ئه‌ڤرۆ نیوز ، هلورى:
نێچیرڤان بارزانى جێگرێ پارتى دیموكراتى كوردستان گه‌هشته‌ باره‌گایێ سه‌ره‌كیێ ته‌ڤگه‌را گۆڕانێ ل سلێمانیێ و وه‌سا بریاره‌ ل گه‌ل عومه‌ر سه‌ید عه‌لى رێكخه‌رێ گشتیێ ته‌ڤگه‌را گۆڕان كوم ببیت.

شاندنێ پارتى ژبلى نێچیرڤان بارزانى ئه‌دهه‌م بارزانى و فوئاد حسێن ژى ل گه‌ل دايه‌ ،  هه‌ڤده‌م سه‌لاحه‌دین به‌هائه‌دین ئه‌میندارێ گشتیێ ئێكگرتوویا ئیسلامیا كوردستانێ  ژى ل گه‌ل وان دایه‌

دهێته‌زانین ئه‌ڤه‌ ئێكه‌م كومبوونا هه‌ردوو لایانه‌ پشتى ریفراندۆوما سه‌ربخوه‌ى یا كوردستانێ و دهێته‌ چاڤه‌رێكرن به‌حس ل چه‌ند پرسه‌كێن گرنگ دناڤبه‌را پارتى و گۆڕان بهێنه‌كرن ژ وانان پرسا ڤه‌گه‌را سه‌رۆكێ په‌رله‌مانێ كوردستانێ.

زانیارێن زێده‌تر ل ئه‌ڤرۆ نیوز چاڤه‌رێ بن

ئه‌ڤرۆ نیوز ، نه‌وزاد هلۆرى:
ل گوره‌ى ئه‌و نوچه‌یێ كو ل مالپه‌را سه‌رۆكاتیا هه‌رێما كوردستانێ هاتیه‌ به‌لاڤكرن ، كومبوونا ئه‌ڤرۆ یا دناڤبه‌را سه‌رۆكێ هه‌رێما كوردستانێ و چه‌ند به‌رپرسه‌كێن عیراقى هاتیه‌ ئه‌نام دان چوار خال هاتینه‌ به‌حسكرن.
ئه‌ڤرۆ مه‌سعود بارزانى سه‌رۆكێ هه‌رێما كوردستانێ و ئه‌یاد عه‌لاوى و ئوسامه‌ نوجێفى هه‌ردوو جێگرێن سه‌روك كومارێ عیراقێ ل سلێمانیێ كومبوو و د كومبوونه‌كا سێ قولى دا دانوستاندن لسه‌ر چه‌ند پرسه‌كێن دناڤبه‌را عیراق و هه‌رێما كوردستانێ یێن نها عیراق تێدا ده‌رباز دبیت هاتنه‌كرن و چه‌وانیا چاره‌سه‌ركرن و ئاریشه‌یێن په‌یوه‌ندیدار ب گوره‌پانا سیاسى هاتینه‌ به‌حسكرن.
دڤى واریدا فوئاد حسێن سه‌روكێ دیوانا سه‌رۆكاتیا هه‌رێما كوردستانێ دیاركر كو به‌رهه‌ڤبوویێن كومبوونێ رێكه‌فتن لسه‌ر ئه‌ڤان چوار خالێن خوارێ هاتنه‌كرن.
1- ده‌ستپێكرنا دانوستاندنا دناڤبه‌را لایه‌نێن سیاسیێن سه‌ره‌كى ل عیراقێ بو هیوكرنا بارودوخێ ده‌ڤه‌رێ.
2- كومبوون لسه‌ر ئه‌نجێندایێن ڤه‌كرى بن.
3- راكرنا ئێكسه‌ر ” ده‌ستبه‌جێ” یا سزایێن ل سه‌ر هه‌رێما كوردستانێ.
4- ده‌ستپێكرنا كومبوونان لده‌مه‌كێ نێزیك ، ب پشت به‌ستن ب ئالیه‌ته‌كا تایبه‌ت بو هه‌ڤكاریێن به‌رده‌وام.

ئه‌ڤرۆ نیوز ، نه‌وزاد هلۆرى:
كومسیوونا بلند یا هه‌لبژاردن و راپرسیێ یا هه‌رێما كوردستانێ دیاركر كو ئه‌و یێ ده‌ست ب به‌رهه‌ڤیان دكه‌ن بو دابه‌شكرنا پارێ وان كارمه‌ندێن كو لسه‌ر سندوقان كاركرى و چه‌ند رۆژێن بهێت دێ پروسه‌ ده‌ستپێكه‌ت.
دڤى واریدا “عه‌لى سالح به‌ندى” به‌رپرسێ ئوفیسا دهۆك یا كومسویونا بلند یا هه‌لبژاردن و راپرسێ یا هه‌رێما كوردستانێ بو ئه‌ڤرۆ نیوز گۆت: ( نها ئه‌م یێ كار لسه‌ر لیسته‌یێن وان كه‌سان دكه‌ین ئه‌ڤێن كو وه‌كو كارمه‌ند لسه‌ر سندوقێن ده‌نگدانێ بو ریفراندۆما سه‌ربخوه‌ى یا كوردستانێ كاركرى و چه‌ند روژێن بهێت ژى دێ ده‌ست ب دابه‌شكرنا پارێ وان كارمه‌ندان كه‌ین)
زێده‌تر گۆت: ( هه‌ر كه‌سه‌كێ لسه‌ر سندوقان كاركربیت وه‌كو كارمه‌ند دێ 120 هزار دیناران وه‌رگریت ، و ده‌ستپێكێ دێ ل سه‌نته‌رێ پارێزگه‌هێ ده‌ستپێكه‌ت پاشان ل قوناغا دوویێ ل قه‌زا و ناحیان )
ل گوره‌ى زانیاریێن ئه‌ڤرۆ نیوز ئه‌و كه‌سانێن ل ده‌ڤه‌رێن سه‌ر ب كارگێریا هه‌رێما كوردستانى َوه‌كو كارمه‌ند كاركرى دێ 180 هزار دیناران وه‌رگرن.

ئه‌ڤرۆ نیوز ، نه‌وزاد هلۆرى:
ده‌مه‌ك به‌ریا نها سه‌رۆكێ هه‌رێما كوردستانێ و سةرؤك كومارىَ عيراقىَ و سه‌رۆكىَ حكومه‌تا هه‌رێما كوردستانێ و چه‌ند كه‌ساتیه‌كێن دن یێن باكوورێ كوردستانێ سه‌ره‌دانا گوڕا مام جه‌لال تاله‌بانى كر و تاجه‌ گول پێشكێشكرن و د كونگره‌یه‌كێ رۆژنامه‌ڤانى دا سه‌رۆك بارزانى دیاركر كو ئه‌و پتر ژ هه‌مووان هه‌ست ب بوشایى وةغةرا مام جه‌لال دكه‌ت.
مه‌سعود بارزانى سه‌رۆكێ هه‌رێما كوردستانێ پشتى كو تاجه‌ گوله‌ك پێشكێشى گۆرا مام جه‌لال تاله‌بانى كرى د كونگره‌یه‌كێ رۆژنامه‌ڤانى دا دیاركر كو ژ ده‌ست دانا مام جه‌لال زیانه‌كا مه‌زن بو و ئه‌و پتر ژ هه‌ر كه‌سى هه‌ست ب بوشایا وةغةرا مام جه‌لال دكه‌ت و گۆت: ( ژ ده‌ستدانا مام جه‌لال تاله‌بانى خه‌مه‌كا مه‌زنه‌ بو گه‌لێ كوردستانێ و پێدڤى یه‌ وه‌كو مام جه‌لال ئه‌م ژى گرنگیێ ب برایه‌تى و پێكڤه‌ژیانێ بده‌ین داكو گیانێ مام جه‌لال و هه‌موو شه‌هیدان شاد ببیت)
زێده‌تر گۆت: (ب دانوستاندنان ئاریشه‌یێن دناڤبه‌را هه‌موو لایه‌نێن سیاسى و به‌غدا ژى چاره‌سه‌ر دبن ، و پێدڤى یه‌ به‌غدا ژى وه‌غه‌را مام جه‌لال بكه‌ت ده‌رفه‌ت بو پێداچوون د سیاسه‌تا خوه‌ دا ، و پێشتر من و مام جه‌لال ب دانوستاندن چاره‌سه‌ریا هه‌ر كاره‌كێ دكر و زور جاران ژى ب ئێك تلفوون مه‌ چاره‌سه‌ریا هه‌ر ئاریشه‌یه‌كێ دكر ، و گرنگه‌ ئه‌ڤرۆ وێڤه‌ ئه‌م ژى مفاى ژ سه‌ربورێن بورى وه‌ربگرین و ب برایه‌تى چاره‌سه‌ریا هه‌ر تشتى بكه‌ین)