ئەڤرۆ، نەوزاد ھلۆری:
د چارچوڤێ سەرەدانا خوە دا بۆ ئوسترالیا، سەرۆکێ تائیفەیا کلدانان ل عیراق و جیھانێ دیارکر کو ژ بەر شەر و ئالوزیێن ل عیراقێ ب تایبەتی ژ ترسا ھێزێن میلشیات ژمارا مەسیحیان ل عیراقێ 50% کێمبوویە، و ئەندامەکا پەرلەمانێ کوردستانێ یا مەسیحی ژی ددەتە دیارکرن کو ژمارا مەسیحیان ل کوردستانێ زێدە بوویە.
دوھی لویس ساکۆ سەرۆکێ تائیفەیا کلدانان ل عیراق و جیھانێ د چارچوڤێ سەرەدانا خوە دا بۆ ئوسترالیا کو چاڤ ب ژمارەکا مەسیحیێن پەنابەرێن عیراقێ ل وی وەلاتی کەفت بوو، دیارکر کو ژمارا مەسیحیان ل عیراقێ بۆ 50% کێمبوویە و گۆت: “ھەر چەند چو سەرژمێریێن دروست ل بارا ژمارا روونشتڤانێن مەسیحی ل عیراقێ ل بەر دەست نینن”.
زێدەتر گۆت: “بەری نھا ژمارا مەسیحیان ل عیراقێ 4% بوویە، بەلێ نھا بوو 2% کێمبوویە، دیسان 100 خێزانێن مەسیحی ژ لایێ مافیا و میلشیاتان ھاتینە دەرکرن، ئەڤە د دەمەکێ دایە کو ژمارا مەسیحیان ل بەغدا ژ ملیۆن کەسان بۆ 200 ھزار کێمبوویە”.
ژ لایەکێ دی ڤە وەحیدا یاقوت ئەنداما پەرلەمانێ کوردستانێ و نوونەرا مەسیحیان بۆ ئەڤرۆ گۆت: “ھژمارا مەسیحیان ل عیراقێ رۆژ بۆ رۆژێ بەر ب کێمبوونە و ئەگەر ژی دزڤریت بۆ دەستدرێژیێن ھێزێن مێلشیاتێن مینا حەشد شەعبی و توندرەوان ل دەڤەرێن جودا یێن عیراقێ”.
زێدەتر گۆت: “ئەو مەسیحیێن کو ل دەڤەرێن عیراقێ بجە ھێلایی قەستا دەرڤەیی وەلاتی و کوردستانێ کریە، بەلێ د بەرامبەر دا ژمارا مەسیحیان ل کوردستانێ بەر ب زێدەبوونێ چوویە، پشتی کو ێزێن عیراقێ بۆ چەند دەڤەرەکێن مەسیحیان ل دەڤەرێن کوردستانیێن دەرڤەیی ئیدارا ھەرێما کوردستانێ ھاتی، دەستدرێژیێن وان ل سەر مەسیحیان زێدەتر بووینە، ئەڤ یەک ژی بوویە سەدەم کو پشکەک ژ وان بۆ ھەرێما کوردستانێ ئاوارە ببن”.
ل بارا رەوشا ژیانا مەسیحیان ل کوردستانێ وەحیدایێ گۆت: “مەسیحیان ل کوردستانێ چو مەترسی نینن و ئارام و دلخوشن، بەلێ پشکەک ژ ئاوارەیان پێدڤی ب ھەڤکاریان ھەیە ژ بەر کو مال و حالێن خوە بجە ھێلاینە”.
نيشاندان