ئەڤرۆ نیوز ، نەوزاد ھلۆری:
دەمەک بەریا نھا نێچیرڤان بارزانی سەرۆکێ حکومەتا ھەرێما کوردستانێ ل بنگەھێ سەرێ بلند یێ دەنگدانێ ل گەل خێزانا خوە نەبیلا مەسعود بارزانی و کورێ خوە ئیدریس نێچیرڤان بارزانی و ھەر سێ زاروکێن خوەیێن دن دەنگێ خوە دا ، و د کونگرەیەکێ رۆژنامەڤانی دا دیارکر کو ئەڤرۆ رۆژەکا دیروکی یە بو گەلێ کوردستانێ.
نێچیرڤان بارزانی سەرۆکی َحکومەتا ھەرێما کوردستانێ د کونگرەیەکێ رۆژنامەڤانی دا گۆت: ( گەلێ کوردستانێ دڤێت ب شێوەیەکێ دیموکراسی چارەنڤیسێ خوە دیار بکەت و ریفراندۆم بو وێ یەکێ ژی نینە کو روژا دوڤدا دەولەتا خوە دیار بکەین و سنوران ژی دیار بکەین ، بەلکو مە دڤێت ئیرادا گەلێ خوە نیشا جیھانێ بدەین و د پشترا دانوستاندنان ل گەل بەغدا بکەین ، و عیراقێ مافێن دەستووری پێشیلکرن ، و ھەردوو ئالایێن عیراق و کوردستان دێ ھەر بلندکری مبینن ل ھەرێمێ )
زێدەتر گۆت: ( چەند سالە مە بو عیراق و جیھانێ دیارکر کو ئەم فاکتەرێ ئەمن و ئاسایشا جیرانان و بەغداینە و پەیاما بو بەغدا ئەوە کو ب شێوەیەکێ ئاشیانە و بێی توندوتیژی دانوستاندن بکەین)
نێچیرڤان بارزانی دیارکر ژی کو تورکیا ھەردەم ھەڤکاریا ھەرێما کوردستانێ کریە د رۆژێن نەخوشدا و دێ ئەم پەیوەندیێن خوە باشتر ژی کەین و گۆت: (ریفراندۆما ھەرێما کوردستانێ مەترس و ھەرەشە نینە بو تورکیا و دەولەتێن جیرانێن دن بەلکو بتنێ ئەوە کو مە ل عیراقێ مەعنەویاتێن نەرێنی ھەنە ، و پەیوەندیێن مە ل گەل تورکیا د بەردەوامن و مە دڤێت دوپات ژی بکەین کو تورکیا دوستەکێ ژ کوردان باشتر نابینیت بخوە ، و ئەوا کو بومە یا روون نینە ئەوە کو ئەم زانین بوچی ریفراندۆما ھەرێما کوردستانێ ھەرەشەیە بو دەوروبەران )
بارزانی د درێژاھیا ئاخفتنێ، خودا دیارکر ژی کو گرتنا فروکخانان ژلایێ عیراقێ سزایەکێ گشتی بوو ، بو خەلکێ کوردستانێ و گوت: ( فروکخانێن کوردستانێ ئەو فروکخانەبوون کو ئاوارێن عیراقێ تێدا ھاتینە ھەرێما کوردستانێ ، دەرگەھێن سنووریێن ھەرێما کوردستانێ ھەموو د ڤەکرینە
دیارکر ژی کو ئەو گرێبەستێن کو ھەرێما کوردستانێ ل بارا پەترۆلێ کری دی َوەکو خوە مینن و
ل بارا کەرکوکێ ژی گۆت: ( ئەگەر پێشمەرگە نەبایە دا حالێ کەرکوکی َوەکو یێ موسل بیت ، و پێشمەرگەیان کەرکوک ب ھەموو پێکھاتەیێن خوەیێن نەتەوەیی و ئاینی ڤە پاراست و دێ بەردەوام ژی بیت ل سەر پاراستنا وان ، و سنوورێن کەرکوک ژی دێ ب دانوستاند ھێنە ئێکلایکرن )

ئەڤرۆ نیوز:
دەمەک بەریا نھا رێکخەرێ گشتیێ تەڤگەرا گۆڕان ل ئێک ژ بنگەھێن دەنگدانێ ل سلێمانیێ دەنگێ خوە دا و د کونگرەیەکێ رۆژنامەڤانی دا دیارکر کو دەنگێ وی ب بەلێ بوو.
عومەرێ سەید عەلی نھا رێکخەرێ گشتیێ تەڤگەرا گۆڕان پشتی کو دەنگێ خوە دای د کونگرەیەکێ رۆژنامەڤانی دا گۆت: (ئەم ھیڤیدارین کو دەنگێن مە ھەمووان بو سەربخوەی یا کوردستانێ بیت و مەژی وەکو ھەمووان ب بەلێ دەنگێ خوە دا)

مەلا بەخیتار : جیرانیا ھەرێما کوردستانێ دێ باشتر بيت ل طةل توركيا
ئەڤرۆ نیوز:
ئەڤرۆ سپێدێ مەلا بەخیتار بەرپرسێ دەستەیا کارگێری یا مەکتەبا سیاسیا ئێکەتیا نیشتمانیا کوردستانێ ل ئێک ژ بنگەھێن دەنگدانێ ل سلێمانیێ دەنگی َخوە دا و د کونگرەیەکێ رۆژنامەڤانی دا دیارکر کو ھەرێما کوردستانێ نابیتە ھەرەشە و ئاژاوەگێری بو تورکیا بەلکو دێ سەردەمێ حوکمرانیا فیدرالی یا ھەرێما کوردستانێ دێ باشتر بیت و دکارین لھەموو رویان ڤە باشتر پێکڤە بژین ، ئەڤە وەکو بەرسڤەک بو وان دەنگویێن کو کومارا تورکیادا ل بارا ھەرێما کوردستانێ بەلاڤکری کو دێ بیتە ئەگەرا ئاژەوە و مەترسیێ ل دەڤەرێ و ئ دێ ئەوان بەرسڤا خوە ھەبیت)
مەلا بەختیاری دیارکر ژی کو ئەوا دبیتە مەترسی ل دەڤەری َنەبوونا ئازادی و دیموکراسیێ یە)

ئەڤرۆ نیوز، نەوزاد ھلوری:
دەمەکى بەریا نھا ل دەمژمێر ل ده‌مژمێر 8:00ى سپێدێ سندوقێن دەنگدانێ بەرامبەر دەنگدەرێن ھەرێما کوردستان و دەڤەرێن كوردستانى يێن ده‌رڤه‌ى ئيدارا ھەرێما کوردستانێ دەستپێکر و بڕیاره‌ ھەتا دەمژمێر ٦:٠٠ێ ئێڤاری یا بەردەوام بیت.
عه‌لى بەندی رێڤەربەرێ گستيێ کومسیوونا بلندا سەربخوەی یا کوردستانێ ل دھۆکێ بو ئەڤرۆ نیوز گۆت: (ھەموو بەرھەڤی ھاتینەکرن و ئەڤرۆ ھەموو بنگەهـ ھاتینە ڤەکرن و ل گورەی ئەو بەرنامەیێ َکو ھاتیە دانان پرۆسە دێ ھەتا دەمژمێر 6:00ێ ئێڤاری یا بەردەوام بیت).
زێدەتر گۆت: (ل ھەموو سنورێ پارێزگەھا دھۆک 744 ھزار و 736 دەنگدەرێن گشتى و چار ھزار و 497 دەنگدەرێن تايبه‌ت ھەنە، 256 بنگەھێن دەنگدانێ و ھزار و575 وێستگەھێن دەنگدانێ ھاتینە دانان.

دناڤا 15 کەمپان ژی دا ھەموو بەرھەڤیێن دەنگدانێ ھاتینەکرن و ل ھەر کەمپەکێ ژی بنگەھەک یان دو بنگەهـ بهێنه‌ دانان و 175 ھزار و 24 ئاوارەیان مافێ دەنگدانێ د ناڤ کەمپان دا ھەیە و 140 ھزار و 155 ئاوارەیان ژی ل دەرڤەى کەمپان مافێ دەنگدانێ ھەیە و 24 بنگەھێن دەنگدانێ بو ئاوارەیان ل دەرڤەیێ کەمپان ھاتینە دانان).

ئەڤرۆ نیوز ، ھلوری:
نێچیرڤان بارزانی سەرۆکێ حکومەتا ھەرێما کوردستانێ پەیامەک بەلاڤکر و تێدا دیارکر کو دەنگێ ھەوە دێ ھێزەکا زێدەتر ب کوردستانێ دەت و بو ئایندەیەکێ باشتر بو خوە و نەڤێن خوە بێژن بەلێ بو سەربخوەی یا کوردستانێ

ئەڤا ل خوارێ دەقا وێ یە

کوردستانیێن خوشتڤی
سوبەھی ٢٥ ئیلونێ رۆژا ریفراندۆم بو سەربخوەی یا کوردستانێ یە ، رۆژا دیارکرنا چارەنڤسی یە و رۆژا بریاردانێ یە ل ئایندەیەکێ باشتر بو ھەوە و نەڤیێن ھەوە ، رۆژا پێنگاڤ ھاڤێتنێ یە بەر ب دەستڤەئینانا خەونا ھزاران شەھید و ئەنفال و کێمیاباران و رەڤاندنیان ، روژا سەرئێخستنا کوردستان و گەلێ کوردستانێ یە ب ھەموو پێکھاتەیێن نەتەوەیی و ئاینی ڤە ، رۆژا بجھکرنا ئەرکێن نیشتمانی و نەتەوەیی یە ، روژەکە دڤێت تێدا ھەموو ناکوکیی و ململانێ و نیگەرانیێن خوە بدەینە لایەکێ و ب گەرما و گەرم بچنە سەر سندوقێن دەنگدانێ و بێژین بەلێ بو سەربخوەی یا کوردستانێ.

کوردستانیێن ھێژا
سوبەھی ھەتاکو پشکداری و دەنگێ بەلێ یا ھەوە ل ریفراندۆمێ بو سەربخوەیێ زێدەتر بیت ، دێ ھێزەکا زێدەتر ب کوردستانێ دەتن و گەرنتیەکا مەزنتر بو ب دەستڤەئینانا ماف و درۆستکرنا کوردستانەکا سەربخوەی ب ھێز دەست ڤە ئینیت ، ژ بەرڤێ بلا ئەم ھەموو سوبەھی پێکڤە ب بەرپرسیارانە ، و ب ئارامی و ل کەش و ھەوایەکێ شارستانی و ئازاد و دیموکراسی دا بێژین بەلێ بو سەربخوەی یا کوردستانێ و بەلێ بو ژیان و ئانیدەیەکێ نوو و بەلێ بو پەیوەندیەکا دوستانە لگەل ھەڤسویان و جیھانێ.

ئەڤرۆ نیوز ، نەوزاد ھلوری:
وەکو پشتەڤانی ژ بوو ھوشیارکرنا دەنگدەران و پالدانا وان ژ بو دەنگدان لسەر ریفراندۆم بو سەربخوەی یا کوردستانی ئەڤ شەڤە و سوبەھی سپێدێ دێ تەکبیرات ل ھەموو مزگەفتێن سنوورێ پارێزگەھا دھۆک ھێنە لێدان.
دڤی واریدا مەلا دلشاد بێسکفی بەرپرسێ لژنا دھۆک یا ئێکەتیا زانایێن ئاینێ ئیسلامێ بۆ ئەڤرۆ نیوز گۆت: ( ژلایێ ئێکەتیا زانایێن ئاینێ ئیسلامێ ل کوردستانێ فەتوایەک وەکو بریار ھاتیە دەرکرن بو لێدانا تەکبیراتان ل ھەموو مزگەفتێن کوردستانێ ، و مەژی ھەموو مزگەفتێن سنوورێ پارێزگەھا دھوکێ ئاگەھدارکرینە کو ب رێیا بلندگویان ئەڤ شەڤە و سوبەھی سپێدێ دەمژمێر ٨:٠٠ ل گەل ڤەکرنا دەرگەھێن سندوقێن دەنگدانێ تەکبیراتێن اللە اکبر ، اللە اکبر ، لا الە الا اللە ، اللە اکبر ، اللە اکبر ، واللە الحمد بھێنە بلندکرن )
زێدەتر گۆت : ( ل گورەی شەریعەتێ ئیسلامێ درۆستە کو ژ بوو خوشیان تەکبیران بھێنە بلندکرن ، بو مە وەکو گەلێ کوردستانێ خوشترین رۆژ سەربخوەی بوونە ، و مزگەفت ھەر ژ دەستپێکا ھەوبونا خوە ھەتا نھا روولەکێ بەرچاڤ ھەبوویە د ھوشیارکرنا خەلکی دا و ھەر ب مەرەما ھوشیارکرنا خەلکی و وەکو ئەرکەکێ نیشتمانی مزگەفتێن مە دێ ب ئەرکێ ھوشیارکرنا خەلکی رابرن)