ئه‌ڤرۆ نیوز ، نه‌وزاد هلۆرى:

سه‌روكێ حكومه‌تا هه‌رێما كوردستانێ د په‌یاما هه‌ڤخه‌میێ دا كو ب هه‌لكه‌فتا وه‌غه‌ركرنا مام جه‌لال تاله‌بانى به‌لاڤكریه‌ دیاركر كو مام جه‌لالى رووله‌كێ كارا و گرنگ هه‌بوویه‌ د شوره‌شێن گه‌لێ كوردستانێ و ژ ده‌ست دانا وى زیانه‌كا مه‌زنه‌ بو كوردستان و عیراق و ده‌ڤه‌رێ.
ئه‌ڤا ل خوارێ ده‌قا په‌یاما وى یه‌.
ئه‌ڤرۆ گه‌لێ كوردستانێ و عیراقێ ، ئازادیخواز و تێكوشه‌ره‌كێ مه‌زنێ ئازادیا كوردستان و دیموكراسیێ عیراقێ ژ دده‌ست دا كو ئه‌و ژى جه‌نابێ مام جه‌لاله‌ ، ب ڤێ هه‌لكه‌فتێ ژى پرسه‌ و سه‌ره‌خوشیێن خوه‌ و حكومه‌تا هه‌رێما كوردستانێ ب هه‌موو گه‌لێ كوردستان و گه‌لێ عیراقێ و هێروخانێ و كاك قوباد تاله‌بانى و كاك بافل تاله‌بانى و هه‌موو بنه‌مالا مام جه‌لال تاله‌بانى و مه‌كته‌با سیاسیا و سه‌ركرداتیا ئێكه‌تیا نیشتمانیا كوردستانێ رادگه‌هینم.
جه‌نابێ مام جه‌لال روله‌كێ مه‌زن ل شوره‌شا كوردستانێ دا هه‌بوویه‌ ، هه‌ر د ژیه‌كێ زویێ گه‌نجاتیێ دا تێكه‌لى ته‌ڤگه‌را ره‌وشه‌نبیرى و سیاسیا كوردستانێ بوویه‌ ، وه‌كو سه‌ركرده‌یه‌كێ رول د خه‌باتا پارتى دیموكراتى كوردستان هه‌بوویه‌ و دامه‌زرێنه‌رێ ئێكه‌تیا نیشتمانیا كوردستانێ بوویه‌ كو هه‌ڤده‌م ل گه‌ل پارتى دیموكراتى كوردستانێ دا روله‌كێ گرنگ د شوره‌ش و به‌ره‌یێ كوردستانێ و سه‌رهلدان و دامه‌زراندن و پاراستنا ده‌زگه‌هێ دیموكراسى و شه‌رعیێن كوردستانێ گێرایه‌.

رولێ مام جه‌لال د خه‌باتا دژى دكتاتور و درۆستكرنا دیموكراسى ل عیراقێ ، روله‌كێ گرنگ و ژ بیرنه‌كریه‌ ، خودێ ژێ رازى سه‌روك مام جه‌لال ل گه‌ل سه‌روك بارزانى و سه‌ركرده‌ دیموكراستخوازێن دن ، روله‌كێ هه‌رى دیار و به‌رچاڤ هه‌بوویه‌ د كاركرن و پێداگیریكرن لسه‌ر درۆستكرنا عیراقێ لسه‌ر بناغه‌یێ سیسته‌مه‌كێ دیموكراسى و مه‌ده‌نى و ئێكسانیا نه‌ته‌وه‌یا كورد و عه‌ره‌ب و پاراستنا مافێن توركمان و كریستیان و هه‌موو نه‌ته‌وه‌ و په‌یره‌وێن ئاینى و مه‌زهه‌بیێن دن یێن عیراقێ و په‌یره‌وكرنا بنه‌مایێن ته‌وافق كو كریه‌ بناغه‌یێ بریاردانێ و ب رێڤه‌برنا وێ ل گوره‌ى ده‌ستوورى.

مام جه‌لال وه‌كو سه‌روك كومارێ عیراقێ ل به‌غدا د هه‌ول و ململانێیه‌كا دژوار و به‌رده‌وام دا بوو بو بجهكرن و پاراستنا ده‌ستوورى ، ژ ئه‌گه‌را هه‌وبونا پێگه‌هه‌كێ تایبه‌تمه‌ند ژلایێ هه‌موو هێزێن عیراقى ب لێهاتیا خوه‌ تا راده‌یه‌كێ زور رێگرى ل بنپێكرنا بنه‌مایێن ته‌وافق و پشتگوه هاڤێتنا ده‌ستورى دكر هه‌ر ژبه‌رڤێ دبینیت پشتى نه‌خوشبوونا مام جه‌لال و دوركه‌فتنا وى ل پوستێ سه‌روك كوماریێ ل به‌غدا بنپێكرنا ده‌ستوور و بنه‌مایێن ته‌وافق ل عیراقێ زورتربوون ، و د ئه‌نجام دا ئه‌ڤ یه‌ك بوویه‌ ئه‌گه‌را په‌ككه‌فتنا پروسه‌یا سیاسى ل عیراقێ و كاره‌سات و مالوێرانیێن زور بو هه‌موو عیراقێ درۆست بوون ، بڤێ یه‌كێ ژى د چارچوڤێ كاركرنا خوه‌ دا بوویه‌ كه‌ساتیه‌كێ بناڤ و ده‌نگ ل هه‌موو جیهانێ.
په‌یوه‌ندیا من و مام جه‌لال په‌یوه‌ندیه‌كا زور باش بوویه‌ كو ئه‌و ژى رێزگرتن و تێكگه‌هشتنا به‌رده‌وام بوویه‌ ، پرانیا ئه‌وان ئاریشه‌یێن كو دهاتنه‌ به‌رامبه‌ر مه‌ و دبونه‌ پشكه‌ك ژ دانوستاندن و په‌یوه‌ندیێن به‌رده‌وامێن دناڤبه‌را مه‌ ، ئه‌نجامێن وێ ژى هه‌رده‌م چاره‌سه‌ركرن بوویه‌ ، ئه‌و ل گه‌ل من هه‌رده‌م خودانێ مێشكه‌كێ ڤه‌كرى بوویه‌ بو چاره‌سه‌ركرنا ئاریشه‌یان.

ژ ده‌ستدانا سه‌ركرده‌ و سیاسه‌یكێ وه‌كو مام جه‌لال ، زیانه‌كا مه‌زنه‌ بو كوردستان و عیراق و ده‌ڤه‌رێ ، دووباره‌ سه‌ره‌خوشیێ و هه‌ڤخه‌میێن خوه‌ ل هه‌موو وان كه‌سان دكه‌م ئه‌ڤێن كو حه‌ژێكرن بو مام جه‌لال هه‌ى و ئومێده‌وارم هه‌مو لایه‌ك ژى هزرێ ل شێوه‌یێ كاركرنا مام جه‌لال بكه‌ن بو ب رێڤه‌برنا كارێن خوه‌ ب ته‌وافق ل عیراقێ.

مام جه‌لال هه‌رده‌م ل هزرێن مه‌یه‌ و جهێ وى بحه‌شت بیت

ئه‌ڤرۆ نیوز:
به‌رپرسێ ده‌سته‌یا كارگێرى یا مه‌كته‌با سیاسیا ئێكه‌تیا نیشتمانیا كوردستانێ دیاركر كو رۆژا پێنج شه‌مبیا بهێت ته‌رمێ مام جه‌لال تاله‌بانى دێ گه‌هیته‌ هه‌رێما كوردستانێ و د رێورسمه‌كێ ژ هه‌ژى دا هێته‌ ڤه‌شارتن.
مه‌لا به‌ختیار به‌رپرسێ ده‌سته‌یا كارگێرى یا مه‌كته‌با سیاسیا ئێكه‌تیا نیشتمانیا كوردستانێ د كونگره‌یه‌كێ رۆژنامه‌ڤانى دا ل سلێمانیێ دیاركر كو سوبه‌هى ته‌رمێ مام جه‌لال دێ ل ئه‌لمانیا مینیت و دوسبه‌ روژا پێنج شه‌مبى رێكه‌فتى 5/10/2017 د رێورسمه‌كێ ژ هه‌ژى دا هێته‌ ڤه‌گه‌راندن بو هه‌رێما كوردستانێ و د سلێمانیێ هێته‌ ڤه‌شارتن)
زێده‌تر گۆت: ( لسه‌ر چه‌وانیا ڤه‌شارتنا وى و ل كیژان گورستانێ دوسبه‌ مه‌كته‌با سیاسیا ئێكه‌تى دێ د راگه‌هاندنه‌كێ دا به‌لاڤ كه‌ت )

ئه‌ڤرۆ نیوز ، نه‌وزاد هلۆرى:
مه‌سرور بارزانى سه‌رۆكێ ئاژانسا پاراستنا هه‌رێما كوردستانێ ب هه‌لكه‌فتا وه‌غه‌ركرنا مام جه‌لال تاله‌بانى په‌یامه‌كا هه‌ڤخه‌مى و سه‌ره‌خوشیێ به‌لاڤكر و تێدا دیاركر كو وه‌غه‌ركرنا مام جه‌لال دێ بوشایه‌كا سیاسى ل هه‌رێما كوردستانێ درۆست كه‌ت.
مه‌سرور بارزانى دده‌تن دیاركرن كو سه‌ره‌خوشیێ ل ئێكه‌تیا نیشتمانیا كوردستانێ و بنه‌مالا مام جه‌لال و سه‌ركردایه‌تى و لایه‌نگیرێن ئێكه‌تیا نیشتمانیا كوردستانێ دكه‌ت و دخوازیت دوماهى نه‌خوشیا وان بیت و گۆت: ( مام جه‌لال تاله‌بانى كه‌ساتیه‌كێ كارتێكه‌رێ یێ مه‌یدانىیێ گوره‌پانا سیاسیا كوردستان و عیراق و ده‌ڤه‌رێ بوویه‌ و وه‌غه‌ركرنا وى دێ بوشایه‌كا زور درۆست كه‌ت ، و دخوازم كو ب ته‌بایى و ئێكرێزى و خه‌باته‌كا بێ راوه‌ستان ب ئاراسته‌یێ بجهكرنا هیڤیێن گه‌لێ مه‌ كو هیڤیێن مام جه‌لال ژى بوویه‌ ، بكارین بڤێ یه‌كێ گیانێ خودێ لێ خوش بوو و ته‌ڤایا شه‌هیدێن كوردستانێ شاد بكه‌ین)

ئه‌ڤرۆ نیوز ، هلورى:
ته‌ڤگه‌را گۆڕان به‌ربژێرێ خوه‌ بو پوستێ سه‌روكاتیا هه‌رێما كوردستانێ دیاركر كو وه‌سا بریاره‌ له‌ مه‌ها چریا دوویێ یا بهێت بهێته‌ ئه‌نجامدان.
ل گوره‌ى نوچه‌یه‌كێ كو ل كه‌نالێ NRT به‌لاڤ كریه‌ ته‌ڤگه‌را گۆڕان “محه‌مه‌د ته‌وفیق ره‌حیم ” وه‌كو به‌ربژێر بو پوستێ سه‌روكاتیا هه‌رێما كوردستانێ لسه‌ر لیستا گۆڕانێ به‌ربژێركریه‌ و ئه‌ڤرۆ ناڤبرى سه‌ره‌دانا كومسیوونێ كریه‌ بو پركرنا فورما به‌ربژێریێ كو دوماهیك رۆژ بوویه‌ بو توماركرنا ناڤێن به‌ربژێران و كومسیوونێ ژى فورما وى وه‌رگرت و په‌سه‌ندكر.
دهه‌لبژاردنێن په‌رله‌مان و سه‌روكاتیا هه‌رێما كوردستانێ دا 21 قه‌واره‌یێن سیاسى دێ هه‌ڤركیێ لسه‌ر كورسیێن په‌رله‌مان و سه‌روكاتیا هه‌رێما كوردستانێ كه‌ن و ئه‌ڤرۆ ژى كومسویونا بلند یا هه‌لبژاردن و راپرسیێ ده‌ما پروپاكندێن هه‌لبژاردنان راگه‌هاندن كو دێ ل رۆژا 15/10/2017 ده‌ستپێكه‌ت و 17 رۆژان یا به‌رده‌وام بیت.
ل گوره‌ى ئه‌وان زانیاریێن كو ل كومسیوونێ وه‌كو مه‌رج بو وه‌رگرتنا پوستێ سه‌روكاتیا هه‌رێما كوردستانێ هاتینه‌ به‌لاڤكرن پێكدهێن ژ هه‌ر ئێك ژ.
– دڤێت ژیێ به‌برژێرى ژ 40 سالیێ و ژه‌هل بیت.
– ئاكنجیێ هه‌رێما كوردستانێ – عیراق بیت.
– ل هه‌موو مافێن مه‌ده‌نى و سیاسى به‌هره‌دار بیت.
– تاوانبار نه‌بیت ب چوو تاوانێن دژى شه‌ره‌فێ و به‌رژه‌وه‌ندیێن گه‌لێ كوردستانێ.

ئه‌ڤرۆ نیوز ، هلورى:
ل گوره‌ى ئه‌و ده‌ما كو كومسیوونا بلند یا هه‌لبژاردن و راپرسیێ بو توماركرنا به‌ربژێرێن پوستێ سه‌روكاتیا هه‌رێما كوردستانێ دانایى ، ئه‌ڤرۆ دێ ب دوماهى هێت ، به‌لێ دهێته‌ چاڤه‌رێكرن كو ده‌ما وێ ب هێته‌ درێژكرن.
ل گوره‌ى ئه‌وان زانیاریێن كو ئه‌ڤرۆ نیوز ده‌ستخوڤه‌ ئینایى بتنێ وه‌لاتیه‌كێ ناڤێ خوه‌ بو وه‌رگرتنا پوستێ سه‌روكاتیا هه‌رێمێ توماركریه‌ و ئه‌و ژى ب شاشى هاتیه‌ توماركرن ، و ئه‌ڤرۆ بریاره‌ كو جڤاتا كومسیوونێ كوم بیت و دهێته‌ چاڤه‌رێكرن كو ده‌ما خوه‌ به‌ربژێركرنێ بهێته‌ درێژكرن.

دهێته‌ چاڤه‌رێكرن كو د هه‌یڤا 11 دا دێ هه‌لبژاردنێن سه‌روكاتیا هه‌رێما كوردستان و په‌رله‌مانێ كوردستانێ هێنه‌ ئه‌نجامدان.

ئه‌ڤرۆ نیوز:
ھێرۆ ئیبراھیم ئەحمەد ئەنداما مەکتەبا سیاسی یا ئێکه‌تییا نیشتمانی یا کوردستانێ ل دۆر دامەزراندنا سەرکردایەتییا سیاسی یا کوردستان – ئیراق رۆنکرنه‌ك به‌لاڤ كر و تێدا دامه‌زراندنا سه‌ركردایه‌تییا سیاسی یا كوردستان – ئیراق ره‌ت كر و ب شاشییه‌كا مه‌زن ل قه‌له‌م دا و گۆت ئه‌و ب چ ره‌نگه‌كی د گه‌ل دا نابیت.
هێرۆ دبێژیت:
جەماوەرێ گەلێ کوردستانێ یێ خۆڕاگر و قارەمان سه‌ره‌رای كو رێفراندۆم ل (٢٥/٩) هاته‌ ئه‌نجام دان، مەبەست ژ وی ڕیفراندۆمێ هه‌ر ئەو نەبوو کو بهێته‌ زانین گەلێ کورد چ دڤێت، بەڵکو دیارکرنا مافێ چاره‌نڤیسی و پێنگاڤێن به‌ره‌ڤ سه‌رخوه‌بوونێ بخوه‌ ڤه‌ دگرت.
هه‌روه‌سا دیار دكه‌ت: هه‌رچه‌نده‌ ھەموو دەوڵەتێن زلھێزێن دنیایێ وەک ئەمریکاو بریتانیاو فڕەنساو روسیا و چین و ئێكه‌تییا ئەوروپا و نەتەوەیێن ئێكگرتی و ته‌ڤایا وه‌لاتێن جیران خواست كو ئه‌و ریفراندۆم د وێ ره‌وشێ دا نه‌هێته‌ ئەنجام دان و ده‌مێ وێ نینه‌ و چەندین پێشنیاز و نەخشەرێ ئێخستە هه‌مبه‌ری مه‌، ئه‌وبوو سەرکردایەتییا ھەرێما کوردستان (د گه‌ل من بخوه‌ ژی) ئه‌م ب وان پێشنیاز و نەخشەرێیان رازی نه‌بووین و مه‌ ته‌حه‌دایا هه‌موویان كر.
ناڤهاتی خویا دكه‌ت ژی كو: دیاره‌ بڕیارا پێكئینانا سەرکردایەتییا سیاسی کوردستان-عێراق دهێته‌ دان، بێ ڤه‌گه‌ریان بۆ سەرکردایەتییا پارت و لایەنێن سیاسی یێن کوردستانێ بۆ ھەڵسەنگاندنێ و بڕیاردانێ ل سه‌ر وی مژارێ، له‌ورا ئه‌ز ب چ ره‌نگه‌كی د وێ سه‌ركردایه‌تیێ دا نینم و نابم.

ئه‌ڤرۆ نیوز:
ئالتان تان، پەرلەمانتارێ ھەدەپێ ئیران و تورکیا و حکومەتا ئیراقێ ب دژوارترین رەنگ رەخنە کرن و گۆت: دەما ئەو بەحسا ئێکپارچەییا ئیراقێ دکەن ئەو ب رەنگەکێ گالتەجاری ڤە ل وان دنێریت.
ئالتان تانی ل پەرلەمانێ تورکیا گۆت: ئێکپارچەییا ئیراقێ ھەبوونا خوە نینە و دەمەکە یا پارچەکرییە، ھەرن سکۆتینا ژاپۆنی ژی بینن ھەکەر خوە پێکڤە گرت و بۆ ئێکپارچە بلا ئێکچارچە بیت.
وی پەرلەمانتارێ ھەدەپێ پێشنیاز كر كو باشترین چاره‌سه‌ری بۆ قۆناغا پشتی رێفراندۆما سه‌رخوه‌بوونا كوردستانێ “ده‌وله‌تا فێدرال یا كوردستانێ” یه‌ كو كورد و توركمان و عه‌ره‌ب پێكڤه‌ تێدا بژین.
ناڤهاتی بەحسێ داخویانیێن بەرپرسێن تورکیا ل سەر کەرکووکێ کر و گۆت: ئەز چەندین جاران چوویمە کەرکووکێ و ل هه‌می كولانێن وێ گه‌ریامه‌، لێ ئەوێن بەحسێ کەرکووکێ دکەن هه‌روه‌سا ئەوێن بەری وان، نە ل ڤی سەردەمی و نە ل سەر دەمێ سەدامی و نە ل سەردەمێ غازی سەرا وی باژاری نەدایە و چ ژێ نزانن بتنێ دئاخڤن، هوون بۆچی هه‌ما ژیانا خوه‌ نه‌چووینه‌ وێرێ؟
“بلا به‌رپرسێن ئاكه‌پێ و مه‌هه‌پێ بێژن كا چ چاره‌سه‌ری بۆ هه‌رێما كوردستانێ هه‌یه‌ و پرۆژه‌یێ خوه‌ پێشكێش بكه‌ن.”