ئه‌ڤرۆ نيوز:
سەرۆکێ لیژنا سامانێن سرۆشتی ل پەرلەمانێ کوردستانێ ئاشکرا کر کو ھەموو بزاڤ دھێنەکرن ئەڤ سالە بەرمیلەکا گازا سپی ل سەر وەلاتیان بھێتە بەلاڤکرن و گۆت: “ل رۆژێن داھاتی جڤاتا بلندا نەفت و غازێ ل ھەرێما کوردستانێ دێ ل دۆر ئەڤێ پرسێ کۆمبوونەکێ ئەنجامدەت”.
د. شێرکۆ جەودەت، سەرۆکێ لیژنا پیشەسازی و سامانێن سرۆشتی ل پەرلەمانێ کوردستانێ بۆ رۆژناما ئەڤرۆ دیار کر کو ل دەستپێکا سالا 2016ێ سەرۆکاتیا جڤاتا وەزیران ئاگەھداریا ئیدارێن پارێزگەھێن ھەرێما کوردستانێ کریە کو ئیدی حوکمەتێ شیان نینن گازا سپی ل سەر وەلاتیان بەلاڤ بکەت و داخواز ژ ئیدارێن پارێزگەھان کریە بزاڤان بۆ دابینکرنا گازێ بکەن و گۆت: “ل سالا بۆری چەندین بزاڤ بۆ بەلاڤکرنا گازێ ل ئیدارا سلێمانیێ ھاتنەکرن و شیان ھەتا رادەکی رێژەکا گازێ ب رێیا کەرتێ تایبەت ب دەستڤە بینن و ھەتا نوکە یا دھێتە بەلاڤکرن، ئانکو ھەر خێزانەکا پارێزگەھا سلێمانیێ دێ بەرمیلەکا گازێ وەرگریت، بەلێ بۆ پارێزگەھێن دی وەکو دھۆک و ھەولێرێ پێدڤیە ل سەر ئیدارێن وان پارێزگەھان بزاڤان بۆ ب دەستڤەئینانا گازێ بکەن”.
ناڤھاتی ئاماژە دا وێ چەندێ کو نوکە ئەو وەکو پەرلەمان و سەرۆکاتیا جڤاتا وەزیران ژی ژ ئالیێ خوەڤە یێ بزاڤان دکەن بۆ زڤستانا ئەڤ سالە بەرمیلەکا گازا سپی ل سەر وەلاتیان بەلاڤ بکەن و گۆت: “بڕیارە ل چەند رۆژێن داھاتی جڤاتا بلندا نەفت و غازێ ل ھەرێما کوردستانێ ل دۆر پرسا بەلاڤکرنا گازا سپی کۆمبیت و رێیەکێ بۆ بەلاڤکرنا گازا سپی ل سەر وەلاتیان ببینیت، چونکی پەترۆل یا ھەی و دشێن بدەنە پارزینگەھێن کەلەک و بازیان یان ژی ھندەکێ ژ دەرڤە بینن و بەلاڤ بکەن”.

ئه‌ڤرۆ نیوز ، نه‌وزاد هلۆرى:

ترسا فرۆكێن توركیا و شه‌هیدكرنا خه‌لكێ ده‌ڤه‌رێ بویه‌ سه‌ده‌م كو هژماره‌كا زور یا وه‌لاتیێن سنوورێ ناحیا شێلادزێ و دێره‌لوك نه‌كارن قه‌ستا سه‌ر گوندێن خوه‌ بكه‌ن ل ده‌ڤه‌را نێروه‌ورێكان ب تایبه‌تى بو چنینا ترى ، ئه‌ڤ یه‌ك بویه‌ سه‌ده‌م كو ئه‌ڤ ساله‌ تریێ وان هه‌موو پیچ ببیت و زیانێن زور ب وان بگه‌هن.

دڤى واریدا” لوقمان عه‌لى ” وه‌لاتیه‌كێ دێره‌لوكێ یه‌ دیاركر كو ئه‌وى ئه‌ڤ ساله‌ نه‌شیا بچیته‌ تریێ خوه‌ و بۆ ئه‌ڤرۆ نیوز گۆت: (هه‌موو سالان دڤى ده‌مى دا تریێ مه‌ ل گوندێن ده‌ڤه‌را نێروه‌ و رێكان دهێته‌ به‌رى و ئه‌م ژى دئینین مال و دفروشین به‌لى ئه‌ڤ ساله‌ ژ به‌ر ترسا فروكا و به‌رده‌وامبوونا بوردومانێن وان مه‌ نه‌شیا بچینه‌ تریێ خوه‌ و هه‌موو پێڤه‌ پیچ بو و گیانه‌وه‌ران خوار)

زێده‌تر گۆت: ( هزاران ره‌زێن ترى ل ده‌ڤه‌را نێروه‌ورێكان هه‌نه‌ و مه‌ بخوه‌ ره‌زه‌كێ مه‌زن یێ ترى هه‌یه‌ كو سالانه‌ نێزیكێ 300 سندوقێن ترى ژێ دهێته‌ به‌رهه‌مئینان ، هنده‌ك ژ ره‌زڤانان گیانێ خوه‌ ئێخستیه‌ مه‌ترسێ و هه‌ند شیاینه‌ پشكه‌ك ژ تریێ خوه‌ بكه‌ن مێویژ، و ڤێ یه‌كێ زیانێن زور مه‌زن ب ره‌زڤان و جوتیاران گه‌هاندینه‌ ژبه‌ركو پشكه‌ك ژ داهاتیێ ئه‌وان گوندان لسه‌ر ره‌ز و كه‌رسته‌یێن چیایى یه‌)

یوسف رێكانى ئه‌و ژى وه‌لاتیه‌كێ شێلادزێ یه‌ لسه‌ر بابه‌تى گۆت: ( ئه‌گه‌ر ده‌ڤه‌را نێروه‌ورێكان ده‌ڤه‌ره‌ك ئارام بیت و فروكه‌ بێهنا خه‌لكى ته‌نگ نه‌كه‌ن ، دێ ئه‌و ده‌ڤه‌ر بیته‌ ئێك ژ ده‌ڤه‌رێن هه‌رى بناڤ و ده‌نگ بو هه‌بوونا هه‌موو جوره‌ به‌رهه‌مێن هاڤینى و زستانى و كه‌رسته‌یێن چیایى ، به‌لێ ژ ئه‌گه‌را فروكێن توركیا و هه‌بوونا په‌كه‌كێ به‌رده‌وام ده‌ڤه‌ر د مه‌ترسیێ دایه‌ و زیانێن زور ب وه‌لاتیان دكه‌ڤن ، دنهادا كو وه‌ختێ تریه‌ و چه‌ندان ره‌زێن ترى و به‌رهه‌مێن دن هه‌نه‌ ، هه‌موو هاتنه‌ به‌رده‌وان و پیچ بوون)

ژلایه‌كێ دنڤه‌ “جه‌لال عه‌بدوللا” وه‌كو ئێك ژ بكرێن كه‌رسته‌یێن چیایى و ره‌ز و بیستانان ل بازارێ شێلادزێ بو ئه‌ڤرۆ نیوز گۆت: (ئه‌ڤ ساله‌ تریێ ده‌ڤه‌را نێروه‌ورێكان ناهێته‌ بازارێن شێلادزێ و هه‌كه‌ بهێـ ژى زور ب كێمى دهێت ، و ئه‌و تریێ كو نها دهێته‌ بازارى ل ده‌ڤه‌رێن زێبار و به‌رێ گارێ دهێت و ب شێوه‌یه‌كێ گشتى نها رۆژانه‌ نێزیكێ 50 سندوقێن ترى دگه‌هنه‌ بازارێن شێلادزێ و هه‌موو ژى تریێ خومالى یه‌ )

زێده‌تر گۆت: ( ئه‌ڤ ساله‌ بهایێ ترى ئه‌رزانتره‌ و ئه‌گه‌ر ژى دزڤریت بو قه‌یرانا دارایى ، و نها تریێ ده‌ڤه‌را نێروه‌ورێكان زور ب كێمى دگه‌هیته‌ بازارى و پتر بو چێكرنا مێویژان دهێته‌ بكارئینان ، ئه‌ڤێ یه‌كێ ژى زیانێن زور ب جوتیار و ره‌زڤانان گه‌هاندیه‌ )

ده‌ڤه‌را نێروه‌ورێكان نێزیكێ 102 گوندان بخوڤه‌ دگریت و هه‌موو ژى دكه‌ڤنه‌ ژێرده‌ستهه‌لاتا په‌كه‌كێ و ئه‌ڤ یه‌ك ژى بویه‌ سه‌ده‌م كو فرۆكێن توركیا به‌رده‌وام بوردومانا ده‌ڤه‌رێ بكه‌ن و زیانێن گیانى و ماددى به‌ر وه‌لاتیان بكه‌ڤن.