۆز و خۆبەخشەکان، پێشمەرگە قارەمانەکان، کەسوکاری شەھیدە سەربەرزەکانمان، ئەو خوێنەی ڕۆڵەکانتان لەڕێگەی ئازادیی کوردستان بەخشیویانە و ئیمڕۆش ھەر دەبەخشرێ، ئەو دەنگە زوڵاڵە بەرزەی کە بۆ سەربەخۆیی کوردستان خستانەڕوو و گەیاندتانە گشت گەلان و وڵاتانی جیھان، ڕۆژێک لە ڕۆژان بە فیڕۆ ناچێت و بەفیڕۆیش نایدەین.

گەلی کوردستان بە ھیمەتی ھێز و ڕۆڵە قارەمانەکانی زوو یان درەنگ ھەر دەگاتە ئامانجە ڕەوا و پیرۆزەکانی. ئیمڕۆ ڕۆژی باوەڕبوونە بە ھێز و یەکڕیزیی گەلەکەمان.

مسعود بارزانی

17ـی 10ـی 2017

ئه‌ڤرۆ نیوز ، هلورى:
وه‌سا بریاره‌ كو سوبه‌هى په‌رله‌مانێ كوردستانێ كوم ببیت و ئه‌ندامه‌كا په‌رله‌مانێ كوردستانێ ژى دیاركر كو به‌رنامه‌یێ كارى یێ په‌رله‌مانێ كوردستانێ كو پێشتر بریار لسه‌ر دایه‌ ناهێته‌ گوهرین.

ژێده‌ره‌كێ ژ په‌رله‌مانێ كوردستانێ بو ئه‌ڤرۆ نیوز گۆت: ( سوبه‌هى په‌رله‌مانێ كوردستانێ لسه‌ر پرسا هه‌لبژاردنا سكرتێره‌كێ بو په‌رله‌مانێ كوردستانێ و پرسا هه‌لبژاردنێن سه‌رۆكاتیا هه‌رێما كوردستان و په‌رله‌مانێ كوردستانێ دێ كوم بیت و دانوستاندنان لسه‌ر كه‌ت و پاشان هنده‌ك بریاران ده‌رئێخیت)

ل بارا ئه‌رێ پرسا هاتنا حه‌شد شه‌عبى بو كه‌ركوك و ده‌ڤه‌رێن ده‌رڤه‌یا كارگێریا هه‌رێما كوردستانێ دناڤا ته‌وه‌رێن رونشتنا سوبه‌هى یا په‌رله‌مانێ كوردستانێ هه‌یه‌ ،ئه‌وى ژێده‌رى گوت  ژى: ( هه‌تا نها چوو تشت نینن كو په‌رله‌مانێ كوردستانێ دانوستاندنێ لسه‌ر هاتنا هێزێن حه‌شد شه‌عبى و سوپایێ عیراقێ بو كه‌ركوك و ده‌ڤه‌رێن دن بكه‌ت )

ئه‌ڤرۆ نیوز ، نه‌وزاد هلۆرى:
پشتى كو ئه‌ڤرۆ هێزێن پێشمه‌رگه‌ى ل مێحوه‌رێ گوێر – مه‌خمور بێى شه‌ر و ته‌قه‌ ڤه‌كێشایى ، فه‌رمانده‌یه‌كێ پولیسێن فیدرالیێن عیراقێ راگه‌هاند كو دێ مه‌خمور ب هه‌ڤپشكى ل گه‌ل پێشمه‌رگه‌ى هێته‌ ب رێڤه‌برن.

فه‌ریق جه‌وده‌ت شه‌وكه‌ت فه‌رمانده‌یێ پولیسێن فیدرالیێن عیراقێ بو ئه‌ڤرۆ نیوز گۆت: ( مێحوه‌رێ مه‌خمور هێزێن عیراقى دێ ب هه‌ڤپشكى ل گه‌ل هێزێن پێشمه‌رگه‌ى هێنه‌ ب رێڤه‌برن و هێزێن عیراقى دێ ب دوراتیا 50كم ل باشوورێ قه‌زا دوبز ل مه‌خمور مینن و زێده‌تر پێشڤه‌چوونێ ناكه‌ن)

ل گوره‌ى زانیاریێن ئه‌ڤرۆ نیوز پشكه‌ك ژ مێحوه‌رێ گوێر – مه‌خمور دێ ژلایێ هێزێن ئه‌مریكى و پشكه‌ك ژى ژلایێ هه‌ردوو هێزێن عیراقى و هه‌رێمێ هێنه‌ ب رێڤه‌برن.